• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᐅᐃᐊᔅᑦᒪᐅᓐᑦ, ᐋᕐᔪᓕᐅᑦ 11, 2017 - ᐊᕙᑕᖅ ᐱᐅᓯᑐᖃᓕᕆᕕᒃ ᐃᓚᒋᔭᐅᕗᖅ ᓯᑕᒪᐅᔪᕐᑐᓄᑦ ᓵᓚᖃᕐᑐᕕᓂᕐᓄᑦ ᐱᔪᓐᓇᐅᑏᑦ ᐃᓱᒪᕐᓲᑏᓪᓗ ᐃᓕᑕᕆᔭᐅᒍᑎᖏᓐᓂᒃ ᑯᐯᒻᒥ ᓄᓇᕐᔪᐊᒥᐅᓕᒫᑦ ᐅᕕᒐᕐᑐᐃᓗ ᐱᔪᓐᓇᐅᑎᖏᑦᑕ ᑐᕐᖃᑕᕐᕕᖓᓐᓂᑦ. ᑕᕝᕙᓂ ᐊᕐᕌᒍᕐᒥ, ᓇᓗᓀᕐᓯᐅᑎᒋᑦᓱᒍ ᖁᓕᓂᒃ ᐊᕐᕌᒍᕐᑖᓂᖓᓄᑦ ᓄᓇᕐᔪᐊᒥ ᑲᑐᑦᔨᖃᑎᒌᕐᕕᖓᑕ ᓄᓇᖃᕐᖄᓯᒪᔪᓄᑦ, ᓵᓚᖃᐅᑎᒃ ᐁᑦᑑᑕᐅᓚᐅᔪᕗᖅ ᓯᑕᒪᐅᔪᕐᑐᓄᑦ ᐱᒋᐊᓐᖓᐅᑎᕕᓂᕐᓄᑦ ᐱᓇᓱᐊᕐᓯᒪᓕᕐᓱᑎᒃ ᓴᐳᑦᔨᓂᕐᒥᒃ ᑯᐯᒻᒥ ᓄᓇᖃᕐᖄᓯᒪᔪᑦ ᐱᔪᓐᓇᐅᑎᖏᓐᓂᒃ.

ᐃᓕᑕᕆᔭᐅᒍᑎᑖᕐᑎᓯᓂᐅᓚᐅᔪᔪᖅ, ᓯᕗᓕᕐᑕᐅᓱᓂ Alexandre Bacon-ᒧᑦ, ᑖᓐᓇ ᐱᒋᐊᕐᑎᓯᖃᑕᐅᓯᒪᔪᖅ KISIS Circle-ᒥᒃ, ᐊᑑᑎᓚᐅᔪᕗᖅ ᐋᕐᔪᓕᐅᑦ 10-ᒥ BAnQ ᒧᓐᑐᔨᐊᑐᖃᕐᒥ ᐃᓚᐅᑎᓪᓗᒍ Geoffrey Kelley, ᑖᓐᓇ ᑯᐯᒻᒥ ᓄᓇᖃᕐᖄᓯᒪᔪᑦ ᑐᕐᖃᑕᕐᕕᖓ, ᐃᓚᐅᒻᒥᑎᓗᒍ Ghislain Picard, ᑖᓐᓇᑕᐅᖅ ᑯᐯᒻᒥ ᓛᐸᑕᐅᔨᒥᓪᓗ ᓄᓇᕐᖄᓯᒪᔪᑦ ᑲᑎᒪᕕᖓᑕ ᐊᖓᔪᕐᖄᖓ, ᐊᒥᓲᒻᒥᔪᑦ ᙯᕐᖁᔭᐅᒪᔪᑦ ᐱᒻᒪᕆᐅᑏᓪᓗ ᑖᕙᓃᒻᒥᑎᓗᒋᑦ.

ᕉᑕ ᑯᑭᐊᐱᒃ, ᐊᕙᑕᐅᑉ ᑲᒪᔨᒻᒪᕆᖓ, ᐅᐱᒍᓱᑦᑐᒪᕆᐅᓚᐅᔪᕗᖅ ᐃᓕᑕᕆᔭᐅᒍᑎᒥᒃ ᐁᑦᑐᑕᐅᒋᐊᖅ, ᓇᓗᓀᕐᓯᒍᑕᐅᒻᒪᑦ 36-ᓂ ᐊᕐᕌᒍᕐᓂ ᐊᕙᑕᖅ ᐊᔪᐃᓐᓇᑐᒻᒪᕆᐅᓯᒪᒻᒪᑦ ᖃᐅᔨᔭᐅᓕᐅᒥᑎᑦᓯᒐᓱᐊᕐᓱᓂ ᐊᓐᓇᑐᐃᒐᓱᐊᕐᓱᓂᓗ ᓄᓇᕕᒻᒥᐅᑦ ᐃᓄᐃᑦ ᐱᐅᓯᑐᖃᖓᓂᒃ. “ᐅᓪᓗᒥᐅᓕᕐᑐᖅ ᐃᓄᒻᒪᕇᑦ ᐃᓅᖃᑎᖃᑦᓯᐊᑐᐃᓐᓇᐳᑦ ᐅᕕᒐᕐᑐᓂᒃ ᖃᐅᔨᓚᐅᕐᓯᒪᒐᓛᓐᖏᑐᓂᒃ ᐃᓄᐃᑦ ᓄᓇᑐᐃᓐᓇᒥ ᐃᓅᒡᒍᓯᕕᓂᖓᓂᒃ, ᑌᑦᓱᒪᓂ ᐃᓅᓯᖅ ᐊᕐᓱᕈᕐᓇᑐᐊᓘᓯᒪᔪᖅ ᐊᔪᐃᓐᓇᒋᐊᖃᕐᓱᓂᓗ… ᐊᑕᐅᓯᕐᒥ ᐃᓅᓯᕐᒥᓂ, ᐃᓄᒻᒪᕆᖁᑎᕗᑦ ᐃᓅᓯᒪᕗᑦ ᖃᓪᓗᓈᖃᒐᓛᓐᖏᑐᒥ ᐅᓪᓗᒥᒧᑦ ᐃᑯᒪᐅᑎᒨᕐᑐᑦ ᐱᓇᓲᑏᑦ, ᖃᕆᑕᐅᔦᑦ ᐊᑐᕐᑕᐅᓯᑐᐃᓐᓇᕋᑕᕐᑎᓗᒋᑦ. ᐊᒥᓱᑦ ᐅᕕᒐᕐᑐᐃᑦ ᐃᓅᓯᖃᓕᕐᑐᑦ ᐱᒻᒪᕆᐊᓗᕋᑕᕐᑎᒍᑦ ᑭᓇᐅᓂᖏᑦ ᑲᑉᐱᐊᓇᕐᑐᒦᓕᕐᑎᓗᒋᑦ.” ᕉᑕ ᑌᒣᓕᓚᐅᔪᔪᖅ. ᓱᕐᖁᐃᑐᖅ ᐃᓄᑐᐃᓐᓇᐅᓱᑕ ᑭᓇᐅᓂᕗᑦ ᓄᓇᕕᒻᒥᐅᓄᑦ ᐃᓱᒫᓗᒋᔭᐅᒻᒪᕆᑦᑐᖅ “ᐊᕙᑕᕐᓗ ᐊᑕᐅᕐᑌᒫᒋᔭᖃᓲᖑᑦᓱᓂ ᐅᕕᒐᕐᑐᓂᒃ ᑎᑭᑉᐸᓕᐊᒐᒥ 40-ᑖᕆᐊᕕᑦᓱᓂ 2021-ᒥ ᓄᑕᐅᓯᓕᕐᓯᒪᓕᕐᑎᓗᒍ ᐊᑦᑕᓀᑦᑑᓂᖓ ᓂᕆᐅᓐᓂᖃᕐᓗᑎᓗ ᐱᒐᓱᐊᕐᑕᒥᓂᒃ ᐱᒍᓐᓇᓂᕐᓴᒪᕆᐅᓗᑎᒃ ᓯᕗᓂᑦᓴᑎᓂ.” ᑌᒣᓕᑦᓱᓂᓗ ᕉᑕ.

ᐅᑯᐊ ᑐᑭᑖᕆᔨᐅᓚᐅᔪᔪᑦ: Ghislain Picard, ᑖᓐᓇ ᑯᐯᒻᒥ ᓛᐸᑕᐅᔨᒥᓪᓗ ᓄᓇᕐᖄᓯᒪᔪᑦ ᑲᑎᒪᕕᖓᑕ ᐊᖓᔪᕐᖄᖓ, Viviane Michel, ᑖᓐᓇ ᑯᐯᒻᒥ ᐊᕐᓀᑦ ᓄᓇᖃᕐᖄᓯᒪᔪᑦ ᐊᖓᔪᕐᖄᖓ, Alexandre Bacon, ᑖᓐᓇ ᐱᒋᐊᕐᑎᓯᖃᑕᐅᓯᒪᔪᖅ KISIS Circle-ᒥ ᐊᒻᒪᓗ Béatrice Vaugrante, ᑖᓐᓇ ᑲᒪᔨᒻᒪᕆᒋᔭᐅᔪᖅ Amnesty International Canada Francophone-ᑯᓄᑦ.

ᖃᐅᔨᒋᐊᕐᕕᓴᖅ :

Michel Patry (ᒥᓯᐊᓪ ᐹᑦᕆ)

Institut culturel Avataq (ᐊᕙᑕᖅ ᐱᐅᓯᑐᖃᓕᕆᕕᒃ

514 989-9031, poste 286 (ᐅᖄᓚᐅᑎᖓ)