ᖃᐅᔨᓴᕐᓂᖅ, ᐊᑐᐊᒐᒃᑯᕕᒃ ᐱᓇᓱᐊᕐᑕᐅᓯᒪᔪᓂᓪᓗ ᑲᑎᕐᓱᐃᕕᒃ
ᐃᓄᑦᑎᒍᑦ ᐱᕐᕈᓰᑎᒎᕐᑐᖅ ᐊᑐᐊᒐᑦᓴᑯᕕᐅᑉ ᐱᓇᓱᐊᕐᑕᐅᓯᒪᔪᓂᓪᓗ ᓄᐊᑦᓯᕕᐅᑉ ᑐᕌᕐᓂᕆᒐᓱᐊᕐᑕᖓ ᖃᐅᔨᒪᔭᐅᒋᐊᓕᓐᓂᒃ ᓄᓇᕕᐅᑉ ᐃᓗᕐᕈᓯᖓᓐᓅᓕᖓᔪᓂᒃ ᐃᕐᖃᓇᕐᑑᓂᖓᓅᓕᖓᔪᓂᓪᓗ ᐊᑐᐃᓐᓇᐅᑎᑦᓯᓂᕐᒥᒃ ᓄᓇᕕᐅᑉ ᐃᓄᖏᓐᓄᑦ ᐱᓇᓱᕝᕕᖁᑎᖏᓐᓄᓗ.
ᖃᓄᐃᓘᕐᑎᐅᓂᕐᒥᓄᑦ ᓄᓇᕕᒻᒥᐅᓄᑦ ᐃᓕᑕᕆᔭᐅᔪᑎᒍᑦ ᐱᓇᓱᐊᕐᑕᐅᓯᒪᔪᓂᒃ ᓄᐊᑦᓯᔨᐅᓂᕐᒥᓄᑦ, ᓱᔪᐃᑌᓕᓂᖃᓲᖅ ᐱᔪᓐᓇᑐᓪᓚᕆᑦᑐᑎᑐᑦ ᐊᖑᒪᑦᓯᒍᑎᒋᑦᓱᒍ ᒫᓐᓇᐅᔪᖅ ᐱᓇᓱᐊᕐᑕᐅᓯᒪᔪᓂᒃ ᓄᐊᑦᓯᓂᕐᒧᑦ ᒪᓕᒐᐅᔪᓂᒃ. ᑌᑦᓱᒪᓂᑕᒻᒪᕇᑦ ᐊᓪᓚᑕᐅᕙᑦᑐᕕᓃᑦ, ᐃᓄᐃᑦ ᐅᓂᒃᑲᐅᓯᖏᑦᑕ ᓂᐱᓕᐅᕐᑕᐅᓂᕕᓂᖏᑦ, ᐃᓄᐃᑦ ᐊᓪᓚᐸᑦᑕᕕᓂᖏᑦ, ᐃᓅᖃᑎᒌᑦᑐᓂᒃ ᖃᐅᔨᓴᕐᑏᑦ ᐱᓇᓱᐊᕐᐸᑕᕕᓂᖏᑦ ᓄᐊᑕᐅᒪᔪᑦ, ᐊᑦᔨᖑᐊᑐᙯᑦ ᐊᒻᒪᓗ ᖃᒻᒥᓂᑕᐅᓂᕐᐹᑦ ᐊᑐᐊᒐᓐᖑᑎᑕᐅᓯᒪᔪᑦ ᓄᓇᓕᓕᒫᓂ ᑎᒥᐅᔪᓄᑦ ᐃᓘᓐᓇᓯᐊᑎᒃ ᐊᓪᓚᖁᑎᑦᑎᓃᖃᑕᐅᔪᑦ.
ᑎᓕᐅᕐᑕᐅᒪᐅᑎᖃᕐᓱᓂ ᐃᕐᐸᑎᑦᓯᓕᐅᒥᓂᕐᒥᒃ ᐱᓇᓱᐊᕐᑕᐅᓯᒪᑦᓱᑎᒃ ᓄᐊᑕᐅᓯᒪᔪᓅᓕᖓᔪᓂᒃ ᖃᐅᔨᒪᔭᐅᒋᐊᓕᓐᓂᒃ, ᐅᑯᓄᖓᑐᐊᑦᓯᐊᖅ: ᓄᓇᕕᒻᒥᐅᓄᑦ, ᐊᑐᐊᒐᑦᓴᑯᕕᒃ ᐱᓇᓱᐊᕐᑕᐅᓯᒪᔪᓂᓪᓗ ᓄᐊᑦᓯᕕᒃ ᐱᒍᑦᔨᓂᖃᓲᒍᒻᒥᔪᖅ ᖃᐅᔨᓴᕐᑎᓂᒃ, ᑐᓴᕋᑦᓴᓂᐊᕐᑎᓂᒃ ᐊᓯᖏᓐᓂᓗ ᑲᖐᒋᔭᓕᓐᓂᒃ. ᑖᓐᓇ ᓄᐊᑦᓯᕕᒃ ᑫᓪᓗᑐᐃᓂᖃᕐᑐᖅ ᓄᓇᓕᓐᓂᒃ ᓇᑉᐯᖁᔨᓂᕐᒥᒃ ᐊᑐᐊᒐᑦᓴᑯᕕᓐᓂᒃ ᐊᓯᖏᓐᓂᓗ ᐱᑦᓴᑖᕐᕕᐅᒍᓐᓇᑐᓂᒃ.
ᒫᓐᓇᐅᔪᖅ ᓄᐊᑦᓯᓂᖃᕋᓱᐊᕐᑐᒍᑦ ᐱᓇᓱᐊᕐᑕᐅᓯᒪᔪᓂᒃ ᓄᐊᑦᓯᕕᑦᑎᓅᒐᔭᕐᑐᓂᒃ, ᓂᐱᓕᐊᕕᓂᕐᓂᒃ ᑐᓂᕐᕈᓯᐊᕕᓂᕐᓂᓗ ᐊᑦᔨᒌᓐᖏᑐᓂᑦ ᑎᒥᐅᔪᓂᑦ ᐊᓂᕐᕋᐅᔪᓂᓪᓗ ᓄᓇᕕᓕᒫᒥᑦ ᐱᔪᓂᑦ. ᑖᓐᓇ ᐱᔭᑦᓴᖅ ᐱᓇᓱᐊᕐᑕᐅᓴᐅᑎᒋᒋᐊᓕᒃ, ᐱᔪᒪᔭᓕᒫᑲᓵᕗᑦ ᓱᔪᑐᐃᓐᓇᕆᐊᖃᓕᕐᒪᑕ ᐃᓂᖃᑦᓯᐊᖏᓐᓂᑯᒥᓄᑦ ᓈᒻᒪᑐᒥᒃ ᐊᒻᒪᓗ ᓄᐃᑕᓪᓗᕆᑦᑐᑯᑦ ᐊᓯᐅᖏᓐᓇᑎᑦᓯᑌᓕᒐᓱᐊᕐᓂᖃᑦᓯᐊᓲᒍᓐᖏᒪᑦ.
ᖃᐅᔨᒋᐊᓚᐅᕆᑦ
ᐃᓄᑐᙯᑦ ᑲᑎᒪᓂᒻᒪᕆᖓ
ᐱᒋᐊᕐᑎᑕᐅᓚᐅᕐᓂᕋᒥ, ᐊᕙᑕᒃᑯᑦ ᐃᓕᑕᕐᓯᒪᓲᒍᕗᑦ ᐊᑐᕐᑐᓚᕆᐊᓘᓂᖓᓂᒃ ᖃᓄᐃᓘᕐᑎᐅᓱᑎᒃ ᐃᓄᑐᙯᑦ ᐃᓅᖃᑎᒌᑦᑐᓂ. ᑌᒣᒻᒪᑦ, ᐊᕙᑕᒃᑯᑦ ᐱᒋᐊᕐᑎᓯᒻᒪᕆᓚᐅᕐᓯᒪᕗᑦ ᓯᕗᓪᓕᐹᒥᒃ ᓄᓇᕕᒻᒥᐅᑦ ᐃᓄᑐᙯᑦ ᑲᑎᒪᓂᒻᒪᕆᖓᓐᓂᒃ, ᑲᖏᕐᓱᒦᓚᐅᕐᓯᒪᔪᒥᒃ 1981-ᒥ.
ᓄᓀᑦ ᐊᑎᖏᑦ
“ᓄᓀᑦ ᐊᑎᖏᑦ ᖃᐅᔨᒪᔭᐅᑦᓱᑎᒃ ᐊᑐᕐᑕᐅᓲᒍᑦᓱᑎᓗ ᐃᓄᐃᑦ ᐊᐅᓚᔨᔭᖏᑎᒍᑦ ᐃᓕᕐᑕᓯᒪᔭᐅᒋᐊᖃᕐᖁᑦ ᑲᕙᒪᒃᑯᓄᑦ ᐊᑐᕐᑕᐅᓗᑎᓗ ᐃᓕᑕᕆᔭᐅᔪᓂ ᓄᓇᓐᖑᐊᓂ ᓱᓕᓪᓚᕆᑦᑑᓂᕃᒋᐊᖃᕐᒪᑕ ᐊᑌᓐᓇᑐᒥᒃ ᐃᓗᕐᕈᓯᑎᒍᑦ ᐃᓪᓕᓇᕐᑑᓂᖏᓐᓂᒃ.” ᑐᑭᑖᕈᑎᕕᓂᖓ ᐃᓄᐃᑦ ᐃᓄᑐᙯᑦ ᑲᑎᒪᓂᒻᒪᕆᖃᕐᓱᑎᒃ, 1983-ᒥ.