ᐃᓄᐃᑦ ᐅᖃᐅᓯᖓ

ᓄᓇᕕᒻᒥᐅᑦ ᐅᕕᒐᕐᑐᐃᑦ/ᐃᓅᓱᑦᑐᐃᑦ ᖑᐊᑦᓴᑎᓪᓗᒋᑦ ᑕᑯᓐᓇᐅᔮᕐᑕᐅᓂᖏᑦ

ᐃᓚᒋᔭᐅᑦᓱᓂ ᐃᓄᒃᑎᑑᕐᓂᐅᑉ ᓴᑐᕐᑕᐅᒐᓱᐊᕐᓂᖓᑕ ᐱᓇᓱᐊᕐᑕᐅᓂᖓᓄᑦ, ᐅᕕᒐᕐᑐᓅᓕᖓᔪᖅ/ᐃᓅᓱᑦᑐᓅᓕᖓᔪᖅ ᖑᐊᑦᓴᑐᓂᒃ ᑕᑯᓐᓇᐅᔮᕋᑦᓴᓕᐅᕐᓂᒧᑦ ᐱᓇᓱᐊᕐᓂᖅ ᐱᒋᐊᕐᑎᑕᐅᓚᐅᔪᕗᖅ ᖁᕝᕙᑎᑦᓯᒋᐊᕈᑕᐅᒐᓱᐊᕐᓱᓂ ᑐᓴᐅᒪᖃᑎᒌᓐᓂᐅᓲᒥᒃ ᐃᓄᐃᑦ ᐅᕕᒐᕐᑐᐃᑦ/ᐃᓅᓱᑦᑐᐃᑦ ᐱᐅᒋᒐᔭᓐᖑᐊᑕᖓᑎᒍᑦ.

Onira Lussier (ᐅᓃᕋ ᓘᓯᔦ) ᐊᒻᒪᓗ Marie Deaudelin (ᒪᕇ ᑑᑦᓖᓐ) ᐱᓯᒪᔫᒃ Les Vidanges en cavale ᑕᑯᓐᓇᐅᔮᕐᑕᐅᔪᑦᓴᓕᕆᔨᒃᑯᖏᓐᓂᑦ ᐱᓇᓱᑦᑎᑖᕆᔭᐅᓚᐅᔪᕘᒃ ᐋᔩᖃᑎᒌᑦᑎᓯᖃᑦᑕᓂᐊᕐᑎᓗᒋᒃ ᑕᑯᓐᓇᐅᔮᕐᑕᐅᔪᑦᓴᓕᐅᕐᑐᐃᑦ ᑲᑎᒪᓂᐊᕈᓯᖏᓐᓂᒃ.

ᐱᕕᖃᕐᑎᓯᒐᓱᐊᒧᑦ ᐃᓚᐅᒍᒪᔪᓂᒃ ᑕᒪᖏᓐᓂ ᑕᓯᐅᔭᕐᔪᐊᒥᑦ ᐅᖓᕙᒻᒥᓗ, ᖑᐊᑦᓴᑎᑦᓯᓂᕐᒧᑦ ᑲᑎᒪᓂᐊᕈᓯᖃᕐᑎᓯᓂᖃᓚᐅᔪᕗᖅ ᐅᒃᑑᐱᕆᐅᓚᐅᔪᔪᒥ ᒪᕐᕉᓂ ᓄᓇᓖᓐᓂ. ᑕᓯᐅᔭᕐᔪᐊᒥᐅᑦ ᑲᑎᓚᐅᔪᔪᑦ ᐳᕕᕐᓂᑐᒥ ᐅᖓᕙᒻᒥᐅᑕᐅᖅ ᑲᑎᑎᓪᓗᒋᑦ ᑰᑦᔪᐊᒥ.

ᑕᓪᓕᒪᓂ ᐅᓪᓗᑐᕐᑐᒥ ᑲᑎᒪᓂᐊᕈᓯᐅᓚᐅᔪᔪᒥ, ᐅᕕᒐᕐᑐᐃᑦ/ᐃᓅᓱᑦᑐᐃᑦ ᐃᓚᐅᔪᑦ ᕿᒥᕐᕈᓂᖃᓚᐅᔪᔪᑦ ᐊᑦᔨᒌᓐᖏᑐᓂᒃ ᖑᐊᑦᓴᓂᖃᕐᑎᓗᒍ ᑕᑯᓐᓇᐅᔮᕐᑕᐅᒍᓯᐅᒋᐊᓕᓐᓂᒃ, ᑐᓴᐅᒪᖃᑎᒌᒍᓯᐅᒋᐊᓕᓐᓂᒃ ᓴᓇᑐᔫᖑᒍᓯᐅᒋᐊᓕᓐᓂᓗ. ᑖᒃᑯᓂᖓ ᐱᓇᓲᑎᐅᒍᓐᓇᑐᓂᒃ ᐃᓕᓐᓂᐊᓂᖃᓚᐅᔪᔪᑦ ᖑᐊᓴᓂᑎᒍᑦ ᐱᒋᐅᕐᓴᖃᑦᑕᓱᑎᒃ ᐊᑕᐅᓯᓐᖑᑎᑦᓯᓱᑎᒃ ᐱᐅᓯᑐᖃᕐᒥᒃ ᐅᖃᐅᓯᕐᒥᓗ ᑐᓐᖓᕕᓕᒻᒥᒃ ᐃᓄᐃᑦ ᐅᓂᒃᑳᑐᐊᖏᓐᓂᒃ ᐅᓂᒃᑲᐅᓯᖏᓐᓂᓗ, ᐊᒻᒪᓗ ᖃᐅᔨᒋᐅᕐᓱᑎᒃ ᖑᐊᑦᓴᑕᐅᓂᖓᓂᒃ ᐃᓕᐊᕐᔫᑉ ᐱᕙᓪᓕᐊᔭᕕᓂᐅᑦᓱᓂ Brazil-ᒥᐅᔭᐅᑦᓱᓂ ᑕᑯᓐᓇᐅᔮᕐᑕᐅᔪᓂᒃ ᑐᑭᒧᐊᕐᑎᓯᔨᒧᑦ Augusto Boal-ᒧᑦ (ᐊᑲᔅᑐ ᐴᓪ). ᑭᖑᓪᓕᐹᖅ ᑲᑎᒪᓂᐊᕈᓯᖅ ᐋᕐᕿᓱᕐᑕᐅᒪᓚᐅᔪᔪᖅ ᐊᑐᐃᓐᓇᕈᕐᑎᕆᑎᓪᓗᒋᑦ ᑕᑯᓐᓇᐅᔮᕐᑕᐅᓂᐊᕐᓂᒥᓂᒃ ᓄᓇᓕᒻᒥᐅᓄᑦ. ᐳᕕᕐᓂᑐᒥ ᑕᑯᓐᓇᐅᔮᕐᑕᐅᓂᖅ ᑲᔪᓯᒍᓐᓇᓚᐅᔪᓐᖏᒪᑦ ᐅᒃᑑᐱᕆᒥ, Léa Hiram (ᓕᐊ ᖀᕋᒻ) ᐊᕙᑕᕐᒥ ᐱᓇᓱᑦᑎ, ᐱᓇᓱᐊᕐᓯᒪᑦᓱᓂ ᖑᐊᑦᓴᓂᖃᕐᑎᓗᒍ ᑕᑯᓐᓇᐅᔮᕐᑕᐅᓂᕐᒥᒃ, ᑎᓯᒻᐱᕆᒥ ᐳᕕᕐᓂᑐᒧᑦ ᐅᑎᓚᐅᔪᔪᖅ ᐃᓚᖃᕐᓱᓂ ᖑᐊᑦᓴᑎᓂᒃ. ᑌᑲᓂ ᐱᒋᐅᕐᓴᑐᕕᓂᐅᓕᕐᓱᑎᒃ ᐳᕕᕐᓂᑐᕐᒥᐅᓄᑦ ᑕᑯᓐᓇᐅᔮᕐᑕᐅᓂᖓ ᐱᑦᓯᐊᑐᒻᒪᕆᐅᓚᐅᔪᔪᖅ.

ᓄᓇᕕᒻᒥᐅᑦ ᐅᕕᒐᕐᑐᐃᑦ/ᐃᓅᓱᑦᑐᐃᑦ ᑲᑎᒪᓂᐊᕈᓯᕐᓂᒃ ᐱᒐᓱᐊᒻᒪᕆᓐᓇᑑᓂᕃᓚᐅᔪᔪᑦ. ᑭᓯᐊᓂ ᖃᐅᔨᒍᒪᓂᕐᒥᓄᑦ, ᓴᓇᑐᔫᓂᕐᒥᓄᑦ ᐊᔪᐃᓐᓇᕆᐊᓪᓛᓂᕐᒥᓄᓪᓗ, ᐃᓕᑦᓯᒍᓐᓇᓯᓚᐅᔪᔪᑦ ᐱᒋᐅᕐᓴᒍᓐᓇᓯᑦᓱᑎᓪᓗ ᐱᒋᐅᕋᑖᕐᒥᓂᒃ. ᐊᒻᒪᓗᒋᐊᓪᓚᒃ, ᑕᒪᒋᒃ ᑕᑯᓐᓇᐅᔮᕐᑕᐅᓃᒃ ᐱᑦᓯᐊᑐᒻᒪᕆᐅᓚᐅᔪᔫᒃ, ᑕᑯᑎᑦᓯᓱᑎᓪᓗ ᐃᓄᓐᓂᒃ ᓱᕐᖁᐃᑐᒥᒃ ᐃᓱᒪᑕᖃᕐᒪᑦ ᖑᐊᑦᓴᓂᖅ ᐊᑐᐃᓐᓇᕈᕐᑎᓯᒪᒐᓛᒍᓐᓀᓗᓂ ᐱᓪᓗᒍ.

ᐅᓇ ᓃᓂᕐᓗᒍ ᑕᑯᒋᐊᕈᒪᒍᕕᑦ ᑲᑎᒪᓂᐊᕈᓯᖃᕐᑎᑕᐅᔪᑦ ᐊᑦᔨᖑᐊᖏᓐᓂᒃ

ᐱᓇᓱᐊᕐᓂᐅᓛᓕᕐᒥᔪᖅ ᑖᑦᓱᒥᖓ ᕿᑦᑌᖓᓇᕐᑑᓱᓂ ᐱᓇᓱᐊᕋᑦᓴᒥ ᐃᑉᐱᒌᓐᓇᓗᒍ ᐆᒪᑎᑦᓯᐊᖏᓐᓇᓗᒍᓗ ᑲᔪᓯᒍᓐᓇᓂᐊᕐᒪᑕ ᐅᓃᕋ ᓘᓯᔦ, ᒪᕇ ᑑᑦᓖᓐ ᐊᒻᒪᓗ ᓕᐊ ᐄᕋᒻ ᑕᒐᑕᒐᒥᑦ/ᒫᓐᓇᒥᑦ ᐅᐱᕐ¯ᒍᓛᕐᑐᖅ/ᐊᐅᔭᐅᓛᕐᑐᖅ ᑎᑭᕋᑕᕐᓗᒍ. ᓂᕆᐅᓐᓂᖃᕐᑐᒍᑦ ᑖᒃᑯᐊ ᐱᖓᓱᑦ ᓄᓇᕕᒻᒨᒋᐊᓪᓚᓛᕐᓂᖏᓐᓂᒃ ᐱᓇᓱᐊᕈᓰᓐᓂ ᒪᕐᕈᑐᕆᐊᕐᑐᓗᑎᒃ ᔪᓓ-ᒥ, ᐊᐅᔭᕐᓯᐅᑎᒥᒃ ᐱᓇᓱᐊᕐᓗᑎᒃ, ᑌᑰᓇ “ᐃᓕᓐᓂᐊᕇᕈᑎᑖᕐᑐᕕᓂᕐᓂᒃ” ᐃᓕᓐᓂᐊᑎᑦᓯᓂᖃᓗᐊᓐᖑᐊᓛᕐᑐᑦ ᓇᓗᓇᕐᓂᓴᕐᓂᒃ ᐱᓪᓗᑯᒋᐊᓕᑎᒍᑦ ᑕᑯᓐᓇᐅᔮᕐᑕᐅᓂᕐᓂ. ᑐᕌᕐᓂᕆᒐᓱᐊᕐᒥᔭᕗᑦ ᑖᑦᓱᒥᖓ ᐃᓕᓐᓂᐊᑎᑦᓯᓂᑦᑎᓄᑦ ᐃᑲᔪᕐᓯᒍᒪᒐᑦᑕ ᐃᓚᐅᔪᓂᒃ ᐃᓚᐅᓕᐅᒥᖁᓪᓗᒋᑦ ᐊᑐᐃᓐᓇᕈᕐᑎᕆᓂᕐᓄᑦ ᑕᑯᓐᓇᐅᔮᕐᑕᐅᓂᑦᓴᓂᒃ ᐃᓄᒃᑎᑐᑦ ᓄᓇᓕᓪᓗᑐᕐᒥᓃᓪᓗᑎᒃ.

ᑖᓐᓇ ᓯᕗᓪᓕᐅᓱᓂ ᐱᓇᓱᐊᕐᑕᐅᓚᐅᔪᔪᖅ ᓴᓇᑐᔪᕐᓂᒃ ᑕᑯᓐᓇᐅᔮᕐᑕᐅᔪᑦᓴᓕᐅᕐᓂᖅ ᐱᐅᔪᒻᒪᕆᐅᓚᐅᔪᔪᖅ, ᐃᓱᒪᒋᔭᖃᕐᓱᑕᓗ ᑲᔪᓯᑎᑕᐅᓂᖓ ᐃᑉᐱᒌᓐᓇᑕᐅᓂᖓᓗ ᐱᒻᒪᕆᐅᒻᒪᑦ ᖑᐊᑦᓴᑐᑦ ᑕᑯᓐᓇᐅᔮᕐᑕᐅᓂᖓ ᑲᔪᓯᓗᓂ ᓱᓪᓕᑕᐅᓯᒪᓂᐊᕐᒪᑦ ᑭᓇᓕᒫᓄᑦ ᓄᓇᕕᒻᒥᐅᓄᑦ ᐁᕕᐅᒍᓐᓇᓗᓂ. ᐃᒣᖁᔨᒐᔭᓐᖑᐊᕋᓗᐊᕐᑐᒍᑦ, ᖑᐊᑦᓴᑐᑦ ᑕᑯᓐᓇᐅᔮᕐᑕᐅᓂᖓ ᐊᕐᖁᑎᐅᒍᓐᓇᒥᔪᖅ ᐅᕕᒐᕐᑑᓱᑎᒃ/ᐃᓅᓱᑦᑑᓱᑎᒃ ᐃᓄᓐᓄᑦ ᑕᑯᑦᓴᐅᑎᑦᓯᖃᑦᑕᕋᔭᕐᒪᑕ ᐃᓅᓯᕐᒥᓂᒃ, ᐊᒻᒪᓗ ᓯᕗᓂᑦᓴᑎᓐᓂ ᑕᑯᓐᓇᓐᖑᐊᕐᓱᑕ ᑖᓐᓇ ᐱᓇᓱᐊᕐᑕᐅᔪᖅ ᓲᖑᓰᒋᐊᓪᓚᒍᓐᓇᒪᑦ ᐃᓄᒃᑎᑐᑦ ᐅᖃᐅᓯᕐᒥᒃ, ᑕᒪᖏᓐᓂ ᐊᓪᓚᓂᒃᑯᑦ ᐅᖄᓂᒃᑯᓗ, ᐅᕕᒐᕐᑐᑎᒍᑦ/ᐃᓅᓱᑦᑐᑎᒍᑦ ᓄᓇᕕᒻᒥᐅᑦ. ᑕᑯᒍᒪᒻᒥᔪᒍᑦ ᐅᕕᒐᕐᑐᓂᒃ/ᐃᓅᓱᑦᑐᓂᒃ ᓇᒻᒥᓂᕐᒥᓂᒃ ᐃᓂᕐᓯᑎᓪᓗᒋᑦ ᖑᐊᑦᓴᑐᓂᒃ ᑕᑯᓐᓇᐅᔮᕋᑦᓴᓂᒃ, ᐅᐱᒪᒍᑎᖃᕐᓂᓴᐅᓛᕐᒪᑕ ᐱᐅᓯᑐᖃᕐᒥᓂᒃ, ᐅᒃᑯᐊᒍᒻᒥᔪᓂᒃ ᐅᒃᑯᐃᓯᒋᐊᓪᓚᕈᑎᒋᓗᒍ ᐱᐅᓯᑐᖃᕐᒧᐊᖓᑦᓱᑎᒃ ᐱᓂᐊᕐᓂᐅᖃᑦᑕᓛᕐᑐᓄᑦ. ᐃᓛᓕᒻᒪᕆᐊᓗᒃ, ᖑᐊᑦᓴᓱᓂ ᑕᑯᓐᓇᐅᔮᕐᑕᐅᓂᖅ ᐊᕗᖓᐅᓕᒋᐊᓪᓚᒍᓐᓇᑐᖅ ᐊᒥᓲᒻᒥᔪᓄᑦ ᑕᑯᓐᓇᐅᔮᕐᑕᐅᓂᕐᓄᑦ, ᐃᓚᐅᑎᓪᓗᒋᑦ ᑕᑯᓐᓇᕋᑦᓴᓕᐅᓂᖅ, ᐃᓐᖏᖑᐊᕐᓂᖅ, ᑖᓂᓯᕐᓂᖅ, ᒥᖑᐊᕈᑎᑎᒍᑦ ᑕᑯᒥᓇᕐᑐᓕᐅᕐᓂᖅ ᐊᒻᒪᓗ ᐃᓪᓗᕈᐊᑦ ᑕᐅᑦᑐᖏᓐᓂᒃ, ᑐᑭᒧᐊᕐᑎᓯᓂᕐᒥᒃ ᑕᑯᓐᓇᐅᔮᕐᑕᐅᑎᑦᓯᓂᕐᒥᓗ, ᐊᓯᖏᓐᓂᓗ.

ᐅᑉᐱᕆᔭᖃᕐᑐᒍᑦ ᑖᓐᓇ ᐱᓇᓱᐊᕐᑕᕗᑦ – ᐃᓚᖃᕐᓗᓂ ᐃᓘᓐᓀᓂᒃ ᓄᓇᕕᒻᒥ ᐊᔪᐃᓐᓇᑕᐅᕙᑦᑐᓂᒃ ᐱᐅᓯᑐᖃᕐᒧᐊᖓᑦᓱᑎᒃ – ᑎᑭᐅᑎᒍᓐᓇᖂᕐᒪᑦ ᓴᕐᕿᑎᑕᐅᓂᖓᓄᑦ ᑕᑯᓐᓇᐅᔮᕐᑕᐅᑎᑦᓯᕕᐅᑦᓱᓂ ᐱᓇᓱᕝᕕᐅᒐᔭᕐᑐᒥᒃ ᐊᔪᐃᓐᓇᕆᐊᓪᓛᑐᐊᕈᑦᑕ ᑕᕝᕗᖓ ᑎᑭᐅᑎᒐᓱᐊᕐᓗᑕ.

ᓴᐳᒻᒥᓯᒪᓚᐅᓐᖏᐸᑕ ᐃᓄᐃᑦ ᓄᓇᓕᒻᒥᐅᑦ, ᑕᒪᒃᑯᐊᓕᒫᑦ ᐱᒋᐊᕐᑕᐅᒍᓐᓇᕋᔭᓚᐅᓐᖏᑐᑦ. ᓵᓕ ᑕᕐᕿᖅ ᐊᕙᑕᕐᒥᐅᖅ ᐃᑲᔪᕐᓯᒪᔪᒻᒪᕆᐅᖃᑦᑕᓚᐅᔪᒻᒥᔪᖅ ᑖᒃᑯᐊ ᒪᕐᕉᒃ ᑲᑎᒪᓂᐊᕈᓯᐅᓚᐅᔪᔫᒃ ᐱᑦᓯᐊᓚᕿᑎᓪᓗᒋᒃ.

ᑖᓐᓇ ᐆᑦᑐᕋᐅᑎᐅᑦᓱᓂ ᐱᓇᓱᐊᕐᑕᐅᓚᐅᔪᔪᖅ ᐃᓘᓐᓇᓯᐊᖓ ᑮᓇᐅᔭᖃᕐᑎᑕᐅᓚᐅᔪᔪᖅ ᐅᖓᓚᒻᒧᑦ ᒪᑭᕝᕕᒃ ᑯᐊᐳᕇᓴᒦᑦᑐᒧᑦ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓐᓄᑦ ᑖᒃᑯᐊ ᐱᓇᓱᕝᕖᒃ ᑮᓇᐅᔭᑎᒍᑦ ᐃᑲᔪᕐᓯᒪᓲᒃ ᐃᓄᒃᑎᑑᕐᓂᐅᑉ ᓴᑐᕐᑕᐅᒐᓱᐊᕐᓂᖓᓂᒃ.

ᑲᑎᒪᓂᐊᕈᓯᐅᓚᐅᔪᔫᑉ ᒥᑦᓵᓅᓕᖓᔪᓂᒃ ᑐᑭᓯᓐᓇᓂᕐᓴᓂᒃ ᑕᑯᒍᒪᒍᕕᑦ, ᐅᕙᓂ ᑕᑯᒐᓱᐊᕐᓗᑎᑦ:
http://www.uqavvik.wordpress.com

ᑐᓄᐊᓃᑦᑐᑦ, ᓴᐅᒥᐊᓂᑦ ᑕᓕᕐᐱᐊᓄᑦ: ᐃᓕᓴᐱ ᓇᓴᖅ (ᑲᖏᕐᓱᒃ), ᑕᓂᐊᓪ ᕚᒃᔅ (ᑰᑦᔪᐊᖅ), ᐃᓖᓇ ᓇᓴᖅ (ᑰᑦᔪᐊᖅ), ᔅᑌᓯ ᓂᖏᐅᕈᕕᒃ (ᑰᑦᔪᐊᖅ), ᐊᐳᑎᒃ ᐊᕐᓇᑐᖅ (ᑰᑦᔪᐊᖅ), ᒫᓯᐅ ᓇᔪᒻᒥ (ᑕᓯᐅᔭᖅ), ᐄᒪ ᑫᓐ (ᑰᑦᔪᐊᖅ), ᓯᕕᒻ ᐃᓪᑯᓐ (ᖁᐊᕐᑕᖅ), ᓭᓚᓯ ᓴᕕᐊᕐᔪᒃ (ᓴᓪᓗᐃᑦ), ᑖᒥ ᓯᕐᖁᐊᓗᒃ (ᑰᑦᔪᐊᖅ), ᓴᓈᖅ ᓯᕐᐸᓗᒃ (ᑰᑦᔪᐊᖅ), ᐋᑕᒥ ᕕᓕ (ᑲᖏᕐᓱᐊᓗᑦᔪᐊᖅ), ᓯᕗᐊᓃᑦᑑᒃ: ᒪᕇ ᑐᑦᓖᓐ, ᐅᓃᕋ ᓘᓯᔦ

ᑐᓄᐊᓃᑦᑐᑦ, ᓴᐅᒥᐊᓂᑦ ᑕᓕᕐᐱᐊᓄᑦ: ᐃᓕᓴᐱ ᓇᓴᖅ (ᑲᖏᕐᓱᒃ), ᑕᓂᐊᓪ ᕚᒃᔅ (ᑰᑦᔪᐊᖅ), ᐃᓖᓇ ᓇᓴᖅ (ᑰᑦᔪᐊᖅ), ᔅᑌᓯ ᓂᖏᐅᕈᕕᒃ (ᑰᑦᔪᐊᖅ), ᐊᐳᑎᒃ ᐊᕐᓇᑐᖅ (ᑰᑦᔪᐊᖅ), ᒫᓯᐅ ᓇᔪᒻᒥ (ᑕᓯᐅᔭᖅ), ᐄᒪ ᑫᓐ (ᑰᑦᔪᐊᖅ), ᓯᕕᒻ ᐃᓪᑯᓐ (ᖁᐊᕐᑕᖅ), ᓭᓚᓯ ᓴᕕᐊᕐᔪᒃ (ᓴᓪᓗᐃᑦ), ᑖᒥ ᓯᕐᖁᐊᓗᒃ (ᑰᑦᔪᐊᖅ), ᓴᓈᖅ ᓯᕐᐸᓗᒃ (ᑰᑦᔪᐊᖅ), ᐋᑕᒥ ᕕᓕ (ᑲᖏᕐᓱᐊᓗᑦᔪᐊᖅ), ᓯᕗᐊᓃᑦᑑᒃ: ᒪᕇ ᑐᑦᓖᓐ, ᐅᓃᕋ ᓘᓯᔦ

ᑰᑦᔪᐊᒥᐅᑦ ᑕᑯᓐᓇᐅᔮᕐᑕᐅᔪᑦ

ᑰᑦᔪᐊᒥᐅᑦ ᑕᑯᓐᓇᐅᔮᕐᑕᐅᔪᑦ

ᑐᓄᐊᓃᑦᑐᑦ, ᓴᐅᒥᐊᓂᑦ ᑕᓕᕐᐱᐊᓄᑦ: ᓕᐊ ᐄᕋᒻ, ᑲᔅᑏᓇ ᑐᓗᒐᖅ (ᐳᕕᕐᓂᑐᖅ), ᓕᓐᑕ ᖃᐅᑦᓵᓕᒃ (ᐅᒥᐅᔭᖅ), ᓈᑕᓕ ᐃᖃᓗᒃ (ᐃᓄᒃᔪᐊᖅ), ᒨᓱᓯ ᓄᕙᓕᓐᖓᖅ, ᐋᓚᓯ ᒥᔅᑎ ᐁᓐᓇᓕᒃ (ᐃᕗᔨᕕᒃ), ᒪᕇ ᑐᑦᓖᓐ, ᓯᐊᔭ ᓱᕈᓯᓛᖅ (ᐳᕕᕐᓂᑐᖅ), ᐅᓃᕋ ᓘᓯᔦ, ᑌᕕᑎ ᓴᐅᕈᒃ (ᓯᓵᓯᐱ), ᓕᓐᑕ ᐸᓚᒥ (ᑰᑦᔪᐊᕌᐱᒃ), ᓂᐊᓕ ᓇᐹᕐᑐᖅ (ᐅᒥᐅᔭᖅ), ᒫᑭ ᓇᑉᐸᑐᖅ (ᐳᕕᕐᓂᑐᖅ), ᔩᓂ ᐃᓄᑉᐸᖅ (ᐅᒥᐅᔭᖅ). ᓄᐃᑕᓐᖏᑐᖅ: ᐊᑭᓂᓯ ᓯᕗᐊᕌᐱᒃ (ᐳᕕᕐᓂᑐᖅ)

ᑐᓄᐊᓃᑦᑐᑦ, ᓴᐅᒥᐊᓂᑦ ᑕᓕᕐᐱᐊᓄᑦ: ᓕᐊ ᐄᕋᒻ, ᑲᔅᑏᓇ ᑐᓗᒐᖅ (ᐳᕕᕐᓂᑐᖅ), ᓕᓐᑕ ᖃᐅᑦᓵᓕᒃ (ᐅᒥᐅᔭᖅ), ᓈᑕᓕ ᐃᖃᓗᒃ (ᐃᓄᒃᔪᐊᖅ), ᒨᓱᓯ ᓄᕙᓕᓐᖓᖅ, ᐋᓚᓯ ᒥᔅᑎ ᐁᓐᓇᓕᒃ (ᐃᕗᔨᕕᒃ), ᒪᕇ ᑐᑦᓖᓐ, ᓯᐊᔭ ᓱᕈᓯᓛᖅ (ᐳᕕᕐᓂᑐᖅ), ᐅᓃᕋ ᓘᓯᔦ, ᑌᕕᑎ ᓴᐅᕈᒃ (ᓯᓵᓯᐱ), ᓕᓐᑕ ᐸᓚᒥ (ᑰᑦᔪᐊᕌᐱᒃ), ᓂᐊᓕ ᓇᐹᕐᑐᖅ (ᐅᒥᐅᔭᖅ), ᒫᑭ ᓇᑉᐸᑐᖅ (ᐳᕕᕐᓂᑐᖅ), ᔩᓂ ᐃᓄᑉᐸᖅ (ᐅᒥᐅᔭᖅ). ᓄᐃᑕᓐᖏᑐᖅ: ᐊᑭᓂᓯ ᓯᕗᐊᕌᐱᒃ (ᐳᕕᕐᓂᑐᖅ)