- ᑭᓇᒃᑰᒪᖔᑦᑕ
- ᖃᐅᔨᒋᐅᕐᓂᖅ ᑐᓂᕐᑕᓂᐊᕐᓂᒥᒃ
- ᐱᓇᓱᐊᕐᑕᐅᔪᐃᑦ ᐱᓇᓱᐊᕋᑦᓭᓗ
- ᖃᕆᑕᐅᔭᑎᒍᑦ ᓄᓇᕐᔪᐊᓕᒫᒨᕈᑏᑦ
- ᑐᑭᓯᒋᐊᕐᕕᓭᑦ
ᑐᓂᕐᑕᓂᐊᕐᓂᖅ
ᓄᓇᓖᑦ ᐃᓕᓐᓂᐊᕕᕐᔪᐊᓗ ᖃᐅᔨᓴᖃᑎᒌᓐᓂᕕᓂᖏᑦ (CURA) ᑐᓂᕐᓂᑦ ᐃᓄᓐᓄᑦ
2001-2003“ᑐᓂᕐᓂᑦ ᐃᓄᓐᓄᑦ”-ᒥᒃ ᖃᐅᔨᓴᕐᓂᕕᓂᖅ, ᓄᓇᓕᐅᔪᓄᑦ ᐃᓕᓐᓂᐊᕕᕐᔪᐊᒧᓪᓗ ᖃᐅᔨᓴᖃᑎᒌᒍᑕᐅᔪᕕᓂᖅ ᐃᑲᔪᕐᑎᖃᕐᓱᑎᒃ ᐃᓅᖃᑎᒌᓂᒃ ᓱᑯᐃᔦᔨᓂᒃ ᓄᓇᕐᔪᐊᒥᐅᓂᓪᓗ ᖃᐅᔨᓴᕐᑎᓂᒃ (Social Sciences and Humanities Research Council), ᓯᕗᓪᓕᐹᑦᓯᐊᒥ ᖃᐅᔨᓴᕐᑐᑦ ᑕᑯᓐᓇᒐᖃᓗᐊᓐᖑᐊᑐᕕᓃᑦ ᖃᔭᕐᑕᓕᒻᒦᑐᓂᒃ ᑮᓇᓐᖑᐊᓂᒃ ᐃᒣᑦᑐᕕᓂᐅᔪᕆᑦᓯᒐᒥᒃ ᐃᓄᕐᖄᕕᓃᑦ ᓄᓇᑦᑐᕕᓂᐅᕐᖂᒪᑕ ᑕᓯᐅᔭᕐᔪᐊᑉ ᓄᕗᖓᑕ ᓯᑦᔭᖓᓄᑦ ᓯᕿᓂᕙᓯᖓᓂ. ᐃᓘᓐᓈᒍᑦ, ᐱᓇᓱᐊᕐᓱᑎᒃ ᑐᑭᓯᓐᓇᓂᕐᓴᓂᒃ ᐊᓪᓚᖁᑎᓕᐅᕈᒪᔪᕕᓃᑦ ᓄᓇᕕᐅᑉ ᐃᓕᕐᕈᓯᖓᑕ ᐃᕐᖃᓇᕐᑐᖁᑎᖓᓐᓅᓕᖓᔪᒥᒃ ᖃᐅᔨᓴᕐᓂᖃᕐᑎᓗᒍ.
ᐊᔭᒍᑕᖅ, ᓴᓪᓗᐃᑦ ᑲᖏᕐᓱᑯᑖᖓᓂ, ᑕᔭᕋᐅᑉ ᓇᔪᓚᐅᕐᑕᕕᓂᖓᑕ ᓴᓂᐊᓂ, ᐊᑦᔨᓕᐊᕕᓂᖅ 2003-ᒥ
ᓄᓇᕕᒻᒥᐅᑦ ᐃᓕᓐᓂᐊᑎᑦᓯᔩᑦ ᑐᓂᕐᑕᓂᐊᕐᓂᒥᒃ ᐃᓕᓐᓂᐊᑎᑕᐅᔪᑦ, ᐊᑦᔨᓕᐊᕕᓂᖅ 2003-ᒥ. ᑖᓐᓇ ᐃᓕᓐᓂᐊᑎᑦᓯᓂᕕᓂᖅ ᐊᑕᐅᓯᓐᖑᑎᑕᐅᔪᕕᓂᖅ ᐃᓕᓐᓂᐊᕇᕈᑎᑖᕋᓱᐊᕐᑐᓅᕐᑕᐅᓱᓂ ᒪᑭᓪ ᐃᓕᓐᓂᐊᕕᕐᔪᐊᖓᑕ ᓄᓇᖃᕐᖄᓯᒪᔪᓂᒃ ᐃᓄᓐᓂᓗ ᐃᓕᓐᓂᐊᑎᑦᓯᓂᕐᒧᑦ ᐊᓪᓚᕕᖓᓐᓄᑦ, ᑕᒪᓐᓇ ᓈᒻᒪᑐᐃᓐᓇᓯᒪᔪᖅ ᐃᓚᒋᐊᕈᑎᐅᑦᓱᓂ CURA-ᐅᑉ ᐱᓇᓱᐊᕐᓂᖓᓄᑦ.
ᑐᑭᓯᓂᖅ ᓄᓇᒍᓯᐅᕙᑦᑐᕕᓂᕐᓂᒃ ᑕᓯᐅᔭᕐᔪᐊᑉ ᓄᕗᖓᓄᑦ ᓯᕿᓂᕙᓯᖓᑕ ᓯᑦᔭᖓᓄᑦ
ᑐᑭᓯᒍᒪᓗᐊᓐᖑᐊᓚᐅᔪᕗᒍᑦ ᐊᑦᔨᒌᓐᖏᑐᓂᒃ ᐊᑑᑎᔭᐅᒍᓇᐅᔪᕆᔭᐅᔪᕕᓂᕐᓂᒃ ᐃᓄᐃᑦ ᓄᓇᓚᕿᑎᓪᓗᒋᑦ ᑕᓯᐅᔭᕐᔪᐊᑉ ᓄᕗᖓᓄᑦ ᓯᕿᓂᕙᓯᖓᑕ ᓯᑦᔭᖓᓄᑦ, ᓴᓪᓗᐃᑦ ᖁᐊᕐᑕᐅᓗ ᐊᑯᓐᓂᖓᓄᑦ. ᓇᓗᓀᑦᓯᐊᓗᒍ, ᑲᖐᒋᔭᖃᓗᐊᓐᖑᐊᓚᐅᔪᕗᒍᑦ ᖃᓄᖅ ᓄᓇᒋᐊᓐᖓᐸᓪᓕᐊᓯᓐᓂᒪ¯ᑕ.
ᑎᑭᓐᓂᕕᓂᖏᑦ ᑐᓃᑦ
ᐱᓂᐊᕐᓂᕕᓃᑦ ᐅᖄᔭᐅᓯᒪᔪᑦ ᑐᓃᑦ ᑎᑭᓐᓂᕕᓂᖏᓐᓄᑦ ᑐᑭᓯᒐᓱᐊᑦᓯᐊᕆᐊᖃᓪᓗᑐᓚᐅᔪᑦ, ᖃᒻᒥᓂᑌᑦ ᖃᐅᔨᔭᐅᔪᕕᓃᑦ ᑌᒣᑦᑐᕕᓂᐅᓂᕃᓐᖏᒪᑕ. ᑌᑦᓱᒪᓂᒋᐊᖅ ᐃᒣᑦᑐᕕᓂᐅᔪᕆᔭᐅᔫᒐᓗᐊᑦ ᑐᓃᑦ ᐃᓄᑐᐃᓐᓇᖑᕐᑐᕕᓂᐅᒋᐊᖏᑦ, ᑭᓯᐊᓂ ᓄᓇᒃ ᐃᓄᓕᕐᔪᐊᕕᓂᕐᔫᔮᕐᑐᖅ ᐃᓄᑐᐃᓐᓇᖄᕕᓃᑦ ᐃᓅᑎᓪᓗᒋᑦ, ᑌᒪ ᓄᓇᕕᐅᓂᐊᓕᕐᒥᒐᒥ ᑐᓂᕐᓄᑦ 2,000 ᐊᕐᕌᒍᐃᑦ ᓈᓕᕐᑐᑦ.
ᑕᑯᑦᓴᖅ (ᓵᓐᖓᓱᓂ ᓂᒡᒋᒧᑦ) ᑕᔭᕋᐅᑉ ᓇᔪᓚᐅᕐᑕᕕᓂᖓ, ᓴᒡᒐᓂᖃᕇᑐᐊᕐᒪᑦ level 1-ᒥᒃ, ᐊᑦᔨᓕᐊᕕᓂᖅ 2003-ᒥ
ᓄᓇᐅᑉ ᖄᖓᓂᑦ ᐱᔭᕕᓃᑦ ᖃᐅᔨᓴᕋᑦᓭᑦ; ᑕᑯᑦᓴᐅᔪᑦ ᓄᓇᐅᑉ ᖃᓕᐊᕇᓐᓂᖏᑦ, ᑕᔭᕋᐅᑉ ᓇᔪᓚᐅᕐᑕᕕᓂᖓ, ᐊᑦᔨᓕᐊᕕᓂᖅ 2003-ᒥ.
ᐊᒃᑑᑎᒐᓚᓐᓂᕕᓂᖏᑦ ᑐᓃᑦ ᐃᓄᑐᐃᓐᓇᖄᕕᓃᓪᓗ
ᑐᓂᖃᕐᓂᐅᑉ ᐃᓱᓕᒋᐊᕕᓐᓂᕕᓂᖓ ᓱᕐᖁᐃᑕᐅᒪᑦᓯᐊᒐᓛᓐᓂᖏᑐᖅ, ᓱᒐᓗᑦᑐᖅ ᐊᒃᑑᑎᒐᓚᕐᖂᓂᕐᒪᑕ ᐃᓄᑐᐃᓐᓇᖄᕕᓂᕐᓄᑦ. ᐃᓄᑐᐃᓐᓇᖄᕕᓃᑦ, ᐊᓛᔅᑲᒥᑦ ᕿᒣᔪᕕᓂᐅᔪᕆᔭᐅᑦᓱᑎᒃ 1000-ᒥ, ᑕᒡᒉᓈᐱᓪᓗ ᐅᑭᐅᕐᑕᑑᑉ ᐅᐊᓐᓂᖓᓅᕐᑐᕕᓂᐅᑦᓱᑎᒃ, ᑌᑰᓇ ᐱᔭᕐᓃᓘᕐᑐᕕᓃᑦ ᓱᖏᐅᑎᒐᓱᐊᕐᓱᑎᒃ ᓯᓚᒥᒃ ᐊᑦᔨᐅᖏᑦᑐᒥᒃ. ᑐᓵᑦᓱᒋᑦ ᐊᑦᔨᒌᓐᖏᑐᑦ ᐊᑑᑎᔪᕕᓂᐅᔪᕆᔭᐅᔪᑦ, ᑐᓃᑦ ᐊᐅᓪᓚᓂᕕᓂᖏᑦ ᑐᑭᓯᓐᓇᑎᑕᐅᔪᖅ ᒪᕐᕈᐃᓕᕿᖓᔫᓐᓄᑦ ᐊᑑᑎᑐᐃᓐᓇᕆᐊᖃᕐᑐᕕᓃᓐᓄᑦ: ᐁᑉᐹ; ᑎᑭᕋᑖᑦ ᐃᓄᑐᐃᓐᓇᖄᕕᓃᑦ ᑐᖁᕃᔪᕕᓂᐅᕐᖂᑐᑦ ᐃᓅᖏᓐᓈᑐᓂᒃ ᑐᓂᕐᓂᒃ, ᐅᕝᕙᓘᓐᓃᑦ ᐃᓄᑐᐃᓐᓇᖄᕕᓃᑦ ᑎᒍᓯᔪᕕᓃᑦ ᑲᑎᑎᕆᑦᓱᑎᓗ ᑭᖑᓪᓕᐸᐅᓕᕐᑐᓂᒃ ᑐᓂᕐᓂᒃ. ᑭᓯᐊᓂ, ᖃᒻᒥᖅ ᖃᐅᔨᓴᕐᑐᕕᓃᑦ ᑖᒃᑯᓃᖓ ᒪᕐᕉᓂᒃ ᐊᑑᑎᔪᕕᓂᐅᔪᕆᔭᐅᔫᓐᓂᒃ ᓱᓕᓂᕃᓐᖏᑐᑦ: ᑐᓃᑦ ᓄᓇᓯᒪᔪᕕᓂᐅᔪᕆᔭᐅᓂᖓ ᖁᐊᕐᑕᐅᑉ ᑲᖏᕐᓱᔪᐊᓪᓗ ᒥᑦᓵᓂ ᐊᕐᕌᒍᒃ 1000-ᖑᓚᐅᕐᑎᓇᒍ, ᑭᐳᐃᔪᖅ ᑐᑭᓯᔭᕕᓂᖓᓂᒃ Plumet (1994), ᑌᒣᒻᒪᑦ ᑕᒪᓐᓇ ᓇᓗᓇᕐᓯᓯᒪᔪᖅ ᐊᐱᕆᐅᑎᐅᒋᐊᖃᓕᕐᓱᓂᓗ ᓇᓪᓕᐊ ᓱᓕᒻᒪ¯ᑦ. ᑌᒣᒐᓗᐊᕐᑎᓗᒍ, ᑐᓃᑦ ᑎᑭᑦᑐᕕᓂᕐᔫᔮᕐᑐᑦ ᓄᓇᕕᒻᒧ ᓯᐊᕈᐊᓘᓕᕐᒪᑦ ᑭᓯᐊᓂ, ᐃᒻᒪᖄ ᐊᕐᕌᒍᕐᓂ 1200-ᓂ 1400-ᓂᓘᓐᓃᑦ (ᐊᓪᓚᑕᕕᓂᖏᑎᒍᑦ Park, 2000; McGhee, 2000). ᑖᒃᑯᓇᓂ ᐱᓂᐊᕐᓂᕕᓂᕐᓂ, ᑖᒃᑯᐊ ᒪᕐᕈᐃᒃ ᐃᓅᓚᐅᕐᑐᕕᓃᑦ ᑲᑎᐅᑎᓚᐅᕐᖂᓂᓐᖏᑐᐃᓪᓘᓃᑦ ᓄᓇᓐᖃᑎᒌᒐᑎᓪᓗ, ᑕᒪᓐᓇ ᑕᑯᔭᐅᑎᓯᒪᒐᓗᐊᕋᑦᑎᒍ ᑲᖏᕐᓱᔪᐊᑉ ᖁᐊᕐᑕᐅᓗ ᒥᑦᓵᓄᐊᖓᔪᓂᒃ ᐅᖄᑦᓱᑕ.
ᐃᓕᓐᓂᐊᑎᓗᑳᑦ ᐱᓇᓱᐊᕐᑐᑦ JfEl-10-ᖑᓂᕋᕐᑕᒥ ᓇᔪᒐᐅᓚᐅᕐᑐᕕᓂᕐᒥ, ᐊᑦᔨᓕᐊᕕᓂᖅ ᐊᐅᔭᖅ 2002-ᒥ
ᐃᑎᕆᐊᕐᕕᒃ ᓄᓇᐅᑉ ᐊᑖᒎᕐᑐᖅ ᑐᓃᑦ ᐊᓂᕐᕋᕕᓂᖓᓄᑦ, JfEl-10-ᖑᓂᕋᕐᑕᒥ ᓇᔪᒐᐅᓚᐅᕐᑐᕕᓂᕐᒥ, ᓵᓐᖓᔪᖅ ᐅᐊᓐᓂᒥᒃ, ᐊᑦᔨᓕᐊᕕᓂᖅ ᐊᐅᔭᖅ 2002-ᒥ
ᖃᔭᕐᑕᓕᒻᒦᑐᑦ ᑮᓇᓐᖑᐊᑦ
ᖃᐅᔨᓴᕐᑕᐅᓂᕕᓂᖏᑦ ᑐᓂᕐᑌᑦ ᑮᓇᓐᖑᐊᑦ ᖃᔭᕐᑕᓕᒻᒦᑐᑦ ᓯᕗᒧᐊᑉᐸᓕᐊᑦᓯᐊᓯᒪᒻᒥᔪᖅ ᐅᐃᒪᓇᕐᑐᖁᑎᒋᔭᐅᑦᓱᑎᒃ, ᑲᑕᒐᑐᐃᓐᓇᕆᐊᖃᓕᕐᒪᑕ ᓴᓇᓐᖑᐊᓯᒪᔪᑦ ᐊᓯᐅᑐᐃᓐᓇᕆᐊᖃᓕᕐᓱᑎᓗ ᖃᒻᒥᖅ ᓯᕗᓂᑦᓴᑎᓐᓂ. ᑖᓐᓇ ᐱᓇᓱᐊᕐᓂᖅ ᐊᑯᓃᕐᑑᓱᓂ ᐊᔪᐃᓐᓇᓂᐅᒐᓱᐊᕐᐸᑐᖅ ᖃᐅᔨᓴᕐᑕᐅᒋᐊᖃᒻᒪᕆᑦᓱᓂ ᐱᕙᓪᓕᐊᔭᐅᓗᓂᓗ. ᑐᑭᑖᕈᒪᒐᓗᐊᕐᒥᔪᒍᑦ ᐋᕐᖀᓂᕐᒥᒃ ᓇᔪᒐᐅᓚᐅᕐᑐᕕᓂᖅ ᐃᓕᑕᕆᔭᐅᓂᕐᑖᖁᒐᑦᑎᒍ ᑲᕙᒪᑐᖃᒃᑯᓄᑦ, ᑖᓐᓇ ᐊᑐᕐᑐᓚᕆᐅᒐᔭᕐᑐᖅ ᓱᖏᕐᑐᑕᐅᓂᖓᓄᑦ ᖃᔭᕐᑕᓕᒃ ᐊᑯᓂᕆᔪᒥᒃ ᐊᓯᐅᖏᓐᓇᕋᔭᓐᖏᒪᑦ.
ᓄᓇᓖᑦ ᐃᓕᓐᓂᐊᕕᕐᔪᐊᓗ ᖃᐅᔨᓴᖃᑎᒌᓐᓂᕕᓂᖏᑦ ᐅᕙᑦᑎᓂᒃ ᐊᓪᓚᖁᑎᓕᐅᕈᓐᓇᓯᑎᑦᓯᓚᐅᔪᑦ ᐊᑦᔨᒌᓐᖏᑐᓂᒃ ᐊᑑᑎᒍᓇᕕᓂᕐᓂᒃ ᓇᔪᒐᐅᓚᐅᕐᑐᕕᓂᕐᒥ, ᐅᕘᓇᓗᐊᓐᖑᐊᖅ, ᐅᕙᑦᑎᓂᒃ ᑲᔪᓯᒍᑎᑦᓴᑖᕐᑎᓯᑦᓱᓂ ᓴᒡᒐᓂᕐᒥᒃ ᑕᒫᓂᕐᕿᔪᓂᒃ ᓄᓇᐅᑉ ᐃᓚᕕᓂᖏᓐᓂᒃ ᓱᕐᕋᓯᒪᓐᖏᓈᕐᑐᒥ ᓴᒡᒐᕕᐅᒍᓐᓇᑐᒥ ᑐᓃᑦ ᐃᓅᕕᕕᓂᖓᓐᓂ. ᑖᒃᑯᐊ ᑕᑯᓂᐊᕆᐊᓪᓚᓂᐅᖃᑦᑕᑐᕕᓃᑦ ᐅᕙᑦᑎᓂᒃ ᐊᓪᓚᖁᑎᓕᐅᕈᓐᓇᓯᑎᑦᓯᓚᐅᔪᑦ ᓇᕝᕚᑕᐅᕐᖃᒥᓐᓂᒃ ᑮᓇᓐᖑᐊᓂᒃ, ᒫᓐᓇᐅᔪᖅ ᑮᓇᓐᖑᐊᑦ ᖃᔭᕐᑕᓕᒻᒦᑐᑦ 200-ᑲᓵᒦᓕᕐᑐᑦ.
ᐊᒥᓱᐃᓕᕿᖓᔪᒥᒃ ᖃᐅᔨᓴᕐᓂᐅᒐᓱᐊᕐᓯᒪᔪᑦ
ᐊᑦᔨᒌᓐᖏᑐᑦ ᐊᔪᐃᓐᓇᓂᕕᓃᑦ ᐅᒃᑯᐊᒥᒃ ᐅᒃᑯᐃᓯᓯᒪᓕᕐᑐᑦ ᐃᑲᔪᕐᑎᒌᓂᐊᓕᕐᑎᓗᒋᑦ ᐱᓇᓱᐊᕋᑦᓴᓄᑦ ᑐᓂᕐᑕᓂᐊᕐᑏᑦ, ᐃᕐᖃᓇᕐᑐᓕᕆᔩᑦ ᐊᑦᔨᒌᓐᖏᑐᐃᓪᓗ ᐱᔪᓐᓇᑐᓪᓚᕇᑦ ᓄᓇᒥᒃ ᓱᑯᐃᔦᓂᕐᒧᑦ. ᑖᓐᓇ ᐃᑲᔪᕐᑎᒌᓐᓂᐅᓚᐅᔪᖅ ᐱᑎᑦᓯᓚᕆᑦᑐᐊᓘᓚᐅᔪᖅ ᐱᓇᓱᐊᕐᑎᓗᑕ ᑕᔭᕋᐅᑉ ᓇᔪᓚᐅᕐᑕᕕᓂᖓᓂᒃ (KbFk-7), ᓴᓪᓗᐃᑦ ᓴᓂᐊᓃᑦᑐᒥᒃ.
ᓯᕗᓪᓕᐹᓪᓚᕆᐅᑦᓱᓂ ᐃᓕᓐᓂᐊᓂᕐᒧᑦ ᐁᕙᓪᓕᐊᓂᖅ
ᑕᔭᕋᐅᑉ ᓇᔪᓚᐅᕐᑕᕕᓂᖓ ᐱᓇᓱᐊᕐᑕᐅᓱᓂ ᐊᖏᔪᐊᓗᒻᒥᒃ ᐱᔪᓪᓚᕆᐊᓘᓚᐅᔪᖅ ᐃᓕᓐᓂᐊᑎᑦᓯᖃᑎᒌᓐᓂᑯᑦ, ᑌᑰᓇ ᐱᓇᓱᐊᖃᑎᖃᓯᓚᐅᔪᒐᑦᑕ ᐃᓕᓐᓂᐊᕕᕐᔪᐊᒥᐅᓂᒃ ᐃᓕᓐᓂᐊᑎᓂᒃ ᐃᓄᓐᓂᓗ ᐳᕐᑐᓂᕐᓴᒥᒃ ᐃᓕᓐᓂᐊᑐᓂᒃ ᐊᒻᒪᓗ ᐃᓄᓐᓂᒃ ᐃᓕᓐᓂᐊᑎᑦᓯᔨᓂᒃ. ᑖᓐᓇ ᐱᓇᓱᐊᕐᑕᐅᔪᕕᓂᖅ ᐱᒋᐊᓐᖓᑎᑦᓯᒍᑎᐅᓚᐅᔪᖅ ᓯᕗᓪᓕᐹᓪᓚᕆᐅᑦᓱᓂ ᐃᓕᓐᓂᐊᓂᕐᒧᑦ ᐁᕙᓪᓕᐊᓂᕐᒥᒃ, ᑕᒪᓐᓇᓗ ᐊᑐᕐᑐᓚᕆᐊᓗᖁᑎᒋᔭᐅᑦᓱᓂ ᐃᓚᐅᔪᕕᓂᕐᓄᑦ.
ᖃᐅᔨᒋᐊᕐᕕᓴᖅ: Daniel Gendron (ᑕᓂᐊᓪ ᔮᓐᑦᕉᓐ)
