ᐱᓇᓱᐊᕐᓂᕕᓃᑦ ᑭᓇᓕᒫᓂᓪᓗ ᑐᓴᐅᒪᑎᑦᓯᓯᐊᕋᓱᐊᕐᓂᖅ

ᑎᕆᒐᓐᓂᐊᖅ ᐃᓄᓪᓗ

ᐃᕐᕓ ᒫᓐᓲ-ᒧᑦ ᑕᓂᐊᓪ ᔮᓐᑦᕉᓐ-ᒧᓪᓗ

ᐃᓄᑐᐃᓐᓇᐅᖏᑦᑐᑦ (ᕿᓚᓗᒐᕐᓂᐊᑏᑦ ᓂᐅᕐᕈᓯᕐᑏᓗ) ᐃᓄᐃᑦ ᓄᓇᖓᓐᓅᓚᐅᕐᑎᓇᒋᑦ, ᐃᓄᐃᑦ ᐃᓅᒡᒍᑎᖃᓪᓚᕆᑦᑐᕕᓃᑦ ᐆᒪᔪᓂᒃ ᐊᓐᓇᐅᒪᒍᑎᒋᑦᓱᒋᑦ ᓂᕿᒋᑦᓱᒋᓪᓗ, ᑭᓯᐊᓂᓗᑦᑕᐅᖅ ᐊᓐᓄᕌᓕᐊᕆᓲᒋᑦᓱᒋᑦ, ᐱᐅᑎᓕᐊᕆᓲᒋᑦᓱᒋᑦ, ᓱᒋᐊᕈᑎᓕᐊᕆᓲᒋᑦᓱᒋᑦ, ᐊᓂᕐᕋᓕᐊᕆᓲᒋᑦᓱᒋᑦ ᐊᐅᓚᒍᑎᓕᐊᕆᓲᒋᑦᓱᒋᓪᓗ. ᐃᓄᐃᑦ ᐃᓅᓯᖏᑦ ᐃᓂᓪᓚᖓᕙᑦᑐᕕᓃᑦ ᒪᙯᓐᓂᒧᑦ ᐊᕙᓗᒪᔭᐅᑦᓱᑎᒃ ᐱᓂᐊᕐᓂᖃᑎᒌᓲᒍᓂᖏᓪᓗ ᐆᒪᔪᕐᓂᒃ ᐊᒥᓱᒻᒪᕆᓐᓂᒃ ᕿᒻᒪᕇᒍᑎᐅᓯᒪᓕᕐᓱᑎᒃ ᐃᓅᑉ ᐃᓱᒪᒍᓯᖓᑎᒍᑦ ᐃᓅᖃᑎᒌᑦᑐᑎᒍᑦ.

ᑌᒣᒻᒪᑦ, ᑭᓇᑐᐃᓐᓇᖅ ᑕᑯᒍᓐᓇᑐᖅ ᐊᑐᐊᒐᓕᐊᕕᓂᕐᓂ, ᐊᒥᓱᐃᓂᒃ ᕿᒥᕐᕈᐊᓂᒃ ᐅᓂᒃᑳᑐᐊᓂᓪᓗ ᐱᓂᐊᕐᓂᖃᖃᑎᒌᓲᒍᓂᖏᓐᓄᑦ ᐃᒪᕐᐱᒥᐅᑌᑦ ᐆᒪᔪᐃᑦ (ᓇᑦᓰᑦ, ᐁᕖᑦ, ᕿᓚᓗᒉᑦ, ᓇᓄᐃᑦ, ᐊᓯᖏᓪᓗ) ᐅᕝᕙᓘᓐᓃᑦ ᓄᓇᒥᐅᑌᑦ ᐆᒪᔪᐃᑦ (ᑐᒃᑐᐃᑦ) ᐃᓄᐃᓪᓗ. ᐃᒃᑯᐊᓗ ᐱᓂᐊᕐᓂᖃᖃᑎᒌᓲᒍᓂᖏᑦ ᐃᓄᐃᑦ ᑎᕆᒐᓐᓂᐊᓗ, ᑎᕆᒐᓐᓂᐊᑦ ᐃᓅᒡᒍᑎᒋᒋᐊᖏᑦ ᐱᒻᒪᕆᐅᓐᖏᓂᕐᓴᐅᒪᑕ. ᐊᓪᓛᓕ, ᑎᕆᒐᓐᓂᐊᔦᑦ ᓂᐅᕐᕈᓯᕐᑕᐅᓂᖏᑦ ᐱᒻᒪᕆᕕᓂᕐᔪᐊᒍᒻᒪᑕ 1900-ᐄᑦ ᐊᕐᕌᒍᖏᑦᑕ ᒥᑦᓵᓂ. ᑎᕆᒐᓐᓂᐊᑦ ᒥᑭᒋᐊᕐᓂᐊᑕᐅᕙᑦᑐᕕᓃᑦ ᖃᒡᒋᑕᕐᓄᑦ, ᓂᕿᑕᖏᓪᓗ ᐃᓄᓐᓄᑦ ᓂᕆᔭᐅᓲᒍᒐᑎᒃ ᕿᒻᒥᖃᐅᑎᓕᐊᒍᕙᒃᑲᓗᐊᕐᓱᑎᒃ.

ᑖᓐᓇ ᐱᓇᓱᐊᕋᑦᓴᖅ ᐱᒋᐊᕐᑎᑕᐅᓚᕿᔪᕕᓂᖅ ᑕᑯᔭᐅᓂᕕᓂᖏᓐᓄᑦ ᐅᓄᕐᑐᒪᕇᑦ ᑎᕆᒐᓐᓂᐊᕕᓃᑦ ᓴᐅᓂᖏᑦ (2000 ᒥᑦᓵᓃᑦᑐᑦ ᓴᐅᓃᑦ), ᑕᒪᒋᒃ ᖃᑯᕐᑌᑦ (Alopex lagopus) ᑲᔪᕐᑐᐃᓗ (Vulpes vulpes), ᑕᑯᔭᕕᓂᐅᑦᓱᑎᒃ ᑕᔭᕋᐅᑉ ᓇᔪᒐᒋᓚᐅᕐᑕᕕᓂᖓᓂ ᓴᓪᓗᐃᑦ ᓴᓂᐊᓂ. ᑖᒃᑯᐊ ᑕᑯᔭᐅᓂᕕᓂᖏᑦ ᐊᒥᓱᑲᓪᓚᓂᒃ ᐊᐱᕐᓲᑎᑦᓴᑖᕐᑎᓯᔪᕕᓃᑦ, ᐃᓚᒋᔭᐅᑎᓪᓗᒍ ᑎᕆᒐᓐᓂᐊᑉ ᓂᕿᑕᖓ ᑐᓂᕐᓄᑦ ᓂᕿᒋᔭᐅᓪᓚᕆᑦᑐᕕᓂᐅᒻᒪᖔᑦ.

ᑌᒣᒻᒪᑦ, ᑎᕆᒐᓐᓂᐊᖅ ᐃᓄᓪᓗ ᕿᒥᕐᕈᐊᖅ ᑐᑭᓯᑎᑦᓯᓕᐅᒥᒐᓱᐊᓚᖓᔪᖅ ᐱᓂᐊᕐᓂᖃᖃᑎᒌᓲᕕᓂᖏᓐᓂᒃ ᑎᕆᒐᓐᓂᐊᑦ ᐃᓄᐃᓪᓗ ᐊᑦᔨᒌᓐᖏᑐᑦ ᓯᓚ ᒪᓕᑦᓱᒍ. ᐊᓪᓚᑕᐅᔪᑦ ᐅᑯᓂᖓ ᐃᓚᖃᓚᖓᔪᑦ:

- ᐆᒪᔪᐃᑦ ᐱᕈᕐᑐᐃᓗ ᓱᑯᐃᔭᕐᑕᐅᓂᖏᓐᓄᑦ: ᐃᑉᐱᒍᓱᓕᐅᒥᑎᑦᓯᒋᐊᕈᑎᓄᑦ ᐊᒡᒍᑐᕐᓯᒪᓂᖏᓐᓄᓗ ᐊᑦᔨᒌᓐᖏᑐᑦ ᑎᕆᒐᓐᓂᐊᑦ ᓄᓇᕕᒻᒦᑐᑦ.

- ᐃᑦᓴᓂᑕᕐᓂᐊᑕᐅᓂᖏᓐᓄᑦ: ᓀᓈᕐᓯᒪᓗᑎᒃ ᐊᑦᔨᒌᓐᖏᑐᑦ ᐃᑦᓴᓂᑕᕐᓂᐊᓂᒧᑦ ᐊᓪᓚᖁᑏᑦ, ᑐᕃᓐᓇᑐᑦ ᐊᓪᓚᖁᑏᑦ, ᐆᑦᑑᑎᒋᓗᒋᑦ ᑎᕆᒐᓐᓂᐊᑦ ᓴᐅᓂᖏᑦᑕ ᖃᐅᔨᓴᕐᑕᐅᓂᖏᑦ, ᐅᕝᕙᓘᓐᓃᑦ ᖃᐅᔨᓴᕐᑕᐅᓂᖏᑦ ᑭᒻᒥᓕᓃᑦ ᓴᐅᓂᕐᓃᑐᑦ, ᑐᕃᓐᓇᖏᑦᑐᑦ ᐊᓪᓚᖁᑏᑦ, ᐆᑦᑑᑎᒋᓗᒋᑦ ᐃᕐᐸᓯᒪᓂᖏᑦ ᖃᒡᒋᑌᑦ ᑖᕙᑦᓱᒪ ᓄᓇᐅᑉ ᒥᑦᓵᓂ.

- ᑌᑦᓱᒪᓂᑌᑦ ᖃᒻᒥᓂᑌᓪᓗ ᐃᓗᓕᖏᑦ, ᑐᓐᖓᕕᒋᔭᐅᑦᓱᑎᒃ ᐱᓇᓱᐊᕐᑕᐅᔪᒧᑦ ᐊᐱᕐᓲᑎᓄᑦ ᓄᓇᕕᒻᒥᐅᓂᒃ ᐃᓄᑐᖃᕐᓂᒃ. ᐊᐱᕐᓲᑏᑦ, ᐊᒡᒍᑐᕐᑕᕕᓂᐅᑦᓱᑎᒃ ᓄᓇᓕᓐᓂ ᐱᐅᓯᑐᖃᓕᕆᔩᑦ ᑲᑎᒪᔨᖏᓐᓄᑦ, ᓄᐊᑦᓯᒍᑕᐅᕙᓪᓗᓛᕐᑐᑦ ᐃᓄᐃᑦ ᖃᐅᔨᒪᐅᓯᑐᖃᖏᓐᓂᒃ. ᑐᓱᓕᕐᑎᑕᕕᓂᒻᒪᕆᐅᑦᓱᑎᒃ ᐃᑦᓴᓂᑕᕐᓂᐊᑏᑦ ᓇᕝᕚᖃᑦᑕᑕᕕᓂᖏᓐᓄᑦ, ᓱᓪᓕᑎᑦᓯᓛᕐᓂᐊᑐᑦ ᓄᖑᑎᕆᓗᑎᓘᓐᓃᑦ ᐃᓚᖏᓐᓂᒃ ᐊᑑᑎᔭᐅᔪᕆᔭᐅᓯᒪᔪᓂᒃ.

- ᑭᖑᓪᓕᐹᖅ ᐱᓇᓱᐊᕐᑕᐅᓛᕐᓂᐊᑐᖅ ᑲᑎᑎᓪᓗᒋᑦ ᖃᐅᔨᔭᐅᔪᕕᓂᓕᒫᑦ ᓄᓇᕐᔪᐊᒥᐅᒍᒻᒥᔪᑦ ᐱᐅᓯᕆᓲᖏᑦ ᑕᑯᓐᓇᓗᒋᑦ, ᐆᑦᑑᑎᒋᓗᒋᑦ ᐅᑭᐅᕐᑕᑐᒻᒪᕆᒃ, ᐅᑭᐅᕐᑕᑑᑉ ᓂᒡᒋᖓ ᐊᑯᑭᑦᑐᓗ.