ᐴᕐᑕᐅᑉ ᐱᓇᓱᐊᕐᑕᐅᓂᖓ
ᐱᐅᓯᑐᖃᕐᑎᒍᑦ ᐃᓪᓘᑉ ᐃᓗᐊᓂ ᐱᓇᓱᐊᕐᑐᕕᓂᕐᓂᒃ ᐅᐱᒍᓲᓰᓂᖅ
ᑌᑦᓱᒪᓂᐊᓗᒃ, ᐃᓚᒌᑦᑐᑦ ᓄᓇᑐᕐᓕᒥᐅᒍᐃᓐᓈᓱᑎᒃ ᐃᓅᓲᕕᓃᑦ ᐃᓗᐃᒃᑲᓚᕆᐅᑦᓱᑎᒃ. ᐱᓇᓱᐊᕋᑦᓴᓕᒫᑦᓯᐊᑦ ᓄᓇᓕᓕᒫᒧᑦ ᐱᓇᓱᐊᕐᑕᐅᕙᑦᑐᕕᓃᑦ, ᐱᓇᓱᐊᕋᑦᓭᓗ ᐊᕕᑦᑐᑕᐅᓲᖑᒐᑎᒃ ᐱᓇᓱᐊᕆᐊᓖᑦ ᐊᕐᕌᒍᖏᑎᒍᑦ. ᑌᒪᓐᖓᓕᒫᑦᓯᐊᖅ, ᐱᐊᕃᑦ ᐃᑲᔪᕐᑎᐅᓲᕕᓃᑦ ᐊᖓᔪᕐᖄᒥᓄᑦ ᐊᓈᓇᑦᓯᐊᑯᒥᓄᓪᓗ. ᑌᒫᒃ ᐱᔭᑦᓴᖃᑦᓴᕋᒥᒃ ᐃᓱᒣᓐᓇᕿᑦᓯᐊᐸᓐᓂᔭᖏᑦᑐᑦ. ᐊᖓᔪᕐᖄᖏᑦ ᑐᑭᑖᓲᕕᓃᑦ ᖃᖓ ᐃᓱᒣᓐᓇᕿᒍᓐᓇᓂᖏᓐᓂᒃ.
ᐆᑦᑑᑎᒋᓗᒍ, ᐱᐊᕃᑦ ᐊᓂᕐᕋᒥᓐᓂᒃ ᓴᓗᒻᒪᓭᒋᐊᖃᕐᐸᑐᕕᓃᑦ, ᕿᓯᓐᓂᒃ ᑭᓂᑎᕐᓗᑎᒃ, ᐃᒥᕐᑕᕋᕐᓗᑎᒃ, ᓄᑲᕐᒥᓂᒃ ᐯᕆᑦᓯᓗᑎᒃ, ᖁᕐᕕᓂᒃ ᐊᓂᐊᑎᕆᓗᑎᒃ, ᐃᑲᔪᕐᓯᒪᓗᑎᒃ ᐊᓈᓇᑦᓯᐊᑯᒥᓂᒃ, ᐊᓯᖏᓐᓂᓗ. ᑎᓕᐅᕐᑕᐅᓕᑐᐊᕋᒥᒃ ᐅᐱᒍᓲᓯᔭᐅᓂᐊᕐᓂᕋᕐᐸᑐᕕᓃᑦ ᐊᖓᔪᕐᖄᒥᓄᑦ, ᐅᖃᐅᑎᔭᐅᑦᓱᑎᓪᓘᓃᑦ ᐊᓃᓐᖑᐊᕈᓐᓇᓚᖓᒋᐊᖏᓐᓂᒃ ᐱᔭᑦᓴᒥᓂᒃ ᐱᔭᕇᑐᐊᕈᑎᒃ. ᑕᒪᓐᓇ ᑲᑦᓱᙰᓪᓕᓭᕙᑦᑐᕕᓂᖅ ᐱᐊᕋᕐᓂᒃ ᐱᓇᓱᐊᕆᐊᓕᒻᒥᓂᒃ ᐱᔭᕇᑲᐱᓐᓂᓴᐅᓚᕿᑦᓱᒋᑦ.
ᓂᕕᐊᕐᓯᐊᑦ ᐊᓈᓇᒥᑕ ᑭᓪᓕᖓᓃᕙᓪᓗᐸᑦᑐᕕᓃᑦ, ᑕᑯᓐᓇᐅᔮᕐᓱᒋᑦ ᐃᓕᓐᓂᐊᕕᒋᑦᓱᒋᓪᓗ ᐊᓐᓄᕌᓕᐅᕈᓯᕐᓂᒃ. ᑭᓗᖏᑦ ᐱᐅᑦᓯᐊᖏᒃᑲᓗᐊᕐᒪᑕ, ᐊᓈᓇᖏᑦ ᐅᐱᒪᐅᑦᔨᑐᐃᓐᓇᐸᑦᑐᕕᓃᑦ. ᑕᒪᓐᓇ ᑲᑦᓱᙰᓪᓕᓭᕙᑦᑐᕕᓂᖅ ᓂᕕᐊᕐᓯᐊᓂᒃ ᐃᓕᑦᓯᓕᐅᒥᒍᒪᓚᕿᑎᓪᓗᒋᑦ ᓄᑖᓂᒃ ᓱᓇᑐᐃᓐᓇᓂᒃ. ᐅᓪᓗᒥᓕ ᑕᑯᓲᖑᒍᓐᓀᑐᒍᑦ ᐱᐊᕋᕐᓂᒃ ᑕᒪᒃᑯᓂᖓ ᐱᓇᓱᐊᕐᑐᓂᒃ ᐊᓂᕐᕋᐅᑉ ᐃᓗᐊᓂ. ᐃᓄᒻᒪᕇ ᑕᑯᕙᓪᓚᓯᒪᓕᕐᑐᑦ ᐊᑦᔨᐅᖏᑦᑐᒪᕆᐅᓕᕆᐊᖓᓂᒃ ᐃᓅᓯᐅᓕᕐᑑᑉ.
