ᑕᑯᔭᒃᓴᑯᕕᓕᕆᓂᖅ
ᑐᒥᕗᑦ – ᑐᒥᑦᑕ ᐃᓂᖏᑦ
2001-ᒥ, ᐃᑲᔪᕐᑎᖃᕐᓱᑎᒃ ᕈᐃᐊᓪ ᐯᓐᒃ ᒃᕉᑉ-ᑯᓂᒃ (Royal Bank Group), ᐊᕙᑕᒃᑯᑦ ᐋᕐᕿᓱᐃᓚᐅᕐᓯᒪᕗᑦ ᐱᒻᒪᕆᕋᑕᕐᒥᒃ ᑕᑯᑦᓴᐅᑎᑦᓯᓂᕐᒥᒃ ᐃᓄᐃᑦ ᓄᓇᕕᒻᒥᐅᑦ ᓴᓇᓐᖑᐊᒍᓯᖏᓐᓂᒃ ᐃᓗᕐᕈᓯᖓᓂᓪᓗ. 4,000 ᐅᖓᑖᓅᕐᑐᑦ ᐳᓛᕆᐊᓚᐅᕐᓯᒪᔪᑦ ᑐᒥᕗᑦ-ᒥᒃ – ᑐᒥᑦᑕ ᐃᓂᖏᑦ ᑕᕐᖀᑦ ᓯᑕᒪᑦ ᓇᑉᐸᖓᑕᓗ ᐃᓗᐊᓂ. ᐊᕐᕕᑕᕐᓱᓂ ᑕᑯᑦᓴᐅᑎᑦᓯᑲᑦᑕᓂᖅ ᐊᑑᑎᔭᐅᑦᓱᓂ ᑯᐯᒃᑯᑦ ᑲᑎᒪᕕᒻᒪᕆᖓᓐᓂ ᐊᒻᒪᓗ ᐱᐅᓯᕐᓱᓱᓂ ᓇᐹᕐᑐᖃᐅᑎᐅᑉ ᐱᐅᓕᑦᓯᕕᖓᓐᓂ (Centre de conservation de la biodiversité boréale) ᓭᓐᑦ ᕕᓖᓯᐊᓐ-ᒦᑦᑐᒥ.
ᐊᑎᖃᓚᕿᔪᖅ – ᑐᒥᕗᑦ – ᑐᒥᑦᑕ ᐃᓂᖏᑦ – ᑐᓱᓕᕐᑐᕕᓂᐅᒐᒥ ᖃᐅᔨᒪᔭᐅᒻᒪᕆᑦᑐᒥᒃ ᐅᓂᒃᑳᑐᐊᕐᒥᒃ ᐅᑭᐅᕐᑕᑐᒥ. ᐅᓂᒃᑳᑐᐊᖅ ᑐᓵᑦᓱᒍ, ᐅᓪᓗᐃᑦ ᐃᓚᖓᓐᓂ, ᐃᓄᒃ ᐊᑐᖓᕐᒥᒃ ᐊᑎᓕᒃ ᑐᑭᑖᓚᐅᕐᑐᕕᓂᖅ ᐱᓱᓚᖓᓂᕐᒥᓂᒃ ᓄᓇᕐᔪᐊᓕᒫᖅ ᐊᑕᖏᕐᓗᒍ. ᐅᓪᓗᒥ, ᐃᓄᓕᒫᑲᓵᑦ ᐃᓕᓐᓂᒃ ᐅᖃᐅᑏᒍᓐᓇᑐᑦ ᐊᑐᖓᐅᑉ ᐱᓱᓐᓂᕕᓂᖓ ᑐᒥᓕᔮᖏᓐᓈᒪᑦ, ᐅᔭᕋᕐᒥ ᓄᐃᑌᓐᓇᓕᕐᑐᓂᒃ. ᑖᒃᑯᐊ ᑐᒦᑦ ᑐᑭᖃᕐᑐᑦ ᖃᐅᔨᒪᑦᓴᐅᖏᑦᑐᓗᑐᕐᒥᒃ ᐱᑐᑦᓯᒪᐅᑎᓂᖏᓐᓂᒃ ᐃᓄᐃᑦ ᐊᒻᒪᓗ ᐊᑑᑎᓯᒪᔭᖏᑦᑕ, ᑖᓐᓇ ᑭᖑᕚᕆᔭᕐᓄᑦ ᕿᒻᒪᕆᐅᑎᑦᓯᐊᒪᕆᒃ ᐅᓂᒃᑳᑐᐊᕐᑕᓕᒻᒪᕆᐅᑦᓱᓂ, ᖃᐅᔨᓯᒪᓕᕐᑕᖏᓐᓄᑦ ᖃᐅᔨᒻᒫᕆᓪᓗᑐᓕᕐᑕᖏᓐᓄᓗ ᐅᑭᐅᕐᑕᑐᒥᐅᑦ.
ᑕᑯᑦᓴᐅᑎᑦᓯᓂᖅ ᓄᑖᒥᒃ ᖃᐅᒻᒣᓚᐅᔪᕗᖅ ᓄᓇᕕᒻᒥᒃ ᐊᕙᑎᖓᓂᓪᓗ. ᐳᓛᕆᐊᕐᑐᐃᑦ ᐃᒻᒥᓂᒃ ᑐᕐᖁᑎᒍᓐᓇᓯᐊᓚᐅᔪᑦ ᐊᑦᔨᒌᓐᖏᑐᒻᒪᕆᓐᓄᑦ ᓄᓀᑦ ᓴᓇᒪᓂᖏᓐᓄᑦ ᓯᓚᖓᓄᓪᓗ ᓄᐃᑕᑎᑦᓯᔪᒥᒃ ᐊᖏᔪᒻᒪᕆᐊᓘᓂᖓᓂᒃ ᓄᓇᐅᑉ. ᐊᒥᓱᑲᓪᓓᑦ ᐃᓄᐃᑦ ᓄᐃᑕᔪᒃᑯᑦ ᐃᓚᐅᑦᓯᐊᓚᐅᔪᑦ ᐃᓱᒪᑖᕆᔭᐅᓂᖓᓄᑦ ᑕᑯᑦᓴᐅᑎᑦᓯᓂᐅᒐᔭᕐᑑᑉ, ᓄᐃᑦᓯᓱᓂ ᐊᒥᓱᐃᓂᒃ ᓄᓇᕕᒻᒥᐅᑦ ᐱᐅᓯᕐᓱᕈᑎᒋᑦᓱᒋᑦ ᑲᔪᓯᔪᓂᒃ, ᑖᓐᓇ ᓱᓪᓖᓚᐅᔪᖅ ᓴᓇᑐᔫᓂᖏᓐᓂᒃ ᐊᑐᕐᑐᓚᕆᐅᓂᖏᓐᓂᓗ ᐊᐴᓯᙰᓐᓂᖏᑦᑕ, ᐃᓚᖃᕐᓱᓂ ᖃᒻᒥᖅ ᓱᖏᐅᓯᒪᓕᕐᓂᖏᓐᓂᒃ ᑎᒍᒥᐊᖏᓐᓇᕋᓱᐊᒧᑦ ᐃᓗᕐᕈᓯᒥᓐᓂᒃ.
ᐊᑦᔨᖑᐊᒐᓵᓗᐃᑦ, ᐱᐅᒃᑯᑎᕕᓂᓪᓗᑐᐃᑦ ᐃᓗᕐᕈᓯᕐᒧᐊᖓᔪᑦ, ᓴᓇᓐᖑᐊᓯᒪᔪᑦ ᒥᕐᓱᓯᒪᔪᐃᓪᓗ, ᐅᓂᒃᑳᑐᐊᑦ, ᖃᕆᑕᐅᔭᑎᒍᑦ ᖃᐅᔨᒋᐊᕐᕖᒃ ᐱᓐᖑᐊᖃᑎᒌᓐᓂᐅᓲᓪᓗ – ᐃᓘᓐᓇᑎᒃ ᑲᑎᓕᕋᒥᒃ ᐳᓛᕆᐊᕐᑐᓂᒃ ᐊᔪᒉᑦᑐᖑᐊᒥᒃ ᐱᕕᑦᓴᖃᕐᑎᓯᓲᑦ ᑐᑭᓯᓕᐅᒥᓂᕐᒥᒃ ᓴᓇᓐᖑᐊᓲᒍᓂᖏᑦᑕ ᐃᓗᕐᕈᓯᖓᑕᓗ ᐊᔪᒉᑦᑐᖑᐊᒍᑦᓱᑎᒃ ᐃᓂᕐᓯᒍᐊᕐᑐᓴᔭᐅᑦᓱᑎᓪᓗ ᐃᓄᓐᓂᒃ. ᐅᑭᐅᕐᑕᑑᑉ ᐆᒪᔪᖁᑎᖏᑦ, ᐊᓈᓇᐅᑉᔭᕿᑐᕐᖓᐅᓗ ᐃᓅᖃᑎᒌᓐᓂᒋᒃ, ᐃᓚᒌᑦᑐᑦ ᐃᓅᓯᖏᑦ ᐊᒻᒪᓗ ᐱᐅᓯᑐᖃᕐᑎᒍᑦ ᒪᙯᒍᓰᑦ ᐃᖃᓪᓕᐊᒍᓰᓪᓗ ᐅᖄᔭᐅᓗᐊᓐᖑᐊᓚᐅᔪᑦ ᓴᓇᓐᖑᐊᓯᒪᔪᐃᑦ ᑕᑯᑦᓴᐅᑎᑦᓯᓂᕐᒥ.
