- ᑭᓇᒃᑰᒪᖔᑦᑕ
- ᖃᐅᔨᒋᐅᕐᓂᖅ ᑐᓂᕐᑕᓂᐊᕐᓂᒥᒃ
- ᐱᓇᓱᐊᕐᑕᐅᔪᐃᑦ ᐱᓇᓱᐊᕋᑦᓭᓗ
- ᖃᕆᑕᐅᔭᑎᒍᑦ ᓄᓇᕐᔪᐊᓕᒫᒨᕈᑏᑦ
- ᑐᑭᓯᒋᐊᕐᕕᓭᑦ
ᑐᓂᕐᑕᓂᐊᕐᓂᖅ
ᓴᐳᒻᒥᔭᐅᓯᒪᓂᖓ ᐱᕙᓪᓕᐊᔭᐅᓂᖓᓗ ᖃᔭᕐᑕᓕᒻᒥ ᑮᓇᓐᖑᐊᑕᓕᐅᑉ (JhEv-1-ᖑᓂᕋᕐᑕᒥ)
1996-ᒥᓂᑦ
ᐃᓘᓐᓈᒍᑦ ᑕᑯᑦᓴᖅ sector B-ᖑᓂᕋᕐᑕᖅ, ᓄᓇ JhEv-1-ᖑᓂᕋᕐᑕᖅ, ᓵᓐᖓᓱᓂ ᓂᒡᒋᒥᒃ, 2004-ᒥ
1996-ᒥᓂᑦ, ᐊᕙᑕᖅ ᐱᐅᓯᑐᖃᓕᕆᕕᒃᑯᑦ ᓄᐃᑕᔪᒃᑯᑦ ᐃᓚᐅᓯᒪᓕᕐᑐᑦ ᖃᐅᔨᓴᕐᓂᒧᑦ ᐱᕙᓪᓕᐊᑎᑦᓯᓂᕐᒧᓗ ᖃᔭᕐᑕᓕᒻᒥ ᑮᓇᓐᖑᐊᑕᓕᒻᒥᒃ, ᐃᓚᒋᔭᐅᑎᓪᓗᒍ ᐱᓐᖑᑎᑦᓯᓱᑎᒃ ᓴᐳᒻᒥᔭᐅᓯᒪᓂᕆᒐᔭᕐᑕᖓᓂᒃ ᑮᓇᓐᖑᐊᑕᓕᐅᑉ ᐊᑯᓃᕐᑐᑎᒍᑦ.
ᑮᓇᓐᖑᐊᑕᓕᐅᑉ ᖃᓄᐃᓕᖓᓂᖓ ᓇᓃᓐᓂᖓᓗ
ᓄᓇᒥ JhEv-1-ᖑᓂᕋᕐᑕᒦᑦᑐᑦ ᑮᓇᓐᖑᐊᑦ ᐅᖓᓯᑦᑐᑲᓪᓚᒦᑉᐳᑦ ᑕᕐᕋᒥ ᐅᐊᓐᓂᖓᓃᕙᓪᓗᓱᑎᒃ ᕿᑭᕐᑖᓗᒻᒥ, ᑖᓐᓇ ᒥᑭᔪᐊᐱᒃ ᑎᑭᕋᖅ ᖃᔭᕐᑕᓕᐅᓂᕋᕐᑕᐅᔪᖅ. ᕿᑭᕐᑖᓗᒃ 40 ᑭᓚᒦᑕᓄᑦ ᓯᕿᓂᕐᒥ ᐅᐊᓐᓂᖓᓃᑦᑐᖅ ᑲᖏᕐᓱᔪᐊᑉ ᓄᓇᓕᖓᓐᓂᑦ.
ᖃᔭᕐᑕᓕᒃ ᑕᑭᔪᑯᑖᒍᑦᓱᓂ ᐃᑕᕐᓴᒦᑦᑐᖅ, ᐃᒻᒪᖄ ᑕᑭᓂᖃᕐᓱᓂ 130-ᒦᑕᓂᒃ. ᓄᐃᑕᕿᔪᖅ ᖁᓪᓕᓴᖃᐅᑎᒃ ᑕᑯᔭᐅᒍᓐᓇᑐᑦ ᖃᔭᕐᑕᓕᐅᑉ ᓯᕿᓂᐅᑉ ᐅᐊᓐᓂᖓᑕ ᑐᑭᖓᔪᖓᓂ. ᑖᒃᑯᐊ ᖁᓪᓕᓴᔦᑦ ᒪᕐᕈᓗᐊᓐᖑᐊᓂᒃ ᐊᑑᑎᖃᕐᐸᑐᕕᓃᑦ: ᐃᓚᖓ ᑮᓇᓐᖑᐊᑕᓕᓕᐊᕆᔭᐅᑦᓱᓂ ᐃᓚᖓᓗ ᖁᓪᓕᓴᔭᕐᑕᕕᐅᕙᑦᓱᓂ ᖁᓪᓕᓴᕐᓂᒃ ᐅᒃᑯᓯᑦᓴᓂᓪᓗ.
ᓄᓇᒃ JhEv-1-ᖑᓂᕋᕐᑕᖅ ᓱᑯᐃᔦᓂᒃᑯᑦ ᖃᖓᓂᑕᐅᒻᒪ¯ᑦ ᖃᐅᔨᔭᐅᓚᐅᕐᓯᒪᓐᖏᑐᖅ. ᑭᓯᐊᓂ, ᑌᑲᓃᑦᑐᑦ ᓴᓇᒪᔪᑦ ᑕᐅᑦᑐᖏᑦ ᐊᑦᔨᓯᐊᑐᐃᓐᓀᑦ ᑐᓃᑦ ᓴᓇᕙᑦᑕᕕᓂᖏᓐᓂᑦ. ᑐᓂᕐᑕᓂᐊᕐᓂᑎᒍᑦ ᖃᐅᔨᔭᐅᓯᒪᔪᑦ ᖁᓪᓕᓴᔭᕐᑕᓕᒻᒥ ᑕᑯᑎᑦᓯᔪᑦ ᑐᓃᑦ ᑖᕙᓂᒥᐅᒍᓚᐅᕐᑐᕕᓂᐅᒋᐊᖏᑦ.
ᑮᓇᓐᖑᐊᑦ ᓄᐃᑕᖃᑕᐅᑎᓪᓗᒍ ᖁᓪᓕᓴᔭᕐᓂᐊᕕᐅᓲᖅ, ᐊᑦᔨᓕᐊᕕᓂᖅ 2004-ᒥ
ᐃᓘᓐᓈᒍᑦ ᑕᑯᑦᓴᖅ sector B-ᖑᓂᕋᕐᑕᖅ, ᓵᓐᖓᓱᓂ ᓂᒡᒋᒥᒃ, ᐊᑦᔨᓕᐊᕕᓂᖅ 2004-ᒥ
ᑮᓇᓐᖑᐊᑦ
ᖃᔭᕐᑕᓕᒻᒦᑐᑦ ᑮᓇᓐᖑᐊᑦ ᐊᔪᒉᑦᑐᖑᐊᒍᑦᓱᑎᒃ ᓱᕐᖁᐃᓯᒍᑕᐅᕗᑦ ᑐᓃᑦ ᓴᓇᓐᖑᐊᓲᕕᓂᐅᒋᐊᖏᓐᓂᒃ. ᖃᔭᕐᑕᓕᒃ ᑖᓐᓇᑐᐊᕐᕉᔮᕐᑐᖅ ᑐᓃᑦ ᓴᓇ¯ᓯᔪᕕᓂᐅᑎᓪᓗᒋᑦ ᖁᓪᓕᓴᔭᕐᒥᒃ, ᐊᒻᒪᓗ ᐅᓄᕐᑐᒪᕇᑦ, ᑐᑭᖃᑦᓯᐊᑐᑦ ᓴᓇᓐᖑᐊᓯᒪᔪᑦ ᒥᑭᓂᕐᓴᐅᓲᑦ ᓴᐅᓂᕕᓂᐅᑦᓱᑎᒃ, ᑑᒑᕕᓂᐅᑦᓱᑎᒃ ᓇᕐᔪᕕᓂᐅᑦᓱᑎᓪᓗ.
1960-ᐄᑦ ᐊᕐᕌᒍᖏᑦᑕ ᐱᒋᐊᕐᓂᖏᓐᓂ, ᐱᕐᓈ ᓇᕝᕚᑐᕕᓂᐅᓂᕋᕐᓯᒪᔪᖅ 95-ᓂᒃ ᓴᓇᓐᖑᐊᓯᒪᔪᓂᒃ ᖃᔭᕐᑕᓕᒻᒦᓱᓂ (Saladin d’Anglure 1962). ᓯᐊᕈᒋᐊᖑᓕᕐᒪᑦ ᖃᐅᔨᓴᕆᐊᕐᑐᓯᒪᓕᕐᒥᓱᓂ (1996-ᒥᑦ 1998-ᒧᑦ) ᐊᕙᑕᒃᑯᓂᒃ ᐃᓚᖃᕐᓱᓂ, ᓇᓗᓀᕐᓯᒍᓐᓇᓯᓚᐅᔪᒍᑦ 70-ᒋᐊᓪᓚᓂᒃ ᑮᓇᓐᖑᐊᓂᒃ, ᑖᕙᓃᑦᑐᑦ ᑮᓇᓐᖑᐊᑦ ᑲᑎᓕᕋᒥᒃ 165-ᖑᓕᕐᑐᑦ. ᐃᓓᓐᓇᖏᑦ ᑮᓇᓐᖑᐊᑦ ᖃᔭᕐᑕᓕᒻᒦᑐᑦ ᑕᑯᑦᓴᐅᒍᓐᓇᓲᑦ ᓯᕿᓂᖅ ᓈᒻᒪᓈᕐᓯᒪᓕᕐᒪᑦ ᑭᓯᐊᓂ, ᐅᓄᕐᓂᓭᑦ ᑕᑯᑎᑦᓯᔪᑦ ᓴᓇᓐᖑᐊᓯᒪᔪᑦ ᐃᓅᓪᓚᒥᓘᓐᖑᐊᒍᒋᐊᖏᓐᓂᒃ, ᓴᕐᕿᔮᕐᑎᓯᔪᐊᓘᒐᑎᒃ ᐃᓄᓐᖑᐊᒍᒋᐊᖏᓐᓂᒃ ᓴᓇᒪᔪᑦ.
ᑮᓇᓐᖑᐊᖅ ᓴᓇᒻᒪᖃᕐᓱᓂ ᓄᕗᕆᑦᑐᑲᓪᓚᓂᒃ ᑎᒥᒥᒍᑦ ᑕᓕᓐᖑᐊᓂᒃ ᓂᐅᓐᖑᐊᓂᓪᓗ, ᑐᓐᖓᕕᖓ ᐊᒻᒪᓗᑭᑖᒍᑎᓪᓗᒍ, ᐊᑦᔨᓕᐊᕕᓂᖅ 2004-ᒥ
ᑮᓇᓐᖑᐊᖅ ᓴᓇᒻᒪᖓ ᓯᒃᑭᑕᑯᑖᒍᑦᓱᓂ ᑮᓇᖓ ᐊᒻᒪᓗᑭᑖᒐᓛᒥᒃ ᑕᓪᓗᖃᕐᓱᓂ; ᑖᑦᓱᒪ ᓴᓇᓐᖑᐊᓯᒪᔫᑉ ᓯᓈᖏᑦ ᒪᓃᑦᑐᓛᑦ ᒪᓂᕌᐱᐅ¯ᒐᑎᒃ; ᐊᑦᔨᓕᐊᕕᓂᖅ 2004-ᒥ
ᑮᓇᓐᖑᐊᖅ ᓴᓇᒻᒪᖓ ᑕᑭᔪᑯᑖᖅ ᖃᐅᖃᕐᓱᓂ ᑕᑭᔪᑯᑖᒥᒃ ᐃᓱᓕᔪᒥᒃ ᓄᕗᑲᓪᓛᓄᑦ ᐊᑐᓂᑦ ᑮᓇᖓᑕ ᓴᓂᕋᖓᒍᑦ; ᓴᓇᒪᔫᑉ ᑐᓐᖓᕕᖓ ᑐᒥᐅᔭᖅ. ᓴᓇᓐᖑᐊᓯᒪᔪᑦ ᑕᓪᓗᖓᑕ ᐊᑖᓃᑦᑐᑦ ᐊᖓᒃᑰᑉ ᐊᓂᕐᓂᖑᐊᕆᑐᐃᓐᓇᕆᐊᓕᖏᑦ. ᖃᑯᕐᓯᓕᑎᕐᓯᒪᔪᑦ ᓯᓈᖏᑦ ᑕᑯᑎᑦᓯᔪᑦ ᖃᒻᒥᐅᓂᕐᓴᖅ ᑭᓯᐊᓂ “ᓄᑕᐅᓯᓕᕐᑕᐅᒋᐊᕐᑐᕕᓂᐅᒋᐊᖓ” ᓴᓇᒪᔫᑉ; ᐊᑦᔨᓕᐊᕕᓂᖅ 2004-ᒥ
ᓄᓇᐅᑉ ᐊᓯᐅᖏᓐᓇᑎᑕᐅᑦᑌᓕᒐᓱᐊᕐᓂᖓ
ᖁᓕᓂ ᐊᕐᕌᒎᖃᑦᑕᓚᐅᕐᑐᓂ, ᐊᕙᑕᖅ ᐱᐅᓯᑐᖃᓕᕆᕕᒃᑯᑦ ᐱᓇᓱᐊᖃᑎᖃᕐᐸᑐᑦ ᑲᕙᒪᑐᖃᒃᑯᓂᒃ ᖃᔭᕐᑕᓕᒻᒥᒃ ᐃᓕᑕᕆᔭᐅᓂᕐᑖᑎᑦᓯᒐᓱᐊᕐᓱᑎᒃ ᓄᓇᕐᔪᐊᒥ ᐱᐅᓯᕐᓱᓂ ᑲᔪᓯᔫᑎᓪᓗᒍ ᓄᓇᐅᑦᓱᓂ. ᐊᔪᒉᑦᑐᖑᐊᖑᒐᒥ ᐊᑦᑕᓇᕐᑑᓱᓂᓗ, ᑖᓐᓇ ᓄᓇᕐᔪᐊᖅ ᓴᐳᒻᒥᓯᒪᔭᐅᒋᐊᖃᓕᕐᑐᖅ. ᑌᒣᒻᒪᑦ ᐱᒻᒪᕆᐅᕗᖅ ᐱᖁᔭᕐᑖᐸᑦ ᓄᕐᖃᑎᑦᓯᒍᑕᐅᒍᓐᓇᕋᔭᕐᑐᒥᒃ ᓯᖁᑦᑎᕆᓂᐅᕙᑦᑐᓂᒃ ᐊᓯᖏᓐᓂᓗ ᓱᒃᑯᑎᕆᓂᐅᕙᑦᑐᓂᒃ ᐊᓯᐅᖏᓐᓇᑎᑕᐅᑦᑌᓕᒐᓱᐊᕐᓂᖓᓂ. 2008-ᒥ, ᐊᖏᖃᑎᒌᒍᑎᖓ ᐃᓄᐃᑦ ᓄᓇᕕᒻᒥᐅᑦ, ᓄᓇᕘᕐᒥᐅᑦ, ᑲᕙᒪᑐᖃᒃᑯᓗ ᐱᑦᔪᑎᖃᕐᓱᓂ ᓄᓇᕕᐅᑉ ᓯᑦᔭᒦᑦᑐᖁᑎᖏᓐᓂᒃ ᕿᑭᕐᑕᓂᒃ ᐅᕙᑦᑎᓂᒃ ᑐᓂᔨᒋᐊᓪᓚᒍᓐᓇᑎᑦᓯᓯᒪᓕᕐᑐᖅ ᖃᔭᕐᑕᓕᒻᒦᑐᑦ ᐊᓪᓚᖁᑎᖏᓐᓂᒃ ᑲᓇᑕᒥ ᐃᕐᖃᓇᕐᑐᓕᕆᔨᒻᒪᕆᖏᑦᑕ ᑲᑎᒪᔨᖏᓐᓄᑦ (Historic Sites and Monuments Board of Canada). ᖃᔭᕐᑕᓕᒃ ᑲᕙᒪᒃᑯᓄᑦ ᐃᓕᑕᕆᔭᐅᓂᕐᑖᓛᕐᑐᕆᔭᐅᔪᖅ 2010 ᐊᕐᕌᒍᖓᑕ ᐱᒋᐊᕐᓂᖓᓂ.
ᖃᐅᔨᔭᕐᒥᓂᒃ ᓄᐊᑦᓯᔪᑦ: ᑮᓇᓐᖑᐊᑦ ᐊᑦᔨᓕᐅᕐᑕᕕᓃᑦ ᒥᖑᐊᕈᑎᒋᑦᓱᒍ ᓱᔪᓲᒍᓐᖏᑐᖅ ᓯᑯᑦᓴᔭᖅ, ᐊᑦᔨᓕᐊᕕᓂᖅ 1996-ᒥ
ᖃᐅᔨᔭᕐᒥᓂᒃ ᓄᐊᑦᓯᔪᑦ: ᐊᑦᔨᓕᐅᕆᔪᑦ, ᐊᑦᔨᓕᐊᕕᓂᖅ 2004-ᒥ
ᖃᔭᕐᑕᓕᒻᒦᑐᑦ ᑮᓇᓐᖑᐊᑦ ᐊᑦᔨᖑᐊᖁᑎᖏᑦ (lien vers collection pétroglyphes)
