• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᓇᔪᒐᐅᓚᐅᕐᑐᕕᓂᖅ ᖃᔭᕐᑕᓕᒃ ᐃᓚᒋᓕᐅᑎᑎᑕᐅᔪᖅ ᓀᑦᑑᓱᓂ ᓄᓀᑦ ᐊᑎᖁᑎᖃᐅᑎᖓᓄᑦ ᒪᓂᔭᕕᓂᐅᑦᓱᓂ ᑲᓇᑕᐅᑉ ᑲᕙᒪᖓᓄᑦ UNESCO-ᒥ World Heritage Sites-ᒧᑦ

ᒧᓐᑐᔨᐊ, ᐋᕐᔪᓕᐅᑦ 22, 2017 – Tᓇᔪᒐᐅᓚᐅᕐᑐᕕᓂᖅ ᖃᔭᕐᑕᓕᒃ ᐃᓚᒋᔭᐅᕗᖅ ᓯᑕᒪᐅᔪᕐᑐᓄᑦ ᓄᑖᓄᑦ ᓇᔪᒐᐅᓚᐅᕐᑐᕕᓂᕐᓄᑦ ᐃᓚᒋᓕᐅᑎᑎᑕᕕᓂᐅᑦᓱᓂ ᓀᑦᑑᓱᓂ ᓄᓀᑦ ᐊᑎᖁᑎᖃᐅᑎᖓᓄᑦ ᒪᓂᔭᕕᓂᐅᑦᓱᓂ ᑲᓇᑕᐅᑉ ᑲᕙᒪᖓᓄᑦ UNESCO-ᒥ World Heritage Sites-ᒧᑦ. ᑕᒪᓐᓇ ᑐᓴᕐᑎᓯᒍᑎᐅᓚᐅᔪᔪᖅ ᐋᕐᔪᓕᐅᑦ 20-ᒥ Catherine McKenna-ᒧᑦ, ᑖᓐᓇᓗ ᑲᓇᑕᒥ ᐊᕙᑎᓕᕆᔨᓄᑦ ᓯᓚᐅᓪᓗ ᐊᓯᑦᔨᐸᓪᓕᐊᓂᖓᓄᑦ ᑐᕐᖃᑕᕐᕕᐅᓱᓂ.

ᖃᔭᕐᑕᓕᐅᑉ ᐃᓚᒋᓕᐅᑎᑎᑕᐅᒐᓱᐊᕐᓂᖓ ᐊᕙᑕᖅ ᐱᐅᓯᑐᖃᓕᕆᕕᒧᑦ ᐊᑐᐃᓐᓇᕈᕐᑎᑕᕕᓂᐅᕗᖅ ᑐᓂᑦᓱᒍᓗ ᑲᕙᒪᒃᑯᓄᑦ. ᐊᕙᑕᖅ ᐱᐅᓯᑐᖃᓕᕆᕕᒃ ᑎᓕᐅᕐᑕᐅᒪᐅᑎᖃᕐᐳᖅ ᓴᐳᒻᒥᓯᒪᖁᔭᐅᑦᓱᓂ ᐱᕙᓪᓕᐊᑎᑦᓯᖁᔭᐅᑦᓱᓂᓗ ᓄᓇᕕᒻᒥᐅᑦ ᐃᓄᐃᑦ ᐱᐅᓯᑐᖃᖓᓂᒃ ᑯᐯᒻᒥ. ᐊᕐᕌᒍᐃᑦ ᐊᕙᑏᑦ ᐅᖓᑖᓄᑦ ᐊᕙᑕᖅ ᐱᐅᓯᑐᖃᓕᕆᕕᒃ ᐃᒻᒥᓂᒃ ᑐᓂᓯᒪᓪᓚᕆᑦᓱᓂ ᐊᔪᐃᓐᓇᓯᒪᕗᖅ ᖃᐅᔨᓴᕐᑕᐅᑎᑦᓯᓂᕐᒥᒃ, ᐃᓕᑕᕐᓯᔭᐅᑎᑦᓯᓂᕐᒥᒃ ᐱᕙᓪᓕᐊᔭᐅᑎᑦᓯᓂᕐᒥᓗ ᐊᑯᓃᕐᑐᑎᒍᑦ ᓴᐳᒻᒥᔭᐅᒍᑎᑦᓴᖓᓂᒃ ᐸᕐᓀᓱᑎᒃ ᖃᔭᕐᑕᓕᒻᒥᒃ.

ᖃᔭᕐᑕᓕᒃ ᑲᓇᑕᓕᒫᒥ ᑖᓐᓇᑑᑦᔭᖏᓪᓚᖅ ᓇᔪᒐᐅᓚᐅᕐᑐᕕᓂᐅᑦᓱᓂ ᑕᕐᕋᕙᓯᒻᒥ ᐅᔭᕋᐅᑦᓱᓂ ᑕᑯᒥᓇᕐᑐᓕᐅᕐᕕᐅᓚᐅᕐᑐᕕᓂᐅᑦᓱᓂ, ᑭᓯᐊᓂ ᓄᓇᕐᔪᐊᓕᒫᒥ ᐊᑦᔨᖃᓐᖏᓗᑐᑦᓯᐊᑐᖅ. ᑕᑯᔭᐅᓲᑦ ᑖᕙᓃᑦᑐᑦ ᑮᓇᓐᖑᐊᑦ 180-ᐅᕗᑦ ᐊᔭᕋᕐᓂ ᑮᓇᓐᖑᐊᓕᐊᕆᓯᒪᑦᓱᑎᒃ, ᐆᑦᑑᑎᒋᔭᐅᑦᓱᑎᓗ ᑐᓃᑦ ᓴᓇᑐᔪᐊᓘᑦᓱᑎᒃ ᑕᑯᒥᓇᕐᑐᓂᒃ ᓴᓇᓐᖑᐊᓲᒍᓐᓂᒪᑕ. ᖃᔭᕐᑕᓕᒃ ᐱᐅᔪᓪᓗᑐᐊᓘᕗᖅ ᐃᓄᐃᑦ ᐱᐅᓯᑐᖃᖓᓂᒃ ᑕᑯᔭᕐᑐᕕᐅᕙᓪᓗᓲᖑᑦᓱᓂ ᑐᓃᑦ “ᑕᑯᒥᓇᕐᑐᓕᐅᕐᑏᑦ” ᐃᓱᒪᒋᔭᒥᓂᒃ ᓄᐃᑦᓯᕙᓐᓂᒪᑕ ᐅᔭᕌᓘᑉ ᖄᑐᐃᓐᓇᖓᓂ ᑮᓇᓐᖑᐊᓂᒃ ᓴᓇᕙᑦᑐᕕᓂᐅᒻᒪᑕ, ᓄᓇᕐᔪᐊᑉ ᐱᐅᓯᕆᒐᔭᓐᖑᐊᑕᖓᓂᒃ ᑕᑯᔭᐅᑎᑦᓯᒐᓱᐊᕐᓱᑎᒃ - ᑕᑯᓐᓇᖑᐊᕐᓂᕕᓂᖓ ᐃᒻᒪᖄ ᐱᑐᑦᓯᒪᔪᖅ ᑐᓃᑦ ᑕᕐᓂᒥᑎᒍᑦ ᐱᓇᓱᐊᓲᕕᓂᖏᓐᓄᑦ, ᐊᒻᒪᓗ ᐃᓄᑐᐃᓐᓇᖄᕕᓃᑦ ᐊᖓᒃᑯᖏᓐᓄᑦ. ᑐᓃᑦ ᐃᓅᓚᐅᕐᑐᕕᓂᐅᕗᑦ ᓄᓇᕕᐅᑉ ᓯᑦᔭᖏᓐᓂ ᐊᕐᕌᒍᐃᑦ 2,200-ᓂᑦ 1,000-ᓄᑦ ᐊᑯᓐᓂᖏᓐᓂ. ᐊᓯᐅᑐᐃᓐᓇᓚᐅᕐᓂᕕᓂᖏᑦ ᐃᓄᑐᐃᓐᓀᑦ ᑎᑭᓐᖏᓂᖏᓐᓂ ᐊᕐᕌᒍᐃᑦ 800-ᒐᓓᑦ ᓈᓕᕐᑎᓗᒋᑦ ᐅᓪᓗᒥ ᐁᕙᐅᑎᐅᖏᓐᓈᐸᑦᑐᑦ. 100-ᒍᓈᕐᑎᑐᓂ ᐊᕐᕌᒍᕐᓂ ᐃᓄᐃᑦ ᐳᓛᕆᐊᓗᑭᓯᒪᔪᑦ ᖃᔭᕐᑕᓕᒻᒥᒃ ᖁᓪᓕᓴᔦᑐᕐᓱᑎᒃ, ᑖᓐᓇᓗ ᖁᓪᓕᓴᖅ ᖁᓪᓕᓕᐊᕆᔭᐅᕙᑦᑐᕕᓂᐅᑦᓱᓂ, ᓴᓇᓐᖑᐊᑕᐅᕙᑦᑐᕕᓂᐅᑦᓱᓂ ᐱᐅᑎᓕᐊᖑᕙᑦᑐᕕᓂᐅᑦᓱᓂᓗ.

ᓇᔪᒐᐅᓚᐅᕐᑐᕕᓂᖅ ᕿᑭᕐᑖᓘᑉ ᑕᕐᕋᖓᑕ ᐅᐊᓐᓂᖓᓃᑉᐳᖅ ᑲᖏᕐᓱᐊᐱᒻᒦᓱᓂ ᖃᔭᕐᑕᓕᒻᒥ. ᕿᑭᕐᑖᓗᒃ ᐅᖓᓯᓐᓂᖃᕐᐳᖅ ᖁᓕᓄᑦ ᑭᓛᒥᑕᓄᑦ ᑯᐯᑉ ᓯᑦᔭᖓᓂᑦ, ᐃᒻᒪᖄᓪᓗ 40-ᓄᑦ ᑭᓛᒥᑕᓄᑦ ᓯᕿᓂᐅᑉ ᓂᒡᒋᖓᓃᑦᓱᓂ ᑲᖏᕐᓱᔪᐊᕐᒥᑦ.

ᕿᑭᕐᑖᓗᒃ ᐃᓚᒋᔭᐅᕗᖅ ᓄᓇᕕᐅᑉ ᐃᒪᕐᐱᖏᓐᓄᑦ. 2011-ᒥ ᐊᑎᓕᐅᕐᑐᕕᓂᐅᑎᓪᓗᒋᑦ ᓄᓇᕕᒻᒥ ᐃᓄᐃᑦ ᓄᓇᒥᒃ ᓇᒻᒥᓂᖃᕐᓂᕋᕐᓂᖏᓐᓄᑦ ᐊᖏᖃᑎᒌᒍᑎᒥᒃ ᐊᖏᖃᑎᒌᑦᑎᓗᒋᑦ ᒪᑭᕝᕕᑯᑦ, ᓄᓇᕗᕐᒥᐅᑦ ᐊᖓᔪᕐᖃᐅᑎᖏᑦ ᐊᒻᒪᓗ ᑲᕙᒪᑐᖃᒃᑯᑦ, ᕿᑭᕐᑌᑦ ᑖᕙᓃᑦᑐᑦ, ᓄᓇᕗᕐᒥᐅᑦ ᐱᖁᔭᖓᑎᒎᖏᓐᓇᕋᓗᐊᕐᓱᑎᒃ, ᓇᒻᒥᓂᕐᑖᕆᔭᕕᓂᐅᕗᑦ ᐃᓄᓐᓄᑦ ᓄᓇᕕᒻᒥᐅᓄᑦ.

ᓇᓗᓀᕐᑕᐅᓂᕕᓂᖓ ᓇᔪᒐᐅᓚᐅᕐᑐᕕᓂᐅᑉ World Heritage-ᑯᑦ ᐊᓪᓚᖁᑎᖏᓐᓂ ᐳᕐᑐᓂᕐᐸᓰᐊᖑᕗᖅ ᐃᓕᑕᕐᓯᔭᕕᓂᐅᑦᓱᓂ ᑭᖑᕝᕕᕈᓐᓇᑐᓄᑦ ᐃᓪᓕᓇᕐᑐᒪᕆᐅᑎᓪᓗᒍ ᓄᓇᕐᔪᐊᓕᒫᑦᓯᐊᒥ.

ᐊᕙᑕᖅ ᐱᐅᓯᑐᖃᓕᕆᕕᒃ ᐅᐱᒪᔪᒻᒪᕆᐅᕗᖅ ᖃᔭᕐᑕᓕᒃ ᑲᓇᑕᒥᐅᖑᑦᓱᓂ ᐊᓪᓚᖁᑎᒋᔭᑦᓴᐅᑎᓗᒍ ᑎᒃᑯᐊᑕᐅᓐᓂᒪᑦ UNESCO-ᑯᓄᑦ, ᓂᕆᐅᓐᓂᖃᕐᓱᓂᓗ ᓄᓇᕐᔪᐊᓕᒫᒥ ᐃᓕᑕᕐᓯᒪᔭᐅᓕᕐᓂᖓ ᐃᑲᔪᕐᓯᓛᕐᓂᖓᓂᒃ ᐅᖑᒪᔭᐅᑎᓪᓗᒍ ᐃᓪᓕᓇᕐᓂᐸᐅᑦᓱᓂ ᓄᓇᕐᔪᐊᒥ ᓇᔪᒐᐅᓚᐅᕐᑐᕕᓂᐅᑦᓱᓂ.

ᖃᐅᔨᒋᐊᕐᕕᓴᖅ :

ᓗᐃ ᑳᒡᓅ / ᐊᕙᑕᖅ ᐱᐅᓯᑐᖃᓕᕆᕕᒃ

514 989-9031, ᑐᕃᓐᓇᐅᑎᖓ 246