< ᐅᑎᕈᑎᒃ ᐊᓪᓚᖁᑎᓄᑦ

Kashtin (ᑳᔅᑏᓐ), ᑖᒃᑯᐊ ᖃᐅᔨᒻᒫᕆᔭᐅᔪᒻᒪᕇᒃ ᐃᓐᓅᑦᓱᑎᒃ ᑮᓇᐅᔭᓕᐅᕋᓱᐊᕐᓂᑎᒍᑦ ᐱᑦᓯᐊᓯᒪᓂᕐᐹᒃ ᓄᓇᖃᕐᖄᓯᒪᔫᑦᓱᑎᒃ ᑐᓴᕐᓂᔮᕐᑎᓯᔩᒃ, ᐅᑎᖃᑎᒌᓚᐅᔪᔫᒃ ᑐᓴᕐᓂᔮᕐᑎᓯᒋᐊᕐᑐᓂᑐᐃᓐᓇᒧᑦ ᐱᒋᐊᓐᖓᑎᓪᓗᒍ ᐊᕐᐱᒃ ᔮᒻ ᑰᑦᔪᐊᒥ ᐊᐅᒡᒍᔅᑎ 10-ᒥ. ᐆᒻᒪᑎᒃᑯᑦ ᐃᑉᐱᓂᐊᕐᓇᑐᕐᔪᐊᖑᓚᐅᔪᔪᖅ ᓈᓚᒋᐊᕐᓯᒪᔪᓄᑦ ᑐᓴᕐᓂᔮᕐᑎᓯᔩᓐᓂᒃ.

ᑖᒃᑯᐊ ᑲᑎᒪᑦᓱᑎᒃ ᑐᓴᕐᓂᔮᕐᑎᓯᓲᒍᒍᓐᓀᓚᐅᕐᓯᒪᒻᒪᑎᒃ 1998-ᒥ, Claude McKenzie ᐊᒻᒪᓗ Florent Volant ᑕᒪᒋᒃ ᐊᒥᓱᕕᓐᖏᑲᓗᐊᕐᓱᑎᒃ ᑐᓴᕐᓂᔮᕐᑎᓯᒋᐊᕐᑐᓯᒪᔫᒃ ᐊᕐᐱᒃ ᔮᒻ-ᒥ, ᑭᓯᐊᓂ ᑲᑎᒪᑦᔭᕋᑎᒃ ᐊᕐᕌᒍᕐᓂᓗ ᐊᑦᔨᒌᓐᖏᑐᓂ. ᙯᕐᖁᔭᕕᓂᐅᓕᕐᓱᓂ ᐃᓚᐅᖁᔭᐅᑦᓱᓂ ᑕᕝᕙᓂ ᐊᐅᔭᒥ 15-ᖑᒍᑎᒋᓕᕐᑕᖓᓂ ᑐᓴᕐᓂᔮᕐᑎᓯᓂᕐᒥ ᐊᖏᓂᕐᐸᓱᓂ ᓄᓇᕕᒻᒥ, Florent Volant ᑐᑭᑖᕐᑐᕕᓂᐅᓚᐅᔪᔪᖅ ᐁᑉᐸᖃᕈᒪᒋᐊᒥᒃ Claude McKenzie-ᒥᒃ ᑖᕗᓐᖓᖃᑎᒋᑦᓱᒍᓗ. “ᔮᓂ ᐋᑕᒥ ᐱᐅᑦᓴᓂᕋᓚᐅᔪᔪᖅ ᙯᕐᖁᔨᒍᒪ ᐱᖃᓐᓈᓗᑳᓐᓃᕙᖓ ᐱᓐᖑᐊᕋᑎᒋᒋᐊᕐᑐᓗᒋᑦ. ᐅᖃᐅᑎᑐᐊᕋᒃᑯ ᒪᓕᑦᑕᐅᓛᕐᓂᕋᕐᓱᖓ Claude McKenzie-ᒧᑦ, ᑌᒪᓐᖓᓂᐊᓗᒃ ᐱᖃᓐᓈᕆᒐᒃᑯ, ᐃᓱᒪᑖᓚᐅᔪᔪᒍᒃ Kashtin-ᑰᒃ ᐅᑎᖃᑎᒌᓐᓂᖏᒃ ᐊᑦᓱᖏᓪᓗᑐᓕᓚᐅᔪᔪᖅ.”

ᑕᒪᓐᓇ ᓯᕗᓪᓕᐸᐅᑲᓴᑦᓯᐊᓚᐅᔪᔪᖅ. ᑖᒃᑯᐊ ᖃᐅᔨᒻᒫᕆᔭᐅᔪᒻᒪᕇᒃ ᐱᓐᖑᐊᓚᐅᕐᓯᒪᓐᓂᔭᕈᓐᓀᓱᑎᒃ 12-ᓂ ᐊᕐᕌᒍᕐᓂ, ᓯᕗᓪᓕᐹᑦᓯᐊᒥᒃ ᐅᑎᖃᑎᒌᑦᓱᑎᒃ ᑐᓴᕐᓂᔮᕐᑎᓯᔪᕕᓂᐅᓚᐅᔪᒻᒥᔫᒃ ᐊᕐᐲᒃ ᔮᒻ ᐱᒋᐊᓛᓕᕐᑎᓗᒍ ᐅᓪᓘᓂ ᒪᕐᕉᓂ, ᐅᕙᓂ ᑐᓴᕐᓂᔮᕐᑎᓯᑦᓱᑎᒃ: Innu Nikamu ᑐᓴᕐᓂᔮᕐᑎᓯᓂᐅᓚᐅᔪᔪᖅ Maliotenam-ᒥ, ᑖᕙᓂᒥᐅᔮᒃ ᑕᒪᖏᒃ ᑐᓴᕐᓂᔮᕐᑎᓯᔩᒃ. ᑭᖑᓂᐊᒍᑦ ᑰᑦᔪᐊᓕᐊᓕᕐᓂᒥᔫᒃ ᑖᕙᓂᓗ ᑐᓴᕐᓂᔮᕐᑎᓯᑦᓱᑎᒃ ᐃᓄᒐᓴᓐᓂᒃ ᐊᑯᓂᓂᐊᓗᒃ ᖃᐅᔨᒻᒫᖃᓕᕐᑐᓂᒃ ᑖᒃᑯᓃᖓ, Florent ᐃᓅᓕᕐᕕᓯᐅᕐᑎᓗᒍ. “ᖁᕕᐊᓲᓯᐊᑦᓯᐊᕉᕚᑦ”, ᓚᔪᕕᓂᐊᓪᓛᑦ.

“ᑰᑦᔪᐊᖅ ᐱᒻᒪᕆᐅᑦᓱᓂ ᓄᓇᓕᐅᕗᖅ ᑳᔅᑎᓐ-ᑰᒃ ᐱᐅᓯᕆᓯᒪᓕᕐᑕᖓᑎᒍᑦ,” ᑌᒣᓕᔪᕕᓂᖅ Florent. “ᑌᒣᓕᒍᓗᑐᐃᓐᓇᔭᖏᓪᓚᖓ ᐃᓄᓐᓂᒃ ᑖᕙᓂᒥᐅᓂᒃ ᐅᐱᒪᑎᒐᓱᐊᕐᓱᒋᑦ. ᑰᑦᔪᐊᒥ ᑐᓴᕐᓂᔮᕐᑎᓯᓚᐅᕐᓯᒪᕗᒍᒃ ᐳᐃᒍᕐᑕᐅᓚᐅᕐᓯᒪᓂᐊᓐᖏᑐᓂᒃ 1995-ᒥ. ᐅᕙᑦᑏᓄᑦ ᐅᑭᐅᕐᑕᑐᖅ ᐆᒻᒪᑎᒃᑯᑦ ᐃᑉᐱᓂᐊᕐᓇᑐᒻᒪᕆᒃ ᖃᓂᑦᑕᖃᕆᐊᒥᓪᓗ ᐃᑉᐱᒍᓱᓲᒍᑦᓱᓄᒃ ᓄᓇᐅᑉ ᐊᓂᕐᓂᖓᓂ. ᐊᑦᑐᑕᐅᕐᕈᐊᓚᐅᔪᕗᒍᒃ ᑕᑯᒋᐊᒥᒃ ᐃᓄᓐᓂᒃ ᑐᓴᕐᓂᓴᕐᑐᓂᒃ ᐱᓐᖑᐊᑕᑦᑎᓂᒃ, ᐱᐊᕃᓪᓗ ᑕᑯᓐᓇᐅᔮᕆᐊᕐᓯᒪᔪᑦ ᒪᓕᑦᓱᑎᒃ ᐃᓐᖏᖃᑕᐅᖃᑦᑕᑎᓪᓗᒋᑦ. ᑌᓐᓇ ᑐᓴᕐᓂᔮᕐᑎᓯᓂᐅᓚᐅᕐᓯᒪᔪᖅ ᐱᒻᒪᕆᐅᓚᐅᕐᓯᒪᔪᖅ. ᓱᓇᑭᐊᖅ ᐱᐅᔪᐊᓗᒃ ᐊᑑᑎᓚᐅᕐᓯᒪᔪᖅ ᑌᑲᓂ ᐅᓪᓗᒥ.”

ᐊᐅᒡᒍᔅᑎ 10 ᐅᑎᖃᑎᒌᓐᓂᕆᑕᖓᓂᐅᒃ ᐱᒋᐊᕐᕕᓕᐅᑕᐅᓚᐅᔪᕙ ᑳᔅᑏᓐ-ᑰᓐᓄᑦ? ᐊᐅᑲᐅᒐᓗᐊᕐᖂᑐᖅ. ᑕᑯᓐᓇᐅᔮᕐᑕᐅᓱᑎᒃ ᑐᓴᕐᓂᔮᕐᑎᓯᓂᒋᒃ ᐊᑑᑎᓚᐅᔪᔪᖅ ᐸᕐᓇᑕᐅᓯᒪᒐᓛᒐᓂ, ᒋᐊᑲᓪᓚᑑᔮᕐᓱᓂᐊᓪᓛᑦ. ᑕᒐᑕᒐᓕ ᐊᓂᕐᕋᓯᒪᓕᕐᒥᒐᒥᒃ, ᑖᕙᒃᑯᐊ ᐱᖃᓐᓈᕇᒃ ᐃᓕᒃᑰᓱᑎᒃ ᓇᒻᒥᓂᕐᒥᓂᒃ ᐱᓇᓱᐊᑐᐃᓐᓇᓕᕐᒥᔫᒃ ᐃᓱᒫᓘᑎᖃᓪᓗᐊᔭᕋᑎᓗ ᓯᕗᓂᑦᓴᑎᓐᓂᒃ. ᑰᑦᔪᐊᒨᑦ ᐅᑎᕋᔭᕐᖄᒃ? “ᖃᖓᑐᐃᓐᓇᓕᒫᑦᓯᐊᖅ!”Florent ᑭᐅᔪᕕᓂᑦ ᙯᒐᓕᒐᓚᑦᓱᓂᐊᓪᓛᑦ.