ᐋᓐᓂᐊᓯᐅᑎᒋᔭᐅᕙᑦᑐᕕᓃᑦ

ᐅᕕᓂᕐᓗᓃᑦ

ᐊᔪᐊᑦ

ᐋᓐᓂᐊᓯᐅᕈᑎᖃᕐᓂᓴᐅᕗᖅ ᐃᓂᕐᑕᕕᓂᕐᓂᒃ, ᐱᕙᓪᓕᐊᔭᕕᓂᕐᓂᒃ ᐅᖄᒍᑕᐅᔪᕕᓂᕐᓂᓗ ᐊᔪᐊᕐᓂᐅᑉ ᒥᑦᓵᓄᐊᖓᔪᓂᒃ. ᐊᔪᐊᕐᓂᖅ ᐅᖄᔭᐅᓂᕐᐸᐅᓯᒪᕗᖅ ᐋᓐᓂᐊᕆᔭᐅᓲᓕᒫᓂᑦ ᑯᐯᒃ ᑕᕐᕋᖓᓐᓂ. ᐱᑦᔪᑎᖃᑦᓯᐊᕋᒥ: ᐃᓄᐃᑦ ᐊᔪᐊᕐᑐᒪᕆᐊᓘᕙᑦᑐᕕᓃᑦ ᐊᔪᐊᓪᓗ ᐊᑦᑕᓇᕐᑐᒪᕆᐅᑦᓱᑎᒃ. ᐊᖑᑎᒃ ᐊᑕᐅᓯᖅ ᐅᖃᕐᓯᒪᒻᒪᑦ, ‘ᑌᓱᒪᓂᒋᐊᖅ ᐃᓄᐃᑦ ᐊᔪᐊᕐᑐᒪᕆᐊᓘᕙᑦᑐᕕᓃᑦ ᐃᓗᓯᖃᑦᓯᐊᓂᕐᓴᐅᓂᕋᒥᒃ, ᖃᓂᒪᓐᖏᓂᕐᓴᐅᓲᒍᑦᓱᑎᓗ ᐅᓪᓗᒥᑎᑐᑦ. ᐊᒻᒪᓗ, ᐃᓄᐃᑦ ᐃᓱᒪᓲᑦ ᐊᔪᐊᑦ ᐃᓇᖐᓯᒪᓐᓂᒪᑕ ᐃᓗᒻᒥ ᐋᓐᓂᐊᓂᒃ.’ ᐃᒻᒪᖄ ᐃᓄᐃᑦ ᓄᐃᑕᔪᒃᑯᑦ ᖃᓄᐃᓐᓂᓴᐅᑦᓱᑎᒃ, ᐃᓗᒥᒍᑦ ᖃᓄᐃᓐᖏᓂᕐᓴᒪᕆᕕᓃᑦ. ᐊᔪᐊᑦ ᑕᑯᓐᓇᑕᐅᓂᖃᕐᐸᑐᕕᓃᑦ ᐱᒻᒪᕆᐊᓘᒋᐊᖏᑦ, ᐊᑦᑕᓇᕐᑑᒋᐊᖏᑦ. ᐊᔪᐊᖅ ᑲᒪᒋᔭᐅᓐᖏᑐᐊᕋᒥ, ᐃᓅᑉ ᐅᕕᓂᖓᓂᒃ ‘ᓂᕆᔪᖅ’ ᓲᕐᓗ, ᐃᒻᒥᓂᓗ ᒪᒦᓐᓇᑐᐊᕋᒥ ᕿᓕᕈᕐᑖᑎᑦᓯᓲᒍᑦᓱᓂ. ᐊᔪᐊᖅ ᖄᒍᓐᓇᒥᔪᖅ ᑲᒪᒋᔭᐅᓐᓂᖏᑐᐊᕈᓂ: ᐃᓗᒻᒧᑦ ᖄᑐᐊᕐᐸᑦ, ᐃᓄᒃ ᑐᖁᑐᐃᓐᓇᕆᐊᓕᒃ ᐅᓪᓗᐃᑦ ᐱᖓᓱᑦ ᓯᑕᒪᓪᓘᓃᑦ ᐊᓂᒍᕐᐸᑕ (ᖄᕐᑐᕕᓂᖅ ᐃᓗᒻᒧᑦ ᐋᕐᕿᑕᐅᒍᓐᓇᒪᖔᑦ ᖃᐅᔨᒪᔭᐅᓐᖏᑐᖅ). ᓯᓚᒧᑦ ᖄᕐᑐᕕᓂᖅ ᐊᑯᓂᐊᓗᒃ ᒪᒥᒐᓱᐊᓲᖅ. ᐊᔪᐊᖅ ᑲᒪᒋᔭᐅᑦᓯᐊᓂᓐᖏᑐᐊᕋᒥ, ᑭᓇᑐᐃᓐᓇᖅ ᐃᒻᒥᓂᒃ ᒪᕐᓃᔭᑲᐱᒐᓱᐊᕐᑐᕕᓂᐅᑐᐊᕋᒥ ᐅᕝᕙᓘᓐᓃᑦ ᐊᔪᐊᕐᒥᓂᒃ ᖁᐊᔨᐊᖃᓗᐊᖃᑦᑕᑐᐊᕋᒥ, ᐊᔪᐊᖓ ‘ᓂᓐᖓᓂᕋᕐᑕᐅᓲᕕᓂᖅ’: ᐊᐅᐸᕐᓯᔪᐊᓘᑦᓱᓂ ᐳᓪᓕᑐᐊᓘᑦᓱᓂᓗ.

ᒪᕐᕈᕙᓪᓘᕘᒃ ᐊᔪᐊᕐᓃᒃ, ᐁᑉᐸᖓ ᒪᕐᓂᓕᒃ ᕿᑎᓪᓗᐊᒥᒍᑦ (ᐊᕐᔪᐊᖅ), ᐁᑉᐸᖓᓗ (ᐹᖃᓐᖏᑐᖅ), ᑭᓯᐊᓂ ᑕᒪᒋᒃ ᐋᓐᓂᐊᓯᐅᕐᑕᐅᕙᑦᑐᕕᓃᒃ ᐊᑦᔨᒌᓐᖏᑐᓄᑦ ᒪᕿᖓ ᓄᐃᑎᑕᐅᕙᓪᓕᐊᒐᓱᐊᕐᑎᓗᒍ. ᐊᔪᐊᓕᕆᒍᑕᐅᓂᕐᐸᐅᓲᕕᓂᖅ ᐆᒪᔪᕕᓃᑦ ᒪᒥᖏᑦ. ᒪᒦᑦ ᐸᓂᕐᓯᐊᕆᑦᓱᒋᑦ, ᑭᓪᓚᓛᓕᐅᕐᓱᒋᑦ (ᒪᕿᒥᒃ ᒥᓗᑦᓯᒐᔭᕐᒪᑕ), ᑌᒪ ᖃᐅᓯᓕᒐᓛᐱᑦᑕᐅᓱᑎᒃ ᐊᔪᐊᕐᒨᑕᐅᓂᐊᓕᕐᒪᑕ. ᐅᖃᕐᑕᐅᓯᒪᔪᖅ ᑖᒃᑯᐊ ᒪᒦᑦ ᐃᓅᑉ ᐅᕕᓂᖓᓄᑦ ᓂᐱᓪᓛᕆᓲᒍᒻᒪᑕ »ᓂᐱᖁᑎᑎᑐᑦ ᓯᑯᑦᓴᔭᕐᒧᑦ.» ᐊᕕᓐᙰᑦ ᒪᒥᖏᑦ ᐊᑐᕐᑕᐅᓂᕐᐸᐅᓲᕕᓃᑦ ᐋᕐᖀᒍᓐᓇᓂᕐᐸᐅᓱᑎᓗ. ᐱᐅᓂᕐᐸᐅᒥᔪᖅ ᐊᕕᓐᖓᖅ ᑐᖁᑕᕕᓂᐅᑉᐸᑦ ᐅᐱᕐᖔᒥ, ᒪᒥᖓᑕ ᐃᓗᐊᕆᓂᕐᓴᖓ ᐲᔭᕐᓱᒍ ᑌᒪ ᒪᒥᐅᑉ ᓱᑯᑦᓯᐊᓂᒃ ᐱᐅᒋᓂᕐᐹᒥᓂᒃ ᐊᑐᕐᓂᐊᓕᕋᒥᒃ. ᐃᓚᖏᑦ ᐃᓄᐃᑦ ᐊᑐᕈᒪᓂᕐᓴᐅᓲᕕᓃᑦ ᒪᒥᐅᑉ ᑐᓄᖓᓂᒃ, ᐃᓚᖏᑦ ᓈᖓᓂᒃ, ᐃᓚᖏᓪᓗᑕᐅᖅ ᑕᓕᕐᐱᐊᓂᒃ ᓯᕗᓪᓖᖓᓂᒃ ᑲᓈᖓᓂᒃ. ᒥᑭᔪᕐᓚᐅᑎᓪᓗᒋᑦ ᓇᑲᑎᕐᑕᐅᓲᕕᓃᑦ ᒪᒥᖅ ᐊᑐᕐᓯᒪᓐᖏᑐᖅ ᐊᔪᐊᕐᒨᓱᒍ ᖃᐅᑕᒫᑦ. ᒪᕐᓂᖅ ᐅᕕᓂᐅᑉ ᖄᖓᓅᕐᒪᑦ, ᐊᕕᓐᖓᐅᑉ ᒥᕐᖁᖏᑦ ᓇᑉᐸᓲᑦ. ᐊᕕᓐᖓᖃᓐᖏᑐᐊᕐᒪᑦ, ᐆᒪᔪᒻᒥᔪᐃᑦ ᒪᒥᖏᑦ ᐊᑐᕐᑕᐅᖔᓲᕕᓃᑦ. ᐅᑲᓕᔭᖅ, ᑭᒡᒐᓗᔭᖅ, ᑎᕆᐊᔭᖅ ᑎᕆᒐᓐᓂᐊᔦᓪᓗ ᐊᑐᕐᑕᐅᖔᓲᕕᓃᑦ. ᕿᒻᒥᐊᕋᐅᑉ ᓈᕕᓂᖓ ᓴᓂᕋᖓᓃᑦᑐᓗ ᒪᒥᖅ ᐱᐅᔪᐊᓘᓂᕋᕐᑕᐅᓯᒪᒻᒥᔪᖅ. ᐊᕿᒡᒋᕕᓂᐅᑉ ᑲᓈᖓᑕ ᒪᒥᖓ ᐅᕝᕙᓘᓐᓃᑦ ᑐᑦᑐᕕᓂᐅᑉ ᒪᒥᖓᑕ ᓵᓐᓂᓴᖓ (ᐅᓂᖓᓃᑦᑐᖅ, ᓂᐅᖓᑕ ᐃᓗᕐᓯᖓᓃᑦᑐᓗ) ᐱᐅᔫᓂᕋᕐᑕᐅᒥᔫᒃ.

ᐆᒪᔪᕕᓃᑦ ᒪᒥᖏᑦ ᐊᑐᕐᑕᐅᖏᖔᕐᑎᓗᒋᑦ, ᐊᓯᖏᑦ ᐊᔪᐊᕐᒨᑕᐅᕙᑦᑐᕕᓃᑦ ᒪᕿᖓᓂᒃ .ᒥᓗᑦᓯᓚᖓᑎᓪᓗᒋᑦ». ᒥᖑᐊᕈᑎᒃ ᒪᒣᑦᑐᖁᑎᒥᑦ ᐱᓯᒪᔪᖅ ᐸᓂᐅᑉᐹᓯᒪᔪᒥᓪᓗ ᓇᑦᓯᐅᑉ ᐅᕐᓱᖓᓂᑦ ᐱᓯᒪᔪᖅ ᐃᓛᓐᓂ ᐊᑐᕐᑕᐅᕙᓐᓂᒥᔪᖅ. ᐊᕿᒡᒋᕕᓂᖅ ᐁᐸᔪᖅ (ᓴᕝᕕᖓ), ᑐᒃᑐᕕᓂᖅ ᐃᖃᓗᕕᓂᕐᓘᓃᑦ ᐊᑐᕐᑕᐅᒍᓐᓇᒥᔪᑦ, ᐊᒻᒪᓗ ᑕᒧᐊᓯᒪᔪᖅ ᑐᒃᑐᕕᓂᐅᑉ ᑕᕐᑐᖓᑕ ᑐᓐᓄᖓ. ᑐᒃᑑᑉ ᓄᑭᖏᑦ ᑯᔭᐱᖓᓃᑦᑐᑦ ᐋᕐᖀᓯᐊᕈᓐᓇᑐᒻᒪᕇᑦ, ᑭᓯᐊᓂ ᐋᓐᓂᓇᕐᑐᐃᑦ. ᓇᐹᕐᑐᐃᑦ ᒪᒥᖏᑦᑕ ᐃᓗᕐᓯᖏᑦ ᐅᕝᕙᓘᓐᓃᑦ ᐱᖐᑦ ᒪᒥᖏᑦᑕ ᐃᓗᕐᓯᖏᑦ ᐊᑐᕐᑕᐅᒍᓐᓇᑐᑦ, ᑭᓯᐊᓂ ᐃᓛᓐᓂ ᑎᕐᑎᑎᑕᐅᕐᖄᕆᐊᓕᒃ ᓯᖃᓪᓕᓗᒋᓪᓗ. ᑕᓰᑦ ᐊᖃᔭᖏᑦ ᐱᕐᖃᐱᐊᖏᓪᓘᓃᑦ, ᐊᒻᒪᓗᐊᓪᓛᑦ ᕿᒻᒥᐅᑉ ᐊᓇᖓ ᓂᒥᕐᓯᒪᑦᓱᓂ ᑐᒃᑐᕕᓂᐅᑉ ᒪᒥᖓᓂᒃ ᐊᓐᓄᕌᕕᓂᕐᒥᓗ ᐃᑲᔪᕐᓯᐅᑎᐅᒍᓐᓇᒥᔪᑦ ᐊᔪᐊᒥᒃ. ᐊᔪᐊᑉ ᒪᕿᖓ ᓄᐃᑐᐊᕐᒪᑦ, ᐱᓚᑦᑐᑕᐅᑐᐃᓐᓇᕆᐊᖃᓕᕐᑐᖅ. ᑖᓐᓇᑐᐊᑦᓯᐊᖅ ᑯᐯᒃ ᑕᕐᕋᖓᓂ ᖃᐅᔨᒪᔭᐅᔪᖅ ᐋᕐᖀᒐᓱᐊᕈᑕᐅᒍᓐᓇᓱᓂ ᐱᓚᑦᑐᐃᓂᖃᕐᑎᓗᒍ. ᐱᓚᑦᑐᐃᔩᑦ ᐱᓪᓚᕆᐊᓗᕕᓃᑦ, ᐱᓯᑎᓪᓚᕆᐅᑦᓱᑎᒃ ᐊᓯᒥᑎᑐᑦ ᐃᓄᐃᑦ ᓄᓇᖓᓐᓂ, ᐃᓕᓐᓂᐊᓯᒪᒻᒪᕆᐊᓗᒐᑎᒃ, ᑭᓯᐊᓂ ᐃᓅᓕᕐᑐᕕᓃᑦ ᐃᓕᒃᑰᓚᕆᑦᑐᒥᒃ ᐱᔪᓐᓇᓂᖃᕇᕐᓱᑎᒃ. ᒋᐊᖃᑐᐊᕋᒥᒃ, «ᐊᓂᕐᕋᕆᔭᐅᔪᓄᑦ ᙯᕐᖁᔭᐅᒍᓐᓇᐸᑐᕕᓃᑦ» ᑌᒪ ᑲᒪᒋᔭᐅᓚᖓᔪᖅ «ᑌᒪᓐᖓᓕᒫᖅ ᖃᐅᔨᓴᓲᖅ ᐱᓚᑦᑐᐃᔨ ᐱᓯᑎᐅᒻᒪᖔᑦ, ᑌᑰᓇᑕᒐ ᑐᑭᑖᕋᔭᕐᑐᖅ ᐊᔪᐊᓕᕆᔭᐅᒍᒪᒻᒪᖔᒻᒥᒃ. ᐊᔪᐊᓕᕆᔭᖏᑦ ᐋᓐᓂᑐᐊᕐᒪᑕ ᑌᒪ ᐱᓚᑦᑐᐃᔨ ᐱᓚᑦᑐᐃᔨᑦᓯᐊᒍᓐᖏᓚᖅ. ᐱᓚᑦᑐᐃᔨᑦᓯᐊᖅ ᐱᓚᑦᑐᐃᔨᓪᓚᕆᑐᐃᓐᓇᐅᔮᕈᓐᓇᐳᖅ». ᐱᓚᑦᑐᐃᔨᐅᑉ ᐱᓚᐅᑎᖓ ᐱᓪᓗᑯᒋᐊᖃᕐᐸᓂᕐᒥᔪᖅ ᐃᓕᒃᑰᑐᓪᓚᕆᐅᑦᓱᓂ ᐱᖁᑎᒋᔭᓂᑦ: ᑐᑦᑐᕕᓂᐅᑦᓱᓂ ᓂᐅᖓᑕ ᓴᐅᓂᖓ, ᐃᓪᓕᓇᕐᑐᒪᕆᕕᓂᖅ ᐱᖁᑎᒋᔭᐅᑦᓱᓂ ᐊᑦᑕᕆᐊᐱᑦᓱᒍ ᑲᒪᒋᒋᐊᖃᕐᐸᑐᕕᓂᖅ ᐃᓄᐃᑦ ᓅᓕᑐᐊᕐᒪᑕ. ᓄᕗᖓ ᐊᒥᑦᑐᐊᐱᐅᑦᓱᓂ ᐃᓚᓕᒫᖓ ᓯᓕᓐᓂᓴᐅᑎᓪᓗᒍ ᓴᕕᑦᑕᖓᓂᑦ ᐆᑦᑐᕋᕐᑕᐅᓲᒍᑦᓱᓂᓗ ᐅᑲᓕᔭᕐᓄᑦ. ᐱᓚᐅᑎᒃ ᓄᔭᕐᒥᒃ ᖁᐱᓯᒍᐊᕐᑐᐊᐱᐅᒍᓐᓇᕆᐊᖃᕐᐸᑐᕕᓂᖅ, ᐃᓅᑉ ᐅᕕᓂᖓ ᓯᑎᔪᑲᓪᓚᐅᒪᑦ, ᐊᕐᓱᕉᓯᖓᓗᐊᕋᒥᑐᐊᓐᖑᐊᖅ. ᐊᑐᕐᑕᐅᒋᐊᓚᐅᕋᓂ, ᐱᓚᐅᑎᐅᓚᖓᔪᖅ ᓴᓗᒻᒪᓴᕐᑕᐅᖄᕐᐸᑐᕕᓂᖅ ᐆᑎᕐᑕᐅᓱᓂ ᐃᑯᐊᓚᒧᑦ ᐊᓪᓚᑎᕐᑕᐅᓱᓂᓗ ᐃᕕᒑᓄᑦ ᐊᕿᒡᒋᕕᓂᐅᑉ ᒪᒥᖓᓄᓘᓐᓃᑦ.

ᑌᑦᓱᒪᓂ ᓯᓂᑎᑦᓯᒍᑎᖃᕐᓂᖏᑦᑐᖅ, ᑭᓯᐊᓂ ᐱᓚᑦᑐᑕᐅᓚᖓᔪᖅ ᐃᒥᕐᐸᓂᕐᒥᔪᖅ ᒪᒣᑦᑐᖁᑎᒥᒃ ᓄᓪᓚᖓᓂᕐᓴᐅᒍᒪᒧᑦ ᑲᒪᒋᔭᐅᓕᕈᓂ. ᐱᓚᑦᑐᐃᓚᖓᔪᖅ ᕿᓂᓕᑐᐊᕋᒥ ᓇᐅᒃᑯᑦ ᐱᓚᑦᑐᐃᓂᐊᕐᒪᖔᒻᒥ, ᐊᔪᐊᖅ ᖃᐅᔨᓴᕐᑕᐅᕙᑦᑐᕕᓂᖅ ᐃᒪᑐᐃᓐᓇᒧᑦ, ᐃᒪᖅ ᓴᓗᐊᑦᓴᐅᑎᒋᐊᐱᒐᔭᕐᑐᖅ ᐊᔪᐊᑉ ᓴᓂᐊᓃᓐᓂᓴᐅᑐᐊᕈᓂ, ᐅᕝᕙᓘᓐᓃᑦ ᐱᓚᑦᑐᐃᓚᖓᔫᑉ ᐅᖃᖓᓄᑦ, ᐅᖃᖅ ᐃᑉᐱᒍᓱᒍᓐᓇᒪᑦ ᐋᓐᓂᐊᓕᕆᔭᐅᓚᖓᔫᑉ ᑎᓪᓕᑖᖓᓂᒃ ᐅᕝᕙᓘᓐᓃᑦ ᓂᓪᓕᒪᓂᖓᓂᒃ ᐊᔪᐊᑉ ᕿᑎᓪᓗᐊᖓᓂᒃ. ᐅᕕᓂᒃ ᐱᓚᑦᑕᐅᓕᕐᒪᑦ, ᐱᓪᓚᖅ X-ᖑᕙᓪᓗᓲᕕᓂᖅ ᒪᒥᑲᐱᓐᓂᓴᐅᒐᔭᕐᒪᑦ (ᐅᕕᓂᖓ) ᑌᒪ ᒪᖀᔭᕐᑕᐅᒍᓐᓇᓂᐊᓕᕐᒪᑦ. ᐱᒻᒪᕆᐅᕙᑦᑐᕕᓂᖅ ᒪᕿᓕᒫᑦᓯᐊᖅ ᐊᑕᐅᑦᓯᑯᐊᓗᒃ ᐲᕐᑕᐅᐸᑦ, ᑌᒣᓐᖏᑐᐊᕈᓂ ᐊᔪᐊᖅ .ᓅᑐᐃᓐᓇᕋᔭᕐᑐᖅ ᓇᒧᑐᐃᓐᓇᖅ ᑎᒥᖓᓂ. ᐃᓘᓐᓇᑎᒃ ᐃᓄᐃᑦ ᐱᓚᑦᑐᐃᓂᕐᒦᓚᖓᔪᐃᑦ ᐆᑦᑐᕋᕐᖄᐸᑦᑐᕕᓃᑦ ᓄᔭᕐᒥᓂᒃ ᖃᐅᔨᒐᓱᐊᕐᓱᑎᒃ ᓇᓪᓕᐊ ᓄᔭᒋᔭᖅ ᓲᖑᓂᕐᐸᐅᒪᖔᑦ. ᓄᔭᒃ ᓲᖑᓂᕐᐹᖅ ᕿᓓᒍᑕᐅᕙᑦᑐᕕᓂᖅ ᐊᔪᐊᑉ ᐃᓄᖓᓂᒃ ᑌᒪ ᒪᕿᑎᑦᓯᒍᑕᐅᓂᐊᓕᕋᒥ. ᐱᓚᑦᑐᐃᔨ ᓱᒃᑫᑐᐊᐱᐅᒋᐊᖃᕐᐸᑐᕕᓂᖅ ᐊᑦᑕᕈᓱᒻᒪᕆᓪᓗᓂᓗ. ᐊᔪᐊᓕᕆᓕᑐᐊᕋᒥᒃ .ᐃᒥᕈᑎᑯᑖᕌᐱᐅᔮᕐᑐᒥᒃ» ᐊᒥᑦᑐᑳᒥᒃ ᓱᓪᓗᖃᕐᓱᓂ ᑲᖒᑉ ᐃᓴᕈᕕᓂᖓᓂᒃ ᐅᕝᕙᓘᓐᓃᑦ «ᖀᖏᔭᐅᑏᓐᓂᒃ» ᕿᔪᐃᓐᓇᐅᓱᑎᒃ ᑐᒑᕕᓂᐅᑦᓱᑎᓪᓘᓃᑦ, ᓄᔭᖅ ᐃᓚᒋᔭᐅᑎᓪᓗᒍ, ᐊᑐᕐᐸᑐᕕᓃᑦ. ᓄᔭᖅ ᑭᑦᑐᕋᑲᓪᓚᑐᐊᕐᒪᑦ ᐲᕐᓯᒐᓱᐊᕈᑕᐅᑦᓱᓂ, ᐊᔪᐊᓕᕆᓂᓕᒫᑦᓯᐊᖅ, ᐊᕕᓐᙰᑦ ᐊᓯᓕᒫᖏᓪᓗ, ᐱᒋᐊᑦᓯᐊᑕᐅᒋᐊᖃᕐᐸᑐᕕᓃᑦ. ᒪᕿᓕᒫᖓ ᐲᓐᖏᑐᐊᕐᒪᑦ, ᓂᕐᓕᐅᑉ ᐱᓗᖓ ᐊᑐᕐᑕᐅᕙᑦᑐᕕᓂᖅ ᒪᕿᒥᒃ ᐅᕕᓂᒻᒧᑦ ᐅᑎᕐᑎᓯᒍᑕᐅᑦᓱᓂ ᑲᒪᒋᒋᐊᓪᓚᑕᐅᓚᐅᕋᓂ.

ᒪᖀᔭᕐᑕᐅᒌᑐᐊᕐᒪᑦ, ᐊᔪᐊᑉ ᐃᓄᖓ ᐃᓛᓐᓂ .ᐃᑦᔪᓀᑦᑐᒧᑦ ᐊᓂᑎᑕᐅᕙᑦᑐᕕᓂᖅ» ᐴᕐᑕᐅᓱᓂ ᖃᓪᓗᓈᕐᑕᒧᑦ, ᓯᖃᓪᓕᓱᒍ ᑲᐅᑕᕐᒧᑦ ᐃᑯᐊᓚᒨᕐᓱᒍᓗ, ᐅᕝᕙᓘᓐᓃᑦ ᐊᓂᐅᑦᔨᓱᒍ ᐃᓅᑉ ᕿᒻᒥᐅᓘᓐᓃᑦ ᐊᓇᖓᓅᕐᓱᒍ. ᑌᒣᑕᐅᑐᐊᕐᐸᑦ, ᐊᔪᐊᕐᑐᕕᓂᖅ ᐊᑯᓂᐊᓗᒃ ᐊᔪᐊᓕᒐᔭᓐᖏᑐᖅ.

ᐊᔪᐊᖅ ᒪᖀᔭᕐᓯᒪᓕᕐᑐᖅ ᓴᓗᒻᒪᓴᕐᑕᐅᕙᓪᓗᓲᕕᓂᖅ ᐊᕕᓐᖓᐅᑉ ᒪᒥᖓᓄᑦ ᐅᕝᕙᓘᓐᓃᑦ ᕿᑎᕈᓪᓖᑦ (ᓂᕿᒥᐅᔦᑦ ᓴᓂᖃᐅᑎᒥᐅᓐᖏᑐᖅ) ᐊᔪᐊᕐᒨᑕᐅᕙᑦᑐᕕᓃᑦ .ᓂᕆᓂᐊᕐᒪᑕ» ᒪᕐᓂᓗᑯᕕᓂᕐᒥᒃ. ᑌᒪ ᕿᒻᒥᕕᓂᐅᑉ ᐅᕐᓱᖓ ᒥᖑᐊᕆᕈᑕᐅᓂᐊᓕᕐᒪᑦ ᐊᔪᐊᑉ ᒥᑦᓯᓕᒫᖓᓂᒃ ᐅᕕᓂᒃ ᒪᒥᓯᖏᓐᓇᕋᔭᓐᖏᒪᑦ ᓂᕿᒃ ᐅᕕᓂᐅᑉ ᐃᑭᐊᖓᓃᑦᑐᖅ ᒪᒥᓚᐅᕐᖄᑎᓐᓇᒍ.

ᑭᓪᓖᑦ

ᓯᕗᓪᓕᐹᖅ ᐊᑑᑎᔭᐅᒋᐊᓕᒃ ᑭᓕᕐᑐᖃᕐᐸᑦ ᑭᓪᓕᖅ ᐊᐅᓈᕈᓐᓀᑎᓪᓗᒍ. ᑌᒣᓐᓂᐊᕈᓂ ᓂᒥᕈᑎᒃ ᕿᓚᑦᑕᐅᒋᐊᓕᒃ ᑭᓪᓕᐅᑉ ᑭᓕᕐᑑᓗ ᐆᒻᒪᑎᖓᑕ ᐊᑯᓐᓂᖓᓂ (ᐱᕕᖃᕈᓂ), ᐅᕝᕙᓘᓐᓃᑦ ᑭᓪᓕᖅ ᐃᓅᑉ ᐃᑎᕈᖓᓅᕐᓗᒍ ᐅᕝᕙᓘᓐᓃᑦ ᐅᕝᕙᓗᒍ ᐃᓅᑉ ᐃᑎᕈᖓᓄᑦ. ᐃᓅᑉ ᐃᑎᕈᖓ ᑭᓪᓕᒥᒃ ᓴᓗᒻᒣᓯᐊᓲᒍᒻᒥᔪᖅ: .ᑭᓪᓖᑦ ᐃᒫᓅᑐᐊᕈᕕᐅᒃ ᓱᓇᒥᓪᓘᓃᑦ ᐃᑉᐱᒍᓱᒐᔭᓐᖏᑐᑎᑦ. ᑭᓪᓕᖅ ᐃᑎᕈᕐᒨᕈᕕᐅᒃ ᐃᑉᐱᒍᓱᒐᔭᕐᑐᑎᑦ ᐃᑎᕉᑉ ᐱᓇᓱᐊᕐᐸᓓᓕᕐᓂᖓᓂᒃ.» ᑭᓇᑐᐃᓐᓇᖅ ᐃᑉᐱᒍᓱᑦᓯᐊᕆᐊᓕᒃ, ᑭᓪᓕᖓ ᓇᓂᑐᐃᓐᓈᕋᓗᐊᕐᐸᑦ, ᐃᒪᕐᒧᑦ ᑕᕆᐅᕐᒨᑎᑦᑌᓕᓗᒍ, ᑌᒣᑐᐊᕈᓂ ᐃᒻᒪᑐᐃᓐᓇᕋᔭᕐᒪᑦ.

ᐊᓪᓗᕆᐊᕐᓂᐅᓕᕋᔭᕐᒥᔪᖅ ᐅᕕᓂᐅᑉ ᐃᑭᐊᖓᓂᒃ ᐅᕕᓂᒻᒥᓗ ᒪᒥᑎᑦᓯᒐᓱᐊᕐᓂᖅ. ᐆᒪᔪᕕᓂᐅᑉ ᐅᕐᓱᖓ ᒪᒥᑎᑦᓯᒐᓱᐊᕈᑕᐅᕙᓪᓗᓲᕕᓂᖅ, ᓇᑦᓯᐅᑉ ᐅᕐᓱᖓ (ᐅᕐᓱᑐᐃᓐᓇᖅ ᐅᕝᕙᓘᓐᓃᑦ ᐃᒍᓇᖅ ᐅᐊᕈᑎᖃᕐᓗᓂ ᐊᕿᒡᒋᐅᑉ ᖁᓂᕈᖏᓐᓂᒃ), ᑐᒃᑑᑉ ᑐᓐᓄᖓ (ᑐᓐᓄᓯᐊᒍᓂᕐᐹᖅ ᑕᕐᑐᖏᓐᓃᑐᖅ), ᐸᒥᐅᕐᑑᑉ ᐅᕐᓱᖓ ᐅᕝᕙᓘᓐᓃᑦ ᑎᒻᒥᐊᑉ ᐅᕐᓱᖓ (ᐅᑉᐱᐊᓘᑉ, ᓂᕐᓕᐅᑉ ᐊᕿᒡᒋᐅᓘᓐᓃᑦ). ᓇᐹᕐᑑᑉ ᑯᑦᓱᖓ ᑕᒧᐊᔭᐅᓗᓂ ᓵᑦᑐᔮᓐᖑᓗᒍ ᑭᓪᓕᒨᕐᓗᒍᓗ, ᐊᒻᒪᓗ ᓇᐹᕐᑑᑉ ᒪᒥᖓᑕ ᐃᓗᕐᓯᖓ (ᑎᕐᑎᓯᒪᓗᓂ). ᐸᓂᕐᓯᒪᔪᑦ ᒪᓃᑦ ᐅᕝᕙᓘᓐᓃᑦ ᐳᐲᑦ ᖁᓛᖏᑦ ᓯᖃᓪᓕᑕᐅᑦᓱᑎᒃ ᓴᓗᐊᕆᓲᑦ ᑭᓪᓕᒥᒃ. ᐃᒪᑦᓯᐊᒥᐅᑌᑦ ᐊᖃᔦᑦ ᐱᕐᖃᐱᐊᓪᓗ ᓴᓗᒻᒪᓭᒍᑕᐅᓲᒍᒻᒥᔪᑦ ᑭᓪᓕᓂᒃ ᐁᔪᖓᑎᑦᓰᓇᕐᓱᑎᓗ ᐁᔪᙰᓐᓇᕆᐊᖃᑐᐊᕐᐸᑦ ᑭᓪᓕᖅ. ᐃᖃᓗᑉᐱᐅᑉ ᓈᖓᑕ ᐊᒥᕋᖓ ᐋᕐᖀᒍᓐᓇᑐᖅ, ᐊᒻᒪᓗ ᑯᑦᓲᔮᕐᓱᑎᒃ ᐃᓇᓗᐊᖏᓐᓃᑐᑦ ᐆᒐᐅᑉ ᑯᒪᖏᑦ. ᑖᒃᑯᐊ ᒪᕐᐸᑎᕐᑕᐅᓱᑎᒃ ᑭᓪᓕᒨᕐᑕᐅᓲᑦ.

ᐅᑯᐊ ᒪᕐᕉᒃ ᐆᑦᑑᑏᒃ ᑭᓪᓕᓕᕆᒍᓯᐅᕙᑦᑐᕕᓃᒃ: ᓯᕗᓪᓕᖅ, ᑕᒧᐊᓯᒪᔪᖅ ᐅᕐᓱᖅ ᑐᓐᓄᓘᓐᓃᑦ (ᓇᑦᓯᐅᑉ ᐅᕐᓱᖓ ᑐᒃᑑᓘᓐᓃᑦ ᑐᓐᓄᖓ) ᑭᓪᓕᒨᕐᑕᐅᓗᓂ ᐊᐅᓈᕈᓐᓀᑎᑦᓯᓂᐊᕐᒪᑦ. ᑌᒪ ᓵᑦᑐᐊᐱᒃ ᓂᕿᑐᐃᓐᓇᖅ (ᑖᑦᓱᒥᖓᑦᓭᓇᖅ ᐆᒪᔪᒥᑦ ᐅᕐᓱᑖᕐᕕᒋᑫᓐᓇᑕᕐᓂᑦ ᑐᓐᓄᑖᕐᕕᒋᑫᓐᓇᑕᕐᓂᓘᓐᓃᑦ) ᑭᓪᓕᒦᑎᑕᐅᓂᐊᓕᕐᒪᑦ ᐅᓪᓗᓂ ᐊᒥᓲᓐᖏᑐᓂ ᑭᓪᓕᖅ ᐁᔪᙰᓐᓇᑎᒐᓱᐊᒧᑦ ᒪᒥᑎᒐᓱᐊᒧᓪᓗ. ᐁᑉᐹ ᑭᓪᓕᓕᕆᒍᓯᒃ ᐊᖃᔭᕐᓂᒃ ᐱᒋᐊᕐᕕᓕᐅᑎᖃᕐᓗᓂ, ᐊᖃᔭᖅ ᓴᓗᒻᒪᓭᒍᑎᒋᓗᒍ ᖃᐅᓯᓕᕐᑎᕆᐅᑎᒋᓗᒍᓗ ᑭᓪᓕᒥᒃ, ᑌᒪ ᓯᖃᓪᓕᓯᒪᔪᖅ ᒪᓂᖅ ᑭᓪᓕᒨᕐᑕᐅᓂᐊᓕᕐᒥᒪᑦ ᓴᓗᐊᕆᓂᐊᕐᒪᑦ ᒪᒥᑦᓯᓂᐊᕐᒪᓗ. ᑭᓪᓕᒪᕆᐊᓘᑐᐊᕐᐸᑦ ᒥᕐᓱᑕᐅᒍᓐᓇᒥᔪᖅ. ᒥᕐᖁᑎᖃᕈᓐᓇᑐᑦ ᑐᒃᑑᑉ ᓴᐅᓂᖓᓂᒃ ᓇᕐᔪᕕᓂᖓᓂᓘᓐᓃᑦ ᐃᕙᓗᑦᓴᔭᖃᕐᓗᑎᓗ ᐆᒪᔪᕕᓂᐅᑉ ᓄᑭᖏᓐᓂᒃ (ᑐᒃᑐᕕᓂᐅᑉ ᕿᓚᓗᒐᕕᓂᐅᓪᓘᓃᑦ). ᓯᐊᕈᒋᐊᖑᓕᕐᒪᑦ ᑭᓗᐃᑦ ᐃᒻᒥᓂᒃ ᐲᔭᓯᓲᑦ. ᑌᒪ ᑭᓪᓕᖅ ᓴᓗᒻᒪᓴᕐᑕᐅᒌᑐᐊᕐᒪᑦ, ᒪᑦᑐᑎᕐᑕᐅᓲᖅ ᐃᓄᐃᑦ .ᑭᓪᓖᓕᑕᑦᓴᔭᖓᓄᑦ» ᑐᒃᑐᕕᓂᐅᑉ ᐊᕿᒡᒋᕕᓂᐅᓪᓘᓃᑦ ᒪᒥᖓᓄᑦ ᓱᒃᑯᓂᐊᓐᖏᒪᑦ.

ᖁᐊᕐᓂᑖᕐᓃᑦ

ᖁᐊᕐᓂᑖᕙᓪᓗᓲᒍᕗᑦ ᑎᒥᒥᑕ ᐃᓓᓐᓇᖓᒍᑦ (ᐃᑎᒐᒃᑯᑦ, ᐊᒡᒐᑯᑦ, ᓂᐊᖁᒃᑯᑦ) ᐊᓐᓄᕌᕐᓯᒪᑐᐊᕋᒥᒃ ᐁᔪᖓᓗᐊᕐᑐᓂᒃ ᑕᑦᑐᓗᐊᕐᑐᓂᓘᓐᓃᑦ. ᖁᐊᕐᑐᓂᒃ ᐊᒡᒐᓂᒃ ᐅᕝᕙᓂᖅ ᐊᐳᑎᒧᑦ ᖁᐊᕐᓂᑖᕐᑎᓯᓐᖏᑑᒍᓐᓇᑐᖅ, ᑭᓯᐊᓂ ᐅᐸᓗᓗᐊᑐᐊᕐᐸᑦ, ᖁᐊᕐᓂᖏᑦ ᐊᑦᑕᕆᐊᐱᓪᓗᒋᑦ ᑲᒪᒋᔭᐅᒋᐊᓖᑦ: ᑭᓇᓘᓐᓃᑦ ᐅᓗᐊᒥᓂᒃ ᖁᐊᕐᓂᑖᕐᑑᓂᒃ ᐊᒡᒐᒥᓄᑦ ᐊᑦᑐᐃᒋᐊᖃᓐᖏᑐᖅ. ᖁᐊᕐᓂᑖᕐᓃᑦ ᑲᒪᒋᔭᐅᑦᓯᐊᓂᓐᖏᑐᐊᕈᑎᒃ ᐱᔭᕆᐊᑦᑐᒍᓐᓇᑐᑦ, ᐆᑦᑑᑎᒋᓗᒍ ᐃᒻᒪᓗᑎᒃ.

ᖁᐊᕐᓂᑖᕐᓃᑦ ᐊᐅᓴᕐᑕᐅᒋᐊᓖᑦ ᐃᒫᓅᕐᓗᒋᑦ (ᐱᕕᖃᕐᐸᑦ) ᓂᓚᓕᒻᒧᑦ (ᑕᕆᐅᖅ ᐃᒪᖅ ᐱᐅᓂᕐᐹᖅ), ᐅᕝᕙᓘᓐᓃᑦ ᐃᑎᕈᕐᒧᑦ (ᓂᓪᓕᒪᓗᐊᕈᓐᓀᓗᓂ ᐃᒻᒪᑎᑦᓯᑌᓕᒍᑎᐅᒍᓐᓇᒥᔪᖅ). ᐅᕕᓂᒃ ᓂᓚᑦᑖᕙᓪᓕᐊᓯᑉᐸᑦ, ᑐᑭᖃᕐᑐᕕᓂᖅ ᐊᒡᒐᖅ ᐃᑎᒐᓪᓘᓃᑦ ᐊᐅᑉᐸᓕᐊᓕᕐᑐᖅ ᐃᓗᒃᑯᑦ, ᑕᒪᓐᓇ ᐱᐅᔪᖅ. ᖁᐊᕐᓃᑦ ᐃᒫᓅᕐᑕᐅᑐᐊᕈᑎᒃ ᓂᕈᒥᑦᑐᒧᑦ ᐊᐅᒐᔭᕐᑐᑦ ᓯᓚᑏᓐᓇᒥᒍᑦ, ᑌᒣᑐᐊᕐᐸᑦ ᐅᕕᓂᖅ ᑐᖁᒐᔭᕐᑐᖅ ᑕᒪᓐᓇᓗ ᐊᑦᑕᓇᕐᑑᓱᓂ. ᐊᒡᒐᖅ ᐃᑎᒐᓪᓘᓃᑦ ᖁᐊᕐᓂᑖᕐᑐᕕᓂᐅᓗᓂ ᐃᒻᒥᓃᓇᖅ ᐊᐅᑐᐊᕈᓂ ᐃᒻᒪᓚᕿᓗᓂᓗ, ᒪᕿᖓ ᑲᒪᒋᔭᐅᓲᒍᓐᖏᑐᖅ ᐃᒻᒥᓃᓐᓇᖅ ᒪᕿᐊᓗᓚᖓᒻᒪᑦ. ᓂᕈᒥᑦᑐᖅ ᕿᒻᒥᐅᑉ ᐊᓇᖓ, ᒥᖑᐊᕈᑎᒋᓗᒍ ᖁᐊᕐᓂᑖᕐᓯᒪᔪᒧᑦ ᐊᐅᑦᓰᒍᑕᐅᒍᓐᓇᒥᔪᖅ ᐃᒻᒪᕇᒃᑯᑕᐅᓗᓂᓗ. ᖁᐊᕐᓂᖅ ᐊᐅᒌᕐᓯᒪᓕᕐᐸᑦ, ᐁᐸᔪᖅ ᐆᒪᔪᕕᓂᐅᑉ ᐅᕐᓱᖓ (ᓇᑦᓯᕕᓂᐅᑉ ᐅᕐᓱᖓ ᐱᐅᒋᔭᐅᓂᕐᐹᖅ) ᓯᖃᓪᓕᓯᒪᔪᕐᓘᓃᑦ ᒪᓂᖅ ᐳᐱᐅᓪᓘᓃᑦ ᖄᖏᑦ ᒥᖑᐊᕈᑕᐅᓲᑦ ᖁᐊᕐᓂᒥᒃ ᒪᒥᑦᑎᓯᒍᑕᐅᑦᓱᑎᒃ.

ᐆᓐᓃᑦ (ᐆᑦᑐᕕᓃᑦ)

ᐱᐅᓂᕐᐹᖅ ᐆᓐᓂᒨᕐᑕᐅᒋᐊᓕᒃ ᐁᐸᔪᖅ ᐆᒪᔪᕕᓂᐅᑉ ᐅᕐᓱᖓ, ᓇᑦᓯᕕᓂᕐᒥᕙᓪᓗᒃ, ᑐᒃᑑᑉ ᑐᓐᓄᖓ ᑎᒻᒥᐊᓘᓐᓃᑦ ᐅᕐᓱᖓ ᐊᑐᕐᑕᐅᒍᓐᓇᕋᓗᐊᕐᒥᔫᒃ. ᐊᓯᖏᑦ ᐆᓐᓂᓕᕆᒍᓯᐅᒻᒥᔪᑦ ᓵᑦᑐᐊᐲᑦ ᐁᐸᔫᑦᓱᑎᒃ ᑐᒃᑐᕕᓂᐅᑉ ᐊᕿᒡᒋᕕᓂᐅᓪᓘᓃᑦ ᓂᕿᖏᑦ, ᐊᖃᔦᑦ, ᑕᒧᐊᓯᒪᔪᑦ ᓇᐹᕐᑑᑉ ᑯᑦᓱᖏᑦ ᒥᖑᐊᕈᑕᐅᓗᑎᒃ ᐆᑦᑐᕕᓂᓪᓗᑐᕐᒧᑦ ᐅᕕᓂᒻᒧᑦ. ᐸᓂᕐᑐᖅ ᐊᕿᒡᒋᕕᓂᐅᑉ ᖁᖏᓯᖓᑕ ᒪᒥᖓ ᒪᑦᑐᑎᒋᔭᐅᒍᓐᓇᑐᖅ ᐆᓐᓂᒧᑦ.

ᐅᕕᓂᕐᓗᓃᑦ

ᐁᐸᔪᖅ ᐆᒪᔪᕕᓂᐅᑉ ᐅᕐᓱᖓ ᐱᐅᔫᒻᒥᔪᖅ ᐅᕕᓂᕐᓗᓂᕐᓄᑦ, ᐅᕕᓂᕐᓘᓂᕐᐹᖅ ᐸᕐᑎᓂᖅ/ᑲᓚᓐᓂᖅ. ᓇᑦᓯᕕᓂᐅᑉ, ᓇᓄᕕᓂᐅᑉ, ᑎᕆᒐᓐᓂᐊᕕᓂᐅᑉ ᐅᑉᐱᐊᓗᕕᓂᐅᓪᓘᓃᑦ ᐅᕐᓱᖓ ᐊᑐᕐᑕᐅᒍᓐᓇᑐᖅ; ᓂᕈᒥᑦᑐᖅ ᕿᒻᒥᐅᑉ ᐊᓇᒐᓚᖓ ᐊᑐᕐᑕᐅᒍᓐᓇᒥᔪᖅ. ᐅᖃᕐᓯᒪᔪᖃᕐᑐᖅ ᐸᕐᑏᑦ/ᑲᓓᑦ ᐋᕐᕿᑕᐅᑦᓴᐅᑎᒋᐊᐱᒍᓐᓇᒪᑕ ᐅᑦᔪᕕᓂᐅᑉ ᐅᕐᓱᖓᓄᑦ ᒥᖑᐊᕐᑕᐅᖃᑦᑕᑐᐊᕈᑎᒃ ᓯᓚᒥ ᓯᕿᓐᓂᑐᒥ. ᐊᓯᖏᓐᓄᑦ ᐅᕕᓂᕐᓗᓂᕐᓄᑦ, ᐃᒪᑦᓯᐊᒦᑦᑐᕕᓃᑦ ᐊᖃᔦᑦ, ᑏᓕᐊᕕᓂᖅ ᓇᐹᕐᑑᑉ ᕿᒻᒥᖑᐊᖏᓐᓂᑦ, ᐅᕝᕙᓘᓐᓃᑦ ᒪᒣᑦᑑᓱᓂ ᓄᓇᐅᔭᐅᑦᓱᓂ ᐆᒪᔪᕕᓂᐅᑉ ᓱᖓᖃᐅᑎᕕᓂᖓ (ᓇᑦᓯᕕᓂᐅᑉ ᓱᖓᖃᐅᑎᖓ ᐱᐅᒋᔭᐅᓂᕐᐹᖅ) ᐊᑐᕐᑕᐅᓲᒍᒻᒥᔪᑦ. ᓇᓄᕕᓂᐅᑉ ᐅᕐᓱᖓ ᖃᐅᔨᒪᔭᐅᒻᒥᔪᖅ ᓄᔭᓐᓂᐊᕈᑎᒋᔭᐅᒍᓐᓇᕆᐊᖓ, ᐊᑐᕐᑕᐅᓲᕕᓂᖅ ᑭᐊᓕᕐᑐᓄᑦ.

ᐅᓐᖑᐃᑦ

ᓱᐳᑎᐅᑉ/ᓱᐳᑕᐅᔭᐅᑉ ᐅᕐᓱᖓ, ᓄᐊᑕᕕᓂᐅᑦᓱᓂ ᐅᐱᕐᖓᓴᒥ, ᐅᓐᖑᐃᔦᒍᑎᐅᒍᓐᓇᒥᔪᖅ. ᕿᒻᒥᕕᓂᐅᑉ ᐅᕐᓱᖓ ᐊᑐᕐᑕᐅᒍᓐᓇᒥᔪᖅ. ᐊᖏᔪᐊᓘᑐᐊᕐᒪᑕ ᐅᓐᖑᐃᑦ, ᓇᑲᑕᐅᒍᓐᓇᑐᑦ ᓄᔭᕐᒧᑦ, ᐊᒥᓱᕕᓚᐅᕐᓗᓂ ᐆᒋᐊᕐᓗᓂ ᑭᓯᐊᓂ ᓇᑲᑕᐅᒍᓐᓇᑑᒐᓗᐊᑦ.