ᐃᓄᐃᑦ ᐅᖃᐅᓯᖓ
ᐱᓇᓱᐊᕐᑕᐅᔪᐃᑦ
ᐅᖃᐅᓯᕐᓂᒃ ᑐᑭᓕᐅᕆᓂᕐᒧᑦ ᑲᑎᕐᓱᐃᕕᒃ
ᐅᖃᐅᓰᑦ ᐅᖄᖃᑎᒌᒍᑕᐅᔪᕕᓃᑦ ᐅᖃᐅᓯᓕᕆᓂᕐᒥ ᑲᑎᒪᓂᐊᕈᓯᖃᕐᑎᓗᒍ ᐃᓚᒋᓕᐅᑎᑎᑕᐅᓲᑦ ᐅᖃᐅᓯᕐᓂᒃ ᑲᑎᕐᓱᐃᕕᒻᒧᑦ 10,000 ᒥᑦᓵᓃᑦᓱᑎᒃ ᐅᖃᐅᓰᑦ, ᐃᓂᕐᑕᕕᓂᐅᑦᓱᑎᒃ ᖃᕆᑕᐅᔭᒧᑦ ᐱᓇᓲᑎᒧᑦ File-Maker Pro-ᒍᓂᕋᕐᑕᒧᑦ. ᓄᐊᑕᐅᒪᓂᖏᑦ ᐅᖃᐅᓰᑦ ᐊᑐᕐᑕᐅᓗᑭᒍᓐᓀᑐᐃᑦ ᐃᓚᒋᓕᐅᑎᑎᑕᐅᓯᒪᓕᕐᒥᔪᑦ, ᐊᔪᐃᓐᓇᓂᕕᓂᕙᓪᓗᖓᓄᑦ ᑌᕕᑎ ᓂᕕᐊᕐᓯᐅᑉ ᐅᒥᐅᔭᕐᒥᐅᑉ.
ᐅᖃᐅᓯᕐᓂᒃ ᑲᑎᕐᓱᐃᕕᒃ ᐃᓂᓪᓚᑎᕐᑕᐅᒍᓐᓇᑐᖅ ᕿᓂᕐᕕᐅᒍᓐᓇᓱᓂᓗ ᐊᑕᐅᓯᐅᓈᕐᑎᑐᓂᒃ ᐅᖃᐅᓯᕐᓂᒃ ᑕᒪᖏᓐᓂ ᐃᓄᑦᑎᑑᕐᑐᓂ ᖃᓪᓗᓈᑎᑑᕐᑐᓂᓪᓗ. ᐱᕕᖄᐱᑐᐊᕐᒪᑦ, ᐅᖃᐅᓰᑦ ᑐᑭᖏᑦ ᑕᒪᖏᓐᓂ ᐅᖃᐅᓰᓐᓂ ᐃᓚᐅᑎᑕᐅᓲᑦ. ᐱᓇᓱᐊᕐᓂᖃᕆᐊᖃᖏᓐᓈᑐᖅ ᐃᓕᒃᑰᓚᕆᑦᑑᓱᑎᒃ ᐱᓇᓱᐊᕝᕕᐅᒋᐊᓕᓐᓂᒃ, ᑖᓐᓇ ᐱᔭᕆᐊᑐᔪᑲᓪᓚᒃ ᐱᔭᑦᓴᐅᓱᓂ ᐊᓂᕐᓂᖓ/ᑐᑭᖃᕐᓂᖓ/ᐃᓱᒪᒍᓯᖓ/ᐱᓂᐊᕐᓂᕆᓲᖓᓗ ᐃᓄᑦᑎᑐᑦ ᐅᖃᐅᓯᓕᕆᓂᕐᒧᑦ ᐊᑦᔨᒋᔭᐅᒐᓛᓐᖏᒪᑦ ᖃᓪᓗᓈᑦ ᐃᓱᒪᒍᓯᖓᑎᑐᑦ, ᐊᒻᒪᓗ ᑕᒪᓐᓇ ᐱᔭᕆᐊᑦᑐᐃᓯᒪᓲᒍᑦᓱᓂ ᐃᓂᓪᓚᑎᕐᑕᐅᓂᖏᓐᓂᒃ ᐃᓄᑦᑎᑑᕐᓱᑎᒃ ᐅᖃᐅᓰᑦ.
ᐅᖃᐅᓯᕐᓂᒃ ᑲᑎᕐᓱᐃᕕᒃ ᑲᔪᓯᐅᒐᕐᑐᒥᒃ ᓄᑕᐅᓯᓕᕐᑕᐅᒋᐊᖃᓲᖅ, ᑕᒻᒪᓯᒪᔪᕐᓯᐅᑕᐅᒋᐊᖃᓲᖅ ᐱᐅᓯᐅᒥᒋᐊᕐᑕᐅᓲᒍᑦᓱᓂᓗ. ᖃᕆᑕᐅᔭᐅᑉ ᑕᑯᓐᓇᕈᑎᖓ ᕿᓪᓕᑐᔭᐅᑦᓱᓂ ᓵᑦᑐᔮᖅ ᓄᐃᑕᐅᓯᒪᓕᕇᕐᑐᖅ, ᑭᓯᐊᓂ ᓯᑯᑦᓴᔭᒦᑦᑐᑦ ᐊᑐᕐᑕᐅᒍᒪᓂᕐᓴᐅᖏᓐᓈᑐᑦ.
ᐱᓇᓱᐊᕐᓂᐅᒋᐊᖃᓕᕐᒥᔪᖅ ᐅᖃᐅᓯᕐᓂᒃ ᑲᑎᕐᓱᐃᕕᒻᒥᒃ ᐃᓚᖃᕐᑐᖅ ᑲᑎᑎᕆᓂᕐᒥᒃ ᐅᖄᓂᒃᑯᑦ ᐅᖃᕈᓯᕐᓂᒃ ᐅᖃᐅᓯᕐᓂᒃ. ᖃᐅᔨᔭᐅᑎᒐᓱᐊᕐᓂᖅ ᐱᒋᐊᕐᑕᐅᓛᕐᓂᐊᓕᕐᒥᔪᖅ ᖃᒻᒥᑯᑦ ᐊᓪᓚᓂᖃᕐᑎᓗᒍ ᓈᒻᒪᓈᕐᑐᓂᒃ ᐅᖃᑦᓯᐊᕈᓯᕐᓂᒃ ᐅᖃᐅᓯᕐᓂᒃ ᑐᓵᓂᒃᑯᓗ, ᒫᓐᓇᐅᔪᖅ ᐃᓄᑦᑎᑐᑦ ᐅᖃᐅᓯᐅᑉ ᐊᑐᕐᑕᐅᓂᖓ ᓱᔪᑉᐸᓕᐊᑐᐃᓐᓇᒪᑦ ᐅᕕᒐᕐᑐᐃᑦ ᐃᒻᒧᐊᓂ. ᐊᒻᒪᓗᒋᐊᓪᓚᒃ, ᐅᖃᖃᑎᒌᓐᓂᖃᖃᑦᑕᓕᕐᒥᔪᖅ ᐃᑲᔪᕐᑎᖃᕐᓂᒥᒃ Termium Plus-ᒥᒃ ᐊᑐᕐᓗᑎᒃ ᖃᕆᑕᐅᔭᑎᒍᑦ ᐅᖃᐅᓯᕐᓂᒃ ᑲᑎᕐᓱᐃᕕᖓᓐᓂᒃ ᑲᓇᑕᒥ ᑭᓇᓕᒫᓄᐊᖓᔪᓂᒃ ᐱᓇᓱᐊᓲᓄᑦ.
ᐅᖃᐅᓯᓕᕆᓂᕐᒧᑦ ᑲᑎᒪᓂᐊᕈᓰᑦ
ᑐᕌᕐᓂᕆᒐᓱᐊᕐᑕᓗᐊᓐᖑᐊᖓ ᐅᖃᐅᓯᓕᕆᓂᕐᒧᑦ ᑲᑎᒪᓂᐊᕈᓯᐅᕙᑦᑐᐃᑦ ᐱᕙᓪᓕᐊᒐᓱᐊᕐᓂᒥᒃ ᓄᑖᒥᒃ ᐅᖃᐅᓯᕐᓯᐅᕈᑎᒥᒃ ᐅᑎᕐᑎᓯᒐᓱᐊᕐᓂᒥᓪᓗ ᐅᖃᐅᓯᑐᖃᕐᓂᒃ ᐅᖃᕐᑕᐅᓗᑭᒍᓐᓀᑐᓂᒃ. ᑲᑎᒪᓂᐊᕈᓯᖃᕐᐸᑐᑦ ᐅᖃᖃᑎᒌᒍᑎᖃᕐᓱᑎᒃ ᐃᒻᒥᒎᕐᑎᑐᑦ ᖃᐅᔨᒪᔩᑦ (ᐃᓄᒻᒪᕇᑦ ᐱᓯᒪᔪᑦ ᐱᖓᓱᓂᑦ ᓯᑦᔭᓂᑦ) ᐊᒻᒪᓗ ᐃᒻᒥᒎᕐᑎᑐᑦ ᐅᖃᐅᓯᐅᑉ ᐁᑉᐹᓅᔦᔩᑦ/ᑐᓵᔩᓪᓗ. ᖃᒻᒥᓂᑕᐅᓂᕐᐹᖅ ᑲᑎᒪᓂᐊᕈᓯᐅᓚᐅᔪᖅ ᑲᖏᕐᓱᐊᓗᑦᔪᐊᒥ ᑎᕆᓪᓗᓕᐅᑦ (ᐁᕆᓕ) 2006-ᒥ. ᐊᖏᖃᑎᒌᒐᓱᐊᕐᓃᑦ ᐱᒋᐊᕐᑕᐅᓯᒪᓕᕐᑐᑦ ᐃᕐᖃᑐᐃᕕᓕᕆᔨᒃᑯᓂᑦ ᐱᐅᓯᐅᒦᒋᐊᕋᓱᐊᕐᓂᒧᑦ ᐃᕐᖃᑐᐃᕕᒻᒨᓕᖓᔪᓂᒃ ᐅᖃᐅᓯᕐᓂᒃ ᐊᑕᐅᓯᕕᓪᓗᑎᒃ ᐅᖓᑖᓄᓪᓘᓃᑦ ᑲᑎᒪᓂᐊᕈᓯᖃᕐᓗᑎᒃ ᓄᑕᐅᓯᓕᕆᓗᑎᓗ ᐅᖃᐅᓯᕐᓯᐅᕈᑎᓂᒃ.
ᖁᕝᕙᑎᑦᓯᒋᐊᕐᓂᒧᑦ ᐱᓇᓱᐊᕐᓂᐅᕙᑦᑐᑦ
ᐊᕙᑕᒃᑯᑦ ᐊᒡᒍᑐᐃᓗᑭᑲᑦᑕᓲᑦ ᐃᓂᕐᑕᐅᑎᑕᕕᓂᕐᒥᓂᒃ ᓄᓇᕕᒻᒧᑦ ᐃᕐᙯᑎᑦᓯᒋᐊᕋᓱᐊᕐᓱᑎᒃ ᓄᓇᕕᒻᒥᐅᓂᒃ ᐱᒻᒪᕆᐅᓂᖓᓂᒃ ᐃᓄᑦᑎᑐᑦ ᐅᖃᐅᓯᖃᕆᐊᖅ ᐅᓪᓗᑕᒫᕐᓯᐅᑎᒋᓗᒍ. ᐊᕐᕌᒎᓯᒪᓕᕐᑐᓂ, ᑖᒃᑯᐊ ᖁᕝᕙᑎᑦᓯᒋᐊᕋᓱᐊᕐᓂᐅᓲᑦ ᒪᑯᓂᖓ ᐃᓚᖃᕐᐸᑐᑦ: ᐊᓪᓚᐅᑏᑦ ᐃᒪᓖᑦ, ᐳᕕᐊᑦ, ᓂᐱᑦᑕᑐᐃᑦ, ᐅᒃᑯᐃᕈᑎᖃᐅᑏᓪᓗ/ᐲᕈᑎᖃᐅᑏᓪᓗ. ᑖᒃᑯᐊ ᒥᑭᔪᐃᑦ ᐃᕐᙯᑎᑦᓯᒋᐊᕈᑕᐅᕙᑦᑐᑦ ᐊᔪᐃᓐᓇᐅᔨᓂᖃᒐᓛᐱᑦᑐᑦ ᓴᐳᑦᔨᓯᒪᓂᕐᒧᑦ ᐊᑯᓃᕐᑑᓱᑎᒃ ᑐᕌᕐᓂᕆᔭᐅᒐᓱᐊᕐᑐᓂᒃ. ᐊᕙᑕᒃᑯᑦ ᐃᓱᒪᓯᒪᓕᕐᒥᔪᑦ ᐊᓯᖏᓐᓂᒃ ᖁᕝᕙᑎᑦᓯᒋᐊᕈᑕᐅᒐᓱᐊᕈᓐᓇᑐᓂᒃ ᐊᕐᖁᑎᖃᕐᓗᑎᒃ ᒫᑕ-ᖃᐅᒃᑫᒨᓕᖓᔪᒥᒃ ᓂᖏᕐᑕᕕᒻᒥᒃ ᐊᒻᒪᓗ ᐃᓄᒃᑎᑑᕐᓂᐅᑉ ᓴᑐᕐᑕᐅᒐᓱᐊᕐᓂᖓᓄᑦ ᐱᓇᓱᐊᕐᑕᐅᕙᑦᑐᒥᒃ.
