ᐃᑦᓴᓂᑕᕐᓂᐊᓂᕕᓂᖅ ᒪᓂᔭᐅᒪᔪᒥ ᑲᓇᑕᓕᒫᒥ ᑐᕐᓱᔫᕐᒥ ᒥᕐᖑᐃᓯᕕᐅᒐᔭᓐᖑᐊᑐᒥ, 2010 ᐊᐅᔭᖓᓐᓂ
ᑭᓇᒨᒻᒪ¯ᑦ Pierre Desrosiers
ᑕᓯᐅᔭᐅᑉ, ᐅᒥᐅᔭᐅᑉ ᓴᓂᐊᓃᑦᑑᑉ ᓄᓇᖓᑕ ᓴᓇᒻᒪᖓ, ᓄᓇᕕᒻᒦᑦᑐᓂ ᐱᐅᓂᕐᐹᓯᐊᒍᖃᑕᐅᕗᖅ. ᑖᕙᓐᓇ ᓄᓇᒃ ᐅᑭᐅᕐᑕᑐᒥᐅᓄᑦ ᐃᓄᓐᓄᑦ ᐊᓯᖏᓐᓄᓗ ᓯᕿᓂᕐᒥᐅᔭᕐᓄᑦ ᓇᔪᒐᐅᓯᒪᔪᖅ ᑕᐅᓴᓐᑎᐅᓈᕐᑎᑐᓂ ᐊᕐᕌᒍᕐᓂ. ᐅᑯᐊ ᐱᓇᓱᐊᓚᐅᔪᔪᑦ ᑖᕙᓂ: ᒍᐃᓕ ᖁᒫᓗᒃ (ᒪᙯᑦᑎ-ᒪᓕᒐᖅ), ᐊᓐᑦᔫ ᐸᐱᑲᑦᑐᖅ (ᐃᑦᓴᓂᑕᕐᓂᐊᑎᐅᑉ ᐃᑲᔪᕐᑎᖓ ᐊᕙᑕᕐᒥᐅᖅ) ᐊᒻᒪᓗ John Topping (ᔮᓐ ᑖᐱᖕ) (ᐃᑲᔪᕐᑎ), ᐊᖓᔪᕐᖄᓕᑦᑖᓱᑎᒃ Pierre M. Desrosiers-ᒥᒃ (ᐱᔦᕐ ᑎᕉᓯᔦᕐ) (ᐊᕙᑕᐅᑉ ᐃᑦᓴᓂᑕᕐᓂᐊᑎᖁᑎᖓ), ᑖᕙᑦᓱᒥᖓ ᓄᓇᒥᒃ ᐃᑦᓴᓂᑕᕐᓂᐊᓱᑎᒃ ᐅᓪᓗᓂ ᐊᕙᑎᓂ. ᓗᐃ ᑳᒡᓅ (ᑕᑯᔭᕐᑐᕕᓕᕆᔨ, ᐊᕙᑕᒃᑯᓂ) ᐊᒻᒪᓗ ᐋᓂ ᖃᓴᓪᓗᐊᖅ (ᑐᕐᓱᔫᑉ ᒥᕐᖑᐃᓯᕕᖓᑦᑕ ᑐᕐᖃᑕᕐᕕᖓ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓐᓂ) ᐅᓪᓗᓂ ᐃᑭᑦᑑᒐᓗᐊᓂ ᐃᓚᐅᓚᐅᔫᒃ ᐃᑦᓴᓂᑕᕐᓂᐊᑐᓂ. ᑖᓐᓇ ᖃᐅᔨᓴᕐᓂᖅ ᑮᓇᐅᔭᖃᕐᑎᑕᐅᓚᐅᔪᔪᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓐᓄᑦ ᐊᒻᒪᓗ ᓯᕗᓪᓕᑕ ᐃᓅᓯᕆᓚᐅᕐᑕᖏᑦ ᐊᑑᑎᓚᐅᕐᑕᖏᓪᓘᒻᒥᑦ (ᓄᓇᓖᑦ ᐃᓕᓐᓂᐊᕕᕐᔪᐊᓗ ᖃᐅᔨᓴᖃᑎᒌᓐᓂᖏᓐᓄᑦ). ᐊᒻᒪᓗᒋᐊᓪᓚᒃ, ᒪᕐᕉᒃ ᖃᐅᔨᓴᕐᑏᒃ, Dominque Marguerie (ᑕᒥᓃᒃ ᒫᑯᕇ) (ᐃᓕᓐᓂᐊᑎᑦᓯᔨᒻᒪᕆ Rennes ᐃᓕᓐᓂᐊᕕᕐᔪᐊᖓᓐᓂ) ᐊᒻᒪᓗ Stéphanie Steedland (ᔅᑎᐊᕙᓂ ᔅᑏᑦᓚᓐ) (ᓚᕚᓪ ᐃᓕᓐᓂᐊᕕᕐᔪᐊᖓᓂᑦ ᐃᓕᓐᓂᐊᕇᒍᑎᑖᕋᓱᐊᕐᑐᖅ), ᐃᓚᐅᓯᓚᐅᔪᒻᒥᔫᒃ ᐃᑦᓴᓂᑕᕐᓂᐊᑐᓄᑦ ᖃᐅᔨᓴᕆᐊᕐᑐᓱᑎᒃ ᖃᓄᖅ ᐃᓄᐃᑦ ᐊᑐᕐᐸᓂᕐᒪᖔᑕ ᑎᑦᔭᓗᕕᓂᕐᓂᒃ.
ᐃᑦᓴᓂᑕᕐᓂᐊᓗᐊᓐᖑᐊᓚᐅᔪᔪᑦ ᓇᔪᒐᐅᓚᐅᕐᑐᕕᓂᕐᒥᒃ HbFx-1-ᒍᓂᕋᕐᑕᒥᒃ, ᑖᕙᓐᓇ ᑕᓯᐅᔭᐅᑉ ᓯᕿᓂᖓᑕ ᐅᐊᓐᓂᖓᓃᑦᑐᖅ, ᑖᕙᓂᓗ ᐃᓪᓗᕈᐊᓕᐅᕈᒫᕐᓂᐊᓱᑎᒃ ᑐᑦᑕᕕᐅᒐᔭᕐᑐᓂᒃ ᒥᕐᖑᐃᓯᕕᓕᐊᕐᑐᓄᑦ. ᑖᕙᓐᓇ ᓄᓇᒃ ᑌᑦᓱᒪᓂᑕᕐᔪᐊᖅ ᓇᔪᕐᑕᐅᕙᑦᑐᕕᓂᐅᑦᓱᓂ ᐊᓪᓚᓄᑦ. ᐃᑦᓴᓂᑕᕐᓂᐊᕕᕕᓃᑦ ᑕᑯᕕᐅᔪᕕᓃᑦ ᐃᑭᑦᑐᓂᒃ ᐃᑦᓴᓂᕐᑕᓂᒃ, ᐃᓚᐅᑎᓪᓗᒋᑦ ᐱᖁᑏᑦ/ᓴᐸᙰᑦ, ᒪᕐᕋᓴᔭᐅᑦᓱᓂ ᓱᐴᕈᑎᐊᓗᕕᓂᖅ ᐊᒻᒪᓗ ᐃᓄᓕᕐᑕᐅᒐᑎᒃ ᓱᓇᑐᐃᓐᓀᑦ ᓂᐅᕐᕈᓭᔨᒃᑯᓂᑦ ᓂᐅᕕᐊᕆᔭᐅᕙᑦᑐᕕᓂᐅᑦᓱᑎᒃ.
ᐊᒻᒪᓗ, George Papp (ᔮᔨ ᐹᑉ) ᓂᐅᕐᕈᓭᕕᒋᓚᐅᕐᑕᕕᓂᖓ (HaGa-1)-ᒍᓂᕋᕐᑕᒦᑦᑐᖅ ᑕᑯᓂᐊᕐᑕᐅᓚᐅᔪᒻᒥᔪᖅ ᖃᐅᔨᓴᕐᑕᐅᒋᐊᕐᑐᓱᓂ ᑖᕙᓃᑦᑐᑦ ᐃᓪᓗᕈᐊᕕᓃᑦ ᐊᓐᓇᑐᐃᔭᐅᒍᓐᓇᒪᖔᑕ, ᒪᓂᔨᒍᑕᐅᒋᐊᕐᑐᓱᓂᓗ ᐊᑯᓃᕐᑐᒥᒃ ᖃᓄᕐᑑᒐᓱᐊᕐᓂᓄᑦ ᓴᐳᒻᒥᔭᐅᒋᐊᖃᕐᓂᖓᓄᑦ. ᒫᓐᓇᓯᐅᑏᑦ ᖃᓄᕐᑑᒍᑎᑐᐃᓐᓀᑦ ᐊᑑᑎᔭᐅᓚᐅᔪᒻᒥᔪᑦ ᐊᓐᓇᑐᐃᔭᐅᒐᓱᐊᕐᓂᓴᖏᓐᓄᑦ ᐆᑦᑑᑎᒋᓗᒍ ᐃᒐᓛᖏᑦ ᒪᑑᕐᑐᓗᒋᑦ ᖄᑦᓴᔮᓗᓐᓄᑦ ᒪᑭᑎᒋᐊᓪᓚᓗᒍᓗ ᑲᑕᒐᓕᕐᑐᖅ ᐃᓪᓗᕈᐊᕕᓂᖅ.
ᐃᑦᓴᓂᑕᕐᓂᐊᑏᑦ ᑕᑯᓂᐊᕆᐊᓪᓚᓚᐅᔪᒻᒥᔪᑦ ᓇᔪᒐᐅᓚᐅᕐᑐᕕᓂᕐᒥᒃ ᑕᓯᐅᔭᕐᒥ (HaGb-11-ᒍᓂᕋᕐᑕᒥ, ᓇᔪᕐᑕᕕᓂᐅᓂᐊᓐᖒᕆᔭᐅᑦᓱᓂ 1750-1759-ᓂ ᔩᓱᓯᖃᓕᕐᑎᓗᒍ ᐊᒻᒪᓗ 1921-1928?-ᓂ ᔩᓱᓯᖃᓚᕐᑎᓗᒍ), ᓄᐊᑦᓯᒋᐊᕐᑐᓱᑎᒃ ᐃᑦᓴᓂᑕᕐᓂᒃ ᓄᓇᓃᑦᑐᓂᒃ ᓱᔪᓯᒪᓕᕐᑐᓂ ᓯᑦᔭᐅᑉ ᓴᓂᐊᓃᑦᑐᓂᒃ. ᓇᔪᒐᐅᓚᐅᕐᑐᕕᓂᖅ ᐱᐅᓂᕐᓴᒥᒃ ᓄᓇᓐᖑᐊᓕᐅᕐᑕᐅᓚᐅᔪᔪᖅ, ᓇᓗᓀᕐᓯᓯᐊᓚᕿᑎᓪᓗᒋᑦ ᓄᓇᐅᔪᒥᒃ ᑕᑯᔭᐅᓚᐅᕐᓯᒪᓐᖏᑐᓂᒃ ᐃᓪᓗᕈᐊᒍᓚᐅᕐᑐᕕᓂᕐᓂᒃ (ᑖᒃᑯᐊ ᐊᓪᓚᑕᐅᒪᓐᖏᑐᑦ 2004-ᒥ ᖃᐅᔨᓴᐅᑎᕕᓂᕐᓂ) ᑕᑯᔭᐅᓚᕿᑎᓪᓗᒋᑦ 1920-ᒥᓂᑌᑦ ᐃᓪᓗᕈᐊᕕᓃᑦ. ᑖᒃᑯᐊ ᖃᐅᔨᔭᐅᕐᖃᒦᑦ ᐃᓚᖃᕐᑐᑦ ᓇᓃᓪᓗᑐᕐᓂᖓᓂᒃ ᐅᓯᖏᐊᕐᕕᕕᓃᑦ ᐃᓚᖓᑦ.
ᑭᖑᓪᓕᐹᒥ, ᐊᑯᓃᑦᔭᖏᑦᑐᓂᒃ ᖃᐅᔨᓴᕐᓂᖃᓚᐅᔪᔪᖅ ᓄᓇᒥ ᕿᓐᓄᐊᔪᐊᒥ (HaGb-7)-ᒍᓂᕋᕐᑕᒥ ᐊᒻᒪᓗ Gulf Hazard 1-ᒥ (HaGd-4)-ᒍᓂᕋᕐᑕᒥ ᐃᓄᑐᐃᓐᓇᓗᑐᕐᖄᕕᓃᑦ ᓇᔪᓚᐅᕐᑕᕕᓂᖏᓐᓂᒃ. ᑖᓐᓇ ᖃᐅᔨᓴᕐᓂᐅᓚᐅᔪᔪᖅ ᐊᓪᓚᖁᑎᓕᐅᕐᑎᓯᓚᕿᓚᐅᔪᒻᒥᔪᖅ ᓄᑖᓂᒃ ᓇᔪᒐᐅᓚᐅᕐᑐᕕᓂᕐᓂᒃ ᑖᕙᓂᑦᓭᓇᖅ ᐃᓚᐅᑎᓪᓗᒍ ᐃᓄᑐᐃᓐᓇᓗᑐᕐᖄᕕᓃᑦ ᓇᔪᓚᐅᕐᑕᕕᓂᖓ ᐅᒥᐅᔭᐅᑉ ᒥᕝᕕᖓᑕ ᓴᓂᐊᓃᑦᑐᖅ.
ᖃᐅᔨᓴᕐᑐᐃᑦ 2010 ᐊᐅᔭᖓᓐᓂ, ᓴᐅᒥᐊᓂᑦ ᑕᓕᕐᐱᐊᓄᑦ: ᔮᓐ, ᒍᐃᓕ, ᐱᔦᕐ, ᐊᓐᑦᔫ ᐊᒻᒪᓗ ᔅᑎᐊᕙᓂ.
© Stéphanie Steelandt
ᒍᐃᓕ ᐊᒻᒪᓗ ᔮᓐ ᓴᒡᒐᑑᒃ ᐃᑦᓴᓂᑕᕐᓂᐊᕕᐅᓚᖓᔪᓂᒃ HvFx-1-ᒍᓂᕋᕐᑕᒥ ᓇᔪᒐᐅᓚᐅᕐᑐᕕᓂᕐᒥ, 2010 ᐊᐅᔭᖓᓐᓂ.
© ᐱᔦᕐ ᑎᕉᓯᔦᕐ.
ᓱᑲᑦᑐᒥᒃ ᓱᔪᑉᐸᓕᐊᓂᖓ (2004 ᐊᐅᔭᖓᓐᓂᑦ 2010) ᐊᐅᔭᖓᓐᓄᑦ ᓂᐅᕐᕈᓯᕐᕕᐅᓚᐅᕐᑐᕕᓂᐅᑉ, ᔮᔨ ᐹᑉ ᓇᔪᒐᒋᓚᐅᕐᑕᕕᓂᖓᓂ HaGa-1-ᒍᓂᕋᕐᑕᒥ.
© ᐱᔦᕐ ᑎᕉᓯᔦᕐ.
ᒫᓐᓇᓯᐅᑏᑦ ᖃᓄᕐᑑᕋᓱᐊᕈᑏᑦ ᐊᓐᓇᑐᐃᒐᓱᐊᕐᓂᒧᑦ ᓂᐅᕐᕈᓯᕐᕕᐅᓚᐅᕐᑐᕕᓂᕐᒥᒃ, 2010 ᐊᐅᔭᖓᓐᓂ, ᔮᔨ ᐹᑉ ᓇᔪᓚᐅᕐᑕᕕᓂᖓᓂ HaGa-1-ᒍᓂᕋᕐᑕᒥ.
© ᐱᔦᕐ ᑎᕉᓯᔦᕐ.
ᐳᓪᓚᐅᔭᐅᓚᐅᕐᑐᕕᓂᖅ ᓯᑦᔭᒦᑦᑐᖅ, ᑕᓯᐊᔭᐅᑉ ᓂᐅᕐᕈᓯᕐᕕᒋᓚᐅᕐᑕᕕᓂᖓᓂ HaGb-11-ᒍᓂᕋᕐᑕᒥ, 2010 ᐊᐅᔭᖓᓐᓂ.
© ᐊᓐᑦᔫ ᐸᐱᑲᑦᑐᖅ.
ᐱᔦᕐ ᐊᒻᒪᓗ ᐊᓐᑦᔫ ᕿᒥᕐᕈᔫᒃ ᐃᓄᑐᐃᓐᓇᖄᕕᓂᑦ ᖃᕐᒪᒋᓚᐅᕐᑕᕕᓂᖓᓂᒃ Gulf Hazard 1 ᓴᓂᐊᓂ (HaGd-4)-ᒍᓂᕋᕐᑕᒥ, 2010 ᐊᐅᔭᖓᓐᓂ. ᐊᑦᔨᓕᐅᕆᔪᕕᓂᖅ Séphanie Steedland.
© Stéphanie Steelandt
