ᐴᕐᑕᐅᑉ ᐱᓇᓱᐊᕐᑕᐅᓂᖓ
ᕿᒧᑦᓰᑦ
ᐅᑭᐅᒥ ᕿᒧᑦᓰᑦ ᐱᒻᒪᕆᐅᓂᕐᐹᕕᓃᑦ ᐱᐅᒃᑯᑎᒋᔭᐅᑦᓱᑎᒃ ᐊᓐᓇᐅᒪᒐᓱᐊᕐᓂᒧᑦ, ᖃᔦᑦ ᑌᒫᑦᓭᓇᖅ ᐱᒻᒪᕆᐅᕙᓐᓂᒪᑕ ᐊᐅᔭᒥ (ᐅᐱᕐᖔᒥ). ᐅᑯᐊ ᐃᓄᒻᒪᕇᑦ ᐅᖃᐅᑦᔪᐃᒍᑎᖏᑦ ᐅᕙᑦᑎᓂᒃ:
ᕿᒧᑦᓯᑐᓂ, ᐃᓘᓐᓇᑎᒃ ᕿᒻᒦᑦ ᐃᓂᖃᕐᐸᑐᕕᓃᑦ ᕿᒧᑦᓱᑎᒃ. ᓯᕗᓪᓕᖁᑎᖓ ᐊᕐᓇᐅᕙᓪᓗᓲᕕᓂᖅ, ᑭᖑᓪᓕᖁᑎᖃᕐᓱᓂᓗ ᖃᒧᑏᓐᓂ ᖃᓂᑦᓴᓂᕐᐹᒥᒃ. ᕿᒧᑦᓯᑏᑦ ᕿᒻᒥᖃᕙᓪᓗᓲᕕᓃᑦ ᖁᓕᓂᒃ ᖁᓕᓪᓗ ᒪᕐᕈᓘᓄᑦ. ᐊᖑᑎᒃ ᓯᕗᓪᓕᖁᑎᓕᐅᕈᒪᒍᓂ ᕿᒻᒥᐊᕋᕐᒥᒃ ᐊᑎᒋᒥᓄᑦ ᐃᓗᐊᓅᕆᕙᑦᑐᕕᓂᖅ ᐃᒻᒥᓂᒃ ᐊᓂᓚᖓᑎᓪᓗᒍ ᐁᖓᑎᒍᑦ – ᑌᒣᓘᕐᑕᐅᓱᓂ ᐃᓕᑦᓯᕙᑦᑐᕕᓂᖅ ᓯᕗᓕᒋᐊᒥᒃ.
ᖃᒧᑏᒃ ᐱᕐᕌᒋᒃ ᓯᕐᒥᓯᔭᐅᕙᓐᓂᒥᔫᒃ ᐱᐊᑦᑑᖁᔭᐅᒧᑦ. ᖃᐅᑕᒫᑦ, ᓂᕕᐊᕐᓯᐊᑦ ᓱᕈᓰᓪᓘᓃᑦ ᐊᓂᔮᒋᐊᖃᕐᐸᑐᕕᓃᑦ ᓱᓇᒥᓪᓘᓃᑦ ᐄᓯᓚᐅᕋᑎᒃ. ᐊᖑᑏᑦ ᒪᙯᒋᐊᓚᖓᒻᒪᑕ ᐊᓂᔮᕐᓂᖅ ᐃᓱᒪᒋᒋᐊᖃᓂᕐᐹᖑᓲᕕᓂᖅ ᑐᑭᖃᕋᒥ ᐃᓄᐃᑦ ᕿᒻᒦᓗ ᓂᕆᔭᑦᓴᑖᓛᓕᕐᒪᑕ. ᑭᓯᐊᓂ ᐊᐅᓪᓚᒋᐊᓚᐅᕋᑎᒃ, ᖃᐊᑕᒫᑦ ᑐᒃᓯᐊᐸᑦᑐᕕᓃᑦ ᐊᑖᑕᕘᕐᓱᑎᒃ. ᓂᕕᐊᕐᓯᐊᑦ ᕿᒻᒥᓂᒃ ᐊᓄᓕᕐᑐᐃᒋᐊᖃᕐᐸᑐᕕᓃᑦ ᕿᐅᓐᓇᑐᒻᒪᕆᐊᓘᒐᓗᐊᕐᒪᑦ, ᒪᙯᑦᑏᑦ ᐱᒻᒪᕆᐅᓂᕐᓴᓂᓕ ᐱᔭᑦᓴᖃᕐᒪᑕ. ᐅᐱᕐᖓᓴᒥ, ᐱᐊᕃᑦ ᕿᒻᒥᓂᒃ ᑲᒥᑦᑐᐃᕙᑦᑐᕕᓃᑦ ᐃᑎᒐᖏᑦ ᑭᓕᕐᑕᐅᓂᐊᓐᖏᒪᑕ ᓯᑯᒧᑦ. ᖃᔭᐅᑉ ᐊᒥᐊᕕᓂᖓᓂᒃ ᑲᒥᖃᕐᑎᑕᐅᕙᑦᑐᕕᓃᑦ, ᐱᐊᕃᓪᓗ ᑕᒻᒪᑌᓕᑦᓯᐊᓱᑎᒃ ᓇᓪᓗᐊᓄᑦ ᐃᑎᒐᓄᑦ ᐅᖏᕐᑐᐃᕙᑦᓱᑎᒃ ᑲᒥᖏᓐᓂᒃ ᐃᖏᕐᕋᓕᕈᑎᒃ ᐲᑐᐃᓐᓇᓂᐊᓐᖏᒪᑕ. ᐃᓛᓐᓂ ᒪᙯᑦᑏᑦ ᐅᓪᓗᓂ ᐊᒥᓱᓂ ᑕᕆᐅᒦᑉᐸᑐᕕᓃᑦ, ᐃᓛᓐᓂᐊᓛᑦ ᐱᓇᓱᐊᕈᓯᓕᒫᕐᓱᑎᒃ. ᑐᒃᑐᓯᐅᕆᐊᓕᕋᒥᓪᓗ ᑕᕐᕿᓕᒫᕐᐸᓱᑎᒃ ᐅᖓᑖᓄᐊᓪᓛᑦ ᐊᓂᕐᕋᒥᓄᑦ ᐅᑎᓐᖏᑑᑦᓱᑎᒃ.
ᐃᓛᓐᓂ ᐅᑎᕐᐸᓱᑎᒃ ᐅᕐᕿᓇᕐᓱᑎᒃ, ᐃᓛᓐᓂᓗ ᐆᒪᔪᕐᓱᑎᒃ. ᒪᙯᑦᑏᑦ ᐅᑎᑐᐊᕐᒪᑕ, ᐱᐊᕃᑦ ᐃᕐᖃᓀᔭᕐᑎᑕᐅᕙᑦᑐᕕᓃᑦ ᖃᒧᑏᓐᓂᒃ ᓴᓂᕐᕚᑎᕆᑦᓱᑎᓪᓗ ᐱᐅᑎᓂᒃ. ᕿᒻᒦᑦ ᐊᓄᖏᓐᓂᒃ ᓴᓗᒻᒪᓭᓲᕕᓃᑦ ᑭᖏᑦᑐᒧᓪᓗ ᓂᕕᓐᖓᓱᒋᑦ ᕿᒻᒥᓄᑦ ᐱᔭᐅᓂᐊᓐᖏᒪᑕ ᖃᐅᑐᐊᕐᐸᑦ ᐊᑐᕐᑕᐅᓛᕐᒥᒪᑕ ᒪᙯᒋᐊᓛᕐᑐᓄᑦ.
ᒪᙯᑦᑎᒃ ᐱᕐᑐᒧᑦ ᓈᒻᒪᓈᑐᐊᕋᒥ ᑕᑯᕐᖃᔭᕋᓂᓘᓐᓃᑦ ᓯᕗᕌᐱᒻᒥᓂᒃ, ᕿᒻᒦᑦ ᑌᒪᓐᖓᓕᒫᖅ ᖃᐅᔨᒪᕙᑦᑐᕕᓃᑦ ᐅᑎᕆᐊᒥᒃ ᐊᓂᕐᕋᒥᓐᓄᑦ.
ᓱᓇᑐᐃᓐᓇᐅᒐᓗᐊᕐᐸᑦ ᐆᒪᔪᕐᑕᐅᔪᖅ, ᓱᑯᑦᓯᓕᒫᑦᓯᐊᖏᑦ ᐊᓯᐸᑦᑕᐅᕙᓐᓂᔭᖏᑦᑐᑦ. ᓴᐅᓂᒐᓚᖏᑦ ᐸᑎᒐᓚᖏᑦ ᐊᑑᑎᓕᕕᓃᑦ, ᓂᕿᖓᓗ ᐊᕕᑦᑕᐅᓯᐊᕐᐸᓱᓂ ᓄᓇᑐᕐᓕᓕᒫᒧᑦ.
