• ᑐᓴᕋᑦᓭᑦ

< ᐅᑎᕈᑎᒃ ᐊᓪᓚᖁᑎᓄᑦ

ᐃᓄᒻᒪᕇᑦ ᑲᑎᒪᓂᒻᒪᕆᖓ ᐊᕙᑎᓪᓗ ᐱᖓᓱᓪᓘᒍᑕᐅᑦᓱᓂ ᐊᑑᑎᓚᐅᔪᕗᖅ ᑲᖏᕐᓱᐊᓗᑦᔪᐊᒥ ᐆᒃᑑᐱᕆ 22ᒥᑦ 24ᒧᑦ. ᐊᕙᑎᓪᓗ ᑕᓪᓕᒪᐅᔪᕐᑐᓗ ᐃᓄᒻᒪᕇᑦ ᑲᑎᒪᓚᐅᔪᕗᑦ ᓄᓇᕕᐅᑉ ᓄᓇᓕᖁᑎᖏᓐᓂ ᐊᑐᓂ ᐱᓯᒪᑦᓱᑎᒃ ᐃᓚᐅᒻᒥᑎᓪᓗᒋᑦ ᓯᓵᓯᐱᒥᐅᑦ ᐃᓄᖏᑦ. ᑖᓐᓇ ᑲᑎᒪᓂᒻᒪᕆᖓ ᐃᓄᒻᒪᕇᑦ ᐊᕐᕌᒎᒃ ᒪᕐᕈᑕᒫᑦ ᐊᑑᑎᓲᖅ.

ᑖᒪᓐᓇ ᑲᑎᒪᓂᐅᓲᖅ ᐱᒻᒪᕆᐅᕗᖅ ᐃᓄᒻᒪᕇᓐᓄᑦ ᐊᕙᑕᒃᑯᓄᓗ, ᐃᓄᒻᒪᕇᑦ ᑎᓕᔨᓲᒍᒻᒪᑕ ᐊᕙᑕᒃᑯᑦ ᐱᓇᓱᐊᓛᓕᕐᓯᔭᖏᓐᓂᒃ ᑕᒪᑦᓱᒥᖓ ᑲᑎᒪᓂᐅᓲᒥᒃ ᐱᔪᓂᒃ. ᑌᒣᓲᒍᒐᒥ, ᑲᑎᒪᓂᖅ ᐱᒋᐊᕈᑎᖃᓚᐅᔪᕗᖅ ᐊᕙᑕᐅᑉ ᐱᓇᓱᐊᕐᓯᒪᔭᖏᑦ ᑐᓴᕐᑕᐅᑎᑦᓱᒋᑦ ᐃᓄᒻᒪᕆᓐᓄᑦ. ᐅᖄᔭᐅᓚᐅᔪᑦ ᐃᓄᒻᒪᕆᓐᓄᑦ ᐱᒻᒪᕆᖁᑎᒋᔭᐅᓗᐊᖕᖑᐊᓚᐅᔪᖅ ᑐᓂᕐᑕᓂᐊᕐᑏᑦ ᐱᓇᓱᐊᕐᑕᕕᓂᖏᑦ ᓄᓇᖕᖑᐊᓕᕆᓂᕐᓗ ᐊᑦᔨᖑᐊᖃᐅᑎᒃᑯᕕᓪᓗ. ᓄᓇᖕᖑᐊᓂᒃ ᑲᖏᕐᓱᐊᓗᑦᔪᐊᑉ ᓴᓂᐊᓃᑦᑐᓂᒃ ᓄᓇᓂᒃ ᐱᑕᓕᓐᓂᒃ ᐊᑐᐃᓪᓇᖃᒃᑫᓚᐅᔪᒻᒥᔪᒍᑦ ᑎᒍᐃᓐᓇᐅᑎᑦᓱᒋᑦ ᑲᑎᒪᒋᐊᕐᓯᒪᔪᓄᑦ ᑲᖏᒃᓱᐊᓗᑦᔪᐊᒥᐅᓄᓪᓗ.

ᐅᖄᔭᐅᓗᐊᖕᖑᐊᓚᐅᔪᒋᕗᖅ ᐅᖃᐅᓯᓕᕆᓂᖅ, ᐅᖄᒻᒥᓱᑎᓪᓗ ᐃᓄᒻᒪᕇᑦ ᐅᖃᐅᓯᕐᓂᒃ ᐅᖃᕐᑕᐅᓗᑭᒍᓐᓀᑐᓂ. ᔦᐱᑎ ᓄᖕᖓᖅ ᐅᖄᓚᐅᔪᒻᒥᔪᖅ ᑕᒪᓐᓇ ᐅᖃᐅᓯᓕᕆᓂᐅᑉ ᐱᓇᓱᐊᕐᑕᐅᓂᖓ ᖃᓄᐃᓕᖓᒍᑕᐅᓕᕐᒪᖔᑦ ᓄᓇᕕᒻᒥ.

ᑕᑯᓐᓇᑎᑦᓯᓚᐅᔪᒻᒥᔪᖅ ᑲᖏᕐᓱᐊᓗᑦᔪᐊᒥᐅᑦ ᐱᐅᓯᑐᖃᓕᕆᔨᒃᑯᖏᑦ ᐊᓯᒪᐅᑦᑕᑯᑦ ᑐᒃᑐᔭᒥᒃ ᐃᓯᕆᑦᓯᒍᓯᕐᒥᒃ. ᕿᑐᒻᒪᑐᐊᕐᒪᑦ ᑐᒃᑐᔭ ᐹᓗᓕᐊᕆᔭᐅᓲᒍᕗᖅ ᐊᒥᓱᓄᓪᓗ ᐱᐅᒋᔭᐅᑦᓱᑎᒃ ᑐᒃᑐᔦᑦ ᐹᓗᐃᑦ. ᐃᓄᒻᒪᕇᑦ ᓄᓂᕙᒋᐊᕐᑎᑕᐅᓚᐅᔪᒻᒥᔪᑦ, ᐃᓄᐃᓪᓗ ᑲᑎᒪᒋᐊᕐᓯᒪᔪᐃᓪᓗ ᓂᕆᖃᑎᒌᓚᐅᔪᒻᒥᔪᑦ ᑲᑎᒪᒋᐊᕐᓯᒪᔪᓄᑦ ᐊᑦᓱᓀᖃᑎᒌᒍᑎᒌᑦᓱᒍ.

ᐃᓄᒻᒪᕇᑦ ᑲᑎᒪᓂᒻᒪᕆᒋᓛᓕᕐᒥᔭᖓ ᐃᓄᑦᔪᐊᒦᓛᕐᑐᖅ 2021 ᐅᑭᐊᑦᓴᖓᓂ.

ᐅᑯᐊᑕᒐ ᓂᕈᐊᕐᑕᐅᓚᐅᔪᑦ ᐆᒃᑑᐱᕆ 24ᒥ:

ᔫᓯᐱ ᐹᓪᓚᔮᖅ, ᓴᓪᓗᒥᐅᖅ - ᐊᖓᔪᕐᖄᖅ

ᓵᓕ ᐋᕐᖓᖅ, ᑲᖏᕐᓱᐊᓗᑦᔪᐊᒥᐅᖅ - ᑲᑎᒪᔨ

ᑳᓓ ᐹᓕᓴ, ᐃᓄᑦᔪᐊᒥᐅᖅ - ᑲᑎᒪᔨ

ᔨᓂ ᓄᖕᖓᖅ, ᑲᖏᕐᓱᒥᐅᖅ - ᑲᑎᒪᔨ

ᓵᓚᒨᓂ ᐊᓓᑯ, ᐊᑯᓕᕕᒻᒥᐅᖅ - ᑲᑎᒪᔨ

ᐊᕙᑕᒃᑯᑦ ᓇᑯᕐᒦᐳᒎᑦ ᑮᓇᐅᔭᖃᕐᑎᓯᓚᐅᔪᓂᒃ ᐅᑯᓂᖓ:

ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᒪᑭᕝᕕᒃ ᑯᐊᐳᕇᓴ

ᐃᓚᒌᓴ

ᐃᓗᓯᓕᕆᔨᒃᑯᑦ ᓄᓇᕕᒻᒥ

ᑲᑎᕕᒃ ᐃᓕᓴᕐᓂᓕᕆᔨᒃᑯᑦ

ᓄᓇᒥ ᑎᒍᒥᐊᕐᑎᑯᑦ, ᓄᓇᓖᑦ ᑲᕙᒫᐱᒃᑯᖏᓪᓗ

ᑐᑭᓯᒋᐊᕐᕕᐅᒍᓐᓇᑐᖅ ᐊᐱᕐᓱᕈᒪᔪᖃᑐᐊᕐᐸᑦ:

ᕉᑕ ᑯᑭᐊᐱᒃ, ᑲᒪᔨᒻᒪᕆ