ᐋᓐᓂᐊᓯᐅᑎᒋᔭᐅᕙᑦᑐᕕᓃᑦ

ᐅᔭᕃᑦ ᓯᐅᕋᕐᓗ

ᐆᓇᕐᓯᓯᒪᔪᑦ ᐅᔭᕃᑦ ᓯᐅᕃᓪᓘᓃᑦ, ᐃᒧᓯᒪᑦᓱᑎᒃ ᖃᓪᓗᓈᕐᑕᒧᑦ, ᐊᑐᕐᑕᐅᕙᓪᓗᓲᑦ «ᐆᓇᕐᑐᖃᐅᑎᐅᔮᕐᑎᓗᒋᑦ.» ᑭᓯᐊᓂ ᐅᔭᕃᑦ ᓇᓪᓕᑳᕐᑕᐅᓯᐊᒻᒪᕆᒋᐊᓖᑦ. ᓴᓗᒪᔫᓗᑎᒃ ᓄᓇᐅᓪᓗ ᖄᖓᓃᓪᓗᑎᒃ, (ᓄᓇᒧᑦ ᒪᓐᖑᓯᒪᒍᓐᓀᓗᑎᒃ). ᐃᓚᖏ ᐃᓄᐃᑦ ᐊᑐᕈᒪᓂᕐᓴᐅᓲᑦ ᓵᑦᑐᔮᒥᒃ ᒪᓂᕋᐅᑦᓱᓂ ᕿᕐᓂᑕᐅᑦᓱᓂᓗ «ᓄᕝᕗᕆᑦᓴᐅᑎᒥᒃ ᐅᔭᕋᐅᑦᓱᓂ», ᐃᓚᖏᓪᓗᑕᐅᖅ ᐱᐅᓂᕐᓴᐅᔪᕆᑦᓯᑎᓪᓗᒋᑦ ᐊᐅᐸᕐᑐᓂᒃ ᐅᔭᕋᕐᓂᒃ ᑕᓯᕐᓂᑦ ᐃᒪᕐᐱᒥᓪᓘᓃᑦ ᐱᔪᕕᓂᕐᓂᑦ. ᐅᔭᕋᖃᕐᐳᖅ «ᓲᖑᔪᓂᒃ» «ᓴᓐᖐᑐᓂᓪᓗ», ᑭᓯᐊᓂ ᑖᒃᑯᐊ ᐊᑦᔨᒌᓐᖏᓂᖏᑦ ᑕᑯᑦᓴᐅᔭᖏᑦᑐᑦ ᐆᑦᑐᕋᕐᑕᐅᒋᐊᖃᓲᒍᑦᓱᑎᓗ ᓇᓪᓕᐊ ᐋᓐᓂᐊᓯᐅᑎᑦᓯᐊᖑᒐᔭᕐᒪᖔᑕ. ᐅᔭᕃᑦ ᐋᓐᓂᐊᓯᐅᑎᑦᓴᓕᐊᖑᓯᒪᔪᑦ ᐊᑦᑕᕆᐊᐱᑦᓱᒋᑦ ᓴᓂᕐᕙᑕᐅᒪᓲᑦ, ᑭᓯᐊᓂ ᐃᒋᑕᐅᓲᑦ ᐃᓄᐃᑦ ᓄᑦᑎᓕᑐᐊᕐᒪᑕ ᓄᓇᐅᒻᒥᔪᒧᑦ.

ᐊᑕᐅᓯᖅ ᐃᓄᒻᒪᕆᒃ ᐅᓂᒃᑳᓯᒪᔪᖅ ᐅᔭᕃᑦ ᒥᑦᓵᓄᑦ: «ᐊᐅᓚᔨᕗᖓ ᐃᓄᒻᒥᒃ ᐅᔭᕋᕐᒥᒃ ᑎᒍᓯᔪᒥᒃ ᓯᑦᔭᒥᑦ ᐊᓈᓇᒻᒪ ᐋᓐᓂᐊᓯᐅᑎᒋᓚᖓᔭᖓᓂᒃ. ᑲᑉᐱᐊᓱᓕᓚᐅᕐᓯᒪᔪᖓ ᐊᓈᓇᒐᓂᒃ ᓂᕆᑎᑕᐅᓂᐊᕐᑐᕆᑦᓯᓱᖓ ᐅᔭᕋᕐᒥᒃ! ᑭᓯᐊᓂ ᐆᓇᕐᓯᐊᕆᓯᓚᐅᕐᓯᒪᔭᖓ ᐅᒃᑯᓯᐅᑉ ᐃᓗᐊᓂ...»

ᓯᐅᕋᖅ ᓄᐊᑕᐅᓲᕕᓂᖅ ᐃᒪᕐᐱᐅᑉ ᓯᑦᔭᖓᓐᓂᑦ ᑎᓂᓐᖓᓕᑐᐊᕐᒪᑦ, ᐅᕝᕙᓘᓐᓃᑦ ᓴᒡᒐᑕᐅᑦᓱᓂ ᓴᒪᓐᖔᓗᒃ ᓇᑎᕐᓈᒥᑦ. ᓯᐅᕋᑦᓯᐊᒍᓂᕐᐹᖅ ᑕᐅᑦᑐᖓ ᖃᑯᕐᓂᓴᐅᕗᖅ ᐳᔪᖃᕋᓂᓗ (ᓴᓂᖃᕋᓂᓗ).

«ᐆᓇᕐᑐᖃᐅᑏᑦ» ᓯᐅᕃᓐᓇᐅᓱᑎᒃ ᐅᔭᕋᐅᑦᓱᑎᓪᓘᓃᑦ ᐃᑯᓪᓚᐅᒦᓲᑦ ᓈᓕᕆᔪᓂᒃ, ᐅᕕᓂᕐᓗᑐᓂᒃ, ᓇᑲᑦᓱᓕᕆᔪᓂᒃ, ᐊᒻᒪᓗᐊᓪᓛᑦ ᐊᕐᓇᓄᑦ ᐊᐅᓈᕐᓇᓵᕐᑐᓄᑦ. ᓂᓪᓕᒪᔪᐃᑦ ᐅᔭᕃᑦ ᐃᓅᑉ ᑐᓄᓱᖓᓐᓅᑕᐅᓲᑦ ᑎᒥᓕᒫᖓᓄᓪᓗ ᕿᖓᒃᑯᑦ ᐊᐅᓈᒻᒪᕆᑐᐊᕐᒪᑦ. ᒥᑭᔪᖅ «ᓄᕝᕗᕆᑦᓴᐅᑎᒃ ᐅᔭᕋᖅ» ᐲᕐᓯᒍᑕᐅᒍᓐᓇᒥᔪᖅ ᐃᓪᓗᑑᑉ ᐃᔨᖓᓃᑦᑐᒥᒃ ᖃᑯᕐᓯᓂᐅᓕᕐᑐᒥᒃ. ᑕᕆᐅᖅ ᐊᑐᕐᑕᐅᖔᕈᓐᓇᒥᔪᖅ ᓯᐅᕋᖅ ᐊᑐᕐᑕᐅᖏᑐᐊᕐᐸᑦ.