- ᑭᓇᒃᑰᒪᖔᑦᑕ
- ᖃᐅᔨᒋᐅᕐᓂᖅ ᑐᓂᕐᑕᓂᐊᕐᓂᒥᒃ
- ᐱᓇᓱᐊᕐᑕᐅᔪᐃᑦ ᐱᓇᓱᐊᕋᑦᓭᓗ
- ᖃᕆᑕᐅᔭᑎᒍᑦ ᓄᓇᕐᔪᐊᓕᒫᒨᕈᑏᑦ
- ᑐᑭᓯᒋᐊᕐᕕᓭᑦ
ᑐᓂᕐᑕᓂᐊᕐᓂᖅ
ᐃᓕᓐᓂᐊᑏᑦ ᑐᓂᕐᑕᓂᐊᕐᑎᑕᐅᓂᕕᓂᖏᑦ
ᐊᕙᑕᐅᑉ ᑐᓂᕐᑕᓂᐊᕐᑎᖁᑎᖏᑦᑕ ᐃᓕᓐᓂᐊᑎᑦᓯᓂᕆᓲᖏᑦ ᑐᓂᕐᑕᓂᐊᕈᓯᐅᒋᐊᓕᓐᓂᒃ
ᐱᒋᐊᕐᑎᑕᐅᓚᐅᕐᓂᕋᒥ 1985-ᒥ, ᐊᕙᑕᐅᑉ ᑐᓂᕐᑕᓂᐊᕐᓂᓕᕆᕕᖓᑕ ᐱᒍᑦᔨᕕᖓ ᐃᓂᓪᓚᑎᕆᕙᑉᐳᖅ ᑐᓂᕐᑕᓂᐊᕐᓂᒧᑦ ᐃᓕᓐᓂᐊᑎᑦᓯᓂᐅᒐᔭᕐᑐᓂᒃ ᓄᓇᕕᒻᒥᐅᑦ ᐃᓅᓱᑦᑐᖁᑎᖏᓐᓂᒃ ᐃᓄᓐᓂᒃ. ᑖᒃᑯᐊ ᐃᓕᓐᓂᐊᑎᑦᓯᓂᐅᓲᑦ ᐃᓄᓐᓂᒃ ᐃᓕᓐᓂᐊᑎᓂᒃ ᐱᕕᖃᕐᑎᓯᓲᑦ ᓄᐃᑕᔪᒃᑯᑦ ᐃᓚᐅᑎᑦᓱᒋᑦ ᐊᑦᔨᒌᓐᖏᑐᓄᑦ ᑐᓂᕐᑕᓂᐊᕐᓂᐅᓲᓄᑦ ᓄᓇᕕᓕᒫᒥ, ᐊᖓᔪᕐᖄᖃᕐᓱᑎᒃ ᐊᕙᑕᐅᑉ ᑐᓂᕐᑕᓂᐊᕐᑎᖁᑎᖏᓐᓂᒃ. ᑌᒣᒻᒪᑦ, ᐱᓇᓱᐊᕐᑕᐅᕙᑦᑐᑦ ᐃᓕᓐᓂᐊᑎᓂᒃ ᓄᑖᓂᒃ ᖃᐅᔨᒪᓂᕐᑖᑎᑦᓯᓲᑦ ᐃᓕᒪᓱᐊᓚᖀᑦᓱᑎᓗ ᐱᒻᒪᕆᐅᒻᒪᑦ ᐊᓯᐅᖏᓐᓇᑎᑦᓯᑌᓕᒋᐊᒥᒃ ᑌᑦᓱᒪᓂᐊᓗᒃ ᓇᔪᒐᐅᕙᑦᑐᕕᓂᕐᓂᒃ ᑐᓂᕐᑕᓂᓪᓗ.
ᐃᓄᐃᑦ ᐅᕕᒐᕐᑐᐃᑦ ᐃᓕᓐᓂᐊᑐᑦ ᓴᒡᒐᕕᒻᒥ ᓴᒡᒐᒍᓯᐅᒋᐊᓕᓐᓂᒃ ᓇᔪᒐᐅᓚᐅᕐᑐᕕᓂᕐᒥ IdGo-12-ᖑᓂᕋᕐᑕᒥ.
ᑐᓂᕐᑕᓂᐊᕆᐊᕐᓯᒪᔪᑦ (ᓴᐅᒥᐊᓂᑦ): Ian Badgley (ᐄᔭᓐ ᐹᑦᔅᓕ), Daniel Gendron (ᑕᓂᐊᓪ ᔮᓐᑦᕉᓐ), ᐹᐱ ᑯᔩ (ᐅᑯᖓᔪᖅ), ᑖᒥ ᐅᐃᑖᓗᑦᑐᖅ, ᐹᓴ ᑮᓚᓐ, ᓄᐊ ᓇᕐᑌᕌᓗᒃ ᐊᒻᒪᓗ Madeleine Bélanger (ᒫᑎᓖᓐ ᐱᓛᓐᔦ).
ᐱᐅᓯᐅᓯᒪᔪᑦ
ᐊᕙᑕᐅᑉ ᑐᓂᕐᑕᓂᐊᕐᑎᖁᑎᖏᑦ ᓯᕗᓪᓕᐹᑦᓯᐊᒥᒃ ᑐᓂᕐᑕᓂᐊᕐᓂᒥᒃ ᐃᓕᓐᓂᐊᑎᑦᓯᒋᐊᓐᖓᓂᕕᓂᖓ ᐊᑑᑎᓚᐅᕐᓯᒪᕗᖅ 1985-ᒥ ᐃᓚᒋᔭᐅᑎᑕᐅᑦᓱᓂ ᖁᐊᕐᑕᐅᑉ ᐱᓇᓱᐊᕐᑕᐅᓂᖓᓄᑦ ᓇᔪᒐᕕᓂᕐᒦᓱᑎᒃ JgEj-3-ᒍᓂᕋᕐᑕᒥ. ᐃᓅᓱᑦᑐᐃᑦ ᓄᓇᕕᓕᒫᒥᑦ ᐱᓯᒪᔪᑦ ᐃᓚᐅᖃᑦᑕᓚᐅᕐᓯᒪᔪᑦ ᓴᒡᒐᓂᕐᒧᑦ ᒪᕐᕉᓄᑦ ᐊᕐᕌᒍᕐᑐᑐᒧᑦ. ᐱᓇᓱᐊᕐᑕᕗᑦ ᐱᑦᓯᐊᑐᕕᓂᐅᒻᒪᑦ ᑲᖐᓱᐊᑎᑦᓯᓚᕿᑦᓱᑕ ᐃᓕᓐᓂᐊᑎᓂᒃ ᐅᕙᑦᑎᓂᒃ ᙯᕐᖁᔨᒋᐊᓪᓛᑎᑦᓯᓚᐅᔪᖅ ᐃᓕᓐᓂᐊᑎᓂᒃ ᑐᓂᕐᑕᓂᐊᕆᐊᓪᓚᖃᑕᐅᖁᑦᓱᒋᑦ, ᑕᒪᑐᒪᓂ ᐃᓚᐅᑎᓪᓗᒋᑦ ᓄᓀᓐᖒᑉ ᓴᒡᒐᑕᐅᓂᖓᓄᑦ. ᑖᓐᓇ ᐊᖏᔪᑲᓪᓚᒃ ᐱᓇᓱᐊᕋᑦᓴᖅ ᑲᔪᓯᑎᑕᐅᔪᕕᓂᖅ 1987-ᒥ 1988-ᒥᓪᓗ ᓇᔪᒐᕕᓂᕐᒦᓱᑎᒃ JcDe-1-ᒍᓂᕋᕐᑕᒥ, ᑖᓐᓇ ᓄᓇᒃ ᑯᐯᑉ-ᓛᐸᑐᐊᔨᐅᑉ ᑎᑭᕋᖓᓃᑦᑐᖅ. ᑌᒪᓐᖓᓂᑦ ᐊᒥᓱᒐᓛᓂᒃ ᐃᓕᓐᓂᐊᑎᓂᒃ ᑐᓂᕐᑕᓂᐊᕐᓂᒧᑦ ᐃᓕᓐᓂᐊᑎᑦᓯᓯᒪᓕᕐᑐᒍᑦ ᓄᓇᕕᐅᑉ ᐃᓗᐊᓂ, ᐅᑯᓇᓂᓗᐊᓐᖑᐊᖅ: ᐃᓄᒃᔪᐊᒥ (ᓇᑦᑐᕋᓕᒃ, 1991; ᐃᑎᖑᐊᓗᒃ, 2007-2008) ᐊᒻᒪᓗ ᓄᕗᒻᒥ (ᑲᖏᕐᓱᔪᐊᖅ, 2003; ᑕᔭᕋᖅ/ᓴᓪᓗᐃᑦ, 2003-2006).
ᑐᓂᕐᑕᓂᐊᕐᓂᑎᒍᑦ ᐱᓇᓱᐊᕐᓂᒧᑦ ᐃᓕᓐᓂᐊᓂᐅᓲᑦ
ᐃᓕᓐᓂᐊᑎᓂᒃ ᑐᓂᕐᑕᓂᐊᕐᑎᓯᓂᕆᓲᕗᑦ ᓯᕕᑐᓂᖃᕙᓪᓗᓲᑦ ᓯᑕᒪᓂᒃ ᐱᖓᓲᔪᕐᑐᓂᓘᓐᓃᑦ ᐱᓇᓱᐊᕈᓯᕐᓂ, ᑕᑯᓐᓇᓱᒍ ᐱᓇᓱᐊᕋᑦᓴᖅ. ᐃᓄᐃᑦ ᐃᓕᓐᓂᐊᑏᑦ ᐊᕐᕌᒍᓖᑦ 13 ᐊᒻᒪᓗ 18 ᐊᑯᓐᓂᖓᓂ ᐃᓕᓐᓂᐊᑎᑕᐅᓲᑦ ᐊᕙᑕᐅᑉ ᑐᓂᕐᑕᓂᐊᕐᑎᖁᑎᖏᓐᓄᑦ, ᑌᒣᑦᓱᑎᒃ ᐊᐅᔭᕐᓯᐅᓂᕐᒥᓂᒃ ᑐᓂᕐᑕᓂᐊᕐᑎᓚᕆᐅᑫᓐᓇᓲᑦ. ᐃᓕᓐᓂᐊᑎᑕᐅᓲᑦ ᑐᓂᕐᑕᓂᐊᕈᓯᐅᒋᐊᓕᓐᓂᒃ (ᐆᑦᑑᑎᒋᓗᒋᒃ ᓄᓇᕕᐅᑉ ᐊᓯᑦᔨᐸᓪᓕᐊᓂᖓ ᐊᒻᒪᓗ ᓱᓇᐅᒻᒪ¯ᑦ ᐅᔭᕋᕐᓂᒃ ᖃᓕᐊᕇᑦᑐᓂᒃ ᖃᐅᔨᓴᕐᓂᖅ), ᐃᓚᒋᔭᐅᑎᓪᓗᒋᑦ ᐊᑦᔨᒌᓐᖏᑐᑦ ᓴᒡᒐᒍᓯᐅᒋᐊᓖᑦ (ᐆᑦᑑᑎᒋᓗᒍ ᖃᓄᖅ ᐊᑐᕐᑕᐅᓲᒍᒻᒪ¯ᑦ ᓴᒡᒐᐅᑎᒃ ᓯᖁᑦᑎᕆᒍᓐᓀᓗᓂ ᓅᑦᓯᒍᓐᓀᓗᓂᓘᓐᓃᑦ ᑐᓂᕐᑕᓂᒃ, ᓇᕝᕚᑕᕐᓂᒃ ᐊᓪᓚᖁᑎᓕᐅᕐᓂᐅᒋᐊᓕᒻᒥᒃ, ᐊᑦᔨᓕᐅᕆᓂᕐᒥᒃ, ᐊᓪᓚᖑᐊᕐᓂᒥᒃ ᐊᑕᐅᑦᓯᑳᕐᑎᑐᓂᒃ ᓴᒡᒐᕕᐅᔪᓂᒃ ᓯᒃᑭᑖᐱᐅᑦᓱᑎᒃ, ᕿᓐᖑᑏᓐᓄᑦ ᓱᕐᖄᑎᕆᓂᕐᒥᒃ ᓄᓇᒥᒃ, ᐊᓯᖏᓐᓂᓗ).
ᖃᓕᖑ ᐊᒫᒪᑦᑐᐊᖅ ᐊᒻᒪᓗ ᐋᑕᒥ ᕿᓐᓄᐊᔪᐊᖅ, ᓴᒡᒐᑑᒃ Level II-ᖑᓂᕋᕐᑕᒥᒃ, ᑕᔭᕋᐅᑉ ᓇᔪᒐᒋᓚᐅᕐᑕᕕᓂᖓᓐᓂ KbFk-7-ᖑᓂᕋᕐᑕᒥ, ᐊᑦᔨᓕᐊᕕᓂᖅ ᐊᐅᔭᖅ 2002-ᒥ
ᐃᓕᓐᓂᐊᑎᓗᑳᑦ ᐱᓇᓱᐊᕐᑐᑦ JfEl-10-ᖑᓂᕋᕐᑕᒥ ᓇᔪᒐᐅᓚᐅᕐᑐᕕᓂᕐᒥ, ᐊᑦᔨᓕᐊᕕᓂᖅ ᐊᐅᔭᖅ 2002-ᒥ
ᓯᕗᓂᑦᓴᑎᓐᓂ ᐱᓇᓱᐊᕋᑦᓭᑦ
ᐊᕙᑕᐅᑉ ᑐᓂᕐᑕᓂᐊᕐᑎᖁᑎᖏᑦ ᑲᔪᓯᒍᒪᒐᔭᓐᖑᐊᑑᒐᓗᐊᑦ ᑲᑎᑎᑦᓯᓗᑎᒃ ᑖᒃᑯᓂᖓ ᑐᓂᕐᑕᓂᐊᕐᓂᒧᑦ ᐃᓕᓐᓂᐊᑎᑦᓯᓂᐅᖃᑦᑕᓯᒪᔪᓂᒃ ᐱᓇᓱᐊᒍᓗᑐᐃᓐᓇᓂᕆᓲᑦᑎᓄᑦ ᐃᓚᒋᓕᐅᑎᑎᓪᓗᒋᑦ, ᑌᒣᑦᓱᑕ ᖃᐅᔨᓴᕆᐊᓪᓛᒍᓐᓇᓯᓲᒍᔪᒍᑦ, ᑭᓯᐊᓂᓗᑦᑕᐅᖅ ᐃᓕᒪᓱᐊᓚᖀᑎᑦᓯᓱᑕ ᐃᓄᓐᓂᒃ ᐃᓅᓱᑦᑐᓂᒃ ᐱᒻᒪᕆᐅᒻᒪᑦ ᐊᓯᐅᖏᓐᓇᑎᑦᓯᑌᓕᒋᐊᒥᒃ ᐃᓗᕐᕈᓯᑎᒍᓪᓗ ᕿᒻᒪᖁᑎᓕᐊᕆᒍᓐᓇᑕᖏᓐᓂᒃ ᐊᒻᒪᓗ ᐃᓪᓕᓇᕐᑑᓂᖏᓐᓂᒃ ᑐᓂᕐᑌᑦ ᑌᑦᓱᒪᓂᐊᓗᓂᑌᑦ.
