• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᐊᕙᑕᖅ ᐱᐅᓯᑐᖃᓕᕆᕕᒃ ᐱᓇᓱᕝᕕᐅᕗᖅ ᖄᖏᕐᓂᑯᓕᐅᕐᑎᓯᔭᐅᒐᓂ, ᓴᕐᕿᑎᑕᕕᓂᐅᑦᓱᓂ 1980-ᒥ ᐊᔪᐃᓐᓇᐅᔨᓚᖓᑎᓪᓗᒍ ᓴᐳᒻᒥᓯᒪᓗᓂ ᖃᐅᔨᔭᐅᑎᑦᓯᒋᐊᕐᓗᓂᓗ ᐃᓄᐃᑦ ᓄᓇᕕᒻᒥᐅᑦ (ᑯᐯᒃ ᑕᕐᕋᖓ) ᐅᖃᐅᓯᖓᓐᓂᒃ ᐃᓗᕐᕈᓯᖓᓂᓗ. ᐊᕙᑕᖅ ᐊᓪᓚᕕᒻᒪᕆᖁᑎᓕᒃ ᐃᓄᑦᔪᐊᖅ, ᓄᓇᕕᒻᒦᑐᒥᒃ, ᐊᐅᓚᑦᓯᕕᖃᕐᓱᓂᓗ ᐊᓪᓚᕕᐅᒻᒥᔪᒥᒃ ᐅᐃᐊᔅᑦᒪᐅᓐᑦ-ᒦᑦᑐᒥᒃ (ᒧᓐᑐᔨᐊᒥ), ᑯᐯᒻᒥ.

ᐊᕙᑕᖅ ᒫᓐᓇᐅᔪᖅ ᕿᓂᕐᐳᖅ ᐃᒣᓘᕐᑎᐅᒐᔭᕐᑐᒥᒃ: ᑮᓇᐅᔭᓕᕆᔨᐅᑉ ᐃᑲᔪᕐᑎᖓ

ᐊᖓᔪᕐᖄᖃᕐᓗᓂ ᐊᓪᓚᕕᒻᒥᒃ ᐊᐅᓚᑦᓯᔨᒥᒃ, ᑮᓇᐅᔭᓕᕆᔨᐅᑉ ᐃᑲᔪᕐᑎᖓ ᐅᑯᓂᖓ ᐱᔭᑦᓴᖃᖃᑦᑕᕋᔭᕐᑐᖅ:

- ᑲᑎᑎᕆᕙᓪᓗᓂ, ᐊᑐᐃᓐᓇᕈᕐᑎᕆᕙᓪᓗᓂ ᐊᓪᓚᖁᑎᓕᐅᕐᐸᓗᓂᓗ ᑮᓇᐅᔭᓕᕆᐅᑎᕕᓂᕐᓂᒃ, ᐅᑦᑑᑎᒋᓗᒋᑦ ᐊᑭᓕᕋᑦᓴᓂᒃ, ᐊᑭᓕᕐᑕᐅᒍᒪᐅᑎᓂᒃ, ᐊᓪᓚᕕᐅᑉ ᐱᐅᑎᖏᓐᓄᐊᖓᑦᓱᑎᒃ ᑐᓴᕐᑎᓯᐅᑎᓂᒃ, ᖃᐅᑕᒫᑦ ᑮᓇᐅᔭᓕᕆᐅᑎᕕᓂᕐᓂᒃ ᐊᓯᖏᓐᓂᓗ ᐊᕐᕌᒎᑉ ᐃᓱᐊᓂ ᑮᓇᐅᔭᓕᕆᐅᑎᕕᓃᑦ ᑐᓴᕐᑎᓯᐅᑎᖏᓐᓂᒃ ᐊᑐᕐᓗᓂ ᖃᕆᑕᐅᔭᒥᒃ ᐊᒡᒐᒨᕐᓗᓂᓘᓐᓃᑦ;

- ᑮᓇᐅᔭᓕᕆᐅᑎᕕᓃᑦ ᐃᓂᖏᓅᕐᖃᓯᐊᕐᐸᓗᒋᑦ, ᑲᑎᓐᓂᓕᐅᕐᐸᓗᓂ, ᑮᓇᐅᔭᓕᕆᐅᑎᒨᕐᙯᕙᓪᓗᓂ ᖃᕆᑕᐅᔭᒧᓪᓘᓃᑦ, ᓱᕐᖁᐃᓯᒋᐊᕐᐸᓗᓂ ᑲᓱᕐᑎᑕᕕᓂᕐᒥᓂᒃ ᑲᔪᓯᑎᑦᓯᕙᓪᓗᓂ ᐅᑦᑑᑎᒋᓗᒋᑦ ᐊᑭᓕᕐᑕᐅᒋᐊᓖᑦ ᐊᑭᓕᑦᓭᓗ, ᐱᓇᓱᑦᑏᑦ ᑮᓇᐅᑦᔭᓵᖏᑦ, ᐱᐅᑎᓂᒃ ᓂᐅᕕᕈᑎᕕᓃᑦ, ᑮᓇᐅᔭᑦᓴᔦᑦ, ᐊᑭᓕᕐᑕᐅᒍᒪᐅᑏᑦ, ᑮᓇᐅᔭᑦᓴᓂᒃ ᑐᑦᓯᕋᕐᓃᑦ ᑮᓇᐅᔭᒃᑯᕕᒻᒥᓗ ᑮᓇᐅᔭᕐᑐᑎᕕᓃᑦ;

- ᓄᐊᑦᓯᕙᓪᓗᓂ ᑮᓇᐅᔭᑎᒍᑦ ᑐᕌᒐᓕᐊᕕᓂᕐᓂᒃ ᐊᓪᓚᖁᑎᓂᓗ ᑐᓐᖓᕕᖃᕐᑐᓂᒃ ᑮᓇᐅᔦᑦ ᐃᑎᕐᓂᐊᑐᕆᔭᐅᓂᖏᓐᓂᑦ ᑮᓇᐅᔭᕐᑑᑎᐅᓂᐊᕐᑐᕆᔭᐅᔪᓂᓗ, ᐊᕐᕌᒎᓯᒪᔪᓂᓪᓗ ᑐᕌᒐᓕᐊᖑᕙᑦᑐᕕᓂᕐᓂᒃ;

- ᐊᑐᐃᓐᓇᕈᕐᑎᕆᕙᓪᓗᓂ ᑮᓇᐅᔭᕐᑑᑎᕕᓃᑦ ᐊᓪᓚᖁᑎᖏᓐᓂᒃ, ᑐᓴᕐᑎᓯᐅᑎᓂᒃ ᐊᕐᕌᒍᑕᒫᓪᓘᓃᑦ ᑮᓇᐅᔭᕐᑑᑎᕕᓂᕐᓂᒃ;

- ᑲᑎᑎᕆᕙᓪᓗᓂ ᐱᓇᓲᑏᑦ ᐊᑭᕕᓂᖏᓐᓂᒃ ᐊᓯᖏᓐᓂᓗ ᑮᓇᐅᔭᕐᑑᑎᕕᓂᕐᓂᒃ ᑐᓐᖓᕕᖃᕐᓱᑎᒃ ᒥᑦᓴᐅᓵᕐᑕᕕᓂᕐᓂᒃ, ᐱᓇᓱᒍᑦᔭᐅᓂᕐᒧᑦ ᐊᑭᓕᕆᐊᓕᓂᒃ ᓱᓇᓕᒫᓪᓗ ᐊᑭᖏᑦᑕ ᐊᓪᓚᖁᑎᖏᓐᓂᒃ;

- ᓂᐅᕕᕈᒪᓕᕐᑐᓂᒃ ᑲᒪᒋᔭᖃᕐᐸᓗᓂ, ᐃᓅᖃᑎᖃᑦᓯᐊᒍᓐᓇᓗᓂ ᓂᐅᕕᕐᑎᓂᒃ ᐱᓀᓗᑕᐅᓕᕐᑐᓂᓗ ᐋᕐᖀᕙᓪᓗᓂ;

- ᐊᓯᖏᓐᓂᓗ ᐱᓇᓱᐊᕐᐸᓗᓂ ᐱᓇᓲᑎᑎᒍᑦ, ᐅᑦᑑᑎᒋᓗᒋᑦ ᖃᕆᑕᐅᔭᑎᒍᑦ ᐊᓪᓚᓯᒪᔪᓕᕆᐅᑎᒃ, ᐊᓪᓚᖁᑏᑦ ᐃᓂᓪᓚᖓᑎᑦᓯᐊᓗᒋᑦ ᑮᓇᐅᔭᕐᑑᑎᕕᓃᓪᓗ ᐊᓪᓚᓯᐊᕐᐸᓗᒋᑦ, ᓱᑲᑦᑐᑎᒍᑦ ᐊᐅᓪᓚᑎᑦᓯᐅᖃᕐᐸᓗᓂ ᐊᒥᓱᓕᐅᕆᕙᓪᓗᓂᓗ.

ᐱᔪᓐᓇᕆᐊᓕᖏᑦ:

- ᐱᓇᓱᒐᒋᒍᒪᔭᕐᒥᓂᒃ ᐱᒋᐅᕐᓴᓯᒪᓂᕐᒧᑦ ᓯᓚᑦᑐᓴᕐᕕᒥᓪᓅᓃᑦ ᐱᔭᕇᕐᓂᐅᑎᑖᕐᓯᒪᓗᓂ ᑮᓇᐅᔭᓕᕆᓂᕐᒧᑦ;

- ᖃᕆᑕᐅᔭᕆᐊᒥᒃ ᖃᐅᔨᒪᓗᓂ, ᐊᓪᓚᓯᒪᔪᓕᕆᐅᑎᓕᕆᒍᓐᓇᓗᓂ ᖃᕆᑕᐅᔭᑎᒍᓪᓗ ᑮᓇᐅᔭᓕᕆᐅᑎᓂᒃ ᐱᓇᓱᐊᕈᓐᓇᓗᓂ ᐊᒻᒪᓗ Microsoft Dynamics ᐱᓇᓲᑎᖏᓐᓂᒃ;

- ᒪᕐᕉᓂᒃ ᐅᖃᐅᓰᓐᓂᒃ ᐱᔪᓐᓇᓯᐊᕆᐊᓕᒃ ᐊᓪᓚᓂᒃᑯᑦ ᐅᖄᓂᒃᑯᑦ. ᐃᓄᒃᑎᑑᕈᓐᓇᕈᓂ ᐃᑲᔪᕐᓯᔭᐅᓪᓗᑐᕋᔭᕐᑐᖅ;

- ᖃᐅᔨᒪᔭᐅᓪᓗᑯᐊᐱᒋᐊᓕᓂᒃ ᑐᑭᓯᐊᑦᓯᐊᓗᓂ ᓇᓗᒍᓐᓀᓗᓂ ᐅᐸᓗᓲᖑᒍᓐᓀᓗᓂᓗ.

ᖃᐅᔨᒪᔭᐅᒃᑲᓂᒋᐊᓖᑦ:

- ᐱᓇᓱᐊᕐᓂᕆᖃᑦᑕᕋᔭᕐᑕᖏᑦ: ᐊᑌᓐᓇᖏᑦᑑᓗᓂ 9:00-ᒥᑦ ᐅᓪᓛᑯᑦ 5:00-ᒧᑦ ᐅᓐᓄᓴᒃᑯᑦ, ᐱᓇᓱᐊᕈᓯᑕᒫᑦ ᐅᓪᓗᓂ ᐱᖓᓱᓂ 21-ᓂᒃ ᐃᑲᐅᕐᓂᓕᐅᕐᐸᓗᓂ);

- ᑮᓇᐅᑦᔭᓵᖏᑦ: ᐃᑲᐅᕐᓂᑕᒫᑦ $21.00;

- ᓇᓃᓪᓗᓂ: ᐊᕙᑕᐅᑉ ᐊᓪᓚᕕᖓᓂ ᐅᐃᐊᔅᑦᒪᐅᓐᑦ-ᒥ (ᒧᓐᑐᔨᐊᒥ);

- ᐱᓇᓱᒐᕐᑖᕋᓱᐊᕈᑏᑦ ᑐᓂᔭᐅᕕᒋᒋᐊᓕᖏᑦᑕ ᐃᓱᓕᕝᕕᖓ: ᓂᕿᑦᓯᑐᑦ ᐊᕗᓐᓂᑎ 2, 2018.

ᐱᓇᓱᒐᕐᑖᕋᓱᐊᕐᑐᕕᓃᑦ ᓇᓪᓕᑳᕐᑕᕕᓂᐅᒍᑎᒃ ᑭᓯᐊᓂ ᖃᐅᔨᑎᑕᐅᓛᕐᓂᐊᑐᑦ ᐊᐱᕐᓱᑕᐅᒍᒪᓕᕈᑎᒃ, ᐊᕙᑕᖅ ᐱᓇᓱᒐᕐᑖᕋᓱᐊᕐᑐᑦ ᑭᓇᒃᑯᑐᐃᓐᓇᐅᒐᓗᐊᕐᐸᑕ ᐱᓇᓱᑦᑎᑖᓲᖑᕗᖅ.

ᐱᓇᓱᒐᕐᑖᕈᒪᐅᑎᑎᑦ ᐅᕗᖓ ᐊᐅᓪᓚᑎᓪᓗᒋᑦ:

Michel, Patry (ᒥᓯᐊᓪ ᐹᑦᕇ), ᐊᓪᓚᕕᒻᒥ ᐊᐅᓚᑦᓯᔨ

4150, Ste-Catherine St. W. suite 360

Westmount, Québec, H3Z 2Y5

ᓱᑲᑦᑐᑰᕈᑎᖓ: 514-989-8789