ᐴᕐᑕᐅᑉ ᐱᓇᓱᐊᕐᑕᐅᓂᖓ
ᐃᓄᐃᑦ ᑌᒪᓐᖓᓂᐊᐱᒃ ᐱᓇᓱᐊᕋᑦᓴᙯᓐᓇᓲᑦ
ᐃᓄᐃᑦ ᑌᒪᓐᖓᓂᐊᐱᒃ ᐱᓇᓱᐊᕋᑦᓴᖃᓲᕕᓃᑦ. ᐃᓅᓯᐅᑦᓱᓂ ᐱᐅᓯᐅᒻᒪᑦ. ᐊᖑᑏᑦ ᒪᙯᓲᕕᓃᑦ ᖃᐅᑕᒫᑦ. ᐊᕐᓀᑦ ᑌᒪᓐᖓᑦ ᐃᓪᓗᓂᑦᓴᑎᓪᓗᒋᑦ ᒥᕐᓱᓱᑎᓪᓗ. ᐱᐊᕃᑦ ᐃᑲᔪᕐᑎᐅᓲᕕᓃᑦ ᐊᓈᓇᒥᓄᑦ ᐊᓈᓇᑦᓯᐊᑯᒥᓄᓪᓗ ᐃᓪᓗᒥ ᐊᐳᑎᒥ ᑐᐱᕐᒥᓗ. ᐃᓪᓗᒥᒃ ᐊᐳᓯᕐᑎᑌᓕᕙᑦᑐᕕᓃᑦ. ᓂᕕᐊᕐᓯᐊᑦ ᐃᑲᔪᕐᓯᒪᕙᑦᑐᕕᓃᑦ ᕿᑦᓯᕆᔪᓂᒃ. ᐃᓱᒣᓐᓇᕿᑦᓯᐊᓚᐅᕐᓯᒪᑦᔭᒐᑎᓗ. ᑭᓇᓕᒫᑦᓯᐊᑦ ᐃᑲᔪᕐᓯᒪᕙᑦᑐᕕᓃᑦ ᙯᓐᓂᐅᓇᓕᑐᐊᕐᒪᑦ. ᕿᔪᐃᑦ ᓄᐊᑕᐅᒋᐊᖃᕐᓱᑎᒃ; ᑖᓐᓇ ᐊᕐᓀᑦ ᐱᓇᓱᐊᒐᕕᓂᖓ. ᕿᔪᖅ ᐊᔪᕐᓇᓲᕕᓂᖅ ᓄᓇᕕᒃ ᓇᐹᕐᑐᖃᓐᖏᑐᒦᒻᒪᑦ. ᑎᑦᔭᓗᓐᓂᒃ ᓯᑦᔭᒦᑦᑐᓂᒃ ᐳᑯᒋᐊᖃᕐᐸᑐᕕᓃᑦ.
ᐱᐅᓯᐅᓐᓂᔭᖏᑦᑐᖅ ᑕᑯᓐᓇᕆᐊᒥᒃ ᑭᓇᑐᐃᓐᓇᒥᒃ ᐃᕿᐊᓱᑦᑐᒥᒃ. ᑖᕐᓯᒐᓗᐊᕐᒪᑦ, ᐊᕐᓀᑦ ᑲᒻᒥᐅᖏᓐᓈᐸᑦᑐᕕᓃᑦ ᐊᓐᓄᕌᓕᐅᕐᓱᑎᓪᓘᓃᑦ ᖁᓪᓕᐅᑉ ᐃᑯᒪᒍᓗᐊᐱᖓᑕ ᑭᓪᓕᖓᓂ. ᑭᓯᐊᓂ ᑕᒪᓐᓇ ᓱᖏᐅᓯᒪᑐᐃᓐᓇᑕᕕᓂᖓ, ᑌᒣᒻᒪᑦ ᑕᑯᓐᓇᕈᓐᓇᓯᐊᖏᓐᓈᐸᑐᕕᓃᑦ, ᐊᒻᒪᓗ ᑌᑦᓱᒪᓂᐅᑎᓪᓗᒍ ᑭᓇᓘᓐᓃᑦ ᐃᔭᐅᓯᔭᓲᖑᒐᓂ. ᐅᑭᐊᑦᓴᐅᓕᕐᒪᑦ, ᐃᓄᐃᑦ ᐃᓅᒐᓱᐊᕈᓯᖓ ᐅᖁᒣᓐᓂᓴᕉᕐᐸᑐᕕᓂᖅ ᑐᐲᑦ ᐅᖁᐃᓪᓕᓕᐅᒥᑐᐊᕐᒪᑕ ᐊᐳᑎᖃᑦᓯᐊᕋᑕᕋᓂᓗ ᐃᓪᓗᓕᒍᑎᑦᓴᒥᒃ. ᐃᓄᐃᑦ ᕿᐅᖏᓐᓇᓯᓲᕕᓃᑦ ᐅᓪᓛᑯᓗᐊᓐᖑᐊᖅ ᓯᓚ ᑌᒣᓪᓗᐊᓕᑐᐊᕐᒪᑦ.
