- ᑭᓇᒃᑰᒪᖔᑦᑕ
- ᖃᐅᔨᒋᐅᕐᓂᖅ ᑐᓂᕐᑕᓂᐊᕐᓂᒥᒃ
- ᐱᓇᓱᐊᕐᑕᐅᔪᐃᑦ ᐱᓇᓱᐊᕋᑦᓭᓗ
- ᖃᕆᑕᐅᔭᑎᒍᑦ ᓄᓇᕐᔪᐊᓕᒫᒨᕈᑏᑦ
- ᑐᑭᓯᒋᐊᕐᕕᓭᑦ
ᑐᓂᕐᑕᓂᐊᕐᓂᖅ
ᓄᓇᓕᐅᑉ ᑎᒥᐅᔪᐃᓪᓗ ᐱᒍᑦᔨᓂᖏᑦ
ᓴᐳᒻᒥᓂᖅ ᓄᓇᕕᒻᒥ ᑐᓂᕐᑕᓂᐊᕐᓂᐅᕙᑦᑐᓂᒃ ᑕᕝᕘᓇᑦᓭᓇᕐᓗ ᐃᑲᔪᕐᓯᒪᓂᖅ ᓄᓇᓕᓕᒫᓂ ᐱᕙᓪᓕᐊᓂᐅᔪᓂᒃ
ᐊᕙᑕᖅ ᐱᐅᓯᑐᖃᓕᕆᕕᒃᑯᑦ ᑐᓂᕐᑕᓂᐊᕐᑎᖁᑎᖏᑦ ᐱᓇᓱᐊᓲᒍᕗᑦ ᐱᓇᓱᐊᕐᑕᐅᒋᐊᖃᓕᕐᑐᓂᒃ ᐊᑦᑐᐊᓱᑎᒃ ᐊᓯᐅᖏᓐᓇᑎᑦᓯᑌᓕᓂᕐᒧᑦ ᓄᓇᕕᐅᑉ ᑐᓂᕐᑕᖁᑎᖏᓐᓂᒃ ᐱᕙᓪᓖᒐᔭᕐᒪᑕ ᓄᓇᕕᒻᒦᑐᓂᒃ ᓄᓇᓕᐅᔪᓂᒃ. ᐊᕐᕌᒍᑕᒫᑲᓵᑦᓯᐊᖅ, ᓵᓐᖓᓯᓲᒍᕗᒍᑦ ᑐᓂᕐᑕᓂᐊᕐᓂᒥ ᐊᓯᐅᖏᓐᓇᑎᑦᓯᑌᓕᒋᐊᖃᕐᓂᒧᑦ ᐃᓱᒫᓘᑎᒋᔭᐅᔪᓂᒃ ᐱᑐᑦᓯᒪᑦᓱᑎᒃ ᓄᑖᓐᖑᐸᓪᓕᐊᑐᐃᓐᓇᓂᖏᓐᓄᑦ ᐱᕙᓪᓕᐊᑐᐃᓐᓇᓂᖏᓐᓄᓗ ᑕᕐᕋᒥ ᓄᓇᓖᑦ, ᐊᒻᒪᓗ ᓄᓇᐅᔪᓂ ᐆᑦᑑᑎᒋᓗᒋᒃ ᐅᔭᕋᓐᓂᐊᕖᑦ ᑰᓐᓂᐊᑎᒃᑯᓗ ᐱᓇᓲᑎᖏᑦ ᐃᓕᐅᕐᖃᑕᐅᓕᕐᐸᑕ. ᐊᑐᓕᕐᑎᓯᓯᒪᓕᕐᑐᒍᑦ ᐱᐅᔪᒻᒪᕆᐊᓗᒻᒥᒃ ᓵᓐᖓᓯᓂᐅᕙᑦᑐᒥᒃ ᐃᓄᐃᑦ ᐱᐅᓯᕐᓱᕈᑎᖏᑦ ᑲᔪᓯᔪᑦ ᐊᓯᐅᖏᓐᓇᓂᐊᓐᖏᒪᑕ ᑕᕝᕘᓇᑦᓭᓇᕐᓗ ᑫᓪᓗᑐᐃᑦᓱᑕ ᓄᓇᕕᐅᑉ ᓄᑖᓐᖑᐸᓪᓕᐊᑐᐃᓐᓇᓂᖓᓂᒃ. ᓄᓇᕕᒻᒥᐅᑦ ᑲᖐᓱᐊᑦᓯᐊᑐᑦ ᐃᓪᓕᓇᕐᑑᓂᖏᓐᓂᒃ ᑐᓂᕐᑕᓂᐊᕐᓂᑎᒍᑦ ᐱᐅᓯᕐᓱᕈᑎᓂᒃ ᑲᔪᓯᔪᓂᒃ, ᑌᒣᒻᒪᓗ ᐃᓱᒫᓘᑎᖃᕐᑐᑦ ᓄᓇᖓ ᖃᓄᒐᓛᐱᑐᐃᓐᓇᖅ ᓱᕐᕋᑕᐅᑉᐸᑦ. ᐃᓱᒫᓘᑎᖃᕆᐊᓪᓚᒥᔪᑦ ᐊᓪᓚᖁᑎᓕᐅᕐᑕᐅᕙᓐᓂᖏᓐᓂᒃ ᓄᐊᑕᐅᕙᓐᓂᖏᓐᓂᓗ ᑐᓂᕐᑌᑦ ᓇᕝᕚᑕᕕᓃᑦ ᑐᓂᕐᑕᓂᐊᕐᕕᓂ ᓄᓇᕕᒻᒥ. ᐊᕙᑕᖅ ᐱᐅᓯᑐᖃᓕᕆᕕᒃᑯᑦ ᓈᒻᒪᓈᑦᓯᐊᑐᒃᑯᑦ ᐱᓇᓱᐊᕆᐊᓕᒻᒥᓂᒃ ᐱᓇᓱᐊᕈᓐᓇᑐᑦ ᑕᕝᕘᓇ, ᐊᒻᒪᓗ ᐋᕐᕿᓱᐃᒍᓐᓇᓱᑎᒃ ᓈᒻᒪᓈᕐᑐᑯᑦ ᑐᓴᐅᒪᖃᑎᒌᒋᐊᖃᕐᓂᖏᓐᓂᒃ ᓄᓇᓖᑦ, ᐊᕙᑎᓕᕆᔩᑦ, ᑐᓂᕐᑕᓂᐊᕐᑏᑦ ᐊᓯᖏᓪᓗ ᐱᓇᓱᕝᕕᐅᔪᑦ. ᓱᓇᓱᐊᕐᑎᐅᓂᕗᑦ ᐅᕙᑦᑎᓂᒃ ᓱᖏᕐᑐᐃᔪᖅ ᓈᒻᒪᓈᑦᓯᐊᑐᒃᑯᑦ ᖃᐅᔨᓴᕐᓂᖃᑲᑦᑕᕈᒪᒐᑦᑕ ᐊᓯᐅᖏᓐᓇᑎᑦᓯᑌᓕᓗᑕᓗ ᓄᓇᕕᒻᒥᐅᑦ ᐱᐅᓯᕐᓱᕈᑎᖏᓐᓂᒃ ᑲᔪᓯᔪᓂᒃ ᒪᓕᑦᓱᑎᒃ ᓄᓇᓕᒻᒥᐅᑦ ᐱᔪᒪᔭᖏᓐᓂᒃ ᐊᓯᐅᖏᓐᓇᑎᑦᓯᑌᓕᓂᕐᒧᑦ ᐃᓗᕐᕈᓯᑎᒍᑦ ᐱᐅᓯᕐᓱᕈᑎᖏᓐᓂᒃ ᑲᔪᓯᔪᓂᒃ.
ᐊᕙᑕᒃᑯᑦ ᑎᓕᐅᕐᑕᐅᒍᑎᕕᓂᖏᑦ ᐃᓄᒻᒪᕆᓐᓂᑦ ᓄᓇᕕᒻᒥᐅᓂᑦ
1985-ᒥ, ᐊᕙᑕᒃᑯᑦ ᑎᓕᐅᕐᑕᐅᓚᐅᕐᓯᒪᕗᑦ ᐃᓄᒻᒪᕆᓐᓄᑦ ᓄᓇᕕᒻᒥᐅᓄᑦ ᐊᖓᔪᕐᖃᐅᕕᖃᖁᑦᓱᒋᑦ ᑐᓂᕐᑕᓂᐊᕐᓂᐅᓱᓕᒫᑦᓯᐊᓂᒃ ᓄᓇᕕᒻᒥ. ᐊᖏᕐᑕᐅᓚᖓᑉᐸᑦ ᑖᓐᓇ ᐱᒻᒪᕆᐊᓗᒃ ᑎᓕᔨᒍᑎᒃ, ᐊᒻᒪᓗ ᐅᖃᖃᑎᒌᓐᓂᑯᑦ ᑐᓴᐅᒪᖃᑎᒌᑦᓯᐊᖃᑦᑕᓂᐊᕐᒪᑕ ᑕᕐᕋᒥ ᓄᓇᓖᑦ, ᐱᓇᓱᕝᕕᐅᔪᓕᒫᑦ, ᐱᓇᓱᐊᖃᑕᐅᓲᒍᒐᓗᐊᕈᑎᒃ ᖏᒃᑲᓗᐊᕈᑎᓘᓐᓃᑦ ᐊᕙᑎᓕᕆᓂᒃᒥ ᐊᓯᖓᓂᓪᓘᓃᑦ, ᖃᐅᔨᑎᑦᓯᖃᑦᑕᕆᐊᓖᑦ ᐊᕙᑕᒃᑯᓂᒃ ᑕᕐᖀᑦ ᐊᒥᓲᓐᖏᑑᒐᓗᐊᑦ ᓯᕗᓂᐊᓂ ᓱᓇᒥᓪᓘᓃᑦ ᐱᓇᓱᐊᕆᐊᓚᐅᕋᑎᒃ ᑐᓂᕐᑕᓂᐊᕐᓂᒨᓕᖓᔪᓂᒃ.
ᑕᑲᒃᑯᐊᑕᒐ ᐅᓐᓂᑑᑎᕗᑦ:
- ᐊᕙᑕᒃᑯᑦ ᖃᐅᔨᑎᑕᐅᖃᑦᑕᕆᐊᓖᑦ ᖃᓄᒐᓛᐱᓪᓘᓃᑦ ᑐᓂᕐᑕᓂᐊᕐᓂᑎᒍᑦ ᖃᐅᔨᓴᕐᓂᖃᕆᐊᓚᐅᕐᑎᓇᒍ ᓄᓇᕕᒻᒥ (ᑌᒣᑉᐸᑕ ᓄᓇᓕᒻᒥᐅᓂᒃ ᖃᐅᔨᑎᑦᓯᖃᑦᑕᕋᔭᕋᑦᑕ ᖃᓄᓪᓗᐊᑎᒋᒃ ᑐᓂᕐᑕᓂᐊᕋᔭᕐᒪ¯ᑕ);
- ᐅᓄᕐᑑᖏᑦᑑᒐᓗᐊᑦ ᐃᓄᐃᑦ ᓄᓇᓯᒪᔪᑦ ᐱᓇᓱᑦᑎᑖᕆᔭᐅᖃᑦᑕᕆᐊᓖᑦ ᐱᓇᓱᐊᕋᑦᓴᐅᓕᕐᑐᒥᒃ ᐱᓇᓱᐊᕐᑐᖃᓕᕐᐸᑦ;
- ᑐᓴᕐᑎᓯᐅᑎᓕᒫᑦ ᐊᑦᔨᖏᑦ ᐱᓇᓱᐊᕐᑕᐅᔪᕕᓂᕐᒥᑦ ᐱᔪᕕᓃᑦ ᐊᕙᑕᒃᑯᓅᕐᑕᐅᖃᑦᑕᕆᐊᓖᑦ;
- ᑐᓂᕐᑕᓂᐊᕐᓂᖃᕇᕐᐸᑦ, ᑕᑯᑦᓴᐅᑎᑦᓯᓂᖃᕆᐊᓕᒃ ᑐᓂᕐᑕᓕᒫᓂᒃ ᓇᕝᕚᑕᐅᔪᕕᓂᕐᓂᒃ ᑐᓂᕐᑕᓂᐊᕐᓂᖃᕐᑎᓗᒍ ᖃᓂᓐᓂᐹᒥ ᓄᓇᓕᐅᔪᒥ;
- ᐊᕙᑕᒃᑯᑦ ᖃᐅᔨᑎᑕᐅᖃᑦᑕᕆᐊᓖᑦ ᑐᑭᑖᕆᔭᐅᔪᓕᒫᓂᒃ ᐊᑦᑐᐊᓱᑎᒃ ᑐᓂᕐᑌᑦ ᓄᐊᑕᐅᓂᕕᓂᖏᓐᓄᑦ ᓇᕝᕚᑕᕕᓂᐅᑦᓱᑎᒃ ᓄᓇᕕᒻᒥ.
ᐊᕙᑕᒃᑯᑦ ᑐᓂᕐᑕᓂᐊᕐᑎᖁᑎᖏᑦᑕ ᐱᓇᓱᐊᕐᓯᒪᓕᕐᑕᖏᑦ: ᐃᓓᓐᓈᓱᑎᒃ ᐆᑦᑑᑎᑐᐃᓐᓀᑦ
ᑐᓂᕐᑕᓂᐊᕐᓂᑎᒍᑦ ᓇᐅᑦᓯᑐᕐᓂᒃ ᐅᔮᒃᓚᓐ ᐅᔭᕋᓐᓂᐊᕕᖓᓐᓂᒃ, 2008-ᒥ
2008-ᒥ, ᑐᓂᕐᑕᓂᐊᕐᓂᑎᒍᑦ ᓇᐅᑦᓯᑐᕐᑐᕕᓃᑦ ᐅᔮᒃᓚᓐ ᐅᔭᕋᓐᓂᐊᕕᖓᓐᓂᒃ, ᓄᕗᒻᒦᑐᒥᒃ.
ᖃᖓᑦᑕᔫᒥᑦ ᑕᑯᑦᓴᐅᔪᖅ ᐅᔮᒃᓚᓐ ᐅᔭᕋᓐᓂᐊᕕᖓ
ᑐᐱᐅᓚᐅᕐᑐᕕᓂᐅᑉ ᐊᒥᐊᒃᑯᕆᓕᕐᑕᖓ ᓇᕝᕚᑕᕕᓂᖅ ᐅᔮᒃᓚᓐ ᐅᔭᕋᓐᓂᐊᕕᖓᓐᓂ
ᓱᔪᑎᑦᓯᑌᓕᓂᕐᒧᑦ ᓴᒡᒐᓂᖅ ᓇᔪᒐᐅᓚᐅᕐᑐᕕᓂᕐᒥ IcGm-77-ᒍᓂᕋᕐᑕᒥ, 2005-ᒥ
2005-ᒥ, ᐃᓓᓐᓇᕋᓗᐊᖓᓂᒃ ᓱᔪᑎᑦᓯᑌᓕᕐᓂᒧᑦ ᓴᒡᒐᓂᐅᓚᐅᔪᖅ ᓇᔪᒐᐅᓚᐅᕐᑐᕕᓂᕐᒥᒃ IcGm-77-ᒍᓂᕋᕐᑕᒥ ᐃᓄᑦᔪᐊᒥ ᓱᖏᕐᑐᐃᓚᐅᔪᕗᖅ ᓇᔪᒐᐅᓚᐅᕐᑐᕕᓂᐅᑉ ᓱᒃᑯᑕᐅᒐᔭᓐᖏᓂᖓᓂᒃ ᐅᓯᑲᑦᑕᐅᑎᐊᓗᓐᓄᑦ ᐱᓇᓲᑎᐅᔪᓄᑦ. ᐱᓇᓱᐊᕐᓂᐅᓚᐅᔪᖅ ᓄᐊᑦᓯᑎᑦᓯᓚᕿᓚᐅᔪᒻᒥᔪᖅ ᐅᓄᕐᑐᒐᓛᓂᒃ ᓄᓇᐅᑉ ᖄᖓᓃᑦᑐᓂᒃ ᑐᓂᕐᑕᓂᒃ, ᓇᕝᕚᑕᕕᓂᕙᓪᓘᓱᑎᒃ ᐱᐊᕋᕐᓄᑦ.
ᐊᓪᓚᖁᑎᓕᐅᕐᑐᖅ ᓴᒡᒐᓂᖃᕐᑎᓗᒍ ᓇᔪᒐᐅᓚᐅᕐᑐᕕᓂᕐᒥᒃ IcGm-77-ᒍᓂᕋᕐᑕᒥ, ᓵᓐᖓᔪᖅ ᐅᐊᓐᓂᒧᑦ
ᐃᓘᓐᓇᖓ ᑕᑯᑦᓴᐅᔪᖅ ᐊᒻᒪᓗ ᓄᓇᐅᑉ ᖃᖓᓂᑦ ᓄᐊᑦᓯᓗᑳᑦᑐᑦ ᓇᔪᒐᐅᓚᐅᕐᑐᕕᓂᕐᒥᒃ IcGm-77-ᒍᓂᕋᕐᑕᒥ, ᓴᓐᖓᔪᖅ ᓂᒡᒋᒧᑦ
ᑐᓂᕐᑕᓂᐊᕐᑐᐃᑦ ᐃᓄᑦᔪᐊᒥ, 2004-ᒥ
ᓯᑉᑎᒻᐸᒥ ᐅᒃᑑᐱᕆᒥᓪᓗ 2004-ᒥ, ᓱᔪᑎᑦᓯᑌᓕᒐᓱᐊᕐᓂᒧᑦ ᓴᒡᒐᓂᖃᓚᐅᔪᕗᖅ ᐃᓄᑦᔪᐊᒥ, ᑐᓂᕐᑕᓂᐊᕐᕖᓂ ᓇᔪᒐᐅᓚᐅᕐᑐᕕᓃᓐᓂ IcGm-43-ᒍᓂᕋᕐᑕᒥ ᐊᒻᒪᓗ IcGm-a-ᒍᓂᕋᕐᑕᒥ. ᑖᓐᓇ ᐱᓇᓱᐊᕐᓂᖅ ᑎᓕᔨᒍᑕᐅᓚᐅᔪᖅ ᒪᑭᕝᕕᑯᓐᓄᑦ ᐃᓚᒋᔭᐅᑎᓪᓗᒍ ᐊᑐᐃᓐᓇᕈᕐᑎᕆᓂᕐᒧᑦ ᐱᕙᓪᓕᐊᔭᐅᓂᖓᓄᑦ ᐃᒪᐅᑉ ᓴᓂᐊᓂ ᐃᓪᓗᕈᐊᑉ.
ᐸᕐᓇᑕᐅᒪᔪᓂᒃ ᖃᐅᔨᓴᕐᓃᑦ ᓄᓇᐅᔪᒥ ᓱᕐᕋᑕᐅᒐᔭᕐᑐᒥᒃ ᐃᓪᓗᕈᐊᓕᐅᕐᓂᐅᒐᔭᕐᑐᒧᑦ, ᓇᔪᒐᐅᓚᐅᕐᑐᕕᓂᕐᒥ IcGm-43-ᒍᓂᕋᕐᑕᒥ
ᓴᒡᒐᓂᖅ ᓇᔪᒐᕕᓂᕐᒥᒃ 10-ᒥᒃ, ᓇᔪᒐᐅᓚᐅᕐᑐᕕᓂᖅ IcGm-43-ᒍᓂᕋᕐᑕᖅ, ᓵᓐᖓᔪᖅ ᓂᒡᒋᐅᑉ ᐊᑐᐊᕐᓂᖓᓂᒃ
ᑐᓂᕐᑕᓂᐊᕐᓂᑎᒍᑦ ᖃᐅᔨᓴᕐᓂᖅ ᓄᓇᒃ ᐅᔭᕃᓪᓗ ᖃᓄᐃᑦᑑᓂᖏᓐᓂᒃ ᐸᑎᕐᑑᒥ, 2002-ᒥ
ᐱᓇᓱᐊᕐᑕᐅᓱᓂ ᓯᑉᑎᒻᐱᕆ 2002-ᒥ, ᑖᓐᓇ ᑐᓂᕐᑕᓂᐊᕐᓂᑎᒍᑦ ᓇᐅᑦᓯᑐᒃᓱᑎᒃ ᕿᓂᓚᐅᔪᑦ ᓄᓇᐅᔪᓂᒃ ᐃᓗᐊᓃᑦᑐᓂᒃ ᓴᓂᐊᓃᑦᑐᓂᓪᓗ ᑰᓐᓂᐊᑎᒃᑯᑦ ᐅᔭᕋᓕᕆᑦᓱᑎᒃ ᐱᓇᓱᐊᕐᓂᖏᓐᓄᑦ ᐸᑎᕐᑑᑉ ᒥᑦᓵᓂ.
ᔫᓗ ᐅᐃᓕᐊᓗ ᐸᑎᕐᑑᑉ ᑲᑕᑦᑐᑲᓪᓚᖓᑕ ᓵᖓᓃᑦᑑᒃ ᕿᒥᕐᕈᓂᕐᒥᓂ ᓄᓇᐅᔪᒥ 1-ᒥᒃ
ᓴᒡᒐᓂᖅ ᑐᐱᐅᓚᐅᕐᑐᕕᓃᓐᓂᒃ 6-ᒥᒃ 7-ᒥᓪᓗ, 1991-ᒥ, ᓵᓐᖓᔪᖅ ᐅᐊᓐᓂᒧᑦ
ᓱᔪᑎᑦᓯᑌᓕᓂᕐᒧᑦ ᓴᒡᒐᓂᖅ ᓇᔪᒐᐅᓚᐅᕐᑐᕕᓂᕐᒥ GhGk-63-ᒍᓂᕋᕐᑕᒥ, 1990-ᒥ, 1991-ᒥᓪᓗ
ᒪᕐᕉᒃ ᐊᕐᕌᒎᒃ ᑐᖓᓕᕇᑦᑑᒃ (1990, 1991-ᓗ) ᐊᕕᑦᑐᑕᐅᓚᐅᔪᕘᒃ ᑐᓂᕐᑕᓂᐊᕐᓂᑎᒍᑦ ᓱᔪᑎᑦᓯᑌᓕᓂᕐᒧᑦ ᓴᒡᒐᓂᕐᓄᑦ ᑐᓃᑦ ᓇᔪᒐᒋᓚᐅᕐᑕᕕᓂᖓᓂᒃ GhGk-63-ᒍᓂᕋᕐᑕᒥ, ᑰᑦᔪᐊᕌᐱᐅᑉ ᓄᓇᓕᖓᑕ ᓴᓂᐊᓃᑦᑐᒥ. ᑖᓐᓇ ᐱᓇᓱᐊᕋᑦᓴᖅ ᐊᑐᐃᓐᓇᕈᕐᑎᑕᐅᔪᕕᓂᖅ ᑰᑦᔪᐊᕌᐱᐅᑉ ᑌᒣᖁᔨᑎᓪᓗᒋᑦ ᓱᔪᑎᑦᓯᑌᓕᒐᓱᐊᒧᑦ ᑐᓂᕐᑕᓂᐊᕐᓂᑎᒍᑦ ᖃᐅᔨᒪᔭᐅᓕᕐᑐᓂᒃ ᓱᒃᑯᑕᐅᑐᐃᓐᓇᕆᐊᖃᓕᓚᐅᔪᒻᒪᑕ ᑖᕙᓐᓇ ᓄᓇᒃ ᐱᒋᐅᕐᓴᕕᐅᒍᒫᕐᓂᐊᓕᕐᒪᑦ ᐅᓯᑲᑦᑕᐅᑎᐊᓗᓐᓂᒃ ᐱᓇᓲᑎᖃᕆᐅᕐᓴᑐᓄᑦ.
ᐲᑕ ᐃᓄᒃᓲᑉ ᑲᑕᒐᕐᓯᒪᔫᑉ ᓴᓂᐊᓃᑦᑐᖅ, ᓵᓐᖓᔪᖅ ᐅᐊᓐᓂᒧᑦ
ᑕᑯᑦᓴᐅᔪᖅ ᓴᒡᒐᑕᕕᓂᖅ ᑐᐱᐅᓚᐅᕐᑐᕕᓂᖅ 9, 1991-ᒥ, ᓵᓐᖓᔪᖅ ᓯᕿᓂᐅᑉ ᓂᒡᒋᖓᓄᑦ
