< ᐅᑎᕈᑎᒃ ᐊᓪᓚᖁᑎᓄᑦ

2011-ᒨᓕᖓᔪᖅ ᐊᕐᕌᒍᑕᒫᑦ ᓄᓇᕕᒻᒥᐅᓂᒃ ᑕᑯᒥᓇᕐᑐᓕᐅᕐᑎᓂᒃ, ᑐᓴᕐᓂᑐᓕᐅᕐᑎᓂᒃ ᐊᑐᐊᒐᓕᐅᕐᑎᓂᓪᓗ ᑮᓇᐅᔭᖃᕐᑎᓯᓂᐅᓲᖅ ᑕᒐᑕᒐ ᐱᒋᐊᕐᐳᖅ. ᓄᓇᕕᒻᒥᐅᑦ ᑕᑯᒥᓇᕐᑐᓕᐅᕐᑏᑦ, ᑐᓴᕐᓂᑐᓕᐅᕐᑏᑦ ᐊᑐᐊᒐᓕᐅᕐᑏᓗ ᑮᓇᐅᔭᕐᑖᒐᓱᐊᕈᒪᔪᑦ ᐱᓇᓱᐊᕈᒪᔭᕐᒥᓄᑦ ᒧᓐᑐᔨᐊᒦᑫᓐᓇᕈᒪᔪᓪᓘᓃᑦ ᐱᓇᓱᐊᓲᒥᓂᒃ ᖃᐅᔨᔭᐅᑎᑦᓯᒋᐊᕐᑐᓗᑎᒃ ᐱᕕᙯᓐᓈᑐᑦ ᓂᕿᑦᓯᑐᑦ, ᓄᕕᐱᕆ 15, 2010 ᑎᑭᕋᑕᕐᓗᒍ. ᑮᓇᐅᔭᕐᑖᒐᓱᐊᕈᓐᓇᓂᐅᑉ ᐃᓱᓕᕝᕕᖓ ᓱᑲᑦᑐᒥᒃ ᑎᑭᓴᕐᑐᓕᕐᑐᖅ, ᑌᒣᒻᒪᑦ ᐅᑕᕐᕿᓗᐊᑦᓴᕋᓯ ᐱᕖᕈᑐᐃᓐᓇᕋᑕᕐᓗᓯ, ᑕᒪᑦᓱᒥᖓᓗ ᑐᓴᕐᑎᓯᓗᓯ ᐃᓅᖃᑎᓯᓐᓂᒃ!

ᓇᑭᑦ ᑕᑕᕐᓴᒐᕐᑖᕈᓐᓇᒪᖔᑦᓯ

• ᑕᑕᕐᓴᒉᑦ ᓄᓇᕕᒻᒥᐅᑦ ᑮᓇᐅᔭᕐᑖᒍᑎᒋᒐᓱᐊᕈᑎᖏᑦ ᐊᑐᐃᓐᓇᐅᔪᑦ ᑭᐅᔨᐅᑉ ᓵᖓᓐᓂ ᐃᓘᓐᓀᓂ ᓄᓇᓖᑦ ᑲᕙᒫᐱᒃᑯᖏᓐᓂ.
• ᑕᑕᕐᓴᒉᑦ ᐊᑐᐃᓐᓇᐅᒥᔪᑦ ᖃᕆᑕᐅᔭᑎᒍᑦ ᓇᕐᓂᓗᒍ ᐅᓇ: online.

ᐃᑲᔪᕐᑕᐅᒍᒪᕖᑦ ᑕᑕᕐᓭᑎᓪᓗᑎᑦ ᑮᓇᐅᔭᕐᑖᒐᓱᐊᕈᑎᒥᒃ

ᐊᐱᕐᓲᑎᑦᓴᖃᕈᑦᓯ ᐃᑲᔪᕐᑕᐅᒍᒪᒍᑦᓯᓘᓐᓃᑦ ᑕᑕᕐᓭᑎᓪᓗᓯ, ᖃᐅᔨᑎᑦᓯᓗᓯ ᑲᒃᑯᐊ ᓇᓪᓕᖏᓐᓂᒃ:

Martine Dufour
Aumaaggiivik Coordinator
(Avataq)
Tel : 514-989-9031, #243
Toll-free : 1-800-361-5029
mdufour@avataq.qc.ca

Sammy Kudluk
Artist Liaison
(Makivik and Aumaaggiivik)
Tel: 819-964-2925
Toll-free: 1-877-625-4845
s_kudluk@makivik.org

________________________________________________

ᓄᓇᕕᒻᒥᐅᓂᒃ ᑮᓇᐅᔭᖃᕐᑎᓯᓂᐅᓲᑉ ᑕᑯᒥᓇᕐᑐᓕᐅᕐᓂᓄᑦ, ᑐᓴᕐᓂᑐᓕᐅᕐᓂᓄᑦ ᐊᑐᐊᒐᓕᐅᕐᓂᓄᓪᓗ ᑐᑭᑖᕐᑎᖏᑦ

ᓄᑖᑦ ᐱᖓᓱᑦ ᑐᑭᑖᕐᑏᑦ ᑎᓕᔭᐅᓲᑦ ᑐᑭᑖᖁᔭᐅᑦᓱᑎᒃ ᓄᓇᕕᒻᒥᐅᑦ ᑕᑯᒥᓇᕐᑐᓕᐅᕐᑏᑦ, ᑐᓴᕐᓂᑐᓕᐅᕐᑏᑦ ᐊᑐᐊᒐᓕᐅᕐᑏᓗ ᑮᓇᐅᔭᕐᑖᒐᓱᐊᕈᑎᕕᓂᖏᓐᓂᒃ. ᑐᑭᑖᕐᑏᑦ ᖃᐅᔨᒐᓱᐊᓲᑦ ᑮᓇᐅᔭᕐᑖᒐᓱᐊᕈᑎᕕᓂᕐᓂᒃ ᓇᓪᓕᑳᕐᓱᑎᓗ ᑭᓇᒃᑯᑦ ᑮᓇᐅᔭᕐᑖᑎᑕᐅᔪᑦᓴᐅᒪᖔᑕ, ᐃᓚᒋᔭᐅᑎᓪᓗᒍ ᒧᓐᑐᔨᐊᒦᑫᓐᓇᕆᐊᕐᑐᑐᖅ ᐃᓄᑦᔪᐊᒦᑫᓐᓇᒋᐊᕐᑐᑐᓘᓐᓃᑦ. ᑐᑭᑖᕐᑏᑦ ᑌᒪᓐᖓᓕᒫᑦᓯᐊᖅ ᐃᓄᑐᐃᓐᓇᑕᖃᓲᑦ ᒪᕐᕉᓂᒃ ᓄᓇᕕᒻᒥᐅᒍᑦᓱᑎᒃ ᑕᑯᒥᓇᕐᑐᓕᐅᕐᑏᓂᒃ, ᑐᓴᕐᓂᑐᓕᐅᕐᑏᓂᒃ ᐊᑐᐊᒐᓕᐅᕐᑏᓂᓪᓘᓃᑦ ᐊᒻᒪᓗ ᐃᓄᑐᐃᓐᓇᑕᖃᓲᖑᒐᑎᒃ ᐊᑕᐅᓯᕐᒥᒃ ᑕᑯᒥᓇᕐᑐᓕᐅᕐᑎᒥᒃ, ᑐᓴᕐᓂᑐᓕᐅᕐᑎᒥᒃ ᐊᑐᐊᒐᓕᐅᕐᑎᒥᓪᓘᓃᑦ.

ᐱᖓᓱᑦ ᑐᑭᑖᕐᑎᐅᓚᐅᔪᔪᑦ ᑭᖑᓪᓕᐹᒥ ᑮᓇᐅᔭᕐᑖᕋᓱᐊᕐᓂᖃᕐᑐᕕᓂᐅᑎᓪᓗᒍ ᑲᑎᓚᐅᔪᔪᑦ ᑰᑦᔪᐊᒥ ᓇᓪᓕᑳᕆᐊᕐᑐᓱᑎᒃ ᑭᓇᒃᑯᑦ ᑮᓇᐅᔭᕐᑖᑎᑕᐅᔪᑦᓴᐅᒪᖔᑕ 2010-ᒨᓕᖓᔪᓂᒃ ᓄᓇᕕᒻᒥᐅᑦ ᑕᑯᒥᓇᕐᑐᓕᐅᕐᑏᑦ, ᑐᓴᕐᓂᑐᓕᐅᕐᑏᑦ ᐊᑐᐊᒐᓕᐅᕐᑏᓗ ᑮᓇᐅᔭᖁᑎᖏᓐᓂᑦ ᓂᖏᕐᑎᓯᐅᑎᐅᓲᓂᑦ.

ᐅᑯᐊ ᑐᑭᑖᕐᑎᐅᓚᐅᔪᔪᑦ:

• ᔮᔨ ᐱᓗᕐᑑᑦ (ᓴᓇᓐᖑᐊᑎ ᑲᖏᕐᓱᔪᐊᕐᒥᐅᖅ)
• ᐄᑐᐊ ᓯᓅᐸ (ᑐᓴᕐᓂᔮᕐᑎᓯᔨ ᑰᑦᔪᐊᒥᐅᖅ)
• Maurice Achard (ᒧᕇᔅ ᐊᓵᕐ) ᒪᕐᕋᓴᔭᕐᓂᒃ ᓯᑎᓂᕐᓴᓂᒃ ᑕᑯᒥᓇᕐᑐᓕᐅᕐᑎ ᑕᑯᒥᓇᕐᑐᓕᐊᕕᓂᕐᓂᓗ ᑕᑯᑦᓴᐅᑎᑦᓯᔨ ᒧᓐᑐᔨᐊᒥᐅᖅ)

2011-ᒥ ᑐᑭᑖᕐᑎᐅᓛᕐᑐᑦ ᑕᑯᔭᐅᕋᑕᓐᖏᑐᑦ. ᑐᑭᑖᕐᑎᖑᕐᑐᑦ ᑌᔭᐅᓛᕐᓂᐊᑐᑦ ᐅᑭᐅᒍᓚᖓᔪᒥ ᐱᔭᑦᓴᖃᕐᑎᑕᐅᓛᕐᓱᑎᓗ ᓇᓪᓕᑳᕐᓂᒥᒃ ᑭᓇᒃᑯᑦ ᑮᓇᐅᔭᕐᑖᑐᑦᓴᐅᒪᖔᑕ.

________________________________________________

ᑕᑯᒥᓇᕐᑐᓕᐅᕐᓂᒧᑦ, ᑐᓴᕐᓂᑐᓕᐅᕐᓂᒧᑦ ᐊᑐᐊᒐᓕᐅᕐᓂᒧᓪᓗ ᓂᖏᕐᑎᓯᐅᑏᑦ (ᐃᓗᓕᖓ I)

ᑕᑯᒥᓇᕐᑐᓕᐅᕐᓂᒧᑦ, ᑐᓴᕐᓂᑐᓕᐅᕐᓂᒧᑦ ᐊᑐᐊᒐᓕᐅᕐᓂᒧᓪᓗ ᓂᖏᕐᑎᓯᐅᑏᑦ (ᐃᓗᓕᖓ I) ᐱᔪᓐᓇᑐᓪᓚᕆᐅᑦᓱᑎᒃ ᑕᑯᒥᓇᕐᑐᓕᐅᕐᑎᓂᒃ, ᑐᓴᕐᓂᑐᓕᐅᕐᑎᓂᒃ ᐊᑐᐊᒐᓕᐅᕐᑎᓂᓪᓗ ᑮᓇᐅᔭᕐᑖᕕᐅᒍᓐᓇᓲᑦ $10,000-ᓂᒃ (ᐃᒻᒥᑯᐊᕐᑎᑐᓄᑦ) ᐅᕝᕙᓘᓐᓃᑦ $15,000-ᓂᒃ (ᐃᒻᒥᒎᕐᑎᑐᓄᑦ).

ᑮᓇᐅᔭᕐᑖᕈᑕᐅᒍᓐᓇᑐᑦ ᐱᓇᓱᐊᕐᑕᐅᓲᑦ:

• ᓇᒻᒥᓂᖅ ᐃᓂᕐᓯᕙᓪᓕᐊᓂᕕᓃᑦ, ᐃᓂᕐᑕᕕᓃᑦ, ᐃᕐᐸᑎᑕᕕᓃᑦ, ᐃᓕᓐᓂᐊᒪᕆᓐᓃᑦ ᐱᓇᓱᐊᕆᐊᕐᑐᓱᓂ ᐊᐅᓚᓃᓪᓘᓃᑦ;
• ᐱᓇᓱᐊᕋᑦᓭᑦ ᑲᑐᑦᔮᒍᑦᓱᑎᒃ ᐃᑲᔪᕐᓯᒪᑎᓪᓗᒍ ᐱᔪᓐᓇᑐᓪᓚᕆᐅᑦᓱᓂ ᑕᑯᒥᓇᕐᑐᓕᐅᕐᓂᒧᑦ ᑎᒥᐅᔪᖅ ᐅᕝᕙᓘᓐᓃᑦ ᐃᓕᑕᕆᔭᐅᒪᑦᓱᓂ ᐱᔪᓐᓇᑐᓪᓚᕆᐅᑦᓱᓂᓗ ᑕᑯᒥᓇᕐᑐᓕᐅᕐᑎ, ᑐᓴᕐᓂᑐᓕᐅᕐᑎ ᐊᑐᐊᒐᓕᐅᕐᑎᓘᓐᓃᑦ.

ᑮᓇᐅᔭᕐᑖᕈᑕᐅᒍᓐᓇᑐᑦ ᑮᓇᐅᔭᕐᑑᑏᑦ:

• ᐱᒍᑦᔭᐅᓂᕐᒧᑦ ᐊᑭᓖᒍᑏᑦ, ᐃᓅᒐᓱᐊᕐᓂᖏᓐᓄᑦ ᐊᐅᓚᓂᖏᓐᓄᓗ ᑕᑯᒥᓇᕐᑐᓕᐅᕐᑏᑦ, ᑐᓴᕐᓂᑐᓕᐅᕐᑏᑦ ᐊᑐᐊᒐᓕᐅᕐᑏᓘᓐᓃᑦ ᐊᓯᖏᓐᓂᓗ ᐃᓚᐅᖃᑕᐅᔪᓄᑦ ᐱᓇᓱᐊᕐᑕᐅᔪᒧᑦ;
• ᐱᔪᓐᓇᑐᓪᓚᕆᓐᓄᑦ ᐱᒍᑦᔭᐅᓂᕐᒧᑦ ᐊᑭᓖᒍᑏᑦ, ᐊᐅᓚᓂᖏᓐᓄᑦ ᖃᐅᑕᒫᕐᓯᐅᑎᖏᓐᓄᓗ ᐊᑭᓖᒍᑏᑦ ᐊᖏᖃᑎᒌᒍᑎᑎᒎᕐᑐᓂᒃ, ᐃᑲᔪᕐᓯᒪᔪᓂᒃ, ᖃᐅᔨᒋᐊᕐᕕᐅᖃᑦᑕᓲᓂᒃ, ᐱᓇᓲᑎᓕᕆᔨᓂᒃ ᐊᓯᖏᓐᓂᓗ ᐱᓪᓗᑯᒋᐊᓕᑎᒍᑦ ᐃᑲᔪᕐᑐᕕᓂᕐᓂᒃ ᖃᕆᑕᐅᔭᑎᒍᑦ ᐱᓇᓱᐊᕐᑕᐅᒋᐊᓕᓐᓂᒃ ᐱᓇᓱᐊᕐᑕᐅᔪᒨᓕᖓᑦᓱᑎᒃ;
• ᐱᐅᒃᑯᑏᑦ, ᐱᓇᓲᑏᑦ ᐊᑦᑕᑐᕐᑕᐅᓂᖏᓐᓄᑦ ᐊᑭᓖᒍᑏᑦ ᑖᒃᑯᐊᓗ ᐊᐅᓚᑕᐅᓂᖏᓐᓄᑦ ᐊᑭᓖᒍᑏᑦ ᐊᑦᑐᐊᓱᑎᒃ ᐱᓇᓱᐊᕐᑕᐅᔫᑉ ᐱᔭᕇᕐᑕᐅᓂᖓᓄᑦ;
• ᖃᐅᔨᔭᐅᑎᑦᓯᒐᓱᐊᕐᓂᒧᑦ ᐊᑭᓖᒍᑏᑦ;
• ᐃᓂᕐᓯᕙᓪᓕᐊᓂᕐᒧᑦ ᐊᑭᓖᒍᑏᑦ;
• ᐱᔪᓐᓇᑐᓪᓚᕇᑦ ᐱᕙᓪᓕᐊᔭᐅᓂᖏᓐᓄᑦ ᐃᓕᓐᓂᐊᑎᑦᓯᓂᖏᓐᓄᓗ ᐊᑭᓖᒍᑏᑦ.

________________________________________________

ᑐᖓᓕᐊ ᓄᓇᕕᒻᒥᐅᖅ ᑕᑯᒥᓇᕐᑐᓕᐅᕐᑎ, ᑐᓴᕐᓂᑐᓕᐅᕐᑎ ᐊᑐᐊᒐᓕᐅᕐᑎᐅᓘᓐᓃᑦ ᒨᓐᑐᔨᐊᒦᑫᓐᓇᓂᖓᑕ ᐃᓚᒋᓕᐅᑎᑎᑕᐅᓂᖓ

ᐊᕐᕌᒍᑕᒫᑦ, ᐃᓗᓕᖓᑕ ᑐᖓᓕᐊ ᑮᓇᐅᔭᓂᒃ ᓂᖏᕐᑎᓯᓂᕐᒨᓕᖓᔪᖅ (ᐃᓗᓕᖓ II-ᐁ)-ᒍᓂᕋᕐᑕᖅ ᑮᓇᐅᔭᖃᕐᑎᓯᓲᖅ ᓄᓇᕕᒻᒥᐅᒥᒃ ᑕᑯᒥᓇᕐᑐᓕᐅᕐᑎᒥᒃ, ᑐᓴᕐᓂᑐᓕᐅᕐᑎᒥᒃ ᐊᑐᐊᒐᓕᐅᕐᑎᒥᓪᓘᓃᑦ ᒧᓐᑐᔨᐊᒦᑫᓐᓇᑐᒥᒃ. ᒧᓐᑐᔨᐊᒥᑫᓐᓇᓂᖅ ᓯᕕᑐᓂᖃᓲᖅ ᒪᕐᕉᓂ ᑕᕐᖀᓂ, ᑖᒃᑯᓈᓂ ᒪᕐᕉᓂ ᑕᕐᖀᓂ, ᑕᑯᒥᓇᕐᑐᓕᐅᕐᑎ, ᑐᓴᕐᓂᑐᓕᐅᕐᑎ ᐊᑐᐊᒐᓕᐅᕐᑎᓘᓐᓃᑦ ᐊᑭᓕᕆᐊᖃᓐᖏᑐᒥᒃ ᐊᓂᕐᕋᒦᑦᑎᓗᒍ ᒧᓐᑐᔨᐊᑉ ᐃᓪᓗᔪᐊᖃᕐᕕᖓᓐᓂ ᑮᓇᐅᔭᕐᑖᑎᑕᐅᑦᓱᓂᓗ $10,000-ᓂᒃ.

ᒧᓐᑐᔨᐊᒦᑫᓐᓇᓂᖅ ᐊᔪᒌᑦᑐᖑᐊᒍᑦᓱᓂ ᐱᕕᑦᓴᓯᐊᒍᕗᖅ ᓄᓇᕕᒻᒥᐅᖅ ᑕᑯᒥᓇᕐᑐᓕᐅᕐᑎ, ᑐᓴᕐᓂᑐᓕᐅᕐᑎ ᐊᑐᐊᒐᓕᐅᕐᑎᓘᓐᓃᑦ ᐱᐅᓯᐅᒦᒋᐊᕈᓐᓇᑎᓪᓗᒍ ᐆᒻᒪᑎᑦᓯᒋᐊᓪᓚᓗᓂᓗ ᐃᓂᕐᓯᒍᓯᕐᒥᓂᒃ ᕿᒥᕐᕈᓗᓂ ᒧᓐᑐᔨᐊᒦᑦᑐᓂᒃ ᑕᑯᒥᓇᕐᑐᓕᐅᕐᑏᑦ, ᑐᓴᕐᓂᑐᓕᐅᕐᑏᑦ ᐊᑐᐊᒐᓕᐅᕐᑏᓗ ᐱᓇᓱᐊᓕᓂᖏᓐᓂᒃ. ᐊᒥᓱᒻᒪᕆᐅᕗᑦ ᐱᑦᔪᑏᑦ ᓇᓪᓕᑳᕐᓂᒧᑦ ᑕᑯᒥᓇᕐᑐᓕᐅᕐᑎᒥᒃ, ᑐᓴᕐᓂᑐᓕᐅᕐᑎᒥᒃ ᐊᑐᐊᒐᓕᐅᕐᑎᒥᓪᓘᓃᑦ: ᑲᑎᓯᑲᑦᑕᓱᑎᒃ ᐊᓂᕐᕋᓯᒪᔪᓂᒃ ᑕᑯᒥᓇᕐᑐᓕᐅᕐᑎᓂᒃ, ᑐᓴᕐᓂᑐᓕᐅᕐᑎᓂᒃ ᐊᑐᐊᒐᓕᐅᕐᑎᓂᓪᓘᓃᑦ, ᐃᓕᓐᓂᐊᕆᐊᑲᑦᑕᓂᖅ, ᑕᑯᓐᓇᐅᔮᕐᑕᐅᖃᑕᐅᓂᖅ, ᑕᑯᓂᐊᕋᕐᓂᖅ ᑕᑯᔭᕐᑐᕕᓐᓂᒃ, ᐊᓯᖏᓪᓗ.

ᒧᓐᑐᔨᐊᒦᑫᓐᓇᓂᐅᓛᓕᕐᒥᔪᖅ ᐊᑑᑎᓛᕐᑐᖅ ᐅᑑᐱᕆ-ᒥᑦ ᑎᓯᐱᕆ-ᒧᑦ 2011-ᒥ.

________________________________________________

ᓓᓇ ᓄᓗᑭ: ᑕᑯᒥᓇᕐᑐᓕᐅᕐᑎ ᒧᓐᑐᔨᐊᒦᑫᓐᓇᓛᓯᔪᖅ

ᑕᑯᒥᓇᕐᑐᓕᐅᕐᑎ ᓓᓇ ᓄᓗᑭ ᐃᓄᑦᔪᐊᒥᐅᔭᖅ ᑕᑯᒥᓇᕐᑐᓕᐅᕐᑎᐅᕗᖅ ᓇᓪᓕᑳᕐᑕᕕᓂᐅᑦᓱᓂ 2010-ᒥ ᒧᓐᑐᔨᐊᒦᑫᓐᓇᓛᕐᑎᓗᒍ.

ᐅᑑᐱᕆ 1-ᒥ, ᓓᓇ ᒧᓐᑐᔨᐊᓕᐊᓛᕐᑐᖅ ᑖᕙᓃᓛᕐᓱᓂᓗ ᒪᕐᕉᓂ ᑕᕐᖀᓂ. ᐊᓂᕐᕋᒦᓛᕐᑐᖅ ᐊᑦᑕᑐᕐᑕᐅᔪᒥᒃ ᑯᐯᒻᒥ ᑕᑯᒥᓇᕐᑐᓕᐅᕐᑏᑦ ᑲᑎᒪᔨᖏᓐᓄᑦ, ᑌᒣᓚᐅᔪᒻᒥᒪᑦ ᓯᕗᓪᓕᐅᓚᐅᔪᔪᖅ ᑮᓇᐅᔭᓂᒃ ᓂᖏᕐᑎᑕᐅᓚᐅᔪᔪᖅ, ᓯᐊᓯ ᖁᖏᐊᖅ ᔫᓐᔅ, 2009 ᐅᑭᐊᑦᓴᖓᓐᓂ.

ᑕᑯᒥᓇᕐᑐᓕᐅᕐᑎ ᐸᕐᓇᓯᒪᔪᖅ ᑲᔪᓯᓛᕐᓂᒥᓂᒃ ᕿᒥᕐᕈᓗᓂ ᑕᑯᒥᓇᕐᑐᓕᐊᕕᓂᕐᓂᒃ ᒥᖑᐊᕐᑕᕕᓂᕐᓂᓗ ᑕᑯᓂᐊᕋᖃᑦᑕᓛᕐᓱᓂᓗ ᐊᒥᓱᐃᓂᒃ ᒧᓐᑐᔨᐊᒦᑦᑐᓂᒃ ᑕᑯᒥᓇᕐᑐᓕᐅᕐᓂᒧᑦ ᑕᑯᔭᕐᑐᕕᓐᓂᒃ.

ᓄᓇᕕᒻᒥᐅᓂᒃ ᑮᓇᐅᔭᓂᒃ ᓂᖏᕐᑎᓯᓲᑦ ᐱᒐᓱᐊᕐᑕᖓᓐᓂᒃ ᐱᔭᖃᖃᑦᓯᐊᖁᔨᔪᑦ ᒧᓐᑐᔨᐊᒦᑫᓐᓇᓂᖓᓂ.

________________________________________________

ᑕᑯᒥᓇᕐᑐᓕᐅᕐᑎᐅᑉ, ᑐᓴᕐᓂᑐᓕᐅᕐᑎᐅᑉ ᐊᑐᐊᒐᓕᐅᕐᑎᐅᓘᓐᓃᑦ ᓄᓇᕕᒻᒦᑫᓐᓇᓂᖓ

ᑮᓇᐅᔭᓂᒃ ᓂᖏᕐᑎᓯᓂᐅᓲᑉ ᐱᓇᓱᐊᕐᑕᐅᓂᖓᓂ, ᓅᓯᒪᑫᓐᓇᓂᐅᓲᖅ ᐃᓕᖓᑐᐃᓐᓇᓛᕆᑦᑐᖅ ᐃᓄᑐᐃᓐᓇᐅᖏᑦᑐᓄᑦ ᑯᐯᒻᒥᐅᒍᑦᓱᑎᒃ ᑕᑯᒥᓇᕐᑐᓕᐅᕐᑎᓄᑦ, ᑐᓴᕐᓂᑐᓕᐅᕐᑎᓄᑦ ᐊᑐᐊᒐᓕᐅᕐᑎᓄᓪᓘᓃᑦ ᖃᐅᔨᒋᐅᕈᒪᔪᓄᑦ ᓄᓇᕕᒻᒣᑫᓐᓇᓂᐅᑉ ᒥᑦᓵᓄᑦ. ᑕᑯᒥᓇᕐᑐᓕᐅᕐᑎ ᐃᓪᓗᕈᐊᖃᕐᑎᑕᐅᓛᕐᑐᖅ ᒪᕐᕉᓂ ᑕᕐᖀᓂ 2011 ᐊᐅᔭᖓᓐᓂ ᑮᓇᐅᔭᓂᓗ ᓂᖏᕐᑎᑕᐅᓗᓂ $10,000-ᓂᒃ.

ᑐᑭᑖᕐᑏᑦ ᓇᓪᓕᑳᓲᑦ ᑕᑯᒥᓇᕐᑐᓕᐅᕐᑎᒥᒃ ᑕᑯᒥᓇᕐᑐᓕᐅᕐᑎᑐᐃᓐᓇᐅᖏᑦᑑᓂᖓᓄᑦ, ᑭᓯᐊᓂ ᓇᓪᓕᑳᕐᑕᐅᓂᖓ ᑐᓐᖓᕕᖃᕐᑎᓗᒍ ᐱᓇᓱᐊᓚᖓᔭᖓ ᐃᑲᔪᕐᓯᓛᕐᒪᖔᑦ ᐃᓄᑦᔪᐊᒥᐅᓂᒃ.

ᑕᒪᑦᓱᒥᖓ ᑐᑭᓯᒋᐊᑦᓯᐊᒍᒪᒍᕕᑦ ᑕᑕᕐᓴᒐᕐᒥᓘᓐᓃᑦ ᖃᕆᑕᐅᔭᕐᓅᕖᕐᓯᒍᒪᒍᕕᑦ, ᐅᓇ ᓃᓂᕐᓗᒍ, click here.

ᐊᐱᕐᓲᑎᑦᓴᖃᕈᕕᑦ ᓄᓇᕕᒻᒦᑫᓐᓇᓂᐅᑉ ᒥᑦᓵᓄᑦ, ᑲᒃᑯᐊ ᓇᓪᓕᖏᓐᓄᑦ ᐅᖄᓚᕕᖃᕐᓗᑎᑦ:

Francine Royer
Manager, residency programs
(Conseil des arts du Québec)
Tel: 514-864-3350
Toll-free: 1-800-608-3350
francine.royer@calq.gouv.qc.ca

Martine Dufour
Aumaaggiivik Coordinator
(Avataq)
Tel : 514-989-9031, #243
Toll-free : 1-800-361-5029
mdufour@avataq.qc.ca