ᑕᑯᔭᒃᓴᑯᕕᓕᕆᓂᖅ
ᓴᐳᑎᒃ ᑕᑯᔭᕐᑐᕕᒃ
ᓴᐳᑎᒃ ᑕᑯᔭᕐᑐᕕᒃ ᐳᕕᕐᓂᑐᒦᑦᑐᖅ ᓄᐃᑕᐅᓚᐅᕐᓯᒪᕗᖅ 1978-ᒥ ᑖᒧᓯ ᖁᒪᖅ ᓄᕙᓕᓐᖓᒧᑦ, ᓯᕗᓪᓕᐹᑦᓯᐊᒍᑦᓱᓂᓗ ᑕᑯᔭᕐᑐᕕᐅᑦᓱᓂ ᓄᓇᕕᐅᑉ ᐃᕐᖃᓇᕐᑐᖁᑎᖏᓐᓂᒃ. ᑖᒧᓯ ᐃᓅᒍᓐᓀᒪᑦ 1993-ᒥ, ᐃᓪᓗᔪᐊᖅ ᐊᒻᒪᓗ ᓄᐊᑕᐅᒪᔪᑦ ᐃᓗᓕᖏᑦ ᐃᐱᕃᓐᓇᑕᐅᓚᐅᕐᓯᒪᔪᑦ ᑮᓇᐅᔭᖃᕐᑎᑕᐅᑦᓯᐊᖏᓐᓂᑯᒥᓄᑦ. ᑌᑦᓱᒨᓇ, ᐊᕙᑕᖅ ᐱᐅᓖᒋᐊᕋᓱᐊᓯᓚᐅᕐᓯᒪᔪᖅ ᑕᑯᔭᕐᑐᕕᒻᒦᑐᓂᒃ ᐱᓪᓚᕆᐊᓘᑦᓱᑎᒃ ᓄᐊᓯᒪᔭᖁᑎᖏᓐᓂᒃ ᐃᓅᓯᕐᒧᐊᖓᔪᓂᒃ ᑐᓂᕐᑕᓂᓪᓗ, ᑭᓯᐊᓂ ᑕᑯᔭᕐᑐᕕᐅᑉ ᐃᓪᓗᔪᐊᕐᑕᖓ ᓴᓇᔭᐅᒋᐊᓪᓚᕖᕈᑦᑐᕕᓂᖅ, ᐊᒻᒪᓗ ᐃᑐᑦᑎᑕᐅᑐᐃᓐᓇᓱᓂ ᔫᓂ 1994-ᒥ.
1996-ᒥᓂᑦ, ᐊᕙᑕᒃᑯᑦ ᑲᔪᓯᒃᑫᓯᒪᓕᕐᑐᑦ ᑎᓕᔭᐅᒍᑎᕕᓂᕐᒥᓂᒃ ᐳᕕᕐᓂᑑᑉ ᑲᕙᒫᐱᒃᑯᖏᓐᓄᑦ ᐊᒥᓱᒐᓛᓂᒃ ᖃᐅᔨᓴᕐᓂᖃᕐᐸᓱᑎᒃ ᐊᒻᒪᓗ ᖃᐅᔨᒋᐊᕐᕕᖃᕐᐸᓱᑎᓪᓗ ᑐᕌᒐᖓᔪᓂᒃ ᐃᓪᓗᓕᐅᕐᓂᒥᒃ ᓄᑖᒥᒃ ᑕᑯᔭᕐᑐᕕᒻᒥᒃ ᐱᐅᓯᑐᖃᕐᒧᐊᖓᔪᓂᓪᓗ ᐱᓇᓱᐊᕐᕕᓴᒥᒃ. ᐊᖏᔪᕋᑕᕐᒥᒃ ᐸᕐᓇᕈᑎᓕᐅᕐᓯᒪᓕᕐᑐᑦ, ᐊᒻᒪᓗ ᑮᓇᐅᔭᕐᓯᐅᕈᑎᐅᓯᒪᓕᕐᓱᓂ. 2001-ᒥ, ᐊᕙᑕᒃᑯᑦ ᐱᓇᓱᑦᑎᑖᓚᐅᔪᕗᑦ ᐃᓄᒻᒥᒃ ᐳᕕᕐᓂᑐᒥᐅᒥᒃ ᓇᒻᒥᓂᕐᓗ ᐃᓕᓐᓂᐊᑎᑦᓱᒍ ᐱᐅᓕᑦᓯᒐᓱᐊᕐᓂᒧᐊᖓᔪᓂᒃ. ᒫᓐᓇᐅᑎᓪᓗᒍ ᑲᒪᒋᔭᖃᖃᑦᑕᑐᖅ ᑕᑯᔭᕐᑐᕕᒻᒧᑦ ᐃᓂᒋᔭᐅᑫᓐᓇᕋᔭᕐᑐᒥᒃ.
ᓴᓇᓐᖑᐊᓂᕐᒧᑦ ᐸᑎᑦᑎᒐᓕᐅᕐᓂᒧᓪᓗ ᑲᑎᒪᓂᐊᕈᓯᖅ
ᑭᒡᒐᑐᕐᓱᒍ ᐳᕕᕐᓂᑑᑉ ᑲᕙᒫᐱᖓ, ᐱᓇᓱᐊᖃᑎᒋᑦᓱᒍᓗ ᓴᐳᑎᒃ ᑕᑯᔭᕐᑐᕕᒃ, ᐊᕙᑕᒃᑯᑦ ᐱᒋᐊᕐᑎᓯᓚᐅᔪᕗᑦ ᓴᓇᓐᖑᐊᓂᕐᒧᑦ ᐸᑎᑦᑎᒐᓕᐅᕐᓂᒧᓪᓗ ᑲᑎᒪᓂᐊᕈᓯᕐᒥᒃ. ᑲᓇᑕᒥ ᐱᐅᓯᕐᓱᕈᑎᓂᒃ ᑲᔪᓯᔪᓂᒃ ᑲᒪᔩᑦ ᒪᑭᕝᕕᒃ ᑯᐊᕇᓴᒃᑯᓗ ᑖᑦᓱᒥᖓ ᑮᓇᐅᔭᖃᕐᑎᓯᓚᐅᔪᑦ. ᑌᓐᓇ ᑲᑎᒪᓂᐊᕈᓯᖅ ᒪᕐᕉᓂᒃ ᐱᓇᓱᐊᕐᕕᓕᒃ, ᐁᑉᐸᖓ ᐃᓕᖓᑎᓪᓗᒍ ᐅᔭᕋᕐᓂᒃ ᓴᓇᓐᖑᐊᓂᕐᒧᑦ, ᐁᑉᐸᖓᓗ ᐃᓕᖓᑎᓪᓗᒍ ᐊᓪᓚᖑᐊᕐᓯᒪᔪᓂᒃ ᐱᓇᓱᐊᕐᓂᓄᑦ. ᐳᕕᕐᓂᑐᕐᒥᐅᑦ ᓴᓇᓐᖑᐊᑏᑦ ᐊᓪᓚᖑᐊᕐᑏᓗ ᐱᕙᓪᓕᔭᐅᓲᑦ ᐊᖏᔪᐊᓗᓐᓄᑦ ᐱᒍᓐᓇᓪᓚᕆᑦᑐᑎᒍᑦ ᐱᓇᓱᐊᕈᑎᒋᔭᐅᓲᓂᒃ ᐃᓚᖃᕐᒥᑎᓪᓗᒋᑦ ᐊᑦᑕᓀᑦᑑᒋᐊᖃᕐᓂᖏᓐᓂᒃ ᐱᓇᓲᑏᑦ; ᑖᓐᓇ ᐱᓇᓱᐊᕐᕕᐅᔪᖅ ᐊᑐᕐᑕᒪᕆᐊᓘᓲᒍᒻᒥᔪᖅ ᐃᓅᓱᑦᑐᓄᑦ ᐱᔪᑦᓴᐅᔮᕐᕕᖃᑦᓯᐊᑐᓄᑦ ᓴᓇᓐᖑᐊᑎᕈᒐᓱᐊᕐᓂᒥᒃ. ᓴᕐᕿᑎᑦᓯᓯᒪᓕᕐᓱᑎᒃ ᑖᒃᑯᓂᖓ ᐱᐅᔪᑦᓴᔮᓘᑦᓱᑎᒃ ᐱᓇᓱᕝᕕᓂᒃ, ᐳᕕᕐᓂᑐᕐᒥᐅᑦ ᓇᒻᒥᓂᓪᓚᕆᒃ ᓄᐃᑦᓯᓯᒪᓕᕐᖁᑦ ᑭᓇᒃᑯᓕᒫᓄᐊᖓᔪᒥᒃ ᐃᓪᓗᖁᑎᒥᒃ ᐃᓕᖓᑐᐃᓐᓇᓚᕆᑦᑐᒥᒃ ᓴᓇᓐᖑᐊᓯᒪᔪᓂᒃ ᓄᐃᑦᓯᓂᕐᓄᑦ ᓴᓇᓐᖑᐊᓂᒃᑯᓗ ᐱᓪᓗᑯᒋᐊᓕᓐᓄᐊᖓᔪᓂᒃ ᐃᓕᓐᓂᐊᑎᕆᒍᓐᓇᓯᓂᕐᒥᒃ ᖃᐅᔨᒪᒃᑫᓱᑎᓗ ᓱᓇᒧᑦ ᑖᓐᓇ ᓄᓇᓕᒃ ᖃᐅᔨᒪᔭᐅᒍᑎᓪᓚᕆᐊᓗᖃᓕᕆᐊᖓ. ᑌᓐᓇ ᓴᓇᓐᖑᐊᓯᒪᔪᓂᒃ ᐊᒻᒪᓗ ᐸᑎᑦᑎᒐᓕᐅᕐᓂᓂᒃ ᐱᓇᓱᐊᕐᕕᐊᐱᒃ ᐃᓕᑕᕆᔭᐅᔪᑎᒍᑦ ᐅᒃᑯᐃᑕᐅᓚᐅᔪᖅ ᓯᑉᑎᒻᐸ 2005-ᒥ.
1982-ᒥ, ᑫᔅ ᐹᐱᓕᐊᖑᓚᐅᕐᓯᒪᔪᖅ ᑮᓇᐅᔭᒃᑯᕕᒃ ᐳᕕᕐᓂᑐᒦᑦᑐᖅ ᓴᐳᑎᒃ ᑕᑯᔭᑦᓴᑯᕕᓐᖑᓚᐅᕐᓯᒪᔪᖅ, ᑖᓐᓇ ᑖᒧᓯ ᖁᒪᐅᑉ ᑐᕃᓐᓇᓯᐊᕐᓱᒍ ᐊᔪᐃᓐᓇᓯᔭᕕᓂᖓ.
ᓗᕌᓐ ᑳᒡᓅᓐ ᐊᒻᒪᓗ ᐲᑕ ᐳᐃ ᐃᑦᑐᑲᓪᓚᒃ ᐅᖃᖃᑎᒌᑐᑎᓖᒃ ᓄᑖᒥᒃ ᐱᓇᓲᑎᒥᒃ ᓴᕐᕿᑎᑦᓯᒍᑎᑦᓴᒥᒃ ᑕᑯᔭᕐᑐᕕᒻᒥ ᓴᓇᓐᖑᐊᓯᒪᔪᐊᓘᒐᔭᕐᑐᒥᒃ
ᓂᐊᓕ ᓄᓐᖓᖅ ᓇᑲᑦᓯᔪᖅ ᓇᑦᓯᔭᐅᑦᓱᓂ ᕿᑐᒪᕐᓵᓴᔭᒥᒃ ᐃᓚᒋᔭᐅᑎᓪᓗᒍ ᐃᓕᑕᕆᔭᐅᔫᑦᓱᓂ ᖁᕕᐊᓲᑎᒋᔭᐅᔪᒧᑦ ᐱᒋᐊᕐᑎᑕᐅᑎᓪᓗᒍ ᓄᑖᖅ ᐳᕕᕐᓂᑐᒦᑦᑐᖅ ᓴᓇᐅᒐᕐᕕᒃ ᐸᑎᑦᑎᒐᓕᐅᕕᓗ.
