• ᑭᓇᒃᑰᒪᖔᑦᑕ
  • ᐊᑑᑎᔭᐅᓯᒪᔪᑦ
  • ᐱᓇᓱᖃᑎᒌᑦᑐᑦ
• ᖃᐅᔨᒋᐅᕐᓂᖅ ᑐᓂᕐᑕᓂᐊᕐᓂᒥᒃ
  • ᐅᑭᐅᕐᑕᑑᑉ ᐱᐅᓯᖓ ᐅᓪᓗᐃᑦ ᒪᓕᑦᓱᒋᑦ
  • ᐅᓕᕐᓀᓯᒍᑎᐊᕈᒃ
• ᐱᓇᓱᐊᕐᑕᐅᔪᐃᑦ ᐱᓇᓱᐊᕋᑦᓭᓗ
  • ᖃᐅᔨᓴᕐᓂᒧᑦ ᐱᓇᓱᐊᕋᑦᓭᑦ
  • ᐱᓇᓱᐊᕐᑕᐅᔪᐃᑦ
  • ᓄᓇᓕᐅᑉ ᑎᒥᐅᔪᐃᓪᓗ ᐱᒍᑦᔨᓂᖏᑦ
• ᖃᕆᑕᐅᔭᑎᒍᑦ ᓄᓇᕐᔪᐊᓕᒫᒨᕈᑏᑦ
  • ᑐᓂᕐᑕᓂᐊᕐᕕᒃ
  • ᓄᐊᑕᐅᓯᒪᔪᑦ
  • ᖃᕆᑕᐅᔭᒦᑦᑐᑦ ᐊᓪᓚᖁᑏᑦ
• ᑐᑭᓯᒋᐊᕐᕕᓭᑦ
  • ᐊᑐᐊᒉᑦ ᐊᓪᓚᖁᑎᖏᑦ
  • ᐱᑐᑦᓯᒪᒍᑏᑦ

ᑐᓂᕐᑕᓂᐊᕐᓂᖅ

ᓄᓇᕐᔪᐊᒥᐅᓕᒫᑦ ᐅᑭᐅᕐᑕᑐᒥᐅᑦ ᐊᕐᕌᒍᖁᑎᖓ (IPY)

< ᒪᒃᐱᒐᐅᑫᓐᓇᑐᒧᑦ

ᖃᐅᔨᓴᕐᓂᖅ ᐃᓄᑐᐃᓐᓇᖄᕕᓃᑦ ᓄᓇᑉᐸᓕᐊᒍᓯᕕᓂᖏᑦᑕ ᓯᓚᓗ ᓈᒻᒪᓯᒻᒪᑦ ᐱᑦᓴᑖᕋᓱᐊᕐᐸᓂᕕᓂᖏᑦᑕ ᐋᕐᕿᓯᒪᐅᑎᑦᓴᖏᓐᓂᒃ ᓄᓇᕕᐅᑉ ᓯᑦᔭᖏᓐᓂ

ᓄᐃᑕᔪᒃᑯᑦ ᐃᓚᐅᕙᒃᑲᒥᒃ ᓄᓇᕐᔪᐊᒥᐅᓕᒫᑦ ᐅᑭᐅᕐᑕᑐᒥᐅᑦ ᐊᕐᕌᒍᖁᑎᖓᓐᓄᑦ, ᐊᕙᑕᒃᑯᑦ ᑐᓂᕐᑕᓂᐊᕐᓂᒧᑦ ᐱᒍᑦᔨᕕᖓ ᐱᓇᓱᐊᕐᓯᒪᓕᕐᑐᖅ ᐊᑦᔨᒌᓐᖏᑐᓂᒃ ᑕᒪᒃᑯᓄᖓᓕᖓᔪᓂᒃ ᖃᐅᔨᓴᕐᓂᐅᕙᑦᑐᓂᒃ.

ᖃᐅᔨᓴᕐᑕᕕᓃᑦ ᖃᓄᐃᓕᖓᓂᖏᑦ

ᐃᓄᑐᐃᓐᓇᖄᕕᓃᑦ/ᐃᓄᐃᑦ ᓇᔪᒐᕕᓂᖏᑦ ᓄᓇᕕᒻᒥ: ᓄᓇᐅᑉ ᓇᔪᒐᐅᓂᕕᓂᓐᖑᐊᖓ

ᖃᐅᔨᓴᕐᑕᐅᓂᕕᓂᖓ ᐃᓄᑐᐃᓐᓇᖄᕕᓂᕐᓄᐊᖓᔪᑦ/ᐃᓄᓐᓄᐊᖓᔪᓪᓗ ᑐᓂᕐᑕᓂᐊᕐᓂᒥ ᓄᓇᕕᒻᒥ ᖃᐅᔨᓴᕐᑕᐅᑲᓐᓂᕆᐊᓕᒃ. ᐊᑕᐅᓯᖅ ᑲᖐᒋᓇᕐᑐᖑᐊᖅ ᖃᐅᔨᒪᔭᐅᓕᕐᑐᖅ ᐅᑭᐅᕐᖃᒥᐅᑎᓪᓗᒍ ᐃᓄᑐᐃᓐᓇᖄᕕᓃᑦ/ᐃᓄᐃᑦ ᓇᔪᒐᕕᓂᖏᑦ ᐃᓘᓐᓇᑲᓵᖏᑦ ᕿᑭᕐᑕᓃᒻᒪᑕ; ᖃᐅᔨᓯᒪᔪᒍᑦ ᐃᑭᑦᑐᐊᐱᓐᓂᒃ ᖃᕐᒪᕕᓂᕐᓂᒃ ᓄᓇᑐᐃᓐᓇᒦᑦᑐᓂᒃ. ᐊᒻᒪᓗᑦᑕᐅᖅ, ᐅᐱᕐᖓᓴᒥ/ᐊᐅᔭᒥ ᐅᑭᐊᕐᐸᓕᐊᒥᓪᓗ ᐃᓅᖃᑎᒌᑦᑐᕕᓃᑦ ᓄᓇᑐᐃᓐᓇᒥᐅᕕᓂᕐᔫᔮᕐᑐᑦ ᕿᑭᕐᑕᓂᓪᓗ. ᑕᒪᓐᓇ ᑕᑯᑎᑦᓯᔪᕐᔫᔮᕐᑐᖅ ᒪᕐᕈᐃᓕᕿᖓᔪᒥᒃ ᐃᓅᒐᓱᐊᕈᓯᓕᕕᓂᕐᔫᔮᕐᒪᑕ ᐊᑦᑐᐊᓚᕆᑦᑐᒥᒃ ᓯᓚᐅᑉ ᐊᓯᑦᔨᑕᕐᓂᖓᓄᑦ. ᒫᓐᓇᐅᔪᖅ ᖃᐅᔨᒪᓕᕐᑕᑕ ᐃᓗᐊᓂ, ᑲᖐᒋᓇᓐᖑᐊᓕᕋᔭᕐᑐᖅ ᐊᓪᓚᓯᒪᔪᓕᐅᕐᑐᖃᕈᓂ ᓄᓇᑖᕈᓯᐅᕙᑦᑐᕕᓃᑦ ᒥᑦᓵᓄᐊᖓᔪᓂᒃ, ᑖᒃᑯᐊ ᐱᓯᒪᔪᕐᔫᔮᕐᒪᑕ ᐊᑐᐃᓐᓇᐅᔪᓂᑦ ᖃᐅᔨᓯᒪᓕᕐᑕᑎᓐᓂᑦ. ᑐᑭᑖᕐᓂᖃᕆᐊᓕᒃ ᐃᓅᒐᓱᐊᕈᓯᕕᓂᖅ ᐱᕙᓪᓕᐊᔭᐅᓐᓂᒪ¯ᑦ ᐅᓪᓗᐃᑦ ᐃᖏᕐᕋᓂᖏᑦ ᒪᓕᑦᓱᒋᑦ ᐊᒻᒪᓗ ᑌᒣᑦᑐᕕᓂᐅᑉᐸᑦ, ᓱᓇᓪᓗᑯᐊᐲᑦ ᐊᓯᑦᔨᓚᕿᓐᓂᒪ¯ᑕ. ᑖᓐᓇ ᖃᐅᔨᓴᕐᓂᖅ ᐊᑐᓗᐊᓐᖑᐊᓛᕐᓂᐊᑐᖅ ᑐᑭᓯᓕᐅᒥᒐᓱᐊᕐᓂᑎᓄᑦ ᓯᓚᐅᑉ ᐊᓯᑦᔨᐸᓪᓕᐊᓂᖓᓂᒃ ᐃᓅᖃᑎᒌᑦᑐᑎᒍᓪᓗ ᑲᑦᓱᙰᓐᓂᕕᓂᕐᓂᒃ.

ᐋᕐᕿᓯᒪᐅᑏᑦ ᐱᑦᓴᑖᕋᓱᐊᕐᓂᒧᑦ ᐊᓯᑦᔨᐸᓪᓕᐊᓂᖏᓐᓄᓗ ᐱᐅᒃᑯᑎᑦᓴᔦᑦ

ᓄᑖᓂᒃ ᐃᓱᕐᕆᐅᑎᑖᕐᐸᓕᐊᓂᖅ ᑐᑭᐊᒎᕐᑑᓱᓂ ᐅᖄᔭᑦᓴᖑᐊᕌᓘᒐᔭᕐᒥᔪᖅ ᐱᓇᓱᐊᕋᑦᓴᒨᓕᖓᓗᓂ, ᖃᐅᔨᒪᑦᓯᐊᒐᓛᓐᖏᓇᑦᑕ ᓄᓇᕕᒻᒥᐅᑦ ᐃᓄᑐᐃᓐᓇᖄᕕᓃᑦ/ᐃᓄᐃᑦ ᐋᕐᕿᓯᒪᐅᑎᕕᓂᖏᓐᓂᒃ ᐱᑦᓴᑖᕋᓱᐊᕐᓂᒧᑦ ᐊᓯᑦᔨᐸᓪᓕᐊᓂᖏᓐᓄᓗ ᐱᐅᒃᑯᑎᑦᓴᔦᑦ. ᐆᒪᔪᕕᓃᑦ ᓴᐅᓂᖏᑦ ᐊᑐᕐᑕᐅᕙᓐᓂᕕᓂᖏᑦ ᐱᐅᒃᑯᑎᓕᐊᕆᑦᓱᒋᑦ ᐅᖄᔭᑦᓴᐅᒥᔪᖅ ᐱᓇᓱᐊᕋᑦᓴᐅᑉ ᐃᓗᐊᒎᕐᓗᑎᒃ. ᐱᐅᒃᑯᑎᑦᓴᔭᕐᑖᕋᓱᐊᕐᓂᒧᑦ ᐋᕐᕿᓯᒪᐅᑏᑦ ᓱᕐᖁᐃᑐᒥᒃ ᐱᑐᑦᓯᒪᔪᑦ ᐃᓅᖃᑎᒌᑦᑐᑎᒍᑦ ᑲᑦᓱᙰᕐᓂᕕᓂᕐᓄᑦ. ᓯᓚᐅᑉ ᐊᓯᑦᔨᐸᓪᓕᐊᓂᖓ ᓱᕐᕃᓯᒪᑐᐃᓐᓇᕆᐊᖃᕐᒥᔪᖅ ᑖᒃᑯᓂᖓ ᐋᕐᕿᓯᒪᐅᑎᓂᒃ ᐱᐅᒃᑯᑎᑦᓴᔭᕐᑖᕆᔭᐅᒍᓐᓇᑐᑦ ᐅᐸᑦᑕᐅᓯᐊᕐᖃᔭᓐᖏᓂᖏᓐᓄᑦ ᐃᒻᒥᒎᓈᕐᑎᑐᓂᓪᓗ ᐊᓯᐊᓂᒃ ᕿᓂᕐᑎᑦᓯᒋᐊᖃᕐᑐᕕᓂᐅᑦᓱᑎᒃ ᐃᓅᒐᓱᐊᕈᑎᑦᓴᓂᒃ.

ᖃᐅᔨᓴᕐᓂᐅᓯᒪᓕᕐᑐᑦ

ᐊᐅᔮᓐᓂ 2007-ᒥ 2008-ᒥᓪᓗ, ᑐᓂᕐᑕᓂᐊᕐᑏᑦ ᐊᕙᑎᑦ ᒥᑦᓵᓃᑦᑐᑦ ᐃᓚᐅᖃᑦᑕᓚᐅᔪᕗᑦ ᓴᒡᒐᓂᕐᒥᒃ ᑐᓂᕐᑕᓂᐊᕐᕕᒥ IbGk-3-ᖑᓂᕋᕐᑕᒥ, ᐱᓐᖑᑎᑦᓯᓱᑎᓗ ᐱᒋᐊᓐᖓᐅᑎᒥᒃ ᑭᑎᑦᓯᓂᕐᒥᒃ ᑐᓂᕐᑕᖁᑎᒥᓐᓂᒃ ᓇᕝᕚᑕᕕᓂᕐᒥᓂᒃ ᓄᓇᕕᒻᒥᑦ. ᑐᓂᕐᑕᓂᐊᕐᕕᒃ IbGk-3-ᖑᓂᕋᕐᑕᖅ ᐃᑎᖑᐊᓗᒻᒦᑐᖅ ᕿᑭᕐᑕᒥ, ᑕᓯᐅᔭᕐᔪᐊᑉ ᓯᑦᔭᖓᑕ ᐅᐊᓐᓂᖓᓂ, ᐃᓄᑦᔪᐊᑉ ᓄᓇᓕᖓᑕ ᓴᓂᐊᓃᑦᓱᓂ. ᑖᓐᓇ ᖃᐅᔨᓴᕐᓂᐅᓚᐅᔪᖅ ᐱᓇᓱᐊᕐᑕᕕᓂᖅ ᐃᓚᒋᓕᐅᑎᓂᕕᓂᑦᑎᓄᑦ ᓄᓇᕐᔪᐊᓕᒫᒥ ᐅᑭᐅᕐᑕᑐᒥᐅᑦ ᐊᕐᕌᒍᖁᑎᖓᓐᓄᑦ. ᑖᓐᓇ ᐱᓇᓱᐊᕋᑦᓴᖅ ᐱᒋᐊᕐᑎᑕᐅᒋᐊᓐᖓᑐᕕᓂᖅ Daniel Gendron-ᒧᑦ (ᑕᓂᐊᓪ ᔮᓐᑦᕉᓐ) ᑐᑭᒧᐊᕐᑎᑕᐅᑦᓱᓂᓗ Pierre M. Desrosiers-ᒧᑦ (ᐱᔦ ᑎᕉᓯᔦ).

ᐊᐅᔭᖅ 2007-ᒥ ᐱᓇᓱᐊᕐᓂᕕᓃᑦ

ᐃᓚᐅᔪᕕᓃᑦ

Pierre M. Desrosiers-ᒧᑦ (ᐱᔦ ᑎᕉᓯᔦ) ᐃᓚᐅᔪᕕᓃᑦ ᐃᑎᖑᐊᓗᒻᒥ, ᑖᒥ ᐅᐃᑖᓗᑦᑐᖅ, ᓵᑲᕆᐊᓯ ᐸᐅᓗᓯ (ᒪᙯᑦᑎ-ᒪᓕᒐᖅ), ᐋᓕ ᓈᓚᑦᑑᔭᖅ (ᒪᙯᑦᑎ-ᒪᓕᒐᖅ), ᐋᓂ ᑯᑭᐊᐱᒃ (ᐃᒐᔨ), ᒣ ᐹᑦᑐᔨᑦᔅ (ᐃᒐᔨ), ᐊᒻᒪᓗ ᐃᑲᔪᕐᑎᒃ ᒪᙯᑦᑎᓄᑦ-ᒪᓕᒐᕐᓄᑦ ᐸᐅᓗᓯ ᐃᓄᑉᐸᖅ ᐊᒻᒪᓗ ᒃᔨᔅ ᐊᖏᔫᖅ. ᒪᕐᕉᒃ ᐃᓕᓐᓂᐊᑏᒃ ᑕᕆᐅᑉ ᐊᑭᐊᓂᒥᐅᔮᒃ (Europe-ᒥᑦ) ᐃᓚᐅᓚᐅᔪᒻᒥᔫᒃ: Claire Houmard (ᒃᓕᐊᔾ ᖂᒫᓐ) (ᑖᓐᓇ ᐃᓕᓐᓂᐊᕕᕐᔪᐊᒥ ᑕᕆᐅᑉ ᐊᑭᐊᓂ ᐅᐃᒍᐃᑦ ᓄᓇᖓᓐᓂ ᐱᔭᕇᕈᑎᑖᕋᓱᐊᕐᑐᖅ) ᐊᒻᒪᓗ Enrico Foietta (ᐃᐊᓐᔩᑯ ᕗᐃᑦᑕ) ᐃᓕᓐᓂᐊᕕᕐᔪᐊᒥ ᐃᓕᓐᓂᐊᑎᒃ, ᐃᑕᓕᒥ). ᖁᓕᐅᓐᖏᒐᕐᑐᑦ ᐃᓄᐃᑦ ᐃᓕᓐᓂᐊᑏᑦ ᓯᑕᒪᓂ ᐱᓇᓱᐊᕈᓯᕐᓂ ᐃᓚᐅᓚᐅᔪᒻᒥᔪᑦ ᐃᓕᓐᓂᐊᑎᑕᐅᑦᓱᑎᒃ ᓴᒡᒐᒍᓯᑦᓯᐊᒥᒃ ᐃᓚᐅᑎᓪᓗᒋᑦ ᕿᓂᕈᓯᖅ, ᐱᓪᓗᑯᒋᐊᓕᑎᒍᑦ ᐊᓪᓚᖑᐊᕐᓂᐅᒋᐊᓕᒃ, ᐊᑐᕐᓂᒥᒃ ᑐᓂᕐᑕᓂᐊᕈᑐᓂᒃ ᕿᔪᐊᐱᓐᓂᒃ ᓯᒃᑭᑕᓪᓛᒍᑦᓱᑎᒃ ᐊᒻᒪᓗ ᑐᓂᕐᑕᓂᒃ ᐱᒐᓱᐊᕈᓯᕐᓂᒃ. ᐅᑯᐊ ᐃᓕᓐᓂᐊᑎᐅᓚᐅᔪᑦ: ᓈᑕᓕ ᐃᖃᓗᒃ, ᐁᐸᔭᖄ ᖃᓴᓪᓗᐊᖅ ᒣᓇ, ᐁᐱᓕ ᐅᐃᓕᐊ, ᒦᑲᓐ ᖃᓴᓪᓗᐊᖅ, ᔅᑎᕚᓐ ᒣᓇ, ᑖᒥ ᓂᕕᐊᕐᓯ, ᐋᓕ ᐊᑯᓕᐊᖅ, ᒨᓱᓯ ᐃᓪᓚᐅᑦ ᐊᒻᒪᓗ ᓲᓯ ᒣᓇ. ᑖᒃᑯᐊ ᐃᓕᓐᓂᐊᑏᑦ ᐃᓚᖏᑦ ᐃᓕᓐᓂᐊᑎᑕᐅᒋᐊᓪᓛᓚᐅᔪᒻᒥᔪᑦ ᓄᓇᓐᖑᐊᑎᒍᑦ ᓄᓇᒥᒃ ᐊᓪᓚᓂᕐᒥᒃ ᓄᓇᐅᑉ ᖄᑐᐃᓐᓇᖓᓂᒃ ᖃᐅᔨᓴᕐᑎᓄᑦ ᓚᕚᓪ ᐃᓕᓐᓂᐊᕕᕐᔪᐊᖓᓐᓂᒥᐅᓄᑦ ᑖᒃᑯᐊ ᙯᓯᒪᖃᑕᐅᓚᐅᔪᒻᒪᑕ ᖃᐅᔨᓴᕐᓂᑎᓄᑦ. ᓚᕚᓪ ᐃᓕᓐᓂᐊᕕᕐᔪᐊᖓᓐᓂᒥᐅᑦ ᓯᕗᓕᕐᑕᐅᓱᑎᒃ Najat Bhiry-ᒧᑦ (ᓇᔮᑦ ᐱᐅᔨ) ᐃᓚᐅᒻᒥᑎᓪᓗᒋᑦ Anne-Marie Lemieux (ᐋᓐ-ᒪᔩ ᓚᒥᐅ), Elsa Censig (ᐃᐊᓪᓴ ᓯᐊᓐᓯᒃ) ᐊᒻᒪᓗ Bryan Sinkunas (ᐳᔦᔭᓐ ᓯᓐᑯᓇᔅ).

IbGk-3-ᖑᓂᕋᕐᑕᖅ ᑐᓂᕐᑕᓂᐊᕐᕕᒃ: ᖃᕐᒣᑦ ᐃᓄᐃᑦ ᓇᔪᒐᒋᓚᐅᕐᑕᕕᓂᖏᑦ

ᓴᒡᒐᓂᕗᑦ ᐅᕙᑦᑎᓂᒃ ᑐᑭᓯᓕᐅᒥᑎᑦᓯᓚᐅᔪᑦ IbGk-3-ᖑᓂᕋᕐᑕᐅᑉ ᑐᓂᕐᑕᓂᐊᕐᕕᐅᑉ ᒥᑦᓵᓄᑦ. ᑖᕙᓐᓇ ᓇᔪᒐᕕᓂᕐᔫᔮᕐᑐᖅ ᐃᓄᑐᐃᓐᓇᓗᑐᕐᖄᕕᓂᕐᓄᑦ [def.], ᐊᒻᒪᓗ ᑖᕙᓃᑦᑐᕕᓂᐅᓕᕇᕐᓱᑎᒃ 2,500 ᐊᕐᕌᒍᐃᑦ ᓈᓕᕐᑐᑦ. 2,000 ᐊᕐᕌᒍᑲᓵᑦ ᑭᖑᓂᐊᓂ, ᑖᓐᓇ ᓇᔪᒐᕕᓂᖅ ᓇᔪᕐᑕᐅᓕᕐᓂᒥᔪᖅ ᐃᓄᑐᐃᓐᓇᓄᑦ ᑖᕙᓂ ᖃᕐᒪᓕᐅᕐᑐᕕᓂᕐᓄᑦ [def.] ᑲᑕᓕᓐᓂᒃ ᓄᓇᐅᑉ ᐊᑖᒎᕐᑐᓂᒃ. ᑖᑦᓱᒪ ᓇᔪᒐᕕᓂᐅᑉ ᐃᓓᓐᓈᐱᖓ ᓴᒡᒐᑕᐅᓯᒪᔪᖅ ᐅᓪᓗᒥᒧᑦ ᑎᑭᑦᓱᒍ, ᑭᓯᐊᓂ ᓴᒡᒐᓱᑎᒃ ᐊᑐᕐᑐᓗᑐᓐᖑᐊᓂᒃ ᓇᕝᕚᑐᕕᓃᑦ. ᖃᐅᔨᓚᐅᔪᒍᑦ ᕿᔪᒃ, ᑖᓐᓇ ᕿᔪᒃ ᑕᑯᔭᐅᓚᐅᕐᓯᒪᑦᓯᐊᔭᖏᑦᑐᖅ ᐅᑭᐅᕐᑕᑑᑉ ᐅᐊᓐᓂᖓᓂ, ᐊᑐᕐᑕᐅᕙᑦᑐᕕᓂᐅᒻᒪᑦ ᐊᓂᕐᕋᕆᔭᐅᔪᓄᑦ ᖁᓛᑦᓴᓕᐊᕆᔭᐅᑦᓱᓂ. ᑖᒃᑯᐊ ᓇᕝᕚᑕᕕᓂᕗᑦ ᐅᕙᑦᑎᓂᒃ ᑐᑭᓯᓕᐅᒥᑎᑦᓯᓚᖓᔪᑦ ᑌᑦᓱᒪᓂᐊᓗᒃ ᑌᒣᑦᑐᓂᒃ ᐃᓪᓗᓕᐅᕈᓯᐅᔪᕕᓂᕐᓂᒃ.

ᓄᓇᓕᓕᒫᓂ ᓇᓗᓀᕐᓱᒋᑦ ᐊᓪᓚᑕᐅᒪᓂᖏᑦ ᓇᔪᒐᕕᓃᑦ, ᐊᓂᕐᕋᕕᓃᑦ, ᐅᔭᕋᕐᑖᕕᐅᕙᑦᑐᕕᓃᓪᓗ ᐱᐅᒃᑯᑎᑦᓴᓂᒃ

ᑐᓂᕐᑕᓂᐊᑲᓪᓛᐱᓐᓂᑎᓐᓂ ᓇᓗᓀᕐᓯᓚᕿᓚᐅᔪᒻᒥᔪᒍᑦ ᐊᕙᑎᑦ ᒪᕐᕉᒃ ᐅᖓᑖᓅᕐᑐᓂᒃ ᓄᑖᓂᒃ ᓇᔪᒐᐅᓚᐅᕐᑐᕕᓂᕐᓂᒃ ᐃᑎᖑᐊᓗᕙᓪᓗᒦᑦᑐᓂᒃ ᐃᓐᓇᓕᑲᓪᓚᒥᓪᓘᒐᓗᐊᖅ ᓇᐹᕐᑐᓕᒻᒥᓗ. ᑖᓐᓇ ᑕᑯᑎᑦᓯᔪᖅ ᓄᓇᐅᑉ ᐊᑦᓱᐃᑐᒻᒪᕆᐅᓂᖓᓂᒃ ᑐᓂᕐᑕᖃᕐᓂᑎᒍᑦ, ᕿᑭᕐᑕᓂᓗᐊᓐᖑᐊᖅ. ᓇᔪᒐᐅᓚᐅᕐᑐᕕᓃᑦ ᓇᕝᕚᖃᑦᑕᓚᐅᔪᔭᕗᑦ ᐃᓚᖃᖃᑦᑕᓚᐅᔪᑦ ᐊᒥᓱᓂᒃ ᐊᐅᔭᒥ ᐊᓂᕐᕋᕆᔭᐅᔪᕕᓂᕐᓂᒃ ᐊᒻᒪᓗ ᓴᓇᔭᐅᕙᑦᑐᕕᓂᕐᓂᒃ ᐆᑦᑑᑎᒋᓗᒍ ᐅᒃᑯᐊᑕᔫᑦ, ᕿᓐᖏᕖᑦ ᐃᓗᕖᓪᓗ, ᐃᓚᐅᒻᒥᑎᓪᓗᒋᑦ ᐊᒥᓱᒐᓛᑦ ᐃᓄᕐᖄᕕᓃᑦ ᓇᔪᓚᐅᕐᑕᕕᓂᖏᑦ. ᐊᒥᓱᒐᓛᑦ ᖁᓪᓕᓴᔭᕐᓂᐊᕕᕕᓃᑦ ᕿᒥᕐᕈᔭᐅᓚᐅᔪᒻᒥᔪᑦ.

ᐊᐅᔭᖅ 2008-ᒥ ᐱᓇᓱᐊᕐᓂᕕᓃᑦ

ᐃᓚᐅᔪᕕᓃᑦ

ᐊᐅᔭᖅ 2008-ᒥ, ᐊᕙᑕᖅ ᐱᐅᓯᑐᖃᓕᕆᕕᒃᑯᑦ ᑲᔪᓯᓚᐅᔪᕗᑦ ᑐᓂᕐᑕᓂᐊᕐᓂᒥᒃ ᐃᓐᓇᓕᓐᓂ, ᐃᓄᑦᔪᐊᑉ ᓄᓇᓕᖓᑕ ᓴᓂᐊᓂ. ᑐᓂᕐᑕᓂᐊᕐᑐᑦ ᓯᕗᓕᕐᑕᐅᓱᑎᒃ Pierre M. Desrosiers-ᒧᑦ (ᐱᔦ ᑎᕉᓯᔦ), ᐃᑲᔪᕐᑎᖃᕐᓱᓂ Elsa Censig-ᒥᒃ (ᐃᐊᓪᓴ ᓯᐊᓐᓯᒃ), ᐅᑯᐊ ᐃᓚᐅᒻᒥᑎᓪᓗᒋᒃ: ᓈᓕ ᐅᐃᑖᓗᑦᑐᖅ ᐊᒻᒪᓗ ᐊᓐᑦᔫ ᐃᐳ, ᑖᒃᑯᐊ ᑕᒪᒋᒃ ᐊᕙᑕᒃᑯᓂ ᐱᓇᓱᑦᑏᒃ. ᓄᓇᓕᒻᒥ ᐱᓯᒪᔪᑦ ᐃᓚᐅᓚᐅᔪᒻᒥᔪᑦ ᐅᑯᐊ: ᓰᒥᐅᓂ, ᐋᓚᓯ ᐊᒻᒪᓗ ᐋᓐᑎ ᓈᓚᑦᑑᔭᖅ; ᔪᐊᓂ ᐃᓓᔭᓯᐊᐱᒃ; ᐊᒻᒪᓗ ᐋᓕ ᓈᓚᑦᑑᔭᖅ. ᐃᓕᓐᓂᐊᕕᒻᒥᑦ ᐱᓯᒪᔪᑦ ᖁᓕᓪᓗ ᓯᑕᒪᓪᓘᑦ ᐃᓚᐅᓚᐅᔪᒻᒥᔪᑦ ᐅᑯᐊᒍᑦᓱᑎᒃ: ᐋᓕ ᐊᑯᓕᐊᖅ, ᐹᐱ ᐊᕐᓇᑐᖅ, ᒨᓱᓯ ᐃᓪᓚᐅᑦ, ᓈᑕᓕ ᐃᖃᓗᒃ, ᒫᓂᑲ ᐃᖃᓗᒃ, ᐹᐱ ᐃᓓᔭᓯᐊᐱᒃ, ᐋᓕᒃ ᐃᐳ, ᐹᒥᓚ ᐃᓄᑉᐸᖅ, ᓯᐊᔭ ᐃᖃᓪᓗᒃ, ᒫᑎᐅᓯ ᖃᓴᓪᓗᐊᖅ, ᒦᑲᓐ ᖃᓴᓪᓗᐊᖅ, ᑑᓐᔭ ᒧᐊᕉ, ᐄᕙ ᓇᐅᔭ ᐊᒻᒪᓗ ᐸᐅᓗ ᐹᓕᓴ. Anne-Marie Lemieux (ᐋᓐ-ᒪᔩ ᓚᒥᐅ) (ᓚᕚᓪ ᐃᓕᓐᓂᐊᕕᕐᔪᐊᖓᓐᓂ ᐃᓕᓐᓂᐊᑎᒃ) ᐆᑦᑑᑎᖃᑎᒌᑦᑎᓯᖃᑦᑕᓚᐅᔪᖅ ᓄᓇᐅᑉ ᖄᖓᓃᑦᑐᕕᓃᑦ ᑐᓂᕐᑌᓗ ᐊᓪᓚᖁᑎᖏᓐᓂᒃ ᖃᐅᔨᓴᕈᑎᒋᑦᓱᒋᑦ ᐱᕙᓪᓕᐊᓂᕕᓂᖏᓐᓂᒃ ᐊᓂᕐᕋᕆᔭᐅᕙᑦᑐᕕᓃᑦ ᓄᓇᓕᓕᒫᓂ. ᐊᒥᓱᑲᓪᓚᓂᒃ ᐊᐱᕐᖁᓂᖃᑲᑦᑕᓚᐅᔪᒻᒥᔪᖅ ᐃᓄᑦᔪᐊᑉ ᐃᓄᒻᒪᕆᖁᑎᖏᓐᓂᒃ ᐱᔭᕇᕋᓱᐊᕐᓱᓂ ᖃᐅᔨᓴᕐᓂᒥᓂᒃ. ᓄᓇᐅᑉ ᖄᖓᓃᑦᑐᕕᓂᕐᓂᒃ ᖃᐅᔨᓴᕐᑎ Najat Bhiry (ᓇᔮᑦ ᐱᐅᔨ) (ᓚᕚᓪ ᐃᓕᓐᓂᐊᕕᕐᔪᐊᖓᓐᓂᒥᐅᖅ) ᐊᒻᒪᓗ ᕿᔪᐃᑦ ᖃᓄᐃᑦᑑᓂᖏᓐᓂᒃ ᓇᐹᕐᑐᕕᓂᕐᓂᓗ ᖃᐅᔨᓴᕐᑎᒪᕆᒃ Dominique Marguerie (Rennes) ᐃᓕᓐᓂᐊᕕᕐᔪᐊᖓᓐᓂᒥᐅᖅ ᐃᓚᐅᓚᐅᔪᒻᒥᔫᒃ.

ᐃᓄᑦᔪᐊᒥ ᐃᓕᓐᓂᐊᑎᓂᒃ ᐃᓕᓐᓂᐊᑎᑦᓯᒋᐊᓐᖓᓂᕕᓂᖅ

ᐃᓄᑦᔪᐊᒥᐅᑦ ᐃᓕᓐᓂᐊᑏᑦ ᐅᓪᓗᒥ ᐊᑕᐅᓯᕐᒥ ᐃᓕᓐᓂᐊᑎᑕᐅᒋᐊᓐᖓᓯᓚᐅᔪᕗᑦ ᑐᓂᕐᑕᓂᐊᕐᓂᐅᑉ ᒥᑦᓵᓄᑦ ᐃᓄᑦᔪᐊᑉ ᐃᓕᓐᓂᐊᕕᖓᓐᓂ. ᓄᓇᒦᑦᓱᑎᒃ, ᑕᑯᓐᓇᐅᔮᕈᓐᓇᓯᓚᐅᔪᑦ ᑐᓂᕐᑕᓂᐊᕐᕕᒥ ᓴᒡᒐᐸᓪᓕᐊᓯᔪᓂᒃ, ᐃᓕᓐᓂᐊᑎᑕᐅᑦᓱᑎᓗ ᐃᓓᓐᓇᖏᓐᓂᐅᒐᓗᐊᖅ ᓯᑕᒣᓕᕿᖓᔪᓂᒃ ᓄᓇᕐᔪᐊᑉ ᐱᐅᓯᖓᓂᒃ ᓇᐹᕐᑐᕕᓂᕐᓂᓗ ᖃᐅᔨᓴᕐᓂᒥᒃ. ᑲᑎᐅᕐᖃᓯᒪᓕᕐᓱᑎᒃ ᐃᑯᐊᓚᑦᓯᐅᑉ ᓴᓂᐊᓂ, ᓰᒥᐅᓂ ᓈᓚᑦᑑᔭᖅ ᐅᓂᒃᑲᐅᔨᓚᐅᔪᖅ ᐃᓕᓐᓂᐊᑎᓂᒃ ᓄᓇᐅᑉ ᐱᐅᓯᕆᓯᒪᓕᕐᑕᖓᓂᒃ ᐱᐅᓯᑐᖃᕐᑎᒍᓪᓗ ᐅᓂᒃᑳᑐᐊᑦ ᒥᑦᓵᓄᑦ. ᐃᓚᐅᓚᐅᔪᒻᒥᔪᑦ ᕿᒥᕐᕈᑎᑕᐅᑦᓱᑎᒃ ᒪᓕᒐᕐᒥᓄᑦ, ᓯᕗᓕᕐᑕᐅᓱᑎᒃ ᒪᑭᐊᓪᒥᐅᒧᑦ ᓄᓇᐅᑉ ᖄᖓᓂᒃ ᖃᐅᔨᓴᕐᑎᒧᑦ, ᓄᓇᓕᐊᕐᓱᑎᒃ ᐊᑯᓂᓂᑕᐅᓂᕐᐹᓯᐊᓂᒃ ᓄᓇᕐᔪᐊᒥ ᐅᔭᕋᕐᑕᓕᒻᒧᑦ.

ᓴᒡᒐᓂᕕᓂᖅ ᐅᑭᐅᒥ ᖃᕐᒪᐅᓱᓂ ᓇᔪᒐᐅᓚᐅᕐᑐᕕᓂᕐᒥᒃ

ᐱᓇᓱᐊᕐᓂᖃᕙᓪᓗᓚᐅᔪᑦ IbGk-3-ᖑᓂᕋᕐᑕᒥ ᑐᓂᕐᑕᓂᐊᕐᕕᒥ. ᑖᓐᓇ ᓄᓇᑐᕐᓕᕕᓂᖅ ᐊᑐᕐᑕᐅᖄᓚᐅᕐᑐᕕᓂᖅ ᐃᓄᕐᖄᕕᓂᕐᓄᑦ, ᑖᕙᒃᑯᐊ ᓇᑉᐯᖃᑦᑕᓚᐅᕐᓂᒪᑕ ᓇᔪᒐᒋᓂᐊᓕᕐᑕᒥᓂᒃ ᓄᓇᒥᒃ ᓴᒡᒐᓯᒪᔪᒥᒃ. ᓯᐊᕈᒋᐊᖑᓕᕐᒪᑦ, ᐃᓄᐃᑦ ᖃᕐᒪᓕᐅᕐᐸᓕᕐᓂᒥᔪᑦ ᑌᑲᓂᑦᓭᓇᖅ ᓇᔪᒐᐅᓚᐅᕐᑐᕕᓂᕐᒥ ᐅᑭᐅᕐᓯᐅᕕᑦᓴᒥᓐᓂᒃ ᓇᑉᐯᓱᑎᒃ. ᖃᕐᒪᕕᓂᖅ 1 (ᐃᓄᐃᑦ ᐅᑭᐅᕐᓯᐅᕕᕕᓂᖓ ᖃᕐᒪᐅᓱᓂ) ᑖᓐᓇ ᖃᐅᔨᓴᕐᑕᐅᕙᓪᓗᑐᑑᓚᐅᔪᖅ. ᐱᓇᓱᐊᕐᓱᑕ ᓄᐃᑦᓯᒋᐊᓪᓚᒍᓐᓇᓯᓚᐅᔪᒍᑦ ᓇᔪᒐᐅᓚᐅᕐᑐᕕᓂᐅᑉ ᖁᓛᕕᓂᖓᓂᒃ, ᑖᓐᓇ ᖁᓛᕕᓂᖅ ᕿᔪᐃᓐᓇᖅ ᓯᕐᒦᓇᐅᑦᓱᓂᓗ. ᐃᓚᖏᓐᓂ ᓴᒡᒐᑕᑦᑎᓂ, ᕿᔪᓕᒫᕐᑕᖏᓐᓂᒃ ᐊᒧᓯᒍᓐᓇᓯᓚᐅᔪᒍᑦ, ᐊᓂᕐᕋᕕᓂᐅᑉ ᐃᓗᕕᓂᖓᓄᑦ ᐃᑎᕈᓐᓇᓯᓚᕿᑦᓱᑕ (ᐆᑦᑑᑎᒃ: ᐳᓛᕐᕕᕕᓂᖓᓄᑦ). ᐊᑯᓂᑲᓪᓚᒃ ᑖᕙᓃᑦᑐᓂᒃ ᕿᔪᕕᓂᕐᓂᒃ ᑐᓂᕐᑕᐅᓕᕐᑐᓂᒃ ᐊᒧᓯᒐᓱᐊᒋᐊᖃᓚᐅᔪᒐᑦᑕ, ᑐᑭᑖᓕᓚᐅᔪᒍᑦ ᐱᓇᓱᐊᕐᓂᓴᐅᑫᓐᓇᓚᖓᓕᕐᓱᑕ ᓇᔪᒐᐅᓚᐅᕐᑐᕕᓂᐅᑉ ᓯᕗᕋᖓᓂᒃ, ᑖᕙᓐᓇ ᓯᕗᕌ ᒪᕐᓗᑯᖃᐅᑎᐅᓲᕕᓂᖅ. ᒪᕐᓗᑯᕕᓃᑦ ᓄᐃᑦᓯᓚᕿᓚᐅᔪᑦ ᖃᐅᔨᒪᔭᐅᒋᐊᓕᓐᓂᒃ ᓱᓇᓱᐊᕐᐸᓂᕐᒪ¯ᑕ ᖃᐅᑕᒫᕐᓯᐅᑎᒥᓐᓂ ᖃᕐᒪᐅᓚᐅᕐᑐᕕᓂᕐᒥᐅᕕᓃᑦ. ᒪᕐᓗᑯᐃᑦ ᓴᐅᓂᕕᓂᕙᓪᓘᓚᐅᔪᑦ ᓴᓇᓂᕐᓗᑰᑦᓱᑎᓪᓗ.

ᐊᒥᓱᒐᓛᑦ ᐳᓛᕆᐊᖃᑦᑕᓚᐅᔪᑦ ᓴᒡᒐᕕᑦᑎᓄᑦ, ᐃᓚᐅᑎᓪᓗᒋᒃ ᒪᕐᕉᒃ ᐃᓄᒻᒪᕇᒃ (ᓘᓯ ᐅᐃᑖᓗᑦᑐᖅ ᐊᒻᒪᓗ ᐋᑦᑕᒥ ᓂᕕᐊᕐᓯ) ᐅᓪᓗᓕᒫᖅ ᐅᕙᑦᑎᓃᓚᐅᔫᒃ ᐊᐱᕐᓲᑎᑦᑎᓂᒃ ᑭᐅᒋᐊᕐᑐᓯᒪᑦᓱᑎᒃ. ᑐᑭᓯᓂᕐᓴᐅᒐᓱᐊᒧᑦ ᐋᕐᕿᓯᒪᐅᑎᓂᒃ ᐱᑦᓴᑖᕋᓱᐊᕐᓂᒨᓕᖓᔪᓂᒃ ᕿᔪᓐᓂᒃ ᐊᒻᒪᓗ ᖃᐅᔨᓴᕐᓱᒋᑦ ᐊᕐᕌᒍᖏᑦ ᓴᒡᒐᑕᕕᓂᕗᑦ, ᑎᑦᔭᓗᐃᑦ ᓄᐊᑕᐅᓚᐅᔪᑦ ᕿᑭᕐᑕᓂᑦ ᐊᑦᔨᒌᓐᖏᑐᓂᑦ ᓱᕐᖁᐃᒐᓱᐊᓚᖓᑦᓱᒋᑦ ᓇᑭᓂᑕᓪᓗᑑᒪ¯ᑕ ᖃᑦᓯᓂᓗ ᐊᕐᕌᒍᖃᕐᒪ¯ᑕ. ᑖᒃᑯᐊ ᓄᐊᑕᕕᓃᑦ ᓯᐊᕈᒋᐊᖑᓕᕐᐸᑦ ᐊᑐᕐᑕᐅᒍᒫᕐᓂᐊᑐᑦ ᐆᑦᑑᑎᖃᑎᒌᑦᑎᑕᐅᓗᑎᒃ ᓯᕗᓂᑦᓴᑎᓐᓂ ᖃᐅᔨᓴᕐᓂᐅᓛᕐᑐᓂ.

ᐊᑦᑐᐊᔪᖅ ᓄᓇᓖᑦ ᐃᓕᓐᓂᐊᕕᕐᔪᐊᓗ ᖃᐅᔨᓴᖃᑎᒌᓐᓂᖓᓄᑦ, ᓯᕗᓪᓕᑕ ᐃᓅᓯᕆᓚᐅᕐᑕᖓᓄᑦ ᐊᑑᑎᓚᐅᕐᑕᖏᓐᓄᓗ ᐱᓇᓱᐊᕐᓂᒧᑦ ᐊᐅᔭᖅ 2008-ᒥ

ᐊᓪᓚᓯᒪᔪᖁᑎᓕᐅᕐᓂᖅ ᑐᓂᕐᑕᓂᐊᕐᕕᒨᓕᖓᔪᓂᒃ IcGn-8-ᒍᓂᕋᕐᑕᒧᑦ

ᐱᓇᓱᐊᕋᓗᐊᕐᒥᓱᑕ IcGn-8-ᒍᓂᕋᕐᑕᒥ ᓇᔪᒐᐅᓚᐅᕐᑐᕕᓂᕐᒥᒃ, ᐱᒋᐊᓐᖓᓚᐅᔪᒍᑦ ᐊᓪᓚᓯᒪᔪᖁᑎᓕᐅᕐᓂᒥᒃ IcGn-8-ᒍᓂᕋᕐᑕᒥ ᖁᓪᓕᓴᔭᕐᓂᐊᕕᕕᓂᕐᒥᒃ ᐃᑲᔪᕐᑎᖃᕐᓱᑕ Adrian Burke-ᒥᒃ (ᐁᑦᔨᐊᓐ ᐴᔾᒃ), ᑖᓐᓇ ᐅᕙᑦᑎᓂ ᐃᓚᐅᓚᐅᔪᖅ ᐅᓪᓗᓂ ᖁᓕᓐᓂ. ᐱᓇᓱᐊᕐᑕᕗᑦ ᐃᓚᖃᓚᐅᔪᖅ ᓄᓇᐅᑉ ᖃᓄᐃᓕᖓᓂᖓᓂᒃ ᑕᕝᕙᓂ ᐊᖏᔪᐊᓗᒻᒥ ᓇᔪᒐᐅᓚᐅᕐᑐᕕᓂᕐᒥ ᖁᓪᓕᓴᔭᕐᓂᐊᕕᕕᓂᖅ ᑕᑭᓂᖃᕐᑎᓗᒍ 700 ᒦᑌᑦ ᐅᖓᑖᓄᑦ. ᐃᓕᕐᓂᓗᑯᕕᓃᑦ (ᐅᔭᕋᕐᓂᒃ ᓴᓇᕐᕈᑎᓕᐅᕐᑐᓄᑦ), ᐃᓚᖏᑦ ᓄᓇᐅᑉ ᐊᑖᓃᑦᓱᑎᒃ 1 ᒦᑕᒧᑦ, ᑕᑯᔭᐅᓚᐅᔪᑦ ᐊᒥᓲᓐᖏᑑᒐᓗᐊᓂ ᓇᔪᒐᐅᓚᐅᕐᑐᕕᓂᕐᓂ ᖁᓪᓕᓴᔭᕐᓂᐊᕕᐅᑉ ᓴᓂᐊᓂ. 2 ᒦᑕᓪᓗᐊᒐᓛᒃ ᓯᒃᑭᑖᒃ, ᐊᕕᑦᑐᑕᐅᒪᑦᓱᑎᒃ ᐱᖓᓱᐃᓃᑦᑎᓗᒋᑦ ᐃᓗᕐᓴᓂ, ᓴᒡᒐᑕᐅᓚᐅᔪᑦ ᓇᔪᒐᐅᔪᕕᓂᕐᒥ 2008-ᒥ. ᐱᓇᓱᐊᕐᓱᑎᒃ ᓄᐊᑦᓯᓚᕿᓚᐅᔪᑦ 60,000 ᐅᖓᑖᓅᕐᑐᓂᒃ ᑐᓂᕐᑕᓂᒃ, ᓴᓇᓂᕐᓗᑯᕕᓂᕙᓪᓗᓂᒃ. 200 ᐅᖓᑖᓅᕐᑐᑦ ᐅᔭᕃᓐᓇᐅᓱᑎᒃ ᑲᐅᑕᒋᔭᐅᕙᑦᑐᕕᓃᑦ ᑌᑲᓃᖏᓐᓈᑎᓪᓗᒋᑦ ᐊᓪᓚᖁᑎᓕᐅᕐᑕᐅᓚᐅᔪᑦ. ᑖᒃᑯᐊ ᑲᐅᑕᕕᓃᑦ ᐅᔭᕋᓱᑦᔪᐊᓗᓐᓂᒃ ᓇᑲᑎᕆᕈᑕᐅᕙᑦᑐᕕᓃᑦ ᓴᓇᕐᕈᑎᓕᐊᒍᓚᖓᔪᓂᒃ.

ᑭᑎᑦᓯᓂᖅ ᓄᓇᓕᓕᒫᓂ ᑐᓂᕐᑕᓂᐊᕐᕕᓂᒃ

ᐱᓇᓱᐊᕋᓗᐊᕐᒥᓱᑕ ᐅᖄᕋᑖᕐᑕᑎᓂᒃ, ᑕᑯᓂᐊᓚᐅᔪᒻᒥᔪᒍᑦ ᐊᑦᔨᒌᓐᖏᑐᓂᒃ ᕿᑭᕐᑕᓂᒃ ᑭᑎᑦᓯᒐᓱᐊᒧᑦ ᑐᓂᕐᑕᓂᐊᕐᕕᐅᒍᓐᓇᑐᖁᑎᖏᓐᓂᒃ. ᑕᕝᕘᓇ ᓇᕝᕚᓚᕿᓚᐅᔪᒍᑦ ᖃᐅᔨᒪᔭᐅᓐᖏᑐᓂᒃ ᓇᔪᒐᐅᓚᐅᕐᑐᕕᓂᕐᓂᒃ ᐊᒻᒪᓗ ᓇᓗᓀᕐᓯᓚᕿᑦᓱᑕ 100-ᒍᓈᕐᑎᑐᓂᒃ ᑐᓂᕐᑕᐅᓱᑎᒃ ᓇᔪᒐᐅᓚᐅᕐᑐᕕᓂᕐᓂᒃ. ᐱᐅᒃᑯᑎᑦᓴᑖᕐᕕᓭᑦ ᐅᔭᕋᕐᓂᒃ ᓇᓗᓀᕐᑕᐅᓚᐅᔪᒻᒥᔪᑦ ᐆᑦᑐᕋᕐᑕᐅᓱᑎᓗ, ᑭᓯᐊᓂ ᓄᑖᓂᒃ ᐅᔭᕋᕐᑕᕕᓐᓂᒃ ᑕᑯᓚᐅᔪᓐᖏᑐᒍᑦ. ᑕᕝᕙᓂ ᐱᑦᓴᑖᕐᕕᓕᐊᓗᒻᒥ, ᕿᑭᕐᑌᑦ ᐃᓄᖃᕐᔪᐊᐸᑦᑐᕕᓃᑦ. ᐊᒥᓱᓂ ᐊᕐᕌᒍᕐᓂ ᓄᐃᑕᔪᒃᑯᑦ ᖃᐅᔨᓴᕐᓂᖃᕆᐊᖃᕋᔭᕐᑐᖅ ᓈᒻᒪᓈᕐᓂᓴᑎᒍᑦ ᐊᓪᓚᖁᑎᓕᐅᓛᑐᐊᕈᑦᑕ 4,000-ᓂᒃ ᐊᕐᕌᒍᖃᓕᕐᑐᒥᒃ ᐃᓄᖃᕐᐸᑐᕕᓂᕐᒥᒃ ᑕᕝᕙᓂ ᓄᓇᐅᔪᒥ.

ᖃᐅᔨᒋᐊᕐᕕᓵᒃ: Daniel Gendron (ᑕᓂᐊᓪ ᔮᓐᑦᕉᓐ), Pierre M. Desrosiers (ᐱᔦ ᑎᕉᓯᔦ)

Dynamic Inuit Societies in Arctic History : http://ipy.utoronto.ca/

Nunatsiaq News : http://www.nunatsiaqonline.ca/archives/2007/710/71012/news/nunavik/71012_592.html

ᖃᕆᑕᐅᒻᒥᔪᒧᑦ ᐊᐅᓚᑕᐅᔪᑦ ᐊᓪᓚᖁᑏᑦ ᑖᑦᓱᒧᖓ ᖃᐅᔨᓴᕐᓂᒨᓕᖓᔪᑦ

ᐊᕕᑦᑐᓯᒪᓂᖅ

ᑌᔭᐅᒍᓯᒃ

ᐊᑐᐊᒐᓕᐅᕐᑐᕕᓂᖅ

ᐅᓪᓗᖓ

ᐱᓇᓲᑎᒃ ᖃᕆᑕᐅᔭᒨᕐᓗᒍ

ᖃᐅᔨᓴᕐᓂᒧᑦ ᑐᓴᕋᑦᓴᓕᐊᖑᓯᒪᔪᑦ

IPY Archaeological Project, Inukjuak Fieldwork 2008. AR259

Avataq Cultural Institute

2009

ᐊᑦᔨᖁᑎᖃᐅᑎᒃ

Inukjuak Archaeological Fieldwork 2008

ᖃᐅᔨᒪᔭᐅᓐᖏᑐᖅ

2008

ᖃᐅᔨᓴᕐᓂᒧᑦ ᑐᓴᕋᑦᓴᓕᐊᖑᓯᒪᔪᑦ

IPY Archaeological Project, Inukjuak Fieldwork 2007, AR255

ᐊᕙᑕᖅ

2008