ᖃᐅᔨᓴᕐᓂᖅ, ᐊᑐᐊᒐᒃᑯᕕᒃ ᐱᓇᓱᐊᕐᑕᐅᓯᒪᔪᓂᓪᓗ ᑲᑎᕐᓱᐃᕕᒃ
ᐃᓄᑦᑎᒍᑦ ᐱᕐᕈᓰᑎᒎᕐᑐᖅ ᐊᑐᐊᒐᑦᓴᑯᕕᐅᑉ ᐱᓇᓱᐊᕐᑕᐅᓯᒪᔪᓂᓪᓗ ᓄᐊᑦᓯᕕᐅᑉ ᑐᕌᕐᓂᕆᒐᓱᐊᕐᑕᖓ ᖃᐅᔨᒪᔭᐅᒋᐊᓕᓐᓂᒃ ᓄᓇᕕᐅᑉ ᐃᓗᕐᕈᓯᖓᓐᓅᓕᖓᔪᓂᒃ ᐃᕐᖃᓇᕐᑑᓂᖓᓅᓕᖓᔪᓂᓪᓗ ᐊᑐᐃᓐᓇᐅᑎᑦᓯᓂᕐᒥᒃ ᓄᓇᕕᐅᑉ ᐃᓄᖏᓐᓄᑦ ᐱᓇᓱᕝᕕᖁᑎᖏᓐᓄᓗ.
ᖃᓄᐃᓘᕐᑎᐅᓂᕐᒥᓄᑦ ᓄᓇᕕᒻᒥᐅᓄᑦ ᐃᓕᑕᕆᔭᐅᔪᑎᒍᑦ ᐱᓇᓱᐊᕐᑕᐅᓯᒪᔪᓂᒃ ᓄᐊᑦᓯᔨᐅᓂᕐᒥᓄᑦ, ᓱᔪᐃᑌᓕᓂᖃᓲᖅ ᐱᔪᓐᓇᑐᓪᓚᕆᑦᑐᑎᑐᑦ ᐊᖑᒪᑦᓯᒍᑎᒋᑦᓱᒍ ᒫᓐᓇᐅᔪᖅ ᐱᓇᓱᐊᕐᑕᐅᓯᒪᔪᓂᒃ ᓄᐊᑦᓯᓂᕐᒧᑦ ᒪᓕᒐᐅᔪᓂᒃ. ᑌᑦᓱᒪᓂᑕᒻᒪᕇᑦ ᐊᓪᓚᑕᐅᕙᑦᑐᕕᓃᑦ, ᐃᓄᐃᑦ ᐅᓂᒃᑲᐅᓯᖏᑦᑕ ᓂᐱᓕᐅᕐᑕᐅᓂᕕᓂᖏᑦ, ᐃᓄᐃᑦ ᐊᓪᓚᐸᑦᑕᕕᓂᖏᑦ, ᐃᓅᖃᑎᒌᑦᑐᓂᒃ ᖃᐅᔨᓴᕐᑏᑦ ᐱᓇᓱᐊᕐᐸᑕᕕᓂᖏᑦ ᓄᐊᑕᐅᒪᔪᑦ, ᐊᑦᔨᖑᐊᑐᙯᑦ ᐊᒻᒪᓗ ᖃᒻᒥᓂᑕᐅᓂᕐᐹᑦ ᐊᑐᐊᒐᓐᖑᑎᑕᐅᓯᒪᔪᑦ ᓄᓇᓕᓕᒫᓂ ᑎᒥᐅᔪᓄᑦ ᐃᓘᓐᓇᓯᐊᑎᒃ ᐊᓪᓚᖁᑎᑦᑎᓃᖃᑕᐅᔪᑦ.
ᑎᓕᐅᕐᑕᐅᒪᐅᑎᖃᕐᓱᓂ ᐃᕐᐸᑎᑦᓯᓕᐅᒥᓂᕐᒥᒃ ᐱᓇᓱᐊᕐᑕᐅᓯᒪᑦᓱᑎᒃ ᓄᐊᑕᐅᓯᒪᔪᓅᓕᖓᔪᓂᒃ ᖃᐅᔨᒪᔭᐅᒋᐊᓕᓐᓂᒃ, ᐅᑯᓄᖓᑐᐊᑦᓯᐊᖅ: ᓄᓇᕕᒻᒥᐅᓄᑦ, ᐊᑐᐊᒐᑦᓴᑯᕕᒃ ᐱᓇᓱᐊᕐᑕᐅᓯᒪᔪᓂᓪᓗ ᓄᐊᑦᓯᕕᒃ ᐱᒍᑦᔨᓂᖃᓲᒍᒻᒥᔪᖅ ᖃᐅᔨᓴᕐᑎᓂᒃ, ᑐᓴᕋᑦᓴᓂᐊᕐᑎᓂᒃ ᐊᓯᖏᓐᓂᓗ ᑲᖐᒋᔭᓕᓐᓂᒃ. ᑖᓐᓇ ᓄᐊᑦᓯᕕᒃ ᑫᓪᓗᑐᐃᓂᖃᕐᑐᖅ ᓄᓇᓕᓐᓂᒃ ᓇᑉᐯᖁᔨᓂᕐᒥᒃ ᐊᑐᐊᒐᑦᓴᑯᕕᓐᓂᒃ ᐊᓯᖏᓐᓂᓗ ᐱᑦᓴᑖᕐᕕᐅᒍᓐᓇᑐᓂᒃ.
ᒫᓐᓇᐅᔪᖅ ᓄᐊᑦᓯᓂᖃᕋᓱᐊᕐᑐᒍᑦ ᐱᓇᓱᐊᕐᑕᐅᓯᒪᔪᓂᒃ ᓄᐊᑦᓯᕕᑦᑎᓅᒐᔭᕐᑐᓂᒃ, ᓂᐱᓕᐊᕕᓂᕐᓂᒃ ᑐᓂᕐᕈᓯᐊᕕᓂᕐᓂᓗ ᐊᑦᔨᒌᓐᖏᑐᓂᑦ ᑎᒥᐅᔪᓂᑦ ᐊᓂᕐᕋᐅᔪᓂᓪᓗ ᓄᓇᕕᓕᒫᒥᑦ ᐱᔪᓂᑦ. ᑖᓐᓇ ᐱᔭᑦᓴᖅ ᐱᓇᓱᐊᕐᑕᐅᓴᐅᑎᒋᒋᐊᓕᒃ, ᐱᔪᒪᔭᓕᒫᑲᓵᕗᑦ ᓱᔪᑐᐃᓐᓇᕆᐊᖃᓕᕐᒪᑕ ᐃᓂᖃᑦᓯᐊᖏᓐᓂᑯᒥᓄᑦ ᓈᒻᒪᑐᒥᒃ ᐊᒻᒪᓗ ᓄᐃᑕᓪᓗᕆᑦᑐᑯᑦ ᐊᓯᐅᖏᓐᓇᑎᑦᓯᑌᓕᒐᓱᐊᕐᓂᖃᑦᓯᐊᓲᒍᓐᖏᒪᑦ.
ᖃᐅᔨᒋᐊᓚᐅᕆᑦ
ᐅᖃᐅᓯᓕᕆᓂᕐᒧᑦ ᑲᑎᒪᓂᐊᕈᓰᑦ
ᑖᒃᑯᐊ ᑲᑎᒪᓂᐊᕈᓰᑦ ᑐᕌᖓᕙᓪᓗᓲᑦ ᐱᕙᓪᓕᐊᕈᑕᐅᒐᓱᐊᕐᓱᑎᒃ ᓄᑖᓂᒃ ᐅᖃᐅᓯᕐᓂᒃ ᐅᖃᕐᑕᐅᓗᑭᒍᓐᓀᑐᓂᓪᓗ ᐅᖃᖃᑎᒌᓐᓂᖃᖃᑦᑕᑎᓪᓗᒋᑦ ᖃᐅᔨᒪᔨᒋᔭᐅᔪᑦ (ᐃᓄᑐᙯᑦ ᐱᖓᓱᓂᑦ ᓯᑦᔭᓂᑦ ᐱᓯᒪᔪᑦ) ᐊᒻᒪᓗ ᐅᖃᐅᓯᐅᑉ ᐁᑉᐹᓅᔦᔩᑦ ᑐᓵᔨᓪᓗ. ᖃᒻᒥᓂᑕᐅᓂᕐᐹᖅ ᐅᖃᐅᓯᓕᕆᓂᕐᒧᑦ ᑲᑎᒪᓂᐊᕈᓯᐅᓚᐅᔪᖅ ᑲᖏᕐᓱᐊᓗᑦᔪᐊᒦᓚᐅᔪᖅ ᑎᕆᓪᓗᓕᐅᑦ (ᐁᕆᓕ) 2006-ᒥ.
2007-2008: ᓄᓇᕐᔪᐊᓕᒫᒥ ᓄᓇᖃᕐᖄᓯᒪᔪᑦ ᐊᕐᕌᒍᖁᑎᖓ (IPY)
ᐊᐅᔭᐅᑎᓪᓗᒍ/ᐅᐱᕐ¯ᒍᑎᓪᓗᒍ 2007-ᒥ, ᑐᓂᕐᑕᓂᐊᕆᐊᕐᓯᒪᔪᑦ ᐊᕙᑎᑦ ᒥᑦᓵᓃᑦᑐᑦ ᐃᓚᐅᓚᐅᔪᕗᑦ ᑐᓂᕐᑕᓂᐊᕐᓂᒥ ᓴᒡᒐᓂᕐᒧᑦ ᐃᑎᖑᐊᓗᒻᒥ (IbGk-3-ᒍᓂᕋᕐᑕᒥ) ᐊᒻᒪᓗ ᑐᓂᕐᑕᓂᐊᕐᓂᒥ ᖃᐅᔨᓴᕐᓂᖃᑲᓪᓛᐱᑦᑎᓗᒍ ᐃᑎᖑᐊᓘᑉ ᒥᑦᓵᓃᑦᑐᓂᒃ. ᑐᓂᕐᑕᓂᐊᕐᑏᑦ ᐱᓇᓱᐊᕐᓂᕆᓚᐅᔪᔭᖓ ᐃᓚᒋᔭᐅᓚᐅᔪᕗᖅ ᓄᓇᕐᔪᐊᓕᒫᒥ ᓄᓇᖃᕐᖄᓯᒪᔪᑦ ᐊᕐᕌᒍᖁᑎᖓᓐᓄᑦ.