ᐴᕐᑕᐅᑉ ᐱᓇᓱᐊᕐᑕᐅᓂᖓ
ᐃᓅᓯᖅ ᐃᓪᓘᑉ ᐊᐳᑎᐅᑉ ᐃᓗᐊᓂ
ᐃᓪᓗᐃᑦ ᐊᐳᑏᑦ ᐊᑦᔨᒌᑦᔭᖏᑦᑐᓂᒃ ᓴᓇᒻᒪᖃᕐᐸᑐᕕᓃᑦ ᐃᓚᒌᑦᑐᑦ ᐊᖏᓂᖏᓐᓂᒃ ᒪᓕᑦᑎᑕᐅᑦᓱᑎᒃ. ᑭᓇᓘᓐᓃᑦ ᐃᓪᓗᒥᓂᒃ ᑯᑐᔨᐊᖃᕈᒪᕙᓐᓂᖏᑦᑐᖅ, ᐃᓯᕐᓗᕕᓂᖃᓪᓗᐊᑎᓯᑦᑌᓕᕙᑦᓱᓂᓗ, ᐱᕐᓯᑐᕕᓂᐅᓕᕐᒪᓗᐊᓐᖑᐊᖅ. ᐃᓪᓗᐃᑦ ᐊᐳᑏᑦ ᖃᐅᑕᒫᑦ ᓴᓗᒻᒪᓴᕐᑕᐅᕙᑦᑐᕕᓃᑦ. ᑐᐸᑐᐊᕋᒥᒃ ᓯᓂᕝᕕᕕᓂᕐᒥᓂᒃ (ᐊᐳᑎᐅᒻᒥᔪᒥᒃ) ᒪᓂᕃᓭᕙᑦᑐᕕᓃᑦ ᑐᒻᒥᑐᕐᓱᒍ. ᐃᓪᓗᐃᑦ ᒪᕐᕉᓂᒃ ᑲᑕᖃᕙᓪᓗᓱᕖᓂᑦ. ᓴᕕᐅᔭᕐᑕᕕᓂᖅ ᓂᓚᒃ ᐃᒐᓛᓕᐊᒍᕙᑦᑐᕕᓂᖅ, ᓴᓗᒻᒪᓴᕐᑕᐅᓗᑭᒋᐊᖃᓲᒍᑦᓱᓂᓗ ᐃᓪᓗᖅ ᖃᐅᒪᓂᐊᕐᒪᑦ ᐃᑯᒪᑐᐊᒍᕙᓐᓂᕋᒥ ᐅᓪᓘᓂᖓᓂ. ᐃᓪᓘᑉ ᓇᑎᖓ ᓴᓗᒻᒪᓴᕐᑕᐅᒋᐊᖃᕐᐸᓂᕐᒥᔪᖅ, ᐋᖃᓗᐃᔭᕐᓱᒍ, ᐃᓯᕐᓗᐃᔭᕐᓱᒍ ᐃᓛᓐᓂᓗ ᐃᑎᕈᐃᔭᕐᓱᒍ. ᐊᐳᑎᑐᖃᖅ ᐲᕐᑕᐅᓱᓂ ᐊᐳᓯᕐᓱᒍ ᓄᑖᒥᒃ. ᐃᓪᓕᖅ ᐃᓪᓘᑉ ᑐᖔᓃᑦᑐᖅ ᑲᒪᒋᔭᐅᖏᓐᓇᒋᐊᖃᕐᐸᑐᕕᓂᖅ ᓴᓗᒣᓪᓕᓂᕐᐸᐅᓲᒍᓐᓂᕋᒥ. ᐃᓄᐃᑦ ᓴᓗᒪᑎᑦᓰᓇᕋᓱᐊᕐᐸᑐᕕᓃᑦ ᐃᓅᕕᑦᓴᓯᐊᒍᑎᑦᓯᒐᓱᐊᕐᓱᑎᓪᓗ ᐃᓪᓗᒥᓐᓂᒃ, ᑌᒫᑦᓭᓇᖅ ᐅᓪᓗᒥᐅᓕᕐᑐᖅ ᐃᓪᓗᕈᐊᒥᓂᒃ ᓴᓗᒪᑎᑦᓰᓇᕋᓱᐊᕐᐸᑲᒥᒃ. ᖁᕕᐊᒋᔭᐅᓐᖏᓂᕐᐹᕕᓂᖅ ᓴᓗᒻᒪᓭᓂᖅ ᓇᑎᐅᑉ ᖁᐱᓯᒪᓂᖏᓐᓂᒃ. ᓴᓗᒻᒪᓴᕐᑕᐅᑐᐊᕋᒥᒃ ᐃᓪᓗᐃᑦ ᓴᓗᒪᔪᐊᐱᐅᕙᑦᑐᕕᓃᑦ ᖃᐅᒪᔪᐊᐱᐅᑦᓱᑎᓪᓗ.
ᐅᓪᓛᑯᑦ ᐃᓪᓗᖅ ᐊᐳᑎᒃ ᐅᖁᐃᑦᑐᒪᕆᐅᕙᑦᑐᕕᓂᖅ ᐅᕐᖂᓯᓴᐅᑎᕙᓐᓂᔭᖏᒻᒪᑕ ᐅᓐᓄᐊᒥ. ᑭᓇᓕᒫᑦᓯᐊᖅ ᓯᓂᑉᐸᑐᕕᓂᖅ ᐊᓐᓄᕃᑦᑑᓱᓂ, ᐊᓐᓄᕌᖏᑦ ᐃᒧᓯᒪᑎᓪᓗᒋᑦ ᐃᓪᓕᐅᑉ ᖄᖓᓂ ᓂᕈᒥᑦᑑᑎᒐᓱᐊᒧᑦ. ᑐᐸᒃᑲᒥᒃ ᑲᒥᖏᑦ ᖁᐊᕐᕿᐅᕙᑦᑐᕕᓃᑦ, ᐊᑎᒡᒐᕋᓱᐊᕐᑕᐅᒋᐊᖃᕐᐸᓱᑎᓪᓗ ᖁᐊᒍᒻᒪᑕ. ᖃᐅᑕᒫᑦ ᐱᐊᕃᑦ ᐃᒥᕐᑕᕆᐊᖃᕐᐸᑐᕕᓃᑦ ᐊᓂᑦᓯᓗᑎᓗ ᖁᕐᕕᒥᒃ ᓯᓚ ᐃᒃᑮᓇᕐᑐᒪᕆᐅᒐᓗᐊᕐᒪᑦ. ᑌᒪ ᑌᒫᑦᓭᓇᖅ ᐱᒪᐅᑦᔨᓂᐊᓕᕐᒥᒐᒥᒃ ᐊᓈᓇᑦᓯᐊᑯᒻᒥᓂᒃ ᐃᓄᑐᖃᕐᓂᓗ ᓄᓇᕐᖃᑎᒥᓐᓂᒃ.
ᐅᕐᖂᓯᓴᐅᑎᑐᐊᕕᓂᖅ ᐃᑯᒪᑑᑦᓱᓂᓗ ᐃᓪᓘᑉ ᐊᐳᑎᐅᑉ ᐃᓗᐊᓂ ᖁᓪᓕᖅ. ᐊᓐᓄᕌᑦ ᐸᓂᕐᓯᐊᒍᕙᑦᑐᕕᓃᑦ ᖁᓪᓕᐅᑉ ᖁᓛᓂ. ᐊᖑᑏᑦ ᓇᑦᓯᑐᕕᓂᐅᓐᖏᑐᐊᕐᒪᑕ ᐅᕐᓱᐃᕈᑐᐊᕐᒪᓗ, ᐊᓂᕐᕃᑦ ᐅᖁᐃᑦᑐᐊᓘᕙᑦᑐᕕᓃᑦ ᑖᕐᑑᓱᑎᓪᓗ. ᐃᓚᒌᑦᑐᑦ ᐊᖑᑎᖃᓐᖏᑐᐊᕋᒥᒃ ᒪᙯᑦᑎᒥᒃ, ᐃᓅᓯᖏᑦ ᐊᕐᓱᕈᓐᓇᓂᕐᓴᐅᓲᕕᓃᑦ.
ᐃᓄᐃᑦ ᑌᒪᓐᖓᓕᒫᑦᓯᐊᖅ ᑯᒪᖃᓲᕕᓃᑦ ᓄᔭᑯᑖᖏᓐᓃᑐᓂᒃ ᐊᓯᖏᓐᓂᓗ ᑯᒪᐅᒻᒥᔪᓂᒃ ᐊᓐᓄᕌᖏᓐᓃᑐᓂᒃ. ᑯᒣᔦᖃᑦᑕᐅᑎᕙᑦᑐᕕᓃᑦ ᐊᑯᓂᐊᓗᒃ.
