ᐅᖃᐅᓯᑦᓴᖃᕐᕕᖃᕐᓂᖅ ᐊᐅᓚᔨᓂᕐᒧᑦ ᐄᒦᓕ ᓄᕙᓕᓐᖓᒥᒃ
ᐅᖃᐅᓯᑦᓴᖃᕐᕕᖃᕐᓂᖅ ᐊᐅᓚᔨᓂᕐᒧᑦ ᐄᒦᓕ ᓄᕙᓕᓐᖓᒥᒃ
ᐃᓘᓐᓇᑕ ᐊᕙᑕᖅ ᐱᐅᓯᑐᖃᓕᕆᕕᒻᒥᐅᑦ ᐆᒻᒪᑎᑦᑎᓂᑦ ᐱᔪᒥᑦ ᐃᕐᖃᐅᒪᑦᓯᓂᖃᕈᒪᕗᒍᑦ ᐄᒦᓕ ᓄᕙᓕᓐᖓᒥᒃ. ᐄᒦᓕ ᐱᒋᐊᕐᑎᓯᓪᓚᕆᑦᑐᕕᓂᐅᑦᓱᓂ ᓄᓇᕕᒻᒥ ᐅᖃᑦᓯᐊᖑᐊᕈᑎᓕᐅᕐᓂᒥᒃ, ᐃᓅᒍᓐᓀᒋᐊᑲᓪᓚᓚᐅᔪᕗᖅ ᑐᐊᕚᓪ-ᒥ ᐊᕐᓇᓕᓐᖑᑎᕕᒃ (ᐅᒃᑏᐱᕆ) 10, 2009-ᒥ.
ᐄᒦᓕ ᐱᔪᓐᓇᑐᓪᓚᕆᐅᑦᓱᓂ ᐃᓕᓐᓂᐊᑎᑦᓯᔨᓐᖑᒋᐊᓐᖓᓚᐅᕐᓯᒪᕗᖅ ᐳᕕᕐᓂᑐᒥ, ᑭᓯᐊᓂ ᐊᕐᕌᒎᖃᑦᑕᓯᒪᓕᕐᑐᓂ, ᐃᓕᑕᕐᓯᒪᔭᐅᓂᕐᑖᓚᕿᓯᒪᓕᓚᐅᔪᔪᖅ ᐃᓱᒪᑕᐅᓂᕐᐸᐅᒋᐊᖓ ᐅᖃᑦᓯᐊᖑᐊᕈᑎᓕᐅᕐᑎᐅᓱᓂ, ᐊᑐᐊᒐᓕᐅᕐᑎᐅᓱᓂ ᐅᓂᒃᑳᖑᐊᕐᑎᐅᓱᓂᓗ ᓄᓇᕕᒻᒥ. ᐄᒦᓕ ᐃᓅᒍᓐᓀᒋᐊᑲᓪᓚᓚᐅᔪᔪᖅ ᐊᑐᐃᓐᓇᕈᕐᑎᕆᓕᕐᓱᓂ ᐊᕐᕕᑕᕐᓂᓴᕐᒥᓂᒃ ᑕᓯᐅᔭᕐᔪᐊᒥ ᓄᓇᓕᓐᓄᑦ ᐅᓂᒃᑲᐅᔨᒋᐊᕐᑐᓗᒋᑦ, ᐱᕕᓕᒫᕐᓗᓂ, ᐊᓕᐊᓇᕐᑐᖑᐊᒍᓗᓂ ᑲᑦᓱᙰᑦᑑᓗᓂᓗ ᑕᒪᒃᑯᓅᓇ ᖃᐅᔨᒪᔭᐅᒍᑎᖃᓕᕐᓂᕋᒥ.
ᐅᓪᓗᒥ, ᐄᒦᓕᐅᑉ ᐅᖃᑦᓯᐊᖑᐊᕈᑎᓕᐊᕆᓕᓂᖏᑦ ᑕᑯᔭᐅᒍᓐᓇᑐᑦ ᐊᑦᔨᒌᓐᖏᑐᓂ ᐊᑐᐊᒐᓐᖑᑎᑕᐅᔪᕕᓂᕐᓂ ᑭᓇᓕᒫᓄᐊᖓᔪᓂᓪᓗ. ᐊᓪᓛᑦ, ᐅᖃᑦᓯᐊᖑᐊᕈᑎᓕᐊᕕᓂᖓ ᐃᓚᖓ ᐃᓚᒋᔭᐅᓪᓚᕆᑦᑐᖅ ᐱᓇᓱᐊᕐᑕᕕᓂᖓᓄᑦ ᓴᓇᓐᖑᐊᑎᐅᑉ Michel Goulet (ᒥᓯᐊᓪ ᑰᓖ), ᑖᓐᓇ ᐅᖃᑦᓯᐊᖑᐊᕈᑎᒃ ᑌᒪᓐᖓᑦ ᑕᑯᑦᓴᐅᓲᒍᓂᐊᓕᕐᑎᓗᒍ ᓴᕐᕿᑎᑕᕕᓂᖅ ᑯᐯᒃ ᓯᑎᐅᑉ ᐱᖁᔭᓕᐅᕐᕕᖓᓐᓂ. ᒪᑭᕝᕕᐅᑉ ᕿᒥᕐᕈᐊᓕᐊᕆᓲᖓ ᐅᖄᔪᕕᓂᖅ ᒪᕐᕉᓂᒃ ᑕᑯᒥᓇᕐᑐᓕᐅᕐᑏᓂᒃ/ᑐᓴᕐᓂᑐᓕᐅᕐᑏᓂᒃ ᐊᐅᔭᐅᑎᓪᓗᒍ 2008-ᒥ: ᐊᑐᐊᕈᓐᓇᑕᑎᑦ ᐅᕙᓂ.
ᐄᒦᓕ ᐊᑐᕐᑐᕕᓂᐅᒻᒥᔪᖅ ᓲᖑᔪᒻᒪᕆᐊᓘᑦᓱᓂ ᑭᓇᐅᓂᕐᒥᓂᒃ ᓴᐱᓐᖏᑑᑦᓱᓂ ᐹᒍᑎᒋᑦᓱᒍ ᐱᓗᑲᑦᑕᐅᓲᒍᓂᖏᓐᓂᒃ ᐊᕐᓀᑦ – ᑖᓐᓇ ᐃᓅᓯᐅᑉ ᐃᓗᐊᓂ ᐊᑑᑎᓪᓚᕆᑦᑕᐅᓲᖅ ᑭᓇᓕᒫᓄᑦ ᑐᓵᔭᐅᑦᓱᓂ ᐱᐅᓐᖏᑑᓂᕋᕐᓱᒍ ᐅᖃᑦᓯᐊᖑᐊᕈᑎᓕᐊᕕᓂᕐᒥᓂ ᐊᑎᓕᒻᒥᒃ “ᕿᓚᕆᑦᑐᖅ ᐃᒡᓗᕕᒐᖅ”. 2005-ᒥ, ᑖᓐᓇ ᐅᖃᑦᓯᐊᖑᐊᕈᑎᒃ ᑐᓴᕐᑕᐅᓚᐅᔪᔪᖅ ᓀᑦᑑᓱᓂ ᑕᑯᓐᓇᕋᑦᓴᓕᐊᕕᓂᕐᒥ ᑐᑭᒧᐊᕐᑎᑕᕕᓂᐅᑦᓱᓂ Brigitte Lebrasseur-ᒧᑦ (ᑉᔨᑦᓯᑦ ᓚᑉᕋᓲᕐ), ᐳᕕᕐᓂᑐᒥ ᐋᓐᓂᐊᓯᐅᑎᒃ ᐱᒋᐅᕐᓴᓱᓂᓗ ᑕᑯᓐᓇᕋᑦᓴᓕᐅᕐᓂᒥᒃ.
ᓇᑯᕐᒦᐳᒍᑦ ᑕᑯᓐᓇᕋᑦᓴᓕᐊᕕᓂᖓᓐᓂᒃ Vidéo Femmes-ᑯᑦ ᑕᑯᔭᐅᑎᑦᓯᒍᓐᓇᓯᓚᐅᔪᒐᑦᑕ ᑖᑦᓱᒥᖓ ᑕᑯᓐᓇᕋᑦᓴᒥᒃ ᐄᒦᓕ ᓄᕙᓕᓐᖓᐅᑉ ᒥᑦᓵᓄᑦ ᐅᖃᑦᓯᐊᖑᐊᕈᑎᓕᐊᕕᓂᖓᓐᓂᓗ “ᕿᓪᓚᕆᑦᑐᖅ ᐃᒡᓗᕕᒐᖅ”. ᑖᓐᓇ ᐅᖃᑦᓯᐊᖑᐊᕈᑎᒃ ᐃᓅᓯᕐᒧᐊᖓᔪᖅ ᓇᓪᓕᓂᕐᒧᓗ.
ᐊᑦᓱᓀ ᓇᔭᑦᓵᒃ, ᑕᙯᕐᓯᓯᐊᕐᓂᐊᓕᕐᐳᑐᓪᓕᐁ
ᔦᐱᑎ ᓄᓐᖓᐅᑉ ᐊᓪᓚᑕᖏᑦ
ᐃᕐᖃᐅᒪᓇᑦᓴᐳᑦ ᐊᐅᓚᔨᓕᕐᐸᓕᐊᕕᒋᓯᒪᔭᕗᑦ ᐅᓪᓗᐃᑦ ᓯᕗᓪᓖᑦ
ᑕᐅᑐᓐᖑᐊᓇᕐᓂᖏᑦ ᑕᑉᐱᑐᑦᓯᐊᒍᑦᓱᑎᒃ ᐊᓯᐅᒋᓐᓇᖃᔭᕋᑎᓪᓗ
ᐃᓪᓗᐃᑦ ᐊᐳᑏᑦ ᑐᐲᓪᓗ
ᖃᔦᑦ ᕿᒧᑦᓰᓗ
ᐃᓱᒪᔮᕐᓇᑐᖃᕐᑎᓇᒍ ᐊᓕᐊᓇᕐᑐᐊᓗᑐᐃᓐᓇᐅᓱᓂ
ᐃᓚᒌᑦᓱᑕ ᑐᕐᓱᖃᑎᒌᑉᐸᓚᐅᕋᑦᑕ –
ᐃᓪᓗᕗᑦ ᑐᕐᓲᑯᑦ ᑲᓱᕐᑎᓯᒪᑎᓪᓗᒋᒃ –
ᖁᕕᐊᓇᕐᐸᓚᐅᕐᒪᓕ, ᐃᓄᑐᐃᓐᓇᐅᓱᑕ ᓱᓕ
ᐊᑖᑕᖃᕋᓐᓄᒃ ᓄᑲᕇᓐᓂᒃ
ᐊᓈᓇᕗᓪᓗ ᓄᑲᕇᒻᒥᓱᑎᒃ
ᑕᒐ ᑕᐱᕐᖁᐊᕇᒥᒃ –
ᓇᔭᑦᓴᕇᑉᐳᒍᒃ ᐊᓂᑦᓴᕇᑦᓱᓄᓪᓗ
ᐊᑦᓯᑕᐅᓐᓂᕋᕕᑦ
ᐄᒦᓕ ᓄᔭᕐᓗᑐᕐᒥᒃ
ᐊᓈᓇᑦᓯᐊᕆᕙᒋᑦ ᐊᑖᑕᒻᒪ ᐊᓈᓇᖓ
ᐊᑖᑕᑉᐱᑦ ᐊᓈᓇᒋᕚᑎᑦ
ᐊᑖᑕᒻᒪᓗ ᐊᓈᓇᒋᕚᑎᑦ
ᖃᐅᔨᒪᓐᖏᑕᕋᓕ ᐃᕝᕕᑯᑦ ᑭᓯᐊᓂ
ᐃᓗᕕᖅ ᐃᓗᕕᐅᖃᑎᖃᕐᓱᓂ ᖁᓕᓂᒃ ᐊᓯᒥᓂᒃ
ᐅᔭᕋᓪᓚᓂ ᓇᓄᕐᑑᑉ ᖃᕐᖃᖓᑕ ᖄᖓᓂ ᕿᓚᓐᖑᐊᓂᕐᒥ
ᓄᓇᒋᕐᖄᓯᒪᔭᑦᑎᓂ – ᓴᐳᑎᓕᒐᕐᓂ
ᐊᑏᓄᓇ ᑐᕐᓱᕋᐅᓯᕐᑕᓕᐊᓗᒃ
ᐃᓚᒌᓐᓂᑕ ᐃᓗᐊᓂ ᐆᒪᑎᑦᓯᔪᐊᓗᓐᓂᒃ!
ᐊᑖᑕᒻᒪ ᐊᓈᓇᒋᓚᐅᕐᐹᑎᑦ
ᐊᑖᑕᓐᓂᒃ ᐃᕐᓂᖃᓚᐅᕐᐳᑎᑦ
ᐊᓈᓇᒻᒪ ᓴᑭᐊᐱᒋᓚᐅᕐᐹᑎᑦ
ᓄᑲᕋ ᐋᓕᕙ ᐃᑦᔪᐊᓯᓂᐅᑦᓱᓂ ᑖᑦᓱᒥᖓ ᑐᕐᓱᕋᐅᓯᕐᒥᒃ
ᐃᓕᓐᓂᒃ ᓴᑭᐊᐱᖃᖏᓐᓇᓕᒫᓚᐅᕆᕗᖅ ᐃᓱᐊᓄᑦ
ᐊᖓᔪᒐ ᔪᐊᓇᓯ ᑌᒪᓐᖓᓕᒫᖅ ᐁᕌᕐᕈᐊᐱᒋᓚᐅᕐᐯᑦ
ᑭᓇᓖ ᐳᐃᒍᕈᓐᓇᐸ ᐃᓐᖏᓗᑦᑕᐅᓯᓐᖑᐊᓕᐊᕆᓚᐅᕐᓯᒪᔭᕐᓂᒃ
ᐅᖃᐅᓯᓕᐅᕐᓯᒪᑦᓱᒍ ᐃᓐᖏᖑᐊᕐᐸᓚᐅᕐᑕᓂᒃ ᓂᕕᐊᕐᓯᐊᕌᐱᓐᓄᑦ?
“ᐃᓛᓂᑦ ᙯᒐᓱᐊᕋᕕᑦ ᐊᕿᐊᕈᓛᒃᑯᓅᓕᕐᑕ” – ᓚᔪᒥᒃ
ᑎᒍᒥᐊᓪᓗᑐᕐᐸᓚᐅᕐᑕᑎᑦ ᑌᒃᑯᐊ ᓲᕐᓗ ᐃᑎᒪᑉᐱᑦ ᐃᓗᐊᓂ
ᐁᑎᓐᖑᐊᓴᕐᓱᒋᑦ ᐃᓱᒪᑐᐃᓐᓇᒦᑦᑐᒧᑦ: ᐊᕿᐊᕈᓛᒃᑯᓄᑦ
ᓯᕗᓪᓕᐹᕕᓂᕈᓈ ᐅᖃᑦᓯᐊᖑᐊᕈᑎᓕᐅᕆᐅᕈᑎᕕᓃᑦ
ᒪᓗᒍᓱᑦᔭᑎᓐᓇᑕ ᑌᒣᑦᑑᒪ¯ᑦ?
-2-
ᐊᓃᑦ ᒫᑎᐅᓯ
ᖃᑕᓐᖑᑎᒐ ᓄᓐᖓᐅᖃᑎᒋᑦᓱᒍᓗ
ᕿᒪᑦᑎᒋᒐᑦᑎᒍ ᐊᕐᕌᒎᑉ ᐱᒋᐊᕋᑖᕐᓂᖓᓂ
ᓈᒻᒪᓯᐊᕐᑐᒥᒃ ᐅᖃᐅᓯᕐᑕᓯᓚᐅᔪᕓᑦ, ᐃᒣᓕᒍᑎᒋᑦᓱᒍ:
“ᒫᑎᐅᓯ ᐃᓅᓯᕐᒥᑕ ᐃᓱᐊᓄᑦ ᑎᑭᐅᑎᑐᐃᓐᓇᕋᑕᕐᖁᖅ
ᐊᑕᐅᓯᕕᓪᓗᓂᓘᓐᓃᑦ “ᐄᒦᓖ”-ᓚᓚᐅᕐᓯᒪᕋᑕᕋᓂ”
ᑐᑭᓯᓇᕐᑎᒋᐊᖃᓚᐅᔪᓐᖏᓓᓪᓘᓃᑦ ᑕᒪᓐᓇ –
ᑌᒪᓐᖓᑦ ᒫᑎᐅᓯᐅᑉ ᑌᖏᓐᓇᐸᓚᐅᕐᒫᑎᑦ “ᐃᒦᒥᒻᒥᒃ”
ᓇᒻᒥᓂᑦᑕᐅᖅ ᐃᓱᒪᒥᓂᒃ ᐅᖃᑦᓯᐊᖑᐊᕈᑎᖃᕐᒥᓱᓂ ᐊᑎᕐᓃᕕᑦ
ᓀᓈᕐᑎᓱᑎᒃ ᑭᐱᐅᕐᖃᓯᒪᔫᓈᕐᑎᑑᔮᕐᑐᑦ ᐃᓅᓯᑦᑎᓂᓂᑌᑦ
ᐅᑎᕐᑌᓇᖃᑦᑕᖁᑦ
ᐃᓱᒪᒻᒪ ᐃᓗᐊᓂ ᐊᐅᓚᔫᑦ ᐊᑦᔨᖑᐊᑦ ᑕᑯᓐᓇᐅᔮᕐᕕᒋᔮᕐᑕᖓᓂ
ᑌᒪᓐᖓᑦ ᐅᕙᑦᑎᓂᑦ ᓇᔫᑎᒍᓐᓀᓯᓚᐅᔪᑎᓪᓗᑎᑦ
ᐅᕙᑦᑎᓃᒍᓐᓀᓯᓃᑦ ᐅᓚᐱᕐᓴᐅᑎᑕᖃᑦᓯᐊᑎᓪᓗᒍ ᓂᐯᑦᑐᓯᐊᒍᑦᓱᓂᓗ
ᑌᑦᓱᒪᓂ ᐊᓪᓕᖏᓱᖓᕐᑐᓂ ᐅᓐᓄᑐᒃᑯᑦ
ᐃᓅᒍᓐᓀᕋᕕᑦ ᐅᑭᐅᕆᓕᕐᑕᐱᑦ 55-ᒍᒍᑎᖓᓐᓂ
ᐊᓈᓀᑦ ᐋᓚᓯᐊᐱᒃ
ᐊᔭᑯᓗᒐ
ᐅᖁᒻᒥᐊᓕᐅᕐᑐᖅ ᒪᓛᓯᒥᒃ
ᐃᓪᓗᑎᓐᓂ ᐊᐳᑎᒥ
ᐊᑖᑌᑦ ᐁᓴᑲᓪᓚᒃ
ᐊᒃᑲᒐ
ᐅᕙᓐᓂᒃ ᓱᕈᓯᐊᐱᐅᑎᓪᓗᖓ
ᐅᐱᕐᖏᕕᓕᐊᖃᑎᓕᒃ ᐃᓄᑦᓱᑐᓕᒻᒧᑦ
ᕿᒧᑦᓯᑯᑦ –
ᐊᖑᑎᓪᓚᕆᐊᓘᔪᕆᓚᕿᑎᓪᓗᖓ!
ᑌᒪᓕ ᐃᓅᓯᕗᑦ ᑎᒍᔭᐅᓕᓚᐅᕐᓯᒪᕗᖅ “ᖃᓪᓗᓈᕐᔪᐊᒍᒋᐊᓯᓂᕐᒧᑦ”
ᓱᓇᐅᕝᕓᓇ ᑌᒣᑦᑐᑰᕐᑐᓴᒫᒍᓐᓂᕋᑦᑕ
ᐊᑕᖏᕐᓗᑕ ᐃᖏᕐᕋᒋᐊᓕᕕᓂᐅᒐᑦᑕ “ᓄᑖᒨᓕᕐᑎᒐᓱᐊᕐᓂᒧᑦ”
ᑕᒪᑐᒨᓇᓗ ᐃᓘᓐᓇᑕ ᐊᒥᓱᓄᑦ ᐱᐅᓐᖏᑐᐹᓗᓐᓄᑦ ᐱᒋᐊᕐᑕᐅᓱᑕ
ᐃᓚᖏᑎᒍᑦ ᐊᐳᕐᑕᐅᕕᑦᑎᓂ ᒪᑭᑦᓵᔭᒐᑕ ᐅᐱᓐᓇᕋᓗᐊᕋᓂ
ᐱᐅᓯᑦᓯᐊᕿᓐᓂᕕᓂᑦᑎᓄᑦ ᐅᑎᑦᓯᐊᑐᐃᓐᓇᕈᓐᓇᖏᕐᓱᑕ
ᐃᓛᑎᒍᑦ ᐅᕐᕈᑕᐅᕕᕕᓂᑦᑎᓂᑦ ᒪᑭᒃᑲᓂᕈᓐᓇᓯᒐᑦᑕ
ᓯᕗᒧᑦ ᐱᓱᒍᓐᓇᓯᒍᓗᓐᖑᐊᕈᓐᓇᓯᒐᓗᐊᕐᒥᓱᑕ
ᓇᔭᖓᓕᕐᓱᑕ, ᑲᑦᓱᖓᑦᓱᑕ, ᐅᕐᕈᑲᓐᓂᑐᐃᓐᓇᕆᐊᓕᐅᔮᕐᓱᑕ
ᓱᓕᕆᑦᑖᖏᑦᑐᓴᔭᕕᓂᑐᐃᓐᓇᐅᓕᕐᓱᑕ ᐱᓯᑎᐅᓚᐅᕐᑐᕕᓂᑐᐃᓐᓇᐅᓕᕐᓱᑕ
ᓱᖁᓯᔪᐃᑦᑐᖑᐊᑦᓯᐊᕕᓂᑐᐃᓐᓇᐅᓕᕐᓱᑕ ᖁᖓᒍᐊᕐᑐᕕᓂᑐᐃᓐᓇᐅᓕᕐᓱᑕ
ᓱᓇᒧᓪᓘᓃᑦ ᑲᕙᓕᕐᑎᑕᐅᒍᓐᓇᕋᑕ ᐃᓄᑐᐃᓐᓇᐅᓯᐊᕐᓂᑎᓂ ᑌᑦᓱᒪᓂ;
ᑌᒪ ᐅᖁᒣᒋᒐᑦᓴᑖᓕᕐᓱᑕ ᐃᓱᒫᓗᓐᓇᑐᓂᒃ ᐃᓅᓯᐅᓕᕐᑐᒥ ᓄᑖᒥ
-3-
ᐅᓇᓕᑕᒐ ᐅᖃᒻᒪᕆᒍᑎᖃᕐᓂᕋ ᐃᓕᓐᓂᒃ, ᓇᔭᑦᓵᒃ
ᐃᓅᓯᕐᒥ ᐱᐅᑦᓯᐊᖏᑦᑐᓄᑦ ᓱᒋᐊᕐᑕᐅᓂᕐᓄᑦ ᐊᒥᓱᓄᑦ ᐊᕐᖁᓵᕐᑕᐅᓚᐅᕆᕗᑎᑦ
ᑭᓯᐊᓂ ᑕᒪᒃᑯᐊ ᓇᓪᓕᖏᓐᓄᓘᓐᓃᑦ ᓵᓚᒋᔭᐅᓚᐅᓐᖏᓚᑎᑦ!
ᐃᓗᑦᑎᓃᑦᑐᖅ ᐱᔪᓐᓇᑎᑕᐅᓂᖅ ᖃᐅᔨᓲᕗᑦ
ᐱᑕᖃᕐᑎᑕᐅᒍᑎᒋᑦᓱᒍ ᓱᓇᐅᕝᕙ
ᐊᑑᑎᓚᖓᔪᕆᓐᓂᖏᑦᑕᑎᓐᓂᒃ ᐊᔪᕐᓇᑐᒃᑰᕈᑎᓂᒃ ᐊᕐᖁᓵᕆᑦᓱᑕ
ᐊᓂᒍᐃᒍᑎᒋᓚᐅᕆᕙᑎᓪᓕ ᑕᒪᒃᑯᓂᖓᐅᒐᓗᐊᖅ
ᐊᓐᓇᓴᒡᒉᓇᑐᐃᓐᓇᕕᖃᓚᐅᓐᖏᓚᑎᑦ
ᐃᓅᓯᐅᑉ ᒪᓃᑦᑐᓯᐅᕐᓇᑐᕐᑕᖏᓐᓂᒃ!
ᐊᔭᒋᐊᕈᓐᓇᓚᐅᕐᑕᑎᐊᓪᓛᑦ ᑕᒪᒃᑯᐊ
ᐊᕝᕓᕈᓐᓀᑎᒋᐊᕐᓱᒋᑦ ᐊᕐᖁᑎᓐᓂᒃ!
ᐱᓱᑦᓯᐊᖏᓐᓇᑐᐃᓐᓇᒐᑐᓚᐅᕐᓇᓗ
ᐊᓪᓗᕋᕐᓂᑎᑦ ᑲᑦᓱᙰᑦᑎᓗᒋᑦ ᖁᓚᕈᑎᖃᓐᖏᑐᕐᑎᑐᑦ –
ᐊᓐᓀᑎᑕᐅᑐᐃᓐᓇᕈᒪᓇᒃ
ᓱᓇᓱᐊᕋᑦᓴᓚᕆᓐᓂᒃ ᐱᔭᑦᓴᒫᕆᔭᕕᓂᕐᓂᒃ
ᓯᓚᕐᔪᐊᖅ ᑕᑕᑦᓯᐊᕋᓗᐊᕐᑎᓗᒍ ᐊᓕᐊᓇᓐᖏᑐᓂᒃ ᖁᐊᕐᓵᓇᕐᑐᓂᒃ
ᑕᑦᓰᑎᓚᐅᔪᕚᑎᒍᓪᓕ ᑕᑎᓪᓚᓇᕐᑑᔮᕐᑐᒥᒃ ᐊᓕᐊᓇᕐᑐᐊᓗᒻᒥᒃ, ᐊᓱᒎᖅ!
ᓱᓇᐅᕝᕙ ᐅᖃᑦᓯᐅᖑᐊᕈᑎᓕᐊᕆᓯᒪᔪᓂᒃ ᐅᓂᒃᑲᐅᓯᓕᐅᓲᕕᓂᐅᔪᑎᑦ!
ᑐᓴᕆᐊᓐᖓᕋᒪ ᐅᓂᒃᑲᐅᓯᓕᐅᓲᒍᓂᕐᓂᒃ
ᐃᓚᓐᓈᕆᔭᑦᑎᓂᒃ ÿᐋᓇᒥᑦ
ᖁᓚᕈᓲᑎᒍᓗᐊᐱᒃᑲ ᒥᑭᔫᑏᑦ ᖄᕐᑎᑕᐅᑦᓯᐊᓚᐅᔪᕗᑦ
ᐃᕐᙯᓯᐊᓕᕋᒪ ᑕᑉᐱᑐᑦᓯᐊᒍᑎᓪᓗᒍ ᐃᕐᙯᓂᕋ
ᑌᑦᓱᒥᖓ ᐃᓐᖏᓗᑦᑕᐅᓯᓐᖑᐊᓕᐊᕆᓚᐅᕐᓯᒪᔭᕐᓂᒃ ᐊᕿᐊᕈᓛᒃᑯᓕᕆᔪᒥᒃ
ᑌᑦᓱᒪᓂᑲᓪᓛᓗᓂᑕᐅᓕᕐᑐᒥᒃ
ᐊᓱᐃᓛᓕ ᐅᖃᑦᓯᐊᖑᐊᕈᑎᓕᐅᓲᕕᓂᐅᔪᑎᑦ
ᓱᓇᐅᕝᕓᓇ ᐅᖃᑦᓯᐊᖑᐊᕈᑎᓕᐅᕐᑎᕕᓂᐅᔪᑎᑦ!
ᖃᓅᖅ ᐅᐱᒋᔭᖃᕈᓐᓇᐱᑕ? ᖃᓅᖅ ᐅᐱᒋᔭᖃᕈᓐᓇᐱᑕ?
ᑌᒪᓗ ᓇᑯᕆᔭᖃᑦᓯᐊᓲᑦ ᐅᖃᑦᓯᐊᖑᐊᕈᑎᓂᒃ ᑕᑯᑦᓴᑎᓪᓗᒋᓪᓗ ᐃᓕᓐᓂᒃ
ᐊᑕᓂᐅᑉ ᑎᒍᓕᕐᖄᑎᑦ
ᐱᑲᐱᓗᐊᕐᑐᒥᒃ
ᐊᑕᓂᐅᑉ ᑐᓂᓚᐅᕐᐯᑦ ᐊᑕᓂᐅᓪᓗ ᑎᒍᒋᕓᑦ
ᐊᑕᓂᐅᑉ ᐊᑎᖓ ᓂᕐᑐᑕᐅᓕ
ᕿᒻᒪᖁᓯᕐᕕᒋᓚᐅᓐᖏᓛᑎᒍᓪᓕ ᑭᑦᓴᓇᕐᑐᒥᒃ ᖁᕕᐊᓇᓐᖏᑐᒥᓪᓘᓃᑦ
ᐃᓴᕝᕕᒋ¯ᕐᐸᑎᒍᓪᓕ ᐃᓱᒻᒥᑕᐅᑦᓯᐊᓂᕐᒥᒃ
ᑲᔪᓯᔪᑦᓴᐅᓂᑦᑎᓂᒃ ᐃᓅᑦᓯᐊᕋᓱᐊᕐᓗᑕ ᐃᓕᕐᖁᓯᑦᓯᐊᕿᓪᓗᑕᓗ…
ᐊᑦᓱᓀ, ᓇᔭᑦᓵᒃ, ᑕᙯᕐᓯᓯᐊᕐᓂᐊᓕᕐᐳᑎᓪᓕᐁ
ᔦᐱᑎ ᓄᓐᖓᖅ ᓇᖏᕐᑐᖅ ᐊᓈᓇᑦᓯᐊᒥᑕ ᐃᓗᕕᖓᑕ ᑭᓪᓕᖓᓂ, ᐄᒦᓕ ᓄᔭᕐᓗᑑᑉ, ᑖᑦᓱᒪ ᐊᑎᖓ ᐊᑎᕐᑖᕆᔭᐅᓯᒪᔪᖅ ᐃᕐᖑᑕᖓᓄᑦ ᐄᒦᓕ ᓄᕙᓕᓐᖓᒧᑦ. ᐊᑦᔨᓕᐊᕕᓂᖅ ᓇᓄᕐᑑᑉ ᖃᕐᖃᖓᓂ ᓴᐳᑎᓕᒐᕐᓂ, ᓴᐳᑎᓕᒉᑦ ᐳᕕᕐᓂᑑᑉ ᓯᕿᓂᖓᓃᑦᑐᖅ 45-ᒣᓕᓄᑦ.
ᐄᒦᓕᐅᑉ ᐃᕐᖃᐅᒪᓇᕐᓂᖓ
ᐃᓕᓭᔨᐅᑦᓱᓂ ᐱᕕᓕᒫᕐᓯᒪᔪᖅ ᐱᔪᓐᓇᓂᓕᒫᒥᒍᑦ.
ᑐᓂᒪᑦᓱᓂ ᐃᓄᐃᑦ ᓯᕗᓂᑦᓴᖏᑦ ᐱᓪᓗᒋᑦ.
ᐄᒦᓕ ᐱᓇᓱᑦᑎᓚᕆᐅᓚᐅᕐᑐᖅ ᐃᓕᓭᔨᐅᒍᓐᓇᐅᑎᑖᕐᓯᒪᑦᓱᓂ Université du Québec en Abitibi Témiscamingue -ᑯᓐᓂᑦ.
ᐊᐅᓚᔨᔭᕗᑦ ᐃᓚᐅᖃᑦᑕᓯᒪᓂᖓ ᐃᓕᓴᕐᓂᑎᓐᓂᒃ ᕿᑦᑌᖓᓇᕐᑑᑎᑦᓯᖃᑦᑕᓯᒪᔪᖅ
ᐊᓕᐊᓇᕐᑑᑎᑦᓯᓱᓂᓗ. ᐃᓕᑦᓯᔪᑦᓴᐅᔮᑦᓯᐊᓱᓂ ᐱᔪᑦᓴᐅᔮᑦᓯᐊᓱᓂ ᑲᑦᓱᙰᑦᑑᓱᓂᓗ, ᓱᓇᑐᐃᓐᓇᖅ
ᐱᓇᓱᐊᕈᑎᑦᓴᖅ ᓄᐃᑕᐅᒋᐊᖃᕐᐸᑦ.
ᐄᒦᓕ ᑫᓪᓚᑐᐃᔨᐅᖃᑦᑕᓯᒪᑦᓯᐊᑐᖅ.
ᐱᐅᓯᑐᖃᕐᒥᓂᒃ ᐃᓕᓭᒍᑎᖃᕐᓱᓂ ᐃᓄᒃᑎᑐᑦ ᑲᒃᑲᓛᕌᐱᓐᓄᑦ ᓯᕗᓂᕐᒥ ᐱᔪᑦᓴᑑᓯᒍᒫᕐᑐᓄᑦ.
ᐃᓕᓭᓯᒻᒪᒥᔪᖅ ᖃᓪᓗᓈᑎᑐᑦ ᐃᓄᐊᐱᐅᑦᓱᑎᒃ ᐃᓕᓵᓂᒃ ᓇᒻᒥᓂᖅ ᐃᓅᓯᕐᒥᓂ ᐱᒐᓱᐊᓛᕐᒥᔪᓂᒃ, ᐱᔭᖃᖁᑦᓱᒋᓪᓗ.
ᐄᒦᓕ ᑐᑭᑖᓯᓚᐅᕐᓯᒪᒻᒥᔪᖅ ᐃᓕᑦᓯᒍᒪᑦᓱᓂ ᐅᖄᐅᓯᖏᑦᑕ ᐱᖓᑦᓯᐅᑎᒋᓕᕐᑕᖓᓂᒃ: ᐊᒡᒐᒧᑦ
ᐅᖄᒍᓐᓇᓂᕐᒥᒃ ᑌᒫᒃ ᑭᓯᐊᓂᒃ ᐅᖄᖃᑎᒌᒍᑎᖃᕈᓐᓇᑐᑦ ᐱᑦᔪᑎᒋᑦᓱᒋᑦ.
ᐄᒦᓕ ᐃᓄᑐᐃᓐᓇᐅᓱᓂ ᐊᕐᓇᖅ ᐃᓱᒪᒋᓕᕐᑕᒥᓂᒃ ᓂᓪᓕᕈᑎᖃᕈᓐᓇᓯᒪᑦᓯᐊᑐᖅ
ᐱᒻᒪᕆᐅᓚᑦᓯᓕᕐᑕᒥᓂᒃ, ᐃᓱᒪᒋᓕᕐᑕᒥᓂᒃ ᐊᓪᓚᒍᑎᖃᕈᓐᓇᓱᓂ ᐆᒻᒪᒥᑦᑕᒥᓂᒃ.
ᐄᒦᓕ ᐱᒍᓐᓇᓯᐊᕐᓂᒥᓂᒃ ᖁᓚᕈᑎᖃᖃᑦᑕᓯᒪᓐᖏᓗᑐᕐᕿᑐᖅ ᑕᑯᓐᓇᓐᖑᐊᓕᕐᑕᒥᓂᒃ
ᐃᒻᒥᓅᕈᑎᖃᑐᐃᓐᓇᖃᔭᑦᔭᒐᓂ ᐊᓪᓚᓯᒪᔫᓕᕐᑎᓗᒋᑦ ᓄᐃᖃᑦᑕᓱᒋᑦ, ᐃᓅᖃᑎᒥᓂᒃ
ᐱᒍᓐᓇᓯᐊᕐᓂᒥᓂᒃ ᖁᓚᕈᑎᖃᖁᔨᒐᓂᑦᑕᐅᖅ.
ᓱᕈᐃᒃᑭᓂᐊᓘᑦᓱᓂ ᐱᓇᓱᐊᓕᕐᑕᓕᒫᒥᓂᒃ ᐱᑦᓯᐊᑕᒻᒪᕆᐊᓗᒋᑦᓱᒋᓪᓗ. ᑲᒪᑦᓯᐊᖑᐊᕐᓱᓂ,
ᐃᒥᓅᕈᑎᖃᑐᐃᓐᓇᔭᕋᓂ ᒪᓂᒪᑦᓯᐊᓱᓂᓗ ᐃᑲᔫᕐᑐᓴᐅᔮᕐᓂᒧᑦ.
ᐃᓕᓴᐱ ᑐᑲᓚᒃ ᐅᐃᑦᑕᖓᖅ
ᑏᓕ ᐊᐅᐸᓗᒃ ᐊᓛᓱᐊᖅ
ᐋᓚᓯ ᕿᓐᓄᐊᔪᐊᖅ ᑐᑲᓚᒃ
ᐅᖃᐅᓯᑦᓴᖃᕐᕕᖃᕐᓂᖅ ᐊᐅᓚᔨᓂᕐᒧᑦ ᐄᒦᓕ ᓄᕙᓕᓐᖓᒥᒃ
ᐅᐱᓐᓇᖁᒻᒪᕆᑦᓱᓂ, ᐄᒦᓕ ᓄᕙᓕᓐᖓᖅ ᐃᓄᑐᐃᓐᓇᐅᓱᓂ ᐳᕕᕐᓂᑑᑉ ᒥᕝᕕᖓᓃᑦᑐᑐᐊᑦᓯᐊᒍᓚᐅᕐᓯᒪᕗᖅ ᐃᓚᒌᒍᑦᓱᑕ ᑎᑭᑦᑎᓗᑕ ᐊᐅᔭᓕᕈᑦ (ᐊᐅᒡᒍᔅᑎ) 1975-ᒥ. ᐊᒪᐅᓯᔭᓚᐅᕐᓯᒪᔪᖅ ᐊᒫᕐᓱᓂ ᐱᐊᕌᐱᒻᒥᒃ. ᖁᖓᒍᓗᑐᐃᓐᓇᓱᓂ ᐆᒻᒪᑎᑦᑎᓂᒃ ᐆᓇᕐᓰᓚᐅᕐᓯᒪᔪᖅ.
ᑌᑰᓇ ᐅᕕᒐᕐᑑᖏᓐᓈᓚᐅᕐᓯᒪᔪᖅ ᐃᓕᓭᔨᐅᑦᓱᓂ, ᑭᓯᐊᓂ 1990-ᐄᑦ ᐊᕐᕌᒍᖏᓐᓂ, ᐊᑐᐊᒐᑦᓴᓕᐅᕐᑎᖑᓚᐅᕐᓯᒪᔪᖅ ᒥᑦᓯᓕᓐᖑᐊᓕᐅᕐᑎᖑᕐᓱᓂᓗ ᓲᓱᒋᔭᐅᒻᒪᕆᑦᓱᓂ.
ᐄᒦᓕ ᐃᓚᒋᔭᐅᓯᒪᕗᖅ ᓯᕗᓪᓕᐹᓄᑦ ᐃᓄᑐᐃᓐᓇᓄᑦ ᐃᓕᓐᓂᐊᑎᑕᐅᓯᔪᓄᑦ ᐃᓕᓐᓂᐊᕕᒻᒥ, ᑭᓯᐊᓂ ᐱᑐᑦᓯᒪᓪᓚᕇᓐᓇᓱᓂ ᐃᓗᕐᕈᓯᕐᒥᓄᑦ ᐱᐅᓯᑐᖃᕐᒥᓄᓪᓗ. ᐃᓅᓕᕐᑐᕕᓂᖅ ᑕᓚᕖᓭᑦ ᖃᕆᑕᐅᔦᓪᓗ ᐊᓯᑦᔩᓂᐅᔮᓗᕋᑕᕐᑎᓇᒋᑦ ᐃᓄᐃᑦ ᐃᓗᕐᕈᓯᖃᕈᓯᖓᓐᓂᒃ.
ᐃᓚᒋᔭᐅᓐᓂᒥᔪᖅ ᓯᕗᓪᓕᐹᓄᑦ ᐃᓕᓭᔨᓄᑦ ᐃᓄᑐᐃᓐᓇᐅᓱᑎᒃ ᑲᒃᑲᓛᓂᒃ ᐃᓕᓭᔪᓄᑦ ᐅᖃᐅᓯᕐᒥᓂᒃ, ᐃᓄᒃᑎᑐᑦ – ᐅᖃᐅᓯᑐᐃᓐᓇᐅᖏᑦᑐᒥᒃ ᑭᓯᐊᓂ ᐃᓕᓐᓂᐊᑕᓕᒫᖏᓐᓂᓗ. ᑌᒣᒻᒪᓗ ᓴᕐᕿᑎᑦᓯᖃᑕᐅᓯᒪᔪᖅ ᐊᓯᑦᔨᓂᒐᓴᕐᔪᐊᓂᒃ ᐃᓕᓐᓂᐊᓂᓕᕆᓂᐅᑉ ᐃᓗᐊᓂ, ᑫᓪᓚᑐᐃᓂᖃᕐᓱᓂ ᖃᐅᔨᒪᒍᓯᐅᒋᐊᓖᑦ ᐅᖓᑖᓄᐊᓗᒃ ᓯᕗᓪᓕᐹᓂ ᑕᕐᕋᒥ ᐃᓕᓴᕐᕕᓂ ᐃᓄᒃᑎᑐᑦ ᐃᓕᓐᓂᐊᑎᑦᓯᔪᓂ ᐊᒻᒪᓗ ᓄᑕᐅᓂᕐᓴᓂᒃ ᐃᓕᓐᓂᐊᕋᑦᓴᓕᐅᕈᓯᕐᓂᒃ ᑕᑯᓐᓇᒐᖃᓗᐅᓐᖑᐊᓱᑎᒃ ᑲᒃᑲᓛᑉ ᑲᖐᒋᓗᐅᓐᖑᐊᑕᖏᓐᓂᒃ ᐃᓗᕐᕈᓯᖓᑕ ᐅᖃᐅᓯᖓᑕᓗ ᐃᓗᐊᒎᕐᑐᓂᒃ.
ᐄᒦᓕ ᑲᑦᓱᙰᑦᑐᒪᕆᐅᑦᓱᓂ ᐃᓕᒋᔭᐅᓯᒪᔪᖅ ᐱᕙᓪᓕᐊᑎᑦᓯᖃᑕᐅᑦᓱᓂ ᐳᕕᕐᓂᑑᑉ ᐃᓕᓴᕐᕕᖓᓂ ᐱᓇᓱᐊᕐᑕᐅᔪᒥᒃ ᑌᒪᓐᖓᓗ ᓄᐃᑕᔪᒃᑯᑦ ᐃᓚᐅᓲᒍᑦᓱᓂ ᐃᓕᓭᓂᕐᒥᒃ ᐃᓕᓭᔨᓂᒃ. ᐃᓄᑦᓯᐊᒍᓂᖓ ᐊᓕᐊᖏᓐᓇᓂᖓᓗ ᐆᒻᒪᑎᑦᓯᓲᒻᒪᕆᐅᑦᓱᓂ ᑲᑎᒪᓂᑦᑎᓂᒃ.
ᐃᓕᓭᔨᐅᑦᓱᓂ, ᐄᒦᓕ ᑐᑭᓯᒪᓚᐅᔪᔪᖅ ᐱᒻᒪᕆᐅᒻᒪᑦ ᐱᓐᖑᑎᑦᓯᒋᐊᖅ ᐃᓄᒃᑎᑑᕐᓱᑎᒃ ᐊᓪᓚᓂᐊᒐᕐᓂᒃ. ᑭᓯᐊᓂ ᐃᓚᒋᔭᐅᓐᓂᒥᔪᖅ ᐃᑭᑦᑑᓱᑎᒃ ᐃᓄᓐᓄᑦ ᑌᒣᒃᑯᐊᒍᖃᑎᒥᓄᑦ ᐅᐱᒍᓱᑦᑑᓱᓂ ᐊᓪᓚᓂᐊᒐᓕᕆᓂᕐᒥᒃ ᖃᓄᐃᑦᑐᑐᐃᓐᓇᓂᒃ, ᖃᓄᐃᑦᑐᑐᐃᓐᓇᓂᒃ ᐅᖃᐅᓯᖃᕋᓗᐊᕐᐸᑕ. ᑖᒃᑯᐊᓕᒫᑦ, ᐃᓚᖃᕐᓱᑎᒃ ᐊᓕᐊᓱᒍᒪᓂᖓᓂᒃ ᐊᔪᐃᓐᓇᕈᒪᓂᖓᓂᓪᓗ ᐊᓯᑦᔩᓂᕐᒥᓂᒃ ᐃᓅᓯᕐᒥᓂᒃ, ᐃᑭᑦᓯᔪᕕᓃᑦ ᒥᑦᓯᓕᓐᖑᐊᓕᐅᕐᓂᒧᑦ ᐊᐅᒫᐱᒻᒥᒃ ᐃᑭᑦᓯᓯᒪᔪᒥᒃ ᑕᕐᓂᖓᓂᒃ. ᓴᐱᕐᑌᑐᕕᓂᖅ ᓵᓐᖓᓯᒋᐊᒥᒃ ᐊᓪᓚᓯᒪᔪᕐᑕᖃᓐᖏᑐᒥᒃ ᓯᑯᑦᓴᔭᒥᒃ, ᑌᒣᒻᒪᓗ ᐃᓚᒋᓕᐅᑎᔪᕕᓂᖅ ᓯᕗᓕᕐᑎᓄᑦ ᐃᓅᑦᓱᑎᒃ ᒥᑦᓯᖑᐊᓕᐅᕐᑎᓄᑦ.
ᐄᒦᓕ ᐆᑦᑑᑎᑦᓴᓯᐊᒻᒪᕆᐊᓗᒃ ᑐᓱᓕᕐᑎᓯᓂᕐᒧᑦ ᐃᓄᓐᓂᒃ ᐊᑐᐊᒐᑦᓴᓕᐅᕐᑎᓂᒃ. ᒥᑦᓯᓕᓐᖑᐊᓕᐅᕐᓂᖅ ᐳᕐᑐᓂᕐᐹᒦᑉᐳᖅ ᐊᑐᐊᒐᑦᓴᓕᐅᕐᓂᓂ, ᑌᒣᒻᒪᓗ ᕿᓚᓈᕈᓐᓇᑐᒍᑦ ᐊᓯᖏᑦ ᓄᓇᕕᒻᒥᐅᑦ ᑐᓴᕐᓂᑐᓕᐅᕐᑏᑦ ᑕᑯᒥᓇᕐᑐᓕᐅᕐᑏᓗ ᐃᑦᔭᓯᒐᓱᐊᕋᔭᕐᓂᖏᓐᓂᒃ ᐄᒦᓕᒥᒃ, ᐅᕙᒍᑦ ᐅᐱᒍᓱᒍᓐᓇᓯᑎᓪᓗᑕ ᒥᑦᓯᓕᓐᖑᐊᓕᐊᖏᓐᓂᒃ, ᑕᑯᓐᓇᐅᔮᕐᑕᐅᓂᖏᓐᓂᒃ, ᐊᑐᐊᒐᓕᐅᕐᓂᖏᓐᓂᒃ, ᑕᑯᓐᓇᕋᑦᓴᓕᐅᕐᓂᖏᓐᓂᒃ, ᐃᓐᖏᖑᐊᕈᑎᓕᐅᕐᓂᖏᓐᓂᒃ, ᐊᒻᒪᓗ ᐊᓪᓚᓂᐊᒐᓕᐅᕐᓂᖏᓐᓂᒃ ᐃᕐᖃᓇᕐᑐᓂᒃ, ᐃᓅᖃᑎᒌᑦᑐᓂᒃ, ᐅᑉᐱᓂᓕᕆᓂᕐᒥᒃ, ᐱᓂᐊᕐᓂᓕᕆᓂᕐᒥᒃ ᐊᓯᖏᓐᓂᓗ ᖃᐅᔨᒪᐅᓯᕐᓂᒃ. ᐅᐱᓐᓇᖁᑐᐊᕈᑦᑕ, ᓱᕈᐃᒍᓐᓇᓂᕐᒧᑦ ᐊᐅᒫᐱᒃ ᐊᐅᓚᑦᔮᖀᔪᕕᓂᖅ ᐄᒦᓕᒥᒃ ᐁᑦᑑᑎᐅᓛᕐᒪᑦ ᐊᓯᖏᓐᓄᑦ, ᑲᔪᓯᓗᓂᓗ ᐅᕙᑦᑎᓂᒃ ᖃᐅᔨᑎᑦᓯᓕᐅᒥᓂᕐᒥᒃ.
Gérald McKenzie (ᔨᕌᓪ ᒪᑭᐊᓐᓯ)
Tribute to Emily Novalinga
by Carol Rowan
ᐅᒃᑑᐱᕆ 2008-ᒥ, ᐄᒦᓕ ᐃᓚᐅᓚᐅᔪᕗᖅ ᐊᑐᐊᒐᓕᐅᕐᑎᐅᓱᓂ ᐊᓂᕐᕋᒋᓐᖏᑕᒥᓐᓂ ᓄᓇᕕᒻᒥᐅᑦ ᐃᓕᓭᔩᑦ (ᐃᓕᓐᓂᐊᑎᑦᓯᔩᑦ) ᑲᑎᒪᓂᐊᕈᓯᖃᕐᓱᑎᒃ ᐊᑐᐊᒐᓕᐅᕐᑎᓗᒋᑦ. ᖁᕕᐊᓱᒻᒪᕆᓚᐅᔪᕗᖓ ᐄᒦᓕ ᐊᖏᕐᒪᑦ ᓴᓪᓗᓕᐊᖃᑕᐅᒐᔭᕐᓱᓂ ᑕᒪᑦᓱᒧᖓ ᐃᓚᐅᒋᐊᕐᑐᓗᓂ.
ᐄᒦᓕ ᙯᓯᒪᓚᐅᔪᔪᖅ ᓴᐳᒻᒥᓯᒪᒋᐊᕐᑐᓱᓂ ᐃᓕᓭᔩᑦ (ᐃᓕᓐᓂᐊᑎᑦᓯᔩᑦ) ᑕᑯᒥᓇᕐᑐᓕᐅᕐᓂᑯᒃ/ᑐᓴᕐᓂᑐᓕᐅᕐᓂᑯᑦ ᐱᕙᓪᓕᐊᓂᖏᓐᓂᒃ ᐃᓚᐅᕕᖃᕐᓱᓂᓗ ᓄᓇᕕᒻᒥᐅᑦ ᐃᓕᓭᔩᑦ (ᐃᓕᓐᓂᐊᑎᑦᓯᔩᑦ) ᑲᑎᒪᓂᐊᕈᓯᖃᕐᓱᑎᒃ ᐊᑐᐊᒐᓕᐅᕐᓂᖏᓐᓄᑦ ᐊᑐᐊᒐᓕᐅᕐᑎᐅᓱᓂ ᐊᓂᕐᕋᒋᓐᖏᑕᒥᓐᓂ. ᐱᔪᓐᓇᓂᓕᕐᔪᐊᒍᑦᓱᓂ ᐃᑦᔪᐊᕈᒥᓇᕐᑑᓚᐅᔪᔪᖅ. ᑐᓱᓕᕐᑎᓯᔪᒻᒪᕆᐅᓚᐅᔪᔪᖅ ᐊᑐᐊᒐᑦᓴᓕᐅᕐᓂᑯᓪᓗ ᐱᔪᓐᓇᑐᕐᑕᕆᔭᐅᑦᓱᓂ. ᓴᓪᓗᓃᓐᓂᒥᓂ, ᐄᒦᓕ ᐊᑐᐊᕐᓯᓚᐅᔪᔪᖅ ᐊᑐᐊᒐᓕᐊᕕᓂᕐᒥᓂᒃ ᐊᑎᓕᒻᒥᒃ ᓈᓚᑦᑐᖅ ᑕᕐᕋᖅ (ᓄᕙᓕᓐᖓᖅ, 2005). ᓄᑖᒥᒃ ᐊᑐᐊᒐᓕᐅᕐᓯᒪᒻᒥᔪᖅ ᐊᓪᓚᖑᐊᕐᓯᒪᔪᕐᑕᓕᒻᒥᒃ ᐊᑎᖃᕐᓱᓂ ᑕᑦᓯᓲᒍᓕᕐᖁᖅ (ᓄᕙᓕᓐᖓᖅ, 2008), ᑖᓐᓇ ᐊᑐᐊᒐᓕᐊᕕᓂᖓ ᑐᓐᖓᕕᓕᒃ ᑰᑦᑖᑉ ᑰᖓᓂᒃ. ᐃᓚᐅᓚᐅᔪᔪᖅ ᐃᓕᓭᔩᑦ (ᐃᓕᓐᓂᐊᑎᑦᓯᔩᑦ) ᑲᑎᒪᓂᐊᕈᓯᖓᓐᓄᑦ; ᑐᓴᕐᓂᑐᐊᓗᒻᒥᒃ ᕿᑲᕐᓂᖃᕋᓂ ᐅᖃᑦᓯᐊᖑᐊᕈᑎᓕᐅᓚᐅᔪᔪᖅ, ᑐᓴᐅᑎᑎᒍᑦ ᐊᑐᐊᕐᓯᓚᐅᔪᔪᖅ ᐅᖃᑦᓯᐊᖑᐊᕈᑎᓕᐊᕕᓂᕐᒥᓂᒃ, ᑕᒪᖏᓐᓂ ᐳᕐᑐᓂᕐᓴᓂ ᐳᒃᑭᓂᕐᓴᓂᓗ ᐳᓚᕋᓚᐅᔪᔪᖅ ᐃᓄᒃᑎᑐᑦ ᐃᓕᓐᓂᐊᑎᑦᓯᕕᓐᓂᒃ ᐊᒻᒪᓗ ᑌᑰᓇ ᐊᑐᐊᒐᓕᐅᕐᑎᐅᑎᓪᓗᒍ ᑕᑯᓂᐊᕋᑦᓴᐅᓚᐅᔪᔪᖅ ᐃᓕᒃᑰᑐᒃᑯᑦ ᓄᓇᓕᒃ ᐱᓂᐊᕐᓂᖃᕐᑎᓗᒍ ᐊᑐᐊᒐᑦᓴᑯᕕᒻᒥ.
ᐄᒦᓕ ᐱᔪᓐᓇᓂᓕᕐᔪᐊᒍᓚᐅᔪᔪᖅ ᐃᑦᔪᐊᕈᒥᓇᕐᑑᓱᓂ. ᐃᒻᒥᓂᒃ ᑐᓂᓯᒪᑦᓯᐊᓚᐅᔪᔪᖅ ᐊᑐᐊᒐᓕᐅᕐᑎᐅᓂᕐᒥᓂᒃ ᐅᖃᑦᓯᐊᖑᐊᕈᑎᓕᐅᕐᑎᐅᓂᕐᒥᓂᓪᓗ ᐊᑐᕐᓱᓂ, ᐃᓱᒪᓯᑎᐅᑦᓱᓂ, ᐃᓄᑐᐃᓐᓇᐅᓱᓂ ᐊᕐᓇᐅᓱᓂ ᐊᒻᒪᓗ ᐆᒥᖓ ᐅᖃᕈᒪᒻᒥᔪᖓ, ᑕᑯᑎᑦᓯᓚᐅᔪᔪᖅ ᐃᓕᓭᔩᑦ (ᐃᓕᓐᓂᐊᑎᑦᓯᔩᑦ) ᐃᒻᒥᓂᒃ ᑕᑯᒋᐊᕐᑐᓴᐅᒋᐊᖏᓐᓂᒃ ᐊᑐᐊᒐᓕᐅᕐᑎᐅᓂᕐᒥᓂᒃ. ᑌᒣᓘᓚᐅᔪᔪᖅ ᐃᒻᒥᓂᕿᑦᓱᓂ ᐊᑐᐊᒐᓕᐅᕐᑎᐅᓂᕐᒥᓂᒃ ᐊᑐᕐᓱᓂ ᐊᒻᒪᓗ ᑲᑦᓱᙰᑦᑑᓱᓂ ᐅᓂᒃᑲᐅᔨᓐᖑᐊᕆᐊᒥᒃ ᐅᓂᒃᑲᐅᓯᕐᓂᓗ ᑐᓴᐅᒪᖃᑎᒌᓐᓂᒥᒃ. ᐄᒦᓕ ᐊᑐᐊᒐᓕᐊᕕᓂᕐᒥᓂᒃ ᑐᓴᕐᑕᐅᑎᑦᓯᓕᑐᐊᕐᒪᑦ, ᐃᓪᓗᐊᕈᓯᖅ (ᖃᕆᐊᖅ) ᓂᐯᑦᓯᐊᓚᐅᔪᔪᖅ ᓈᓚᒐᓱᐊᒻᒪᕆᓯᑎᓪᓗᑕ, ᐅᖃᑦᓯᐊᖑᐊᕈᑎᓕᐊᕕᓂᕐᒥᓂᒃ ᐊᑐᐊᕐᓯᑎᓪᓗᒍ ᐅᖃᐅᓯᕐᓂᒃ ᐊᑐᕐᓱᓂ ᑕᑯᓐᓇᖑᐊᕐᑎᓯᔪᓂᒃ ᐊᒻᒪᓗ ᓱᕐᕙᓕᐅᕐᓱᓂ ᑎᒥᒥᓄᑦ ᓂᐱᒥᓄᓪᓗ. ᐄᒦᓕ ᐅᒃᑯᐊᒥᒃ ᐅᒃᑯᐃᓯᒍᑦᔨᓚᐅᔪᕗᖅ ᐃᓕᓭᔩᓂᒃ (ᐃᓕᓐᓂᐊᑎᑦᓯᔨᓂᒃ) ᐃᒻᒥᓂᒃ ᑕᑯᓚᕿᑎᑦᓱᒋᑦ ᐊᑐᐊᒐᓕᐅᕐᑎᐅᒋᐊᖏᓐᓂᒃ ᐃᓄᒃᑎᑐᑦ ᐅᖃᐅᓯᖃᕐᓱᓂ ᐅᖄᖃᑦᑕᓚᐅᔪᒐᒥ ᐊᒻᒪᓗ ᐅᐸᑦᑕᐅᒍᓐᓇᓯᑦᓱᓂ ᐱᐅᓯᑐᖃᕐᑎᒍᑦ ᑐᑭᖃᑦᓯᐊᑐᓂᒃ ᑕᑯᓐᓇᕋᑦᓴᓂᒃ ᖃᐅᔨᒋᐊᕐᕕᓴᕐᓂᓗ, ᓄᓇᕕᒻᒥᑦ ᐱᔪᓂᑦ.
ᓴᓪᓗᓂ ᑲᑎᒪᓂᐊᕈᓯᖃᕇᑐᐊᕐᒪᑦ, ᐄᒦᓕ ᐅᕙᓐᓂᒃ ᐅᖃᐅᑏᓚᐅᔪᔪᖅ ᓯᕗᓂᑦᓴᒥ ᐱᓇᓱᐊᕈᒪᒐᔭᕐᑕᒥᓂᒃ: ᐊᕐᕕᑕᕐᓗᓂ ᓄᓇᕕᒻᒧᑦ ᑐᓵᔭᐅᑎᑦᓯᒋᐊᕐᑐᓗᓂ ᐅᓂᒃᑲᐅᓯᓕᐊᕆᓯᒪᔭᕐᒥᓂᒃ.
