ᐋᓐᓂᐊᓯᐅᑎᒋᔭᐅᕙᑦᑐᕕᓃᑦ

ᐱᐊᕋᑦᓴᖃᕐᓂᖅ ᐱᐊᕋᕐᑖᓂᕐᓗ

ᐊᕐᓇᐅᑉ ᐱᐊᕋᕐᑖᓂᖓ ᐃᒻᒥᓃᓲᖅ. ᐊᖃᔦᑦ ᐊᐅᓈᕐᑐᓄᑦ ᓇᖏᕆᔭᐅᕙᓪᓗᓲᕕᓃᑦ, ᐊᒻᒪᓗ ᐆᓇᕐᑐᒥᒃ ᓯᐅᕋᕐᒥᒃ ᓈᕐᒥᐅᑕᖃᕐᐸᓱᑎᒃ ᐊᐅᓈᕐᓇᓵᓕᑐᐊᕋᒥᒃ. ᐆᓇᕐᓯᓯᒪᔪᖅ ᓯᐅᕋᖅ ᐅᔭᕋᕐᓘᓃᑦ ᐊᑐᕐᑕᐅᓲᒍᓐᓂᒥᔪᖅ ᐊᕐᓇᖅ ᒪᕐᕉᓂᒃ ᐱᖓᓱᓂᓘᓐᓃᑦ ᑕᕐᕿᖃᓕᑐᐊᕐᒪᑦ ᐱᐊᕋᑦᓴᖓ ᓱᒃᑯᓛᓐᖏᒪᑦ, ᑭᓯᐊᓂ ᑕᒪᓐᓇ ᐊᕐᓇᒧᑦ ᐊᑦᑕᓇᕐᑑᒍᓐᓇᒥᔪᖅ ᓯᐊᕈᒋᐊᖑᓕᕐᐸᑦ.

ᐅᖃᕐᓯᒪᔪᖃᕐᑐᖅ ᖃᓄᐃᓐᖏᑐᑦᓯᐊᒥᒃ ᓱᑲᑦᑐᒥᓪᓗ ᐱᐊᕋᕐᑖᓛᕈᒪᒍᓂ, ᐊᕐᓇᖅ ᐱᐊᕋᑦᓴᓕᒃ ᑌᒪᓐᖓᓕᒫᖅ ᑐᐹᐱᑐᐊᕈᓂ ᒪᑭᑦᓴᐅᑎᒋᒋᐊᓕᒃ ᐊᓂᒌᕐᓗᓂᓗ, ᐅᓪᓗᑯᓪᓗ ᓯᓂᖃᑦᑕᕈᓐᓀᓗᓂ. ᐊᒻᒪᓗᑦᑕᐅᖅ, ᑲᑕᒻᒥ ᓄᕐᖃᓗᓂ ᓂᑯᕐᕋᐅᒐᕐᓗᓂ ᓯᓚᒧᑦ ᑕᑯᓐᓇᐅᒐᒋᐊᖃᕋᓂ, ᐊᒻᒪᓗ ᖁᐃᒋᐊᖃᕋᓂ ᐊᓇᕆᐊᖃᕋᓂᓗ ᐃᓪᓘᑉ ᐃᓗᐊᓂ. ᐊᕐᓇᖅ ᐱᐊᕋᕐᑖᕋᓱᐊᓯᒻᒪᑦ ᐃᕐᓂᓱᕐᓰᔨ ᙯᕐᖁᔭᐅᕙᑦᑐᕕᓂᖅ. ᐃᕐᓂᓱᕐᓰᔩᑦ ᐊᕐᓇᐅᕙᓪᓗᓲᕕᓃᑦ, ᐅᖃᐅᑎᔭᐅᓯᒪᑦᓱᑕᓗ, «ᐊᕐᓇᖅ ᓄᑕᕋᕐᑖᑎᑦᓯᓲᖅ ᐃᓕᓐᓂᐊᓯᒪᔪᖅ. ᐃᓕᓐᓂᐊᕆᐊᓯᓲᕕᓂᖅ ᓂᕕᐊᕐᓯᐊᕌᐱᐅᖏᓐᓈᓱᓂ ᐊᕐᓇᐅᑉ ᐱᐊᕋᕐᑖᕋᓱᐊᕐᓂᓕᒫᖓᓂ ᐁᓯᒪᕙᑦᓱᓂ ᐃᓕᓐᓂᐊᑎᑕᐅᑦᓯᐊᕖᓐᖓᓱᓂ.» ᐊᑯᓂᐅᓗᐊᕐᑐᖅ ᐃᑉᐱᒍᓱᑐᐊᕈᓂ, ᐱᐊᕋᕐᑖᕋᓱᐊᕐᑐᖅ ᓇᔪᒻᒥᔭᐅᕙᑦᑐᕕᓂᖅ ᑐᓄᒥᒍᑦ ᓴᐳᒻᒥᔭᐅᑦᓱᓂᓗ ᐊᑐᓂᑦ ᓴᓂᕋᒃᑯᑦ, ᑎᒍᒥᐊᕐᑎᓗᒍ ᐊᑦᓱᓈᓂᒃ. ᑌᒣᑦᑐᑐᐃᓐᓇᐅᑐᐊᕐᐸᑦ ᐅᓪᓗᓂ ᐊᒥᓲᓐᖏᑑᒐᓗᐊᓂ, ᓇᓪᓕᑐᐃᓐᓇᖓ ᐃᓄᒻᒪᕆᒃ ᓇᓪᓕᑳᕐᑕᐅᕙᑦᑐᕕᓂᖅ ᑐᐱᕐᒥᑦ ᐊᓂᓵᒋᐊᖃᕐᓱᓂ, ᐊᕐᐸᖏᕐᓗᓂᓗ ᑐᐱᖅ ᒪᕐᕈᕕᓪᓗᒍ ᑫᕙᓪᓚᓗᒍ, ᑌᒪ ᐅᑎᕐᓂᐊᓕᕐᒥᒐᒥ – ᐱᐊᕋᕐᑖᕆᔭᐅᒐᓱᐊᕐᑐᒥᒃ ᒪᓕᓵᕐᑎᓯᒐᓱᐊᒧᑦ. ᑕᒪᓐᓇ ᓱᓐᖏᑐᐊᕐᒪᑦ, ᐃᓄᐃᑦ ᐃᓱᒪᒐᓱᐊᓯᕙᑦᑐᕕᓃᑦ ᓄᑕᕋᖅ ᑭᓇᒥᒃ ᓴᐅᓂᕐᑖᑐᑦᓴᐅᒪᖔᑦ, ᐊᑎᖏᓐᓂᓗ ᐅᖃᖃᑦᑕᓱᑎᒃ. ᑌᒣᓘᑐᐃᓐᓇᓯᑦᓱᑎᒃ ᓄᑕᕋᖅ ᑭᐅᓐᖏᓂᓕᒫᖓᓂ ᐊᓂᓚᕿᑦᓱᓂ. ᓄᑕᕋᖅ ᐊᓂᑐᐃᓐᓇᕆᐊᖃᓕᑐᐊᕐᒪᑦ, ᐊᕐᓇᖅ ᓰᕐᖁᑐᓯᓲᕕᓂᖅ, ᐅᑯᖓᑦᓱᓂ ᐊᔭᐱᕐᓱᓂᓗ ᒪᕐᕉᓂᒃ ᕿᔫᓐᓂᒃ ᓄᓇᒧᑦ ᒪᓐᖒᒪᔫᓐᓂᒃ.

ᓵᑦᑐᔮᖅ ᕿᔪᖅ ᐃᒧᓯᒪᔪᖅ ᖃᓪᓗᓈᕐᑕᒧᑦ ᑯᑦᓯᓂᖓᑕ ᐊᑖᓅᕐᑕᐅᕙᑦᑐᕕᓂᖅ. ᐃᕐᓂᓱᕐᓰᔨ ᓂᑯᕐᕋᓱᓂ ᑐᓄᐊᓂ, ᓰᕐᖁᖓᑕ ᐃᓪᓗᐊ ᕿᔪᒻᒦᓱᓂ ᓵᑦᑐᔮᒥ ᑕᓕᒋᓪᓗ ᐃᕿᒻᒥᑎᓪᓗᒋᒃ ᓄᑕᕋᕐᑖᕋᓱᐊᕐᑑᑉ ᐊᒫᒪᒋᑦᑕ ᐊᑖᒍᑦ, ᑭᕕᒐᓛᐱᖃᑦᑕᓱᒍ. ᐊᕐᓇᐅᒥᔪᖅ ᐊᒡᒐᒥᓂᒃ ᐅᖁᒻᒥᑕᐅᑎᑦᓯᑎᓪᓗᒍ ᖁᐃᕐᑐᑎᑦᓯᒐᓱᐊᕐᓱᓂ – ᓄᑕᕋᕐᑖᕋᓱᐊᕐᑐᖅ ᖁᐃᕐᑐᑐᐊᕈᓂ ᓄᑕᕋᕐᒥᒃ ᐊᓂᑎᑦᓯᓚᕿᓚᖓᒐᒥ. ᓄᑕᕋᕐᑖᕋᓱᐊᕐᑐᖅ ᑲᓐᖑᓱᓂᐊᖏᒻᒪᑦ ᐅᑦᓱᖓ ᐅᓕᑦᓯᒪᑎᑕᐅᓲᕕᓂᖅ, ᓄᑕᕋᕐᓗ ᐊᓂᒍᓐᓇᖏᐅᒪᑐᐊᕐᒪᑦ, ᖃᐅᔨᒪᔪᒻᒪᕆᒃ (ᐃᕐᓂᓱᑦᓰᔨᐅᑉ ᐊᓯᐊ) ᐅᕝᕙᓲᕕᓂᖅ ᐊᒡᒐᒥᓐᓂᒃ ᓇᑦᓯᐅᑉ ᐅᕐᓱᖓᓄᑦ ᓄᑕᕋᕐᒥᒃ ᐊᓂᑎᑦᓯᒋᐊᓚᖓᓯᒐᒥ ᐊᕐᓇᐅᑉ ᐃᓪᓚᐅᖓᓂᑦ. ᐊᑕᐅᓯᖅ ᐊᕐᓇᖅ ᐅᖃᕐᓯᒪᔪᖅ: «ᓄᑕᕋᕐᑖᕋᓱᐊᓕᑐᐊᕋᕕᑦ, ᑌᒫᒃ ᐋᓐᓂᓇᑦᓴᒪᑦ ᐃᓱᒪᓇᓐᖏᑐᕐᓘᓃᑦ ᐃᓅᓕᒃᑫᒐᓱᐊᕆᐊᒥᒃ ᐃᓄᒻᒥᒃ. ᑭᓯᐊᓂ ᓄᑕᕋᖅ ᐊᓂᐊᐱᑐᐊᕐᒪᑦ, ᓇᓪᓕᓂᕐᔪᐊᖅ ᐃᕐᐸᓲᖅ ᓇᒧᓕᒫᖅ.»

ᐆᒪᔪᕕᓂᐅᑉ ᕿᓯᖓ ᓄᑕᕋᕐᒧᑦ ᑲᑕᕝᕕᐅᓚᖓᔪᖅ ᐃᓕᔭᐅᓲᖅ ᓇᑎᕐᒧᑦ. ᖃᓚᓯᖓᓅᓕᖓᔪᖅ ᕿᓚᑦᑕᐅᓲᖅ ᓄᑕᕋᐅᑉ ᖃᓚᓯᖓᑕ ᓴᓂᐊᒍᑦ ᓇᑲᑕᐅᑦᓱᓂᓗ ᓴᐅᓂᕕᓂᕐᒧᑦ, ᑭᓯᐊᓂ ᐴᕕᓂᖓ ᐊᓂᕐᖃᔦᓐᖏᐅᒪᑐᐊᕐᒪᑦ, ᖃᓚᓯᖓᓅᓕᖓᔪᖅ ᕿᓚᑦᑕᐅᖄᓲᖅ ᓄᑕᕋᕐᑖᕋᓱᐊᕐᑑᑉ ᓰᕐᖁᖓᑎᒎᕐᑎᓱᒍ ᑌᒪ ᐊᑦᑕᕆᐊᐱᑦᓱᒍ ᓱᒃᑫᑐᐊᐱᐅᑦᓱᓂᓗ ᓄᑦᓱᑕᐅᓂᐊᓕᕋᒥ. ᑌᒪ ᓄᑕᕋᐅᑉ ᖃᓚᓯᖓ ᒪᑦᑐᑎᕐᑕᐅᓲᕕᓂᖅ ᐆᓯᒪᔪᒧᑦ ᒪᓂᕐᒧᑦ ᐅᕝᕙᓘᓐᓃᑦ ᓱᐳᑎᒧᑦ ᐊᕐᔭᓕᓂᕐᓄᓗ ᓇᑲᑕᐅᕕᕕᓂᖓ ᒪᒥᑉᐸᓕᐊᓂᐊᕐᒪᑦ.

«ᑌᒪᓐᖓᓕᒫᖅ ᓄᑕᕋᖅ ᑭᕕᑦᑕᐅᒋᐊᓐᖓᐸᒋᐊᓕᒃ ᑕᓕᕐᐱᖓᑎᒍᑦ ᐊᒡᒐᖓᑎᒍᑦ,» ᐅᖃᐅᑎᔭᐅᓯᒪᔪᒍᑦ, «ᓄᑕᕋᖅ ᓴᐅᒥᐅᓛᓐᖏᒪᑦ ᑌᒪᓐᖓᓗ ᑕᓕᕐᐱᒥᓄᑦ ᐱᓇᓱᐊᑦᓯᐊᐸᓛᕐᒪᑦ,» ᓄᑕᕋᕐᑖᕆᔭᐅᔪᖅ ᕿᐊᓯᑲᐱᓐᖏᑐᐊᕐᒪᑦ, ᓄᓗᖓ ᐸᑎᑦᑕᑕᐅᓲᕕᓂᖅ, ᐊᒻᒪᓗ ᐊᓂᕐᑎᕆᑦᓯᐊᖏᑉᐸᑦ, ᑭᓇᑐᐃᓐᓇᖅ ᒥᓪᓗᐊᓯᓲᕕᓂᖅ ᓄᑕᕋᐅᑉ ᕿᖓᖓᓂᒃ ᖃᓂᖓᓂᓗ. ᓄᑕᕋᕐᑖᑑᑉ ᐃᒻᒧᖓ ᐅᕝᕙᕈᑕᐅᒍᓐᓇᒥᔪᖅ ᓄᑕᕋᐅᑉ ᓱᕐᓗᒋᓐᓂᒃ ᓯᒥᑦᓯᒪᔫᓐᓂᒃ. ᓯᐊᕈᒋᐊᕌᐱᐅᓕᕐᒪᑦ ᓄᑕᕋᖅ ᐅᕝᕙᑕᐅᓲᕕᓂᖅ (ᐃᒪᕐᒧᑦ) ᐱᕕᖃᕐᐸᓗ, ᓂᕆᒃᑲᑕᐅᑦᓱᓂ ᒥᑭᔪᐊᐱᒥᒃ ᓂᕿᑐᐃᓐᓇᒥᒃ ᓲᖑᓯᐅᒥᓂᐊᕐᒪᑦ. ᖃᕆᓴᒌᒃ ᑲᑎᒪᑎᓪᓗᒋᒃ ᕿᓚᑦᑕᐅᕙᑦᑐᕕᓃᒃ ᕿᑎᖓᑎᒍᑦ ᐅᑉᐱᐸᓐᓂᒪᑕ ᐊᑯᓂᐊᓗᒃ ᐃᓅᓛᕐᒪᑎᒃ. ᓄᑕᕋᐅᑉ ᐴᕕᓂᖓ ᓴᒧᖓᑲᓪᓚᒃ ᓄᓇᒨᕐᑕᐅᕙᑦᑐᕕᓂᖅ ᕿᒻᒥᓄᑦ ᐱᔭᐅᓂᐊᓐᖏᒪᑦ, ᕿᒻᒦᑦ ᐱᔪᕕᓂᐅᒍᑎᒃ ᐃᓄᑦᑐᔫᓐᖑᓴᕈᐊᕐᒪᑕ.

ᓄᑕᕋᕐᑖᖃᒻᒥᒃ ᐊᐅᓈᑯᑖᑐᐃᓐᓇᑐᐊᕐᒪᑦ, ᓯᖃᓪᓕᓯᒪᔪᑦ ᐃᕕᒑᑦ ᐅᑦᓱᖓᓄᑦ ᑐᕐᖁᑕᐅᒐᓛᑉᐸᑐᕕᓃᑦ ᐊᕐᓇᓗ ᐃᒥᕐᑎᑕᐅᑦᓱᓂ ᓂᕈᒥᑦᑐᒥᒃ ᐃᒪᕐᒥᒃ ᑏᒥᓪᓘᓃᑦ ᓲᖑᓯᐅᒥᒍᑎᒋᓂᐊᕐᒪᐅᒃ.