• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

PRESS RELEASE

(For immediate release)

ᐃᓄᑦᔪᐊᖅ, ᒪᓐᓂᓕᐅᑦ 15 2018

ᑲᐅᑦᔭᔪᖅ: ᓯᕗᓪᓕᐹᖅ ᓈᓚᐅᑎᒃᑰᑐᑦᓴᖅ - ᓱᓕᔫᓐᖑᐊᑕᕕᓂᖅ ᓄᓇᕕᒻᒥᐅᑦ ᐃᓄᐃᑦ

ᓱᓕᔪᓐᖑᐊᓕᐅᕐᕕᖁᑎᖓᓄᑦ ᑐᓴᕐᓴᐅᓛᕐᓂᐊᑐᖅ ᑕᕐᕋᒥᐅᑦ ᓂᐱᖔᒃᑯᑎᒍᑦ

ᑲᐅᑦᔭᔪᖅ, ᓱᓕᔪᓐᖑᐊᓕᐊᕕᓂᖅ ᓄᓇᕕᒻᒥᐅᑦ ᐃᓄᐃᑦ ᓱᓕᔪᓐᖑᐊᓕᐅᕐᕕᖁᑎᖓᓄᑦ ᐊᕙᑕᖅ

ᐱᐅᓯᑐᖃᓕᕆᕕᒥᐅᒧᑦ, ᐅᐱᕐᖓᓴᐅᓕᕐᐸᑦ ᓯᑕᒣᓕᕿᖓᓗᓂ ᑐᓴᕐᓴᐅᓛᕐᓂᐊᑐᖅ ᑕᕐᕋᒥᐅᑦ ᓂᐱᖔᒃᑯᑎᒍᑦ. ᑖᓐᓇ

ᓈᓚᐅᑎᒃᑰᑐᑦᓴᖅ ᓱᓕᔫᓐᖑᐊᑕᕕᓂᖅ ᓂᐱᓕᐅᕐᕕᐊᓗᒻᒥ ᓂᐱᓕᐅᕐᑕᐅᓚᐅᔪᔪᖅ ᐃᓚᒌᓴᖅ ᑮᓇᐅᔭᖃᕐᑎᓯᑎᓪᓗᒍ.

ᑕᕐᕋᒥᐅᒃᑯᑎᒍᑦ ᑐᓴᕐᓴᐅᓛᕐᓂᖏᑦᑕ ᖃᖓᐅᓂᖏᑦ: ᒪᓐᓂᓕᐅᑦ 26-ᒥᑦ 29-ᒧᑦ, 2018-ᒥ

ᐅᓪᓗᒍᒥᑕᕐᓇᒥ ᕿᑎᕋᕐᑎᓗᒍ ᐊᒻᒪᓗ ᑐᓴᕐᓴᐅᒋᐊᓪᓚᖃᑦᑕᓗᑎᒃ ᐅᓐᓄᓴᒃᑯᑦ 5:00-ᒥ ᐊᒻᒪᓗ 7:00-ᒥ

ᐅᑯᐊ ᓄᓇᕕᒻᒥᐅᑦ ᐃᓄᐃᑦ ᓈᓚᐅᑎᒃᑰᑐᑦᓴᓂᒃ ᓂᐱᓕᐅᓚᐅᔪᔪᑦ: ᐳᐊᓯ ᓇᐹᕐᑐᖅ, ᐸᐅᔪᖏ ᓄᑕᕌᓗᒃ,

ᓕᑎᐊ ᐊᓚᑯ, ᐋᓕᓴᓐ ᑑᒪᓯ, ᑖᓂᐊᓪ ᑳᑦᐳᐊ ᐊᒻᒪᓗ ᑳᓯ ᑕᕐᕿᐊᐱᒃ. ᓖᓴ ᖁᐱᕐᕈᐊᓗᒃ ᑐᓴᕐᓴᐅᓚᖓᔪᓂᒃ

ᐅᖄᔨ, ᐅᓇ ᑭᓯᐊᓂ ᐱᒻᒪᕆᐅᓂᕐᓴᖅ, ᓂᐱᓕᐅᕐᑐᓂᒃ ᐃᓄᒃᑎᑑᕐᓂᖏᓐᓂᒃ ᐊᔪᖀᒋᐊᕐᑎᐅᓱᓂᓘᓚᐅᔪᔪᖅ.

ᓄᓇᕕᒻᒥᐅᑦ ᓱᓕᔪᓐᖑᐊᓕᐅᕐᕕᖁᑎᖓ ᓴᕐᕿᓕᕿᓯᒪᕗᖅ ᐊᕙᑕᖅ ᐱᐅᓯᑐᖃᓕᕆᕕᒃ

ᐅᖃᐅᓯᓕᕆᓂᖃᕐᑎᓯᑎᓪᓗᒍ ᐊᑦᓯᔭᐅᒪᔪᒥᒃ ᐃᒫᒃ: ᐃᓄᒃᑎᑑᕐᓂᐅᑉ ᓴᑐᕐᑕᐅᒐᓱᐊᕐᓂᖓ.

ᐅᖃᐅᓯᓕᕆᓂᖃᓚᐅᔪᒻᒪᑦ ᐆᒻᒪᑎᑦᓯᒋᐊᓪᓚᒍᑕᐅᒐᓱᐊᓚᖓᔪᒥᒃ ᐃᓄᒃᑎᑑᕐᓂᒥᒃ. ᐃᓘᓐᓀᓂ 15-ᓂ ᓄᓇᓕᓐᓂ,

ᐃᓄᓕᒫᑦ ᐱᓇᓱᕝᔨᐅᔪᐃᓪᓗ ᑲᑎᒪᑎᑕᐅᖃᑦᑕᓚᐅᔪᔪᑦ ᓇᐅᑦᓯᑐᐃᒐᓱᐊᕐᓱᑎᒃ ᖃᓄᐃᓕᖓᓕᕐᓂᖓᓂᒃ

ᓇᓗᓀᕐᓯᒐᓱᐊᕐᓱᑎᓗ ᖃᓄᖅ ᐅᖃᐅᓯᕗᑦ ᐱᐅᓯᐅᒥᒍᓐᓇᒪᖔᑦ. ᐊᑕᐅᓯᖅ ᐅᓐᓂᑑᑎᒃ ᐃᓄᒃᑎᑑᕐᓂᐅᑉ

ᓴᑐᕐᑕᐅᒐᓱᐊᕐᓂᖓᑕ ᑐᓴᕐᑎᓯᐅᑎᖓᓄᑦ ᐃᒣᓕᓚᐅᔪᔪᖅ: «ᐊᕙᑕᖅ ᐱᐅᓯᑐᖃᓕᕆᕕᒃ ᐱᒋᐊᕐᑎᓯᓛᕐᓂᐊᑐᖅ

ᓴᕐᕿᑎᑦᓯᓗᓂ ᓄᓇᕕᒻᒥᐅᑦ ᐃᓄᐃᑦ ᓱᓕᔪᓐᖑᐊᓕᐅᕐᕕᖁᑎᖓᓂᒃ ᑐᓴᕐᑕᐅᑎᓗᒍ ᐱᐅᓯᑐᖃᕗᑦ ᐱᐅᓯᐅᒥᓗᒍᓗ

ᐃᓄᒃᑎᑑᕐᓂᖅ.»

2009-ᒥᓂᑦ, ᐊᕙᑕᖅ ᐱᐅᓯᑐᖃᓕᕆᕕᒃ ᓯᕗᓕᓯᒪᓕᕐᑐᖅ ᓄᓇᕕᒻᒥᐅᑦ ᓱᓕᔪᓐᖑᐊᓕᐅᕐᕕᖁᑎᖓᓂᒃ

ᓱᓕᔫᓐᖑᐊᓕᐅᒋᐅᕐᓴᑎᑦᓯᓂᖃᕐᐸᑎᓗᒍ, ᐊᐅᔭᒥ/ᐅᐱᕐᖔᒥ ᓱᓕᔫᓐᖑᐊᓕᐅᒋᐅᕐᓴᓂᖃᕐᐸᑎᓗᒍ ᑲᑎᒪᓂᒻᒪᕆᓂᓗ.

ᓯᕗᓪᓕᐹᖅ ᓱᓕᔫᓐᖑᐊᓕᐊᕆᒐᑦᓴᖅ ᑲᐅᑦᔭᔪᖅ, ᐊᓪᓚᑕᕕᓂᐅᑦᓱᓂ ᐋᑕᒥ ᖃᓕᖑᒧᑦ, ᓱᓕᔫᓐᖑᐊᑕᐅᓯᒪᓕᕐᑐᖅ

ᐊᑦᔨᒌᓐᖏᑐᓂ ᓄᓇᕕᒻᒥ ᓄᓇᓕᓐᓂ 2011-ᒥ ᓴᕐᕿᑎᑕᕕᓂᐅᓕᕐᓱᓂ. ᑲᐅᑦᔭᔪᖅ ᐱᓯᒪᔪᖅ ᐃᓄᐃᑦ

ᐅᓂᒃᑳᑐᐊᖓᓂᑦ ᖃᐅᔨᒪᔭᐅᑦᓱᓂ ᓄᓇᕕᒻᒥᐅᓕᒫᑲᓵᓄᑦ: ᖃᓄᐃᓕᓐᖓᓚᐅᕐᓯᒪᓂᖓ ᐊᖓᔪᕐᙯᑑᑦᓱᓂ ᐃᓕᐊᕐᔫᑉ.

ᓱᓕᔫᓐᖑᐊᓕᐊᕆᒐᑦᓴᓕᐊᕕᓂᖅ ᐃᓄᓐᓄᓗ ᐅᕕᒐᕐᑐᓄᑦ ᓱᓕᔫᓐᖑᐊᑕᕕᓂᐅᑦᓱᓂ.

ᐱᐅᓯᕆᒐᒥᐅᒃ, ᓱᓕᔪᓐᖑᐊᓂᖅ ᑕᑯᓐᓇᕋᑦᓴᓕᐅᕐᓂᐅᕗᖅ ᑕᑯᑎᑦᓯᓱᓂ ᖃᓄᑐᐃᓐᓇᓕᒫᑦᓯᐊᖅ ᐃᓄᐃᑦ

ᐃᓅᓲᒍᒻᒪᖔᑕ. ᐃᓗᓕᖃᓲᖅ ᑲᑐᑦᔮᕕᓂᕐᓂᒃ ᐃᓱᒪᒋᔭᕕᓂᕐᓂᒃ ᐃᒻᒥᑯᐊᕐᑎᑐᐃᓪᓗ ᐃᓱᒪᒋᔭᕕᓂᖏᓐᓂᒃ. ᓇᑭᑦ

ᐱᓯᒪᓂᑦᑎᓂᑦ ᑎᑭᐅᑎᓲᖅ ᓯᕗᓂᑦᓴᒨᕐᑎᓯᑦᓱᓂᓗ ᓱᓕᔫᓐᖑᐊᓂᒃᑯᑦ. ᓱᓕᔫᓐᖑᐊᓂᖅ ᐃᑲᔪᕐᓯᒪᕆᒍᓐᓇᑐᖅ

ᐃᓅᖃᑎᒌᑦᑐᑦ ᓄᓇᓕᐅᓪᓗ ᐃᓱᒪᒃᑯᑦ ᖃᓄᐃᓐᖏᓯᐊᕐᓂᒥᒃ, ᓇᓗᓀᕐᓯᒋᐊᓪᓚᓗᓂᓗ ᐃᓄᑐᐃᓐᓇᐅᓂᑦᑎᓂᒃ

ᐃᓄᓕᒫᓪᓗ ᐊᐅᓚᔨᔭᖏᓐᓂᒃ.

ᑐᑭᓯᒋᐊᓪᓚᒍᒪᒍᕕᑦ ᐅᖄᓚᕕᖃᕐᓗᑎᑦ: Sylvie Côté Chew-ᒧᑦ / 514-989-9031-ᒧᑦ ᑲᔪᓯᐅᑎᖓ:

223 / ᖃᕆᑕᐅᔭᑎᒍᑦ ᐊᓪᓚᕕᒋᒍᒪᒍᕕᐅᒃ: tumivut@avataq.qc.ca