- ᑭᓇᒃᑰᒪᖔᑦᑕ
- ᖃᐅᔨᒋᐅᕐᓂᖅ ᑐᓂᕐᑕᓂᐊᕐᓂᒥᒃ
- ᐱᓇᓱᐊᕐᑕᐅᔪᐃᑦ ᐱᓇᓱᐊᕋᑦᓭᓗ
- ᖃᕆᑕᐅᔭᑎᒍᑦ ᓄᓇᕐᔪᐊᓕᒫᒨᕈᑏᑦ
- ᑐᑭᓯᒋᐊᕐᕕᓭᑦ
ᑐᓂᕐᑕᓂᐊᕐᓂᖅ
right
1987-1988
ᓄᓀᓐᖑᖅ, ᓯᓚᒧᑦ ᓄᖑᓪᓚᓯᒪᓕᕐᑐᖅ ᓯᑦᔭᖅ; ᑌᑦᓱᒪᓂᒋᐊᖅ ᐃᓄᑕᖃᕐᐸᑐᕕᓂᖅ. ᐅᖓᑖᓂ ᑕᑯᑦᓴᖅ, ᐃᑭᕋᓴᖅ ᑭᓪᓕᓂᕐᓗ, ᓵᓐᖓᓱᑎᒃ ᐅᐊᓐᓂᒥᒃ, ᐊᑦᔨᓕᐊᕕᓂᖅ 1988-ᒥ
ᐱᓇᓱᐊᕐᓂᖅ ᐱᖓᔪᐊᓐᓂᒃ (ᒪᕐᓗᑯᖃᐅᑎᒃ, ᐊᑐᕐᑕᐅᕙᑦᑐᕕᓂᖅ ᐊᓂᕐᕋᐅᔫᓐᓄᑦ 1-ᒧᑦ 2-ᒧᓪᓗ), ᐊᑦᔨᓕᐊᕕᓂᖅ 1988-ᒥ
ᓇᔪᒐᐅᓚᐅᕐᑐᕕᓂᐅᑉ ᖃᓄᐃᓕᖓᓂᖓ ᓇᓃᓐᓂᖓᓗ
ᓇᔪᒐᐅᓚᐅᕐᑐᕕᓂᖅ JcDe-1-ᖑᓂᕋᕐᑕᖅ ᑎᑭᕋᑯᑖᒦᑉᐳᖅ ᐃᑭᕋᓴᐅᑉ ᑐᓄᓱᐊᕐᔫᓗ ᐊᑯᓐᓂᖓᓃᑦᓱᓂ, ᓄᓇᕕᒃ-ᓛᐸᑐᐊᔨᐅᑉ ᑎᑭᕋᖓᑕ ᑕᕐᕋᖓᓂ ᐅᐊᓐᓂᖓᓃᕙᓪᓗᓱᓂ, ᐃᒻᒪᖄ 9-ᑭᓗᒦᑕᓄᑦ ᐅᖓᓯᓐᓂᓕᒃ ᑭᓪᓕᓂᕐᒥᑦ. ᓇᔪᒐᐅᓚᐅᕐᑐᕕᓂᖅ ᐃᓘᓐᓇᓕᒫᑲᓵᖓᓃᑉᐳᖅ ᑎᑭᕌᐱᐅᑉ ᖃᕐᒪᕕᓂᕐᑕᖃᕐᓱᓂ, ᑖᒃᑯᐊ ᑕᕝᕙᓂ ᐊᓂᕐᕋᕆᔭᐅᕙᑦᑐᕕᓃᑦ ᑌᑦᓱᒪᓂᐊᓗᒋᐊᖅ.
ᐱᐅᓯᐅᓯᒪᔪᑦ
ᑐᓂᕐᑕᓂᐊᕐᑏᑦ ᑖᑦᓱᒥᖓ ᓇᔪᒐᐅᓚᐅᕐᑐᕕᓂᕐᒥᒃ ᖃᐅᔨᒪᔪᑐᙯᑦ, ᐃᓄᖃᕐᓯᒪᑎᓪᓗᒍ 3,500 ᐊᕐᕌᒍᐃᑦ ᐅᖓᑖᓄᑦ, 1800-ᐁᑦ ᐊᕐᕌᒍᐃᑦ ᓄᓐᖑᐊᓂᓂᑦ, ᓇᑯᕐᒦᒃ ᓇᐅᑦᓯᑐᓚᐅᕐᓂᒪᑦ Robert Bell, ᑖᓐᓇ ᓄᓇᕐᔪᐊᑉ ᐱᐅᓯᖓᓂᒃ ᖃᐅᔨᓴᕐᑎᒃ ᑲᓇᑕᒥᒃ ᐱᒍᑦᔨᔨᐅᑦᓱᓂ. 1934-ᒥ, Douglas Leechman (1945) ᑕᒫᓃᓚᐅᕐᑐᕕᓂᖅ ᐊᒥᓲᓐᖏᑑᒐᓗᐊᓂ ᐱᓇᓱᐊᕈᓯᕐᓂ, ᓴᒡᒐᒋᐊᕐᑐᓯᒪᑦᓱᓂ ᐊᓂᕐᕋᐅᓚᐅᕐᑐᕕᓂᕐᓂᒃ. ᒪᕐᕉᓂᒃ ᒥᑭᓂᕐᓵᓂᒃ ᖃᐅᔨᓴᕐᓂᖃᕐᓂᒥᔪᖅ 1977-ᒥ 1978-ᒥᓪᓗ.
1985-ᒥ, ᓇᔪᒐᐅᓚᐅᕐᑐᕕᓂᖅ JcDe-1-ᖑᓂᕋᕐᑕᖅ ᓇᓪᓕᑳᕐᑕᐅᔪᕕᓂᖅ ᓂᕆᐅᓐᓂᖃᕐᓂᐊᑎᓪᓗᒍ ᓄᕗ ᑯᐯᒻᒥᐅᑦ ᐃᓄᐃᑦ ᐊᔪᐃᓐᓇᐅᔨᒐᔭᕐᓂᖏᓐᓂᒃ ᓴᐳᒻᒥᓯᒪᓂᕐᒥᒃ ᓱᔪᑎᑦᓯᑌᓕᓂᕐᒥᓗ ᐱᐅᓯᕐᓲᑎᓂᒃ ᑲᔪᓯᔪᓂᒃ ᓄᓇᓕᓕᒫᓂ ᓇᓪᓕᐅᑎᓯᒪᖃᑎᒌᑦᑐᓂᒃ ᓄᓇᓯᒪᔪᓄᑦ. ᓇᔪᒐᐅᓚᐅᕐᑐᕕᓂᖅ ᒪᓂᔭᐅᓚᐅᔪᖅ ᓯᕗᒧᐊᕇᕐᓯᒪᔫᑎᓪᓗᒍ “ᓴᒡᒐᓂᕐᒥᒃ ᐃᓕᓐᓂᐊᕕᐅᒐᔭᕐᓗᓂ” ᐃᓄᓐᓄᑦ ᐃᓕᓐᓂᐊᑎᓄᑦ. ᒪᓂᔭᐅᔪᕕᓂᖅ ᐊᖏᕐᑕᐅᓚᐅᔪᖅ 1987-ᒥ.
ᐃᑎᕆᐊᕐᕕᒃ ᓯᓂᕝᕕᓗ; ᑖᓐᓇ ᓴᒡᒐᓂᖃᕐᑎᓗᒍ ᓇᔪᕐᑕᐅᓚᐅᕐᑐᕕᓂᕐᒥᒃ 1-ᒥᒃ (ᖃᕐᒪᒥᒃ) ᐊᑦᔨᓕᐊᕕᓂᖅ 1988-ᒥ
ᑐᓂᕐᑕᓂᐊᕆᐊᕐᓯᒪᔪᑦ (ᓴᐅᒥᐊᓂᑦ): Ian Badgley (ᐄᔭᓐ ᐹᑦᔅᓕ), Daniel Gendron (ᑕᓂᐊᓪ ᔮᓐᑦᕉᓐ), ᐹᐱ ᑯᔩ (ᐅᑯᖓᔪᖅ), ᑖᒥ ᐅᐃᑖᓗᑦᑐᖅ, ᐹᓴ ᑮᓚᓐ, ᓄᐊ ᓇᕐᑌᕌᓗᒃ ᐊᒻᒪᓗ Madeleine Bélanger (ᒫᑎᓖᓐ ᐱᓛᓐᔦ).
ᑐᓂᕐᑕᓂᐊᕐᓂᒥ ᓴᒡᒐᓂᕕᓃᑦ
1987-ᒥ 1988-ᒥᓪᓗ, ᐊᕙᑕᖅ ᐱᐅᓯᑐᖃᓕᕆᕕᒃᑯᑦ ᔮᐸᓃᓰᓪᓗ ᑐᓂᕐᑕᓂᐊᕐᑏᑦ ᐊᖏᔪᑲᓪᓚᒥᒃ ᓄᓇᒥᒃ ᓴᒡᒐᓂᖃᓚᐅᔪᕗᑦ ᐊᓪᓚᖁᑎᓕᐅᕈᒪᒧᑦ ᐃᓗᕐᕈᓯᑎᒍᑦ ᐃᕐᖃᓇᕐᑑᓂᖓᓂᒃ ᐃᓄᖃᓲᕕᓂᐅᓂᖓᓂᓗ ᑖᕙᑦᓱᒪ ᓄᓇᐅᑉ. ᑕᕝᕙᓂ ᐱᓇᓱᐊᕐᓱᑎᒃ ᑕᐅᓴᓐᑎᐅᓈᕐᑎᑐᓂᒃ ᓄᐊᑦᓯᓂᖃᓚᐅᔪᑦ ᑐᓂᕐᑕᓂᒃ ᖃᐅᔨᒪᔭᐅᒋᐊᓕᓐᓂᓗ ᐊᑦᑐᐊᔪᓂᒃ ᖃᕐᒪᓕᐅᕐᓂᒧᑦ ᓇᔪᒐᐅᓚᐅᕐᑐᕕᓂᕐᒥ. ᑌᒣᒻᒪᑦ, 4,000-ᑐᑲᓵᑦᑐᑦ ᐊᕐᕌᒍᓂᒃ ᐃᕐᖃᓇᕐᑐᐃᑦ, ᑐᓂᕐᖄᕕᓂᐊᓗᖃᓚᐅᕐᑐᕕᓂᕐᒥ 1930-ᐄᑦ ᐊᕐᕌᒍᐃᑦ ᑎᑭᕋᑕᕐᓱᒋᑦ, ᐊᓪᓚᖁᑎᓕᐅᕐᑕᐅᓚᐅᔪᑦ. ᓇᔪᒐᐅᓚᐅᕐᑐᕕᓂᖅ, ᓴᒡᒐᓂᕐᒧᑦ ᐃᓕᓐᓂᐊᕕᐅᒍᓐᓇᓕᕐᓱᓂ, ᐃᓄᓐᓂᒃ ᐃᓕᓐᓂᐊᑎᓂᒃ ᓯᕗᒧᐊᕇᕐᓯᒪᓕᕐᓱᓂ ᐃᓕᓐᓂᐊᑎᑦᓯᒍᑎᐅᓚᐅᔪᒻᒥᔪᖅ ᑐᓂᕐᑕᓂᐊᕐᓂᒥᒃ.
ᖃᐅᔨᒋᐊᕐᕕᓴᖅ: Daniel Gendron (ᑕᓂᐊᓪ ᔮᓐᑦᕉᓐ)
ᐊᖁᐃᒪᕕᓚᕆᒃ, ᓵᓐᖓᓱᓂ ᐅᐊᓐᓂᒧᑦ, ᐊᑦᔨᓕᐊᕕᓂᖅ 1988-ᒥ
ᐁᒐᓱᐊᕐᑐᖅ ᓇᔪᒐᐅᓚᐅᕐᑐᕕᓂᕐᒧᑦ JcDe-1-ᖑᓂᕋᕐᑕᒧᑦ ᑲᖏᕐᓱᐊᓗᑦᔪᐊᒥᐅᑦ ᐅᒥᐊᖓᑎᒍᑦ, ᐊᑦᔨᓕᐊᕕᓂᖅ 1988-ᒥ
