ᐋᓐᓂᐊᓯᐅᑎᒋᔭᐅᕙᑦᑐᕕᓃᑦ

ᑐᒃᑐᖅ

ᒪᕐᕉᓂ ᑕᕐᖀᓂ ᐅᐱᕐᖔᒍᑎᓪᓗᒍ 1983-ᒥ, ᔮᓂ ᐹᓕᓴᓗ ᐊᕐᕕᑕᓚᐅᕐᓯᒪᕗᒍᒃ 14-ᓄᑦ ᐃᓄᐃᑦ ᓄᓇᓕᖏᓐᓄᑦ ᑯᐯᒃ ᑕᕐᕋᖓᓃᑦᑐᓄᑦ, ᓄᓇᓕᓐᓂ ᐊᑐᓂᑦ ᑲᑎᒪᔪᓂᒃ ᐃᓄᒻᒪᕆᓐᓂᒃ ᐊᐱᕐᖁᓂᑲᑦᑕᓱᓄᒃ ᐋᓐᓂᐊᓯᐅᑎᒋᔭᐅᕙᑦᑐᕕᓃᑦ ᒥᑦᓵᓄᑦ. ᑖᓐᓇ ᑐᓴᕐᑎᓯᐅᑎᒃ ᓄᐃᓚᕿᔪᖅ ᖃᐅᔨᓴᕐᓂᕕᓂᑦᑎᓄᑦ.
ᖃᐅᔨᒪᔭᐅᒋᐊᓕᓐᓂᒃ ᓄᐊᑦᓯᓕᕐᓱᓄᒃ, ᐃᓄᐃᑦ ᖃᐅᔨᒪᐅᓯᖏᑦ ᐊᑦᔨᒌᓐᖏᑐᑦ ᓄᐃᕙᓪᓕᐊᒐᓛᐱᓯᓚᐅᔪᑦ. ᐊᑕᐅᓯᖅ ᖃᐅᔨᒪᐅᓯᖅ ᑕᑯᑦᓴᐅᕗᖅ ᐊᑦᔨᒌᐸᓲᒻᒪᑕ ᐊᑦᔨᒌᓪᓗᐊᕋᑎᓗ ᓄᓇᓖᑦ ᐊᑦᔨᒌᓐᖏᑐᑦ ᖃᐅᔨᒪᓂᖏᑦ ᐋᓐᓂᐊᓯᐅᑎᒋᔭᐅᕙᑦᑐᕕᓂᕐᓂᒃ. ᓄᓇᓖᑦ ᐅᖓᓯᑦᑕᕇᒻᒪᕆᐅᒐᒥᒃ ᓄᓇᓐᖑᐊᑎᒍᑦ ᐱᑐᑦᓯᒪᐅᑎᒪᕙᓪᓗᑐᐃᑦ ᐃᓚᒌᓐᓂᑎᒍᑦ. ᑕᒪᓐᓇ ᑕᑯᑦᓴᓗᑐᖅ, ᐆᑦᑑᑎᒋᓗᒍ, ᐊᑑᑎᕙᑦᑕᕕᓂᖏᑎᒍᑦ, ᓇᓂᓕᒫᖅ ᑕᑯᑦᓴᐅᓱᓂ, ᐊᕕᓐᖓᐅᑉ ᒪᒥᖓᓂᒃ ᐊᔪᐊᕐᒧᑦ ᐋᓐᓂᐊᓯᐅᑎᖃᕐᐸᓂᕕᓂᖓ. ᓄᓇᓖᑦ ᐊᑦᔨᒌᓐᖏᓂᖃᓚᐅᔪᑦ ᐊᕕᓐᖓᐅᑉ ᒪᒥᖓᑕ ᓱᑯᑦᓯᐊᓂᒃ ᐊᑐᓲᒍᓂᖏᑦ: ᐃᓚᖏᑦ ᐃᓄᐃᑦ ᐊᑐᓲᕕᓃᑦ ᑲᓈᖓᑕ ᓯᕗᓪᓕᐅᑉ ᑕᓕᕐᐱᐊᓂᒃ, ᐃᓚᖏᑦᑕᐅᖅ ᖁᓖᖓᓂᒃ, ᐃᓚᖏᑦ ᓈᖓᓂᒃ, ᐊᒻᒪᓗ ᓱᕐᖁᐃᑐᖅ ᓇᓪᓕᑐᐃᓐᓇᖓ ᐊᕕᓐᖓᐅᑉ ᒪᒥᖓᑕ ᐅᖃᕐᑕᐅᑫᓐᓇᖏᑦᑐᖅ ᐋᓐᓂᐊᓯᐅᑎᐅᒍᓐᓇᑎᓪᓗᒍ «ᓱᕙᓪᓕᐅᑕᐅᓐᖏᑑᓂᕋᕐᑕᐅᕙᑦᑐᕕᓂᖅ».

ᐊᑦᔨᒌᓐᖏᑑᓂᖓ ᐃᓄᐃᑦ ᖃᓪᓗᓈᓪᓗ ᐋᓐᓂᐊᓯᐅᕈᓯᖏᑦᑕ ᓇᓗᓇᕈᓐᓀᓚᐅᔪᖅ. ᐃᓄᐃᑦ ᐋᓐᓂᐊᓯᐅᕆᓂᕐᒥᒃ ᐋᕐᖀᓂᕐᒥᓗ ᖃᐅᔨᒪᓂᖓ ᑭᓇᓕᒫᓄᑦ ᖃᐅᔨᒪᔭᐅᑎᑕᐅᕙᑦᑐᕕᓂᖅ, ᐊᒻᒪᓗ ᐃᓄᐃᑦ ᐋᓐᓂᐊᖏᑦ ᐋᕐᕿᑕᐅᑐᐊᕐᒪᑕ ᐊᑭᓖᒋᐊᖃᕐᐸᓂᑦᔭᕋᑎᒃ. ᐃᓄᓕᒫᑦᓯᐊᑦ ᖃᐅᔨᒪᕙᑦᑐᕕᓃᑦ ᐋᓐᓂᐊᓯᐅᑎᒋᔭᐅᕙᑦᑐᕕᓃᑦ ᐊᑐᕐᑐᓚᕆᐊᓘᓂᖏᓐᓂᒃ. ᐋᓐᓂᐊᓯᐅᕈᓯᕕᓃᑦ ᐋᓐᓂᐊᕕᒻᒥᓂᑕᐅᑦᔭᖏᑦᑐᑦ – ᐃᓪᓗᖁᑎᖃᕋᑎᒃ, ᐊᓪᓚᓂᐊᒐᖃᕋᑎᒃ ᒪᓕᒐᖃᕋᑎᓪᓘᓃᑦ ᐊᒻᒪᓗ ᐃᓘᓐᓇᑲᓵᑎᒃ ᐋᓐᓂᐊᓯᐅᕆᓲᑦ ᐃᓕᓐᓂᐊᓯᒪᑦᔭᖏᑦᑐᑦ ᐃᓕᓐᓂᐊᕕᒻᒥ ᐱᔪᓐᓇᑐᓪᓚᕆᐊᓘᒐᑎᓗ ᐋᓐᓂᐊᓯᐅᕆᓂᕐᒥᒃ. ᐱᖓᓱᓗᐊᓐᖑᐊᒍᕗᑦ ᑕᑯᑦᓴᐅᓱᑎᒃ ᑕᒪᑦᓱᒨᓕᖓᓐᖏᑐᑦ: ᐃᕐᓂᓱᕐᓰᔩᑦ ᐱᓚᑦᑐᐃᔩᓪᓗ ᐃᓕᓐᓂᐊᓯᒪᒐᓚᑉᐳᓕ (ᐃᓱᒪᑕᐅᓂᖅ ᓇᓪᓕᒍᓱᓐᓂᓗ ᐃᓚᐅᔪᒻᒪᕆᐅᒐᓗᐊᕐᑎᓗᒋᒃ), ᐊᒻᒪᓗ ᐅᖃᕐᑕᐅᒪᔪᖅ ᒥᑭᕐᖑᕆᔭᖅ «ᐋᓐᓂᐊᓯᐅᑎᒻᒪᕆᒋᔭᐅᓂᕋᕐᑕᐅᔪᖅ» ᐃᓚᒌᑦᑐᓄᑦ ᐋᕐᖀᒍᓐᓇᓱᓂᓗ ᐃᓅᖃᑎᒥᑕ ᐅᕕᓂᕐᓗᓂᖏᓐᓂᒃ (ᒪᓂᕐᓇᓂᒃ ᐳᓪᓕᑐᓂᓪᓗ) ᐊᓗᐱᒍᓗᑐᐃᓐᓇᓱᒋᑦ.

ᑕᒪᒋᒃ ᐃᓄᐃᑦ «ᖃᓪᓗᓈᓪᓗ» ᐋᓐᓂᐊᓯᐅᕈᓯᒋᒃ ᐆᑦᑐᕋᕐᑕᐅᒋᐊᖃᕐᓯᒪᒻᒪᕆᑦᑑᒃ, ᑭᓯᐊᓂ ᐱᐅᓯᕐᓲᑎᒋᒃ ᐊᑦᔨᒌᒐᓛᓐᖏᑑᒃ. ᐃᓄᑐᐃᓐᓇᒧᑦ, ᐃᓘᓐᓇᓯᐊᑎᒃ ᐋᓐᓂᐊᒥᒃ ᐋᕐᖀᒐᓱᐊᕐᓃᑦ ᐆᑦᑐᕋᕐᓂᐅᓲᖑᕗᑦ, ᐊᒻᒪᓗ ᐃᓗᓯᖃᑦᓯᐊᓂᖅ «ᓱᕐᖁᐃᓯᒍᑎᑦᓴᑑᑦᓱᓂ ᓱᕐᖁᐃᓯᓂᖅ ᐃᒻᒪᖃᐅᑦᓵᓂᕐᓗ» ᐃᓚᐅᓐᖏᑑᒃ. ᑌᒣᑦᓱᓂ, ᖃᐅᔨᒪᔭᐅᒋᐊᓖᑦ ᓄᐊᑕᕕᓃᑦ ᐱᖁᔦᑦ ᒪᓕᑦᓱᒋᑦ ᐸᕐᓇᑕᐅᒪᔪᑎᒍᓪᓗ ᖃᐅᔨᔭᕕᓃᑦ ᐃᓛᓐᓂ ᐹᕐᓯᖓᐅᑎᔫᔮᕈᓐᓇᑐᑦ.

ᒫᑯᓯ ᐃᔦᑦᑐᖅ ᐅᓂᒃᑳᑐᖅ ᐃᒻᒥᓂᒃ ᐆᑦᑐᕋᕐᓂᕕᓂᕐᒥᓂᒃ: «ᐃᒻᒥᓂᒃ ᐋᓐᓂᐊᓯᐅᕆᓚᐅᕐᓯᒪᕗᖓ ᓱᕈᓯᐅᑦᓱᖓ. ᐃᓪᓗᓱᖓ ᑐᑭᑖᓚᐅᕐᓯᒪᔪᖓ ᐃᔩᒃᑲᓂᒃ ᑭᒻᒥᓇᒥᑎᓯᑦᓱᖓ. ᐋᓐᓂᓇᕐᑐᔪᐊᖑᓚᐅᕐᓯᒪᔪᖅ ᐃᓱᒪᓯᑦᓱᖓᓗ, ‘ᑐᖁᑦᓴᖏᓚᐅᕈᒪ! ᐃᔩᒃᑲ ᖄᑦᓴᖏᓚᐅᕐᐸᓂᒃ!’ ᑕᒪᓐᓇ ᐊᑑᑎᔭᕕᓂᕋ ᐃᕐᙯᖏᓐᓇᓲᕋ ᐃᓱᒪᑦᓱᖓᓗ ᐃᒻᒥᓂᒃ ᐋᕐᕿᒐᓱᐊᕐᓱᖓ ᐋᓐᓂᐊᓕᕐᑐᐊᓗᑐᐃᓐᓇᐅᓚᐅᕐᓯᒪᒐᒪ. ᐊᓯᐊᒍᑦᑕᐅᖅ, ᓇᒻᒥᓂᕐᓃᕙᖓ ᐊᔪᐊᒧᑦ ᐋᓐᓂᐊᓯᐅᑎᓕᐅᓚᐅᕐᓯᒪᔪᖓ ᐃᒣᓕᖓᔪᒥᒃ: ᐅᕝᕙᐅᑎᕐᖄᖑᕙᓚᐅᕐᑐᖅ Sunlight, ᖃᔪᑦᓴᔭᖅ Quaker Oats, ᐃᒪᖅ, ᓇᑦᓯᐅᑉ ᐅᕐᓱᖓ ᑯᓯᕐᑎᒐᓛᐱᑦᓱᒍ. ᒪᕐᓃᔦᑦᓯᐊᑐᐊᓘᓚᐅᕐᓯᒪᔪᖅ ᐊᔪᐊᕐᒥᒃ. ᑲᔪᓯᔪᕕᓂᐅᒍᒪ ᓇᒻᒥᓂᕐᓃᕙᖓ ᐋᓐᓂᐊᓯᐅᑎᓕᐅᑲᑦᑕᓂᕐᒥᒃ, ᐅᓪᓗᒥ ᐋᓐᓂᐊᓯᐅᕐᑎᒪᕆᐅᓕᕋᔭᕐᖁᖓ!»

ᐊᑦᔨᒌᑦᔭᖏᑦᑐᓂᒃ ᐱᑦᔪᑎᖃᕐᓱᓂ, ᖃᓪᓗᓈᑦ ᐋᓐᓂᐊᓯᐅᕈᓯᖏᑦ ᓯᖏᑦᓯᕙᓪᓕᐊᑐᐃᓐᓇᑐᑦ ᐃᓄᐃᑦ ᐋᓐᓂᐊᓯᐅᕈᓯᑐᖃᕕᓂᖏᓐᓂᒃ ᑕᕐᕋᒥ, ᐃᓄᐃᑦ ᐋᓐᓂᐊᓯᐅᕈᓯᖏᑦ ᐊᑐᕐᑕᐅᓲᒍᐃᓐᓈᑑᒐᓗᐊᑦ, ᐅᐱᕐᖏᕕᓂᓗᐊᓐᖑᐊᖅ ᐊᒻᒪᓗ ᓱᒐᓗᑦᑐᖅ ᖁᐊᕐᓂᑖᕐᑐᓄᑦ ᐃᒫᑲᓵᑦᑐᓄᓪᓗ, ᐃᓄᐃᑦ ᓈᒻᒪᓴᑦᔭᖏᒻᒪᑕ ᐋᓐᓂᐊᓯᐅᕐᑕᐅᒍᓯᒋᓲᒥᓐᓂᒃ ᐋᓐᓂᐊᓯᐅᕐᕕᓂ.

ᑐᑭᑖᕐᑕᐅᓚᐅᔪᖅ ᑕᕝᕙᓂ ᑐᓴᕐᑎᓯᐅᑎᒥ ᐃᓚᐅᑎᑦᓯᓚᖓᒋᐊᒥᒃ ᐋᓐᓂᐊᓯᐅᑎᒋᔭᐅᕙᑦᑐᕕᓂᓂᑐᐊᖅ, ᑌᑦᓱᒪᓂᑌᑦ ᐋᓐᓂᐊᓯᐅᑎᒋᔭᐅᕙᑦᑐᕕᓃᑦ ᐃᓄᓐᓄᑦ ᐅᓪᓗᒥᐅᓕᕐᑐᖅ ᐃᓚᖃᓕᕋᓗᐊᕐᑎᓗᒋᑦ ᐊᒥᓱᓂᒃ ᐋᓐᓂᐊᓯᐅᕈᓯᕐᓂᒃ ᓯᕿᓂᕐᒥᓂᑕᕐᓂᑦ. ᐊᑦᔨᒌᓐᖏᓂᒋᒃ «ᐱᐅᓯᑐᖃᐅᑉ» «ᓄᑖᓪᓗ» ᒋᐊᒍᓗᑐᐃᓐᓇᓯᒪᔪᕐᔫᔮᕋᓗᐊᕐᑑᒃ, ᑭᓯᐊᓂ ᕿᓂᑐᐊᕈᑦᑕ ᖃᐅᔨᒪᐅᓯᕐᒥᒃ ᐃᓄᑐᐃᓐᓇᓂᑦ ᐱᓯᒪᓪᓚᕆᑦᑐᒥᒃ, ᑕᒪᓐᓇ ᐊᑦᔨᒌᓐᖏᓂᖅ ᑕᑯᔭᐅᑎᑕᐅᓛᕐᓂᐊᑐᖅ. ᒐᓗᐊᕐᑎᓗᒍ, ᐊᑕᐅᓯᖅ ᐊᖑᑎᒃ ᐅᖃᕐᓯᒪᔪᖅ, «ᑕᒐ ᐸᐅᕐᖔᓘᑉ ‘Orange‘ ᐊᒥᕋᖓᓂᒃ ᐊᑐᕐᓱᑕ, ᖃᕋᕐᑎᓯᓲᖑᔪᒍᑦ ᐃᔨᐅᑉ ᐃᓗᐊᓄᑦ, ᐃᓪᓗᕈᓐᓀᓂᐊᕐᒪᑦ. ᐱᐅᓯᑐᖄᖅ? ᐊᐅᑲ, ᖂᓐᖏᒪᑦ, ᑭᓯᐊᓂ ᐋᕐᖀᒍᓐᓇᑐᖅ!»

ᖃᐅᔨᒪᔭᐅᒋᐊᓖᑦ ᑕᕝᕙᓂ ᑐᓴᕐᑎᓯᐅᑎᒥ ᐃᓂᓪᓚᖓᓂᓖᑦ ᒪᕐᕉᓂᒃ ᐊᑎᖃᕐᑎᓗᒋᒃ : ᐋᓐᓂᐊᓃᑦ ᐱᐅᒃᑯᑏᓪᓗ (Illnesses and Materials).

ᐊᓪᓚᑐᕕᓂᖅ Jonathan Stevens (ᔮᓇᑕᓐ ᔅᑏᕕᓐᔅ)

ᖃᐅᔨᒋᐊᓚᐅᕆᑦ

À découvrir

ᓄᓇᓕᒃ

ᐃᕗᔨᕕᒃ ᑐᑭᖃᕐᑐᖅ ᐃᒫᒃ: “ᓯᑯᐃᑦ ᐃᕗᔪᐃᑦ ᑲᑎᕐᓱᕕᖓ (ᓯᑦᔭᒥᓗᐊᓐᖑᐊᖅ).”

ᖃᐅᔨᒋᐊᒃᑲᓂᕈᒪᒍᕕᑦ


À découvrir

ᐊᓐᓄᕌᑦ

ᐊᓐᓄᕌᑦ ᑐᒃᑐᕋᕕᓂᐅᑦᓱᑎᒃ, ᓇᑦᓯᔭᕕᓂᐅᑦᓱᑎᒃ, ᒥᑎᔭᕕᓂᐅᑦᓱᑎᒃ, ᕿᒻᒥᓲᑦᓱᑎᒃ ᐊᓯᖏᓐᓂᓗ ᐆᒪᔪᕕᓂᔭᐅᑦᓱᑎᒃ.

ᖃᐅᔨᒋᐊᒃᑲᓂᕈᒪᒍᕕᑦ