ᐃᓄᐃᑦ ᐅᖃᐅᓯᖓ
ᐃᓄᑦᑎᑐᑦ ᐅᖃᐅᓯᓕᕆᓂᐅᑉ ᐱᓇᓱᐊᕐᑕᐅᓂᖓᓄᑦ ᑐᕌᕐᓂᐅᒐᓱᐊᕐᑐᖅ ᐱᐅᓕᑦᓯᓗᓂ ᐅᖑᒪᑦᓯᓗᓂᓗ ᐃᓄᐃᑦ ᐅᖃᐅᓯᖓᓂᒃ ᐊᑐᕐᑕᐅᓕᐅᒥᑎᒐᓱᐊᕐᓗᒍᓗ ᓄᓇᕕᓕᒫᒥ.
ᓇᒻᒥᓂᖅ ᑲᕙᒪᖃᓕᕈᑦᑕ ᐃᓄᑦᑎᑐᑦ ᐅᖃᐅᓯᓕᕆᔩᑦ ᑐᕐᖃᑕᕐᕕᖓ ᐃᑉᐱᒍᓱᒐᔭᕐᑐᖅ ᐅᖑᒪᔭᐅᓂᖓᓂᒃ ᐱᕙᓪᓕᐊᔭᐅᓂᖓᓂᓪᓗ ᐃᓄᑦᑎᑐᑦ ᐅᖃᐅᓯᐅᑉ. ᐅᖑᒪᔭᐅᓂᖓ (ᐃᓄᑦᑎᑑᕐᓂᖅ ᐱᓇᓱᕕᒥ ᐊᒻᒪᓗ ᓇᓗᓀᒃᑯᑌᑦ ᓯᓚᒥ) ᓯᕗᓪᓕᐅᔭᐅᒋᐊᖃᕐᖁᑦ ᓄᓇᕕᒻᒥ ᐊᖁᕕ¯ᒃᓄᑦ.
ᐊᕙᑕᒃᑯᑦ ᐅᖃᐅᓯᓕᕆᓂᕆᕙᑦᑕᖓᑦ ᐱᕙᓪᓕᐊᑎᑦᓯᕗᖅ ᐅᖃᐅᓯᕐᓂᒃ ᐊᑐᕐᑕᐅᖃᑦᑕᕆᐊᓕᓐᓂᒃ ᐅᑯᓇᓂ: ᐱᖁᔭᓕᕆᔨᓂ, ᐋᓐᓂᐊᓂᓕᕆᔨᓂ ᑐᓴᐅᒪᖃᑎᒌᓐᓂᓕᕆᔨᓐᓂᓗ. ᐊᕙᑕᒃᑯᑦ ᐸᕐᓀᓂᓲᖑᒻᒥᔪᑦ ᐅᖃᐅᓯᓕᕆᓂᑦᓴᓂᒃ ᐅᖃᐅᓯᐅᑉ ᐁᑉᐹᓅᔦᔩᑦ ᑐᓵᔩᓪᓗ ᑭᖕᖒᒪᑦᓯᓂᖃᕐᐸᒥᒻᒪᑕ ᐃᑲᔫᑎᑦᓴᓂᒃ ᐱᐅᔫᒋᐊᖃᕐᒪᑦ ᐅᖃᐅᓯᐅᑉ ᐁᑉᐹᓅᔦᓂᖅ.
ᐊᕙᑕᒃᑯᑦ ᑲᔪᓯᔪᒥᒃ ᐱᓇᓱᐊᕐᓂᕆᕙᑦᑕᖏᑦ ᐃᓚᖃᕐᐳᑦ ᐱᕙᓪᓕᐊᑎᑦᓯᓂᕐᒥᒃ ᑕᑲᒃᑯᓂᖓ ᐱᓇᓲᑎᑦᓴᓂᒃ: ᐅᖃᐅᓯᓕᕆᓂᕐᒧᑦ ᐅᓕᕐᓀᓯᒍᑎᒃ, ᐅᖃᕐᑕᐅᓗᑭᒍᓐᓀᑐᓂᒃ ᐅᑎᕐᑎᓯᕙᓪᓕᐊᓂᖅ, ᐅᖄᒍᓯᓕᕆᓂᖅ, ᐃᓕᓐᓂᐊᑎᑦᓯᒍᑎᑦᓴᓂᓪᓗ ᐃᓄᑦᑎᑐᑦ ᐅᖃᐅᓯᖅ ᐁᑉᐱᐅᑎᐅᓚᖓᑎᓪᓗᒍ. ᐊᒻᒪᓗ, ᐱᓇᓱᐊᕐᑕᐅᔪᖅ ᐃᓚᖃᕐᐳᖅ ᐱᕙᓪᓕᐊᔭᐅᓂᖓᓂᒃ ᐊᑐᐊᒐᖃᕐᕕᒥ ᑕᑯᒋᐊᕐᕕᓴᖅ, ᐱᕙᓪᓕᐊᔭᐅᓂᖓᓗ ᐃᓄᑦᑎᑐᑦ ᐃᓕᓴᕐᓂᐅᓲᖅ ᑐᕃᓐᓇᑐᒥᒃ - ᑕᑯᓐᓇᓗᑐᕐᓗᓂ ᐁᓯᒪᓪᓗᑐᕐᓗᓂᓗ, ᑕᒪᓐᓇ ᐃᓕᓐᓂᐊᕈᓯᑐᖃᕕᓂᐅᒻᒪᑦ.
ᓄᓇᓕᑎᒍᑦ ᐊᕙᑕᒃᑯᑦ ᑫᓪᓗᑐᐃᓲᖑᕗᑦ ᐅᖃᐅᓯᓕᕆᓂᐅᓲᓂᒃ ᑭᖑᕚᕇᑦᑐᐃᓗ ᐱᓇᓱᐊᖃᑎᒌᓐᓂᕆᓲᖓᓂᒃ ᑖᒃᑯᓇᓂᓕᒫᖅ ᖁᓕᓗ ᓯᑕᒪᓪᓘᓂ ᓄᓇᓕᐅᔪᓂ ᓄᓇᕕᒻᒥ.
ᖃᐅᔨᒋᐊᓚᐅᕆᑦ
ᑖᓂᐊᓪᓕ ᐅᐃᑖᓗᑦᑑᑉ ᑕᑯᔭᑦᓴᑯᕕᖁᑎᖓ
ᑖᓂᐊᓪᓕ ᐅᐃᑖᓗᑦᑑᑉ ᐊᐅᓚᔨᔭᐅᓂᖓᓄᑦ ᑕᑯᔭᑦᓴᑯᕕᒃ ᐱᐅᓯᑐᖃᓕᕆᕕᖓᓗ ᐃᑲᔪᕐᓯᒪᓲᖅ ᓴᐳᒻᒥᓯᒪᓂᕐᒥᒃ ᖁᕝᕙᑎᑦᓯᒋᐊᕐᓂᒥᓪᓗ ᐃᓄᐃᑦ ᓄᓇᕕᒻᒥᐅᓗ ᐃᓗᕐᕈᓯᖓᓐᓂᒃ.
ᐱᓇᓱᐊᕐᓯᒪᓕᕐᑕᖏᑦ
ᐱᓇᓱᐊᕐᓯᒪᓕᕐᑕᖏᑦ ᐃᓚᖃᕐᐳᑦ ᖃᕐᒪᓕᐅᕐᓂᒥᒃ, ᓇᑦᓯᔦᓐᓇᐅᓱᑎᒃ ᑐᐱᕐᓂᒃ, ᐅᒥᐊᒻᒪᕆᑐᖃᕐᓂᒃ ᓇᑦᓯᔦᓐᓇᐅᓱᑎᒃ ᖃᔭᕐᓂᓗ; ᐅᖃᐅᓯᓕᕆᓂᕐᒧᑦ ᑲᑎᒪᓂᐊᕈᓯᕐᓂᒃ; ᓂᕿᑦᓴᔭᓕᐅᕐᓂᓂᒃ/ᐸᓂᕐᑎᑕᓕᐅᕐᓂᓂᒃ, ᑲᒻᒥᐅᓂᕐᓂᒃ, ᐴᕐᑕᓕᐅᕐᓂᓂᒃ ᐊᕙᑕᓕᐅᕐᓂᓂᓗ.